Yu e memre disi ete?

Yu ben prisiri fu leisi den Waktitoren di kon na doro no so langa pasa? We, luku efu yu kan gi wan piki tapu den aksi di e kon now:

• Fu san ede meki sma teki 25 december leki a dei pe den e memre a geborte fu Yesus?

Gado Wortu no e sori wi sortu dei Yesus gebore. Wan buku e taki: „Sma no teki 25 december leki a dei fu hori Kresneti fu di den ondrosuku finifini o ten Yesus gebore, ma na presi fu dati den ben kenki den fesa di sma ben e hori na ini Rome kon tron Kresten fesa. Sma ben hori den fesa disi te a son ben drai kon baka na ini winter.” (Enciclopedia Hispánica) Te a son ben drai kon baka na ini winter, dan den Romesma fu owruten ben e hori bradyari fesa, èn den ben e prati kado.​—15/12, bladzijde 4, 5.

• Tori fu den Apostel 7:59 e sori taki Stefanus ben begi Yesus?

Nôno. Bijbel e sori taki wi musu begi Yehovah Gado wawan. Fu di Stefanus ben kisi wan fisyun pe a ben si Yesus, meki a kan taki a ben firi fri fu taki langalanga nanga Yesus, di a taki: „Masra Yesus, teki mi yeye.” Stefanus ben sabi taki Yesus kisi a makti fu opo den dedewan (Yohanes 5:27-29). Fu dati ede Stefanus ben aksi, noso bari kari Yesus fu kibri en libi krakti, teleki a dei di Yesus ben o gi en wan opobaka.​—1/1/, bladzijde 31.

• Fa wi du sabi taki a fasi fa wi libi o waka, no seti na fesi kaba?

Gado gi wi a fri fu teki wi eigi bosroiti, èn disi e sori krin taki Gado no bosroiti na fesi kaba fa wan sma en libi o waka. Efu Yehovah ben seti na fesi kaba fa wi libi o waka, èn efu a ben o hori wi frantwortu bakaten gi den sani di wi du, dan a ben o de wan Gado di no lobi libisma èn a no ben o handri na wan reti fasi (Deuteronomium 32:4; 1 Yohanes 4:8).​—15/1, bladzijde 4, 5.

• Fu san ede wan sma no ben o sori sakafasi efu a ben o taki dati wondru no man pasa srefisrefi?

Son sabidensiman kon si taki den no sabi ala sani fu den wondru di Gado du di a meki sani, èn fu dati ede den musu erken taki den no man taki moro dati wan sani no man. A wán sani di den kan taki now na dati kande wan sani no man.​—15/2, bladzijde 5, 6.

• Fu san ede meki Krutuman Simson taigi en papa nanga mama taki a ben wani wan fu den umapikin fu den Filistiasma leki wefi? (Krutuman 14:2)

A Wet fu Gado no ben gi sma primisi fu trow nanga wan sma di ben e anbegi heiden gado (Exodus 34:11-16). Toku, a Filistia uma disi ben de „bun” na ini Simson ai. Simson „ben suku wan okasi fu feti nanga den Filistiasma”, èn na uma ben bun fu man doro a marki dati. Yehovah ben horibaka gi Simson nanga yepi fu En santa yeye (Krutuman 13:25; 14:3, 4, 6).​—15/3, bladzijde 26.

• Wan Kresten kan gi moni noso iniwan sortu kado na wan lantiman di du wan wroko gi en?

Na wan fowtu sani efu wan Kresten pai wan lantiman wan tyuku, fu meki a du wan sani di no de akruderi wet, fu no meki a krutu sani na wan reti fasi, noso fu a yepi a Kresten fosi. Ma a no fowtu efu wan Kresten gi wan kado, noso moni na wan wrokoman fu wan lantikantoro, te a wrokoman e du en wroko, noso fu a kan yepi a Kresten fu kisi wan tu sani, noso fu meki taki sma no handri nanga a Kresten na wan fasi di no bun.​—1/4, bladzijde 29.