Meki Gado Wortu skèin leti na tapu yu pasi
Meki Gado Wortu skèin leti na tapu yu pasi
„Yu wortu na . . . wan leti na tapu mi pasi.”—PSALM 119:105.
1, 2. O ten a wortu fu Yehovah sa skèin leti na tapu wi pasi?
A WORTU fu Yehovah sa skèin leti na tapu wi pasi, efu wi e gi pasi taki dati e pasa. Fu man kisi wini fu a yeye leti disi, dan wi musu de fayafaya studenti fu a Wortu di Gado meki sma skrifi, èn wi musu gebroiki a rai di skrifi na ini. Soso te wi e du disi, wi o man firi leki a psalm skrifiman di ben taki: „Yu wortu na wan lampu gi mi futu, èn wan leti na tapu mi pasi.”—Psalm 119:105.
2 Meki wi go luku Psalm 119:89-176 now. Bun furu moi sani skrifi na ini den vers disi, di seti na ini 11 pisi! Den sani disi kan yepi wi fu tan na tapu a pasi di e tyari wi go na têgo libi.—Mateyus 7:13, 14.
Fu san ede wi musu lobi a wortu fu Gado?
3. Fa Psalm 119:89, 90 e sori taki wi kan frutrow a wortu fu Gado?
3 Te wi lobi a wortu fu Yehovah, dan wi o man tanapu kánkan na yeye fasi (Psalm 119:89-96). A psalm skrifiman ben singi: „Te ten di no skotu, o Yehovah, yu wortu seti steifi na hemel. . . . Yu seti grontapu steifi, so taki a kan tan tanapu” (Psalm 119:89, 90). Gado wortu, noso „den wet fu hemel” di Gado poti, e meki taki a son, a mun, nanga den stari e drai lontu na wan soifri fasi, èn grontapu seti steifi so taki a man tan fu têgo (Yob 38:31-33; Psalm 104:5). Wi kan frutrow ibri wortu di e komoto fu a mofo fu Yehovah; san Gado taki, ’seiker sa abi bun bakapisi’ fu di san a abi na prakseri sa kon tru.—Yesaya 55:8-11.
4. Te den futuboi fu Gado lobi en wortu, dan fa dati e yepi den te den e kisi kwinsi?
4 A psalm skrifiman ben o ’dede fu a kwinsi di a ben e kisi efu a no ben lobi a wet fu Gado’ (Psalm 119:92). A no sma fu tra kondre ben e kwinsi en; na den Israelsma di ben e pasa a wet, no ben wani si en na ai (Lefitikus 19:17). Ma disi no ben bruya en, bika a ben lobi a wet fu Gado di ben e gi en krakti. Na ini Korente, na apostel Paulus ben de „na ini kefar na mindri den falsi brada” èn kande wan tu fu den brada disi ben de den „tumusi bun apostel” di ben e suku fowtu na en (2 Korentesma 11:5, 12-14, 26). Toku Paulus ben tan tranga na yeye fasi fu di a ben lobi a wortu fu Gado. Fu di wi lobi a Wortu fu Yehovah di a meki sma skrifi, èn fu di wi e du san a Wortu dati e taki, meki wi lobi wi Kresten brada nanga sisa (1 Yohanes 3:15). Awinsi grontapusma no wani si wi na ai srefisrefi, toku dati no e meki wi frigiti nowan rai fu Gado. Wi e tan du a wani fu en na wan lobi-ati fasi èn na ini wánfasi makandra nanga wi brada nanga sisa, aladi wi e howpu fu du prisiri diniwroko gi Yehovah fu têgo.—Psalm 119:93.
5. Fa Kownu Asa ben suku Yehovah?
5 Te wi wani sori taki wi e dini Yehovah getrow, dan wi kan begi: „Mi na fu yu. O frulusu mi, bika na den komando fu yu mi suku” (Psalm 119:94). Kownu Asa ben suku Gado èn a ben puru ala sani di ben abi fu du nanga falsi anbegi na ini Yuda. Na ini a di fu 15 yari fu a tiri fu Asa (dati na a yari 963 b.G.T.), wan bigi konmakandra ben hori, èn na a konmakandra dati den sma di ben e libi na ini Yuda, „meki wan frubontu fu suku Yehovah”. Ne Gado „meki den feni en” èn a „tan gi den rostu na ala sei” (2 Kroniki 15:10-15). Na eksempre disi musu de wan deki-ati gi den sma di drifi gowe fu a Kresten gemeente, fu suku Gado baka. A o blesi èn kibri den sma di e bigin fu abi demakandra baka nanga a pipel fu en.
6. Sortu sani wi musu du fu kisi kibri na yeye fasi?
6 A wortu fu Yehovah e gi wi koni di kan kibri wi na yeye fasi (Psalm 119:97-104). Den komando fu Gado e meki wi kon moro koni leki den feanti fu wi. Te wi e poti prakseri na den frumane fu en, dan wi e kisi koni fu man si sani krin, èn te wi ’e hori wisrefi na den komando fu en, dan wi man tyari wisrefi na wan fasi di e sori taki wi abi moro frustan leki owru man’ (Psalm 119:98-100). Efu den sani di Yehovah taki ’switi moro leki oni gi wi mofo’ dan wi sa tegu gi ’ibri falsi pasi’ èn wi sa wai pasi gi den sosrefi (Psalm 119:103, 104). Disi sa kibri wi na yeye fasi te wi e kisi fu du nanga heimemresma, nanga faya-atisma, èn nanga ogrisma na ini den lasti dei disi.—2 Timoteyus 3:1-5.
Wan lampu gi wi futu
7, 8. San wi musu du efu wi wani gi yesi na Psalm 119:105?
7 Leti na yeye fasi e komoto fu a wortu fu Gado èn a leti disi e tan skèin doronomo èn fu ala ten (Psalm 119:105-112). Efu wi na salfu Kresten, noso efu wi na mati fu den, di de fu a grupu fu den „tra skapu”, wi e meki bekènti: „Yu wortu na wan lampu gi mi futu, èn wan leti na tapu mi pasi” (Yohanes 10:16; Psalm 119:105). A wortu fu Gado de leki wan lampu di e skèin leti na tapu wi pasi, so taki wi no e naki futu fadon na yeye fasi (Odo 6:23). Toku, wisrefi musu meki a wortu fu Yehovah de wan lampu gi wi futu.
8 Wi musu abi a srefi fasti bosroiti leki a skrifiman fu Psalm 119. A ben abi a fasti bosroiti fu no gowe libi den komando fu Gado. „Mi meki wan sweri”, na so a ben taki, „èn mi sa du soleki fa mi sweri, namku fu hori misrefi na den regtfardiki krutubosroiti fu yu [Yehovah]” (Psalm 119:106). Noiti wi musu kisi a denki taki a no prenspari fu studeri Bijbel doronomo èn fu teki prati na Kresten konmakandra.
9, 10. Fa wi du sabi taki sma di gi den libi abra na Yehovah kan ’gowe libi den komando fu en’, ma fa wi kan sorgu taki disi no pasa nanga wi?
9 A psalm skrifiman no ben ’gowe libi den komando fu Gado’, ma a sani dati kan pasa nanga wan sma di gi en libi abra na Yehovah (Psalm 119:110). Kownu Salomo ben gowe libi den komando fu Gado, aladi a ben de fu wan pipel di ben gi ensrefi abra na Yehovah, èn aladi na ini a bigin a ben handri nanga a koni di Gado ben gi en. „Den trakondre wefi ben meki taki srefi en du sondu” fu di den kisi en so fara taki a go anbegi kruktugado.—Nehemia 13:26; 1 Kownu 11:1-6.
10 Satan, „a sma di e fanga fowru”, e seti furu trapu (Psalm 91:3). Fu eksempre, kande wan sma di ben e dini Gado fosi, e pruberi fu kisi wi so fara taki wi e gowe libi a pasi fu yeye leti, fu go na ini a dungru di e tapu sma di fadon komoto na bribi. Na mindri den Kresten fu Tiatira, yu ben abi „na uma Iseibel”, di ben de wan grupu fu uma kande, di ben e leri trawan fu du afkodrei èn hurudu. Yesus no ben gi pasi taki den sortu ogridu disi ben e pasa, sobun, wi no musu gi pasi tu taki den e pasa (Openbaring 2:18-22; Yudas 3, 4). Fu dati ede, meki wi begi Yehovah fu yepi wi, taki wi no e gowe libi den komando fu en, ma taki wi e tan na ini a leti fu Gado Wortu.—Psalm 119:111, 112.
Gado Wortu e gi wi krakti
11. Fa Gado e si ogrisma, soleki fa Psalm 119:119 e sori?
11 Efu wi no e gowe libi den wet fu Gado noiti, dan a o gi wi krakti (Psalm 119:113-120). Wi no lobi „afu-ati sma”, neleki fa Yesus no lobi den sma na ini a ten disi di e taki dati den na Kresten, aladi den no e dini Gado fayafaya (Psalm 119:113; Openbaring 3:16). Fu di wi e dini Yehovah nanga wi heri ati, meki a de ’wi kibripresi’, èn a o gi wi krakti. A o ’trowe ala den sma di e gowe libi den wet fu en’ fu di den e du sani na wan triki fasi èn na wan bedrigi fasi (Psalm 119:114, 117, 118; Odo 3:32). A e si den ogriwan disi leki „doti skuma”, namku a doti di sma e puru fu warti sani soleki solfru nanga gowtu (Psalm 119:119; Odo 17:3). Meki wi sori ala ten taki wi lobi den frumane fu Gado, bika noiti wi wani tron wan fu den ogrisma na tapu a doti-ipi di sa kisi pori!
12. Fu san ede a de prenspari fu abi frede gi Yehovah?
12 „Fu di mi e frede yu [Yehovah], meki mi kisi gro-skin”, na so a psalm skrifiman ben taki (Psalm 119:120). Efu wi wani taki Gado gi wi krakti leki futuboi fu en, dan a de tumusi prenspari fu abi a yoisti sortu frede gi en, èn wi e sori taki wi abi a frede disi te wi e wai pasi gi sani di a no feni bun. Fu di Yob ben abi frede gi Yehovah na wan lespeki fasi, meki a ben e libi wan regtfardiki libi (Yob 1:1; 23:15). Te wi abi frede gi Gado, dan dati kan meki taki wi e tan libi soleki fa Gado wani, awinsi sortu tesi e miti wi. Ma efu wi wani horidoro, dan wi o abi fu begi fayafaya, èn wi musu du dati nanga bribi.—Yakobus 5:15.
Begi nanga bribi
13-15. (a) Fu san ede wi kan abi na overtoigi taki wi o kisi piki tapu den begi fu wi? (b) San kan pasa te wi no sabi san fu taki na ini begi? (c) Gi wan eksempre fu sori fa Psalm 119:121-128 kan yepi wi te wi e begi nanga „geme di no de fu yere”.
13 Wi kan begi nanga na overtoigi taki Gado sa du wan sani fu yepi wi (Psalm 119:121-128). Neleki a psalm skrifiman, wi sabi seiker taki wi o kisi piki tapu den begi fu wi. Fu san ede? Fu di wi lobi den komando fu Gado „moro leki gowtu, iya, moro leki soifri gowtu srefi”. Boiti dati, ’wi e si ala komando fu Gado di abi fu du nanga ala sani, leki bun komando’.—Psalm 119:127, 128.
14 Yehovah e yere den begi fu wi fu di wi e begi nanga bribi èn fu di wi e gi yesi dorodoro na den komando fu en (Psalm 65:2). Ma fa a de te wi abi problema son leisi di e bruya wi so te, taki wi no sabi san fu taki na ini den begi fu wi? Dan „a yeye srefi e taki gi wi te wi e geme, aladi dati no de fu yere” (Romesma 8:26, 27). Na ini den sortu situwâsi disi, Gado e si den sani di skrifi na ini a Wortu fu en, leki begi di abi fu du nanga den problema fu wi.
15 Na ini Bijbel furu begi nanga prakseri de fu feni di abi fu du nanga ’den geme fu wi di no de fu yere’. Fu eksempre, luku Psalm 119:121-128. Den sani di skrifi na ini a pisi disi kan abi furu fu du nanga a situwâsi fu wi. Fu eksempre, efu wi e frede taki sma o kori wi, dan wi kan aksi Gado fu yepi wi na a fasi fa a psalm skrifiman ben aksi yepi (Luku vers 121-123). Kon meki wi taki dati wi musu teki wan muilek bosroiti. We, dan wi kan begi fu meki a yeye fu Yehovah yepi wi fu memre den rai fu en èn fu gebroiki den rai dati (Luku vers 124, 125). Aladi wi „e tegu gi ibri falsi pasi”, toku a kan de fanowdu fu aksi Gado fu yepi wi, so taki wi no e brokokindi gi wan tesi di kan meki wi pasa en wet (Luku vers 126-128). Efu wi e leisi Bijbel ibri dei, dan moi bijbeltekst leki den wan disi kan kon na wi prakseri te wi e taki nanga Yehovah na ini begi.
Den frumane fu Yehovah e yepi wi
16, 17. (a) Fu san ede wi abi den frumane fu Gado fanowdu, èn fa wi musu si den? (b) Fa tra sma kan si wi, ma san de prenspari trutru?
16 Efu wi wani taki Gado yere den begi fu wi èn efu wi wani taki A feni wi bun, dan wi musu poti prakseri na den frumane fu en (Psalm 119:129-136). Fu di wi e frigiti furu tron, meki wi abi den tumusi moi frumane fu Yehovah fanowdu, so taki wi kan memre den rai nanga den komando fu en. A no de fu taki dati wi e warderi a yeye leti di e skèin ibri tron te wi e kon frustan wan nyun sani fu den wortu fu Gado (Psalm 119:129, 130). Wi de nanga tangi sosrefi taki Yehovah ’meki en fesi skèin na wi tapu’ fu di a feni wi bun, aladi ’liba fu watra e lon komoto na wi ai’ fu di tra sma no e hori densrefi na a wet fu en.—Psalm 119:135, 136; Numeri 6:25.
17 Wi kan de seiker taki Gado o tan feni wi bun te wi e gi yesi na den regtfardiki frumane fu en (Psalm 119:137-144). Leki futuboi fu Yehovah wi sabi taki a abi a reti fu gi wi den regtfardiki frumane fu en di wi musu si leki komando, èn a abi a reti sosrefi fu fruwakti fu wi taki wi e hori wisrefi na den komando disi (Psalm 119:138). Ma efu a psalm skrifiman ben e hori ensrefi na den komando fu Gado, dan fu san ede a taki: „Mi no prenspari èn mi na wan wisiwasi man”? (Psalm 119:141) Soleki fa a sori, dan a ben e taki fu a fasi fa den feanti fu en ben e si en. Efu ala ten wi e tan horibaka gi san de regtfardiki, dan trawan kan si wi leki wisiwasi sma. Ma toku, san de prenspari trutru, na taki Yehovah feni wi bun fu di wi e libi akruderi den regtfardiki frumane fu en.
Sani e waka bun nanga wi, èn wi de na ini vrede
18, 19. Sortu bakapisi wi sa kisi te wi e hori wisrefi na den frumane fu Gado?
18 Te wi e hori wisrefi na den frumane fu Gado, dan dati e meki wi tan krosibei fu en (Psalm 119:145-152). Fu di wi e poti prakseri na den frumane fu Yehovah, meki wi sabi taki wi kan aksi en nanga wi heri ati fu yepi wi, èn wi kan fruwakti taki a o du dati. Kande wi e wiki ’fruku mamanten te dei e broko’ èn wi abi yepi tranga fanowdu. Fu tru, dati na wan heri bun ten fu begi! (Psalm 119:145-147). Gado de krosibei fu wi tu, fu di wi no e tyari wisrefi na wan fasi di no fiti èn fu di wi e teki en wortu leki waarheid, neleki fa Yesus ben si dati (Psalm 119:150, 151; Yohanes 17:17). A banti di wi abi nanga Yehovah e yepi wi na ini a bruya grontapu disi èn a o yepi wi fu pasa a bigi feti fu Armagedon.—Openbaring 7:9, 14; 16:13-16.
19 Fu di wi abi bigi lespeki gi a wortu fu Gado, meki wi abi a dyaranti taki sani sa waka bun nanga wi trutru (Psalm 119:153-160). Tra fasi leki den ogrisma, wi ’no gowe libi den frumane fu Yehovah’. Fu di wi lobi den komando fu Gado, meki a e sori wi en lobi bun-ati, èn dati meki sani e waka bun nanga wi (Psalm 119:157-159). Den frumane fu Yehovah e meki wi memre sani, so taki wi kan sabi san Gado e aksi fu wi na ini son spesrutu situwâsi. Ma na a tra sei, den komando fu Gado na wet, èn wi de klariklari fu lespeki a reti di wi Mekiman abi fu tiri wi. Fu di wi sabi taki ’ala den tori na ini a wortu fu Gado na waarheid’, èn fu di wi sabi taki wi no man libi sondro Gado, meki wi e prisiri fu saka wisrefi ondro a tiri fu en.—Psalm 119:160; Yeremia 10:23.
20. Fu san ede wi abi „vrede pasa marki”?
20 A lobi di wi abi gi a wet fu Yehovah e meki taki wi abi vrede pasa marki (Psalm 119:161-168). Awinsi sma e frufolgu wi, toku den no kan puru a tumusi warti „vrede fu Gado” di wi abi (Filipisma 4:6, 7). Wi abi so furu warderi gi den krutubosroiti fu Yehovah, taki wi e prèise en gi dati furu tron, iya, „seibi tron na ini wan dei” (Psalm 119:161-164). „Vrede pasa marki na fu den wan di lobi yu wet”, na so a psalm skrifiman ben singi, „èn nowan sani kan meki den naki futu” (Psalm 119:165). Efu wisrefi lobi Yehovah èn efu wi e hori wisrefi na a wet fu en, dan wi no o naki futu na yeye fasi te wan sma du wan sani, noso te wan tra sani pasa.
21. Sortu eksempre fu Bijbel e sori taki wi no abi fu naki futu te problema opo kon na ini a gemeente?
21 Furu sma na ini Bijbel no ben gi pasi taki wan sani ben e meki den naki futu fu ala ten. Fu eksempre, a Kresten man Gayus no ben naki futu, ma a ben „tan waka na ini a waarheid” aladi Diotrefes ben e tyari ensrefi na wan fasi di no fiti srefisrefi (3 Yohanes 1-3, 9, 10). Kande na fu di den Kresten uma Eodia nanga Sentike ben kon abi wan kesekese, meki Paulus ben gi den a rai „fu abi a srefi denki na ini Masra”. Soleki fa a sori, dan den ben kisi yepi fu lusu a problema fu den, èn den tan dini Yehovah getrow (Filipisma 4:2, 3). Sobun, wi no abi fu naki futu te wan problema opo kon na ini a gemeente. Meki wi poti prakseri na a hori di wi musu hori wisrefi na den komando fu Yehovah, aladi wi e hori na prakseri taki ’ala den pasi fu wi de na fesi en’ (Psalm 119:168; Odo 15:3). Dan noti no o meki taki wi e lasi a „vrede pasa marki” fu ala ten.
22. (a) Sortu grani wi kan kisi te wi e gi yesi na Gado? (b) Fa wi musu si son sma di gowe libi a Kresten gemeente?
22 Efu wi e gi yesi na Yehovah ala ten, dan wi o abi a grani fu tan prèise en (Psalm 119:169-176). Te wi e libi soleki fa den wet fu Gado e taki, dan a no sa de so nomo taki sani sa waka bun nanga wi na yeye fasi, ma ’wi mofobuba sa tan taki wortu fu prèise Yehovah’ (Psalm 119:169-171, 174). Disi na a moro bigi grani di wi kan abi na ini den lasti dei disi. Aladi a psalm skrifiman ben wani tan na libi èn aladi a ben wani tan prèise Yehovah, toku a ben ’wakawaka lontu leki wan lasi skapu’, ma Bijbel no e taki fa dati du pasa (Psalm 119:175, 176). Kande son sma di gowe libi a Kresten gemeente, lobi Gado ete èn kande den wani prèise en. Fu dati ede, wi musu du ala san wi man fu yepi den, so taki sani kan waka bun baka nanga den na yeye fasi, èn so taki den kan abi a prisiri baka fu prèise Yehovah, makandra nanga a pipel fu en.—Hebrewsma 13:15; 1 Petrus 5:6, 7.
Wan leti di sa tan na tapu wi pasi
23, 24. Sortu wini yu kisi fu Psalm 119?
23 Na difrenti fasi wi kan kisi wini fu Psalm 119. Fu eksempre, a kan meki wi frutrow moro tapu Gado, bika a e sori wi taki wan sma e kisi trutru koloku te a „e waka na ini a wet fu Yehovah” (Psalm 119:1). A psalm skrifiman e memre wi taki ’a heri wortu fu Gado na waarheid’ (Psalm 119:160). A no de fu taki dati disi musu meki wi kisi moro warderi gi a heri Wortu fu Gado di a meki sma skrifi. Te wi e denki dipi fu Psalm 119, dan dati musu meki taki wi e studeri Bijbel fayafaya. Ibri tron baka, a psalm skrifiman ben begi Gado: „Leri mi yu wet” (Psalm 119:12, 68, 135). A ben begi sosrefi: „Leri mi bunfasi, leri mi fu gebroiki mi frustan, èn gi mi sabi srefi, bika na ini den komando fu yu, mi poti bribi” (Psalm 119:66). A bun te wi e begi na a srefi fasi disi.
24 A leri fu Yehovah e meki taki wi kan abi wan tranga banti nanga en. Ibri tron baka, a psalm skrifiman e kari ensrefi, wan futuboi fu Gado. Fu taki en leti, a e taigi Yehovah den moi wortu disi: „Mi na fu yu” (Psalm 119:17, 65, 94, 122, 125; Romesma 14:8). Iya, a de wan grani trutru fu dini Yehovah èn fu prèise en leki wan fu den Kotoigi fu en! (Psalm 119:7) Yu e dini Gado nanga prisiri leki wan Kownukondre preikiman? Efu yu e du disi, dan yu kan abi a dyaranti taki Yehovah o tan horibaka gi yu èn a o tan blesi yu na ini a wroko disi di de wan grani. A o tan du disi efu yu e frutrow na ini en wortu ala ten èn efu yu e meki a wortu dati skèin leti na tapu a pasi fu yu.
San yu ben sa piki?
• Fu san ede wi musu lobi a wortu fu Gado?
• Fa wi kan kisi krakti fu a wortu fu Gado?
• Na sortu fasi den frumane fu Yehovah e yepi wi?
• Fu san ede sani e waka bun nanga a pipel fu Yehovah, èn fu san ede den de na ini vrede?
[Aksi fu a tori disi]
[Prenki na tapu bladzijde 16]
Leti na yeye fasi e komoto fu a wortu fu Gado
[Prenki na tapu bladzijde 17]
Efu wi lobi den frumane fu Yehovah, dan noiti a o si wi leki „doti skuma”
[Prenki na tapu bladzijde 18]
Efu wi e leisi Bijbel ibri dei, dan wantewante difrenti pisi tori na ini kan kon na wi prakseri di sa yepi wi te wi e begi