Libisma tirimakti sa man tyari wan kaba kon na pôtifasi?

MILYUNMILYUN sma gro kon bigi sondro fu sabi san a wani taki fu de pôti. Noiti den ben abi fu go sribi nanga angribere, noso beifi fu di den e kowru. Toku furu fu den sma dati e firi sari gi den pôtiwan èn dati meki den e du ala san den man fu yepi den.

Ma te now ete pôtifasi de wan problema na ini kondre pe sma e feti doronomo, kondre pe bigi frudu de, pe yu abi bigi dreiten, èn pe tra problema de tu. Den sortu problema disi de wan bigi broko-ede gi furu gronman na ini Afrika di e prani sani fu seri, so taki den famiri kan nyan. Sonwan fu den ben abi fu gowe libi den oso fu den èn froisi go tan na den bigi foto, noso den ben abi fu go libi leki loweman na ini tra kondre. Furu sma di e tan na den boiti presi e froisi go na den bigi foto fu di den e howpu taki drape den sa abi wan moro bun libi.

Furu tron a de so taki den foto pe tumusi furu sma e libi, e tron presi di lai pôtisma. Efu presi de na ini a foto, dan a no de nofo fu kan prani sani fu nyan. Furu tron sma no man feni wroko so makriki. Furu sma e go du ogri nanga tranga fu di den no sabi moro san fu du. Den sma di e libi na ini den foto e bari fu kisi yepi, ma libisma tirimakti no man sorgu taki pôtisma no kon moro furu. Wan tijdschrift The Independent fu London ben skrifi fu wan raportu di den Verenigde Nâsi ben tyari kon na doro na ini november 2003. A raportu ben taki: „Moro nanga moro sma na grontapu e libi nanga angri.” Wan tra pisi fu a raportu e taki: „Na heri grontapu sowan 842 milyun sma e siki fu di den no e kisi nofo gosontu nyanyan, èn ibri yari a nomru dati e tan kren nanga 5 milyun sma di e libi nanga angri.”

Ten na ten a bijkantoro fu Yehovah Kotoigi na ini Zuid-Afrika e kisi brifi fu sma di e pina srefisrefi. Leki eksempre, wan man fu a presi Bloemfontein ben skrifi: „Mi no abi wroko, èn mi e fufuru na ini a foto solanga mi kisi na okasi. Efu mi no du dati, dan wi e tan nanga angri omeni dei baka makandra, èn dan mi no taki ete fu a hebi kowru di e teki wi. Wroko no de fu feni kwetikweti. Furu sma e waka go na ala sei fu suku wroko èn fu suku nyanyan. Mi sabi tra sma di e go suku nyanyan na ini dotibaki srefi. Sonwan fu den e kiri densrefi. Furu sma e firi brokosaka èn den no abi howpu, neleki mi. A de leki nowan howpu no de gi wan bun tamara. We, Gado di meki wi nanga a firi fu nyan èn fu weri krosi, no e si taki den sani disi e pasa?”

Moi piki de tapu den aksi di a man disi tyari kon na fesi. Soleki fa a tra artikel sa sori, dan a piki tapu den aksi disi de fu feni na ini Gado Wortu, Bijbel.