Kownukondre preikiman e fruteri

Suku den sma di warti, na den farawe boitipresi fu Australia

NA SON pisi fu a farawe boitipresi fu Australia, Kotoigi no preiki sowan 12 yari langa. Fu dati ede den Kotoigi fu Yehovah na ini Darwin, a moro prenspari foto fu a noordsei pisi fu a kondre, ben orga sani fu preiki a bun nyunsu fayafaya na ini neigi dei; den ben o suku sma di warti fu yere a bun nyunsu.​—Mateyus 10:11.

Twarfu mun na fesi kaba, den brada bigin sreka sani finifini fu du a wroko; den meki sosrefi karta fu a kontren di bigi pasa 800.000 fokanti kilometer; disi na wan kontren di bigi sowan feifi leisi moro Sranan. Fu meki yu frustan o bigi èn o fara a pisi kontren disi de, dan hori na prakseri taki na ala den burugron pe sma e kweki meti, a pasi fu a portu na strati te go miti na oso, langa moro leki 30 kilometer! Boiti dati, sonwan fu den burugron de pasa 300 kilometer fu makandra.

Ala nanga ala sowan 145 Kotoigi ben de klariklari fu teki prati na a kotoigiwroko disi. Sonwan fu den ben komoto srefi fu farawe presi soleki Tasmania. Sonwan fu den kon nanga bigi wagi di man rei na ala sortu takru presi èn den ben lai den wagi nanga ala sortu sani fu man meki kampu, nanga sani di den ben kan gebroiki fu meki a wagi te a broko na pasi, èn den ben tyari oli sosrefi. Trawan ben tyari den sani di den ben o abi fanowdu na ini bakawagi. Boiti dati, den ben yuru tu bus di ben abi presi gi 44 sma. Den sma di no ben abi den yoisti wagi fu rei na tapu takru pasi ben go nanga den tu bus disi. Den wan di ben go nanga bus ben go preiki spesrutu gi den sma na ini den pikin foto na ini spesrutu kontren.

Bifo den teki pasi fu go du a kotoigiwroko, den brada di ben abi a frantwortu, ben hori lezing èn den ben demo fa den preikiman ben kan pristeri a bun nyunsu na ini a tumusi aparti kontren disi. Fu eksempre, fu man preiki nanga bun bakapisi na ini a libimakandra fu den Aboriginsma, dan den musu tyari densrefi akruderi spesrutu markitiki, èn den musu sabi san na den gwenti fu den Aboriginsma. Den ben taki sosrefi fu sani di sma no ben musu du, so taki nowan ogri pasa nanga den meti drape.

Den preikiman ben abi furu moi ondrofenitori.  Fu eksempre, na ini wan Aborigin dorpu, den brada ben sreka sani fu hori wan publikitaki fu Bijbel tori. Na uma di ben e tiri a dorpu dati, ben go fruteri sma fu a lezing disi. Bakaten, den brada ben kan prati 5 buku nanga 41 brochure gi den sma di ben de drape na a lezing. Na ini wan tra dorpu den ben miti wan tra Aboriginsma. A man ben abi en eigi Bijbel srefi, wan King James vertaling, ma a Bijbel ben owru kaba èn a ben pritipriti. Di den aksi en efu a sabi a nen fu Gado, a taki iya èn a puru wan owru Waktitoren fu wan saka fu en dyakti. A leisi na ini a tijdschrift, èn a kari Markus 12:30, pe skrifi: „Yu musu lobi Yehovah, yu Gado, nanga yu heri ati.” A taki: „Mi lobi a bijbeltekst disi trutru.” Baka di den ben abi wan moi Bijbel takimakandra, a teki wan nyun Bijbel èn tra Bijbel publikâsi.

Krosibei fu a Carpentaria Golf na edeman fu wan burugron di bigi sowan 400.000 hektare, ben wani sabi moro fu a Kownukondre boskopu. Di den Kotoigi sori a man den buku Mi boekoe nanga bijbel tori nanga Sabi di e tjari joe go na têgo libi, * dan a aksi den Kotoigi efu den ben abi publikâsi na ini a Krioltongo. Disi ben de wan freimde aksi, fu di furu Aboriginsma e taki a Krioltongo, ma furu fu den no man leisi dati. Bakaten den preikiman kon si taki ala den 50 wrokoman na a burugron dati ben man leisi a Krioltongo. Na edeman ben breiti srefisrefi taki a ben kan kisi publikâsi na ini a Krioltongo, èn nanga prisiri a gi den Kotoigi a telefon-nomru fu en, so taki den ben kan bel en.

Na ini den neigi dei di den preikiman gi kotoigi fayafaya, den prati ala nanga ala 120 Bijbel, 770 buku, 705 tijdschrift, nanga 1965 brochure. Boiti dati den tyari 720 gobaka, èn den bigin nanga 215 bijbelstudie.

Iya, now furu sma di e libi na ini a bigi kontren disi, èn di de warti fu yere a bun nyunsu, man tapu na angri fu den na yeye fasi.​—Mateyus 5:6.

[Futuwortu]

[Karta na tapu bladzijde 30]

(Efu yu wani si pe den sani disi skrifi, luku a tijdschrift)

AUSTRALIA

NOORDSEI KONTREN

Darwin

Carpentaria Golf

Sydney

TASMANIA