A abi wini fu de loyaal?

„YU E pai tumusi furu moni gi yu verzekering gi datra yepi”, na so Karl e taki, di e wroko na wan verzekering kantoro *. „Efu yu e kon na a kantoro fu mi, dan yu o pai 20 Amerkan dala moro mendri, èn dati na wan bigi difrenti.”

„Kande dati de tru”, Jens piki. „Ma na wan tu yari kaba mi e pai verzekering gi datra yepi na a srefi kantoro disi. Den yepi mi furu na ini a ten di pasa, èn mi wani tan loyaal na den.”

„A de wan moi sani fu de loyaal”, na so Karl piki en. „Ma toku yu e pai furu moni fu di yu wani de loyaal na a bedrijf dati!”

Karl ben abi leti. Furu tron, a e kostu yu furu moni te yu de loyaal, noso fu de getrow na wan tra sma. * A de so tu taki a e teki furu fu yu ten nanga yu krakti, èn taki yu musu firi gi a sma. A warti trutru fu de loyaal?

Aladi furu sma feni taki loyaalfasi na wan moi fasi, toku furu sma no de loyaal

Wan organisâsi di nen na Allensbach Opinion Research Institute ben ondrosuku a tori disi na ini Doisrikondre. Den ben poti aksi gi sma, èn 96 procent fu den sma ben taki dati loyaalfasi na wan moi fasi. Wan tra ondrosuku di na Allensbach organisâsi ben hori pe den ben taki nanga sma fu 18 yari te go miti 24 yari, ben sori taki 2 fu ibri 3 sma ben taki dati loyaalfasi na wan fasi di den ben lobi srefisrefi; dati wani taki, den ben si en leki wan bun fasi.

Aladi furu sma e taki dati loyaalfasi, noso getrowfasi na wan moi fasi, toku a de wan heri tra sani te densrefi musu de loyaal, noso getrow. Fu eksempre, na ini furu kondre fu Europa, trowpaar noso memre fu osofamiri no de loyaal na makandra trutru. Furu tron mati no de loyaal na makandra. Èn aladi basi nanga wrokoman, noso bisnisman nanga klanti ben de loyaal na makandra fosi, toku yu no e si dati so furu moro. Fu san ede?

Fu di sma abi so furu fu du na ini a ten disi, meki son leisi den no abi a ten, noso a krakti moro fu du sani di e sori taki den de loyaal na tra sma. A kan taki sma di ondrofeni san a wani taki te trawan no de loyaal, no sa de loyaal na tra sma so makriki. Trawan e libi na wan fasi di e sori taki den no e broko den ede srefisrefi nanga tra sma, so taki den no abi fu de loyaal.

Difrenti sani de di e meki taki furu sma no de loyaal, aladi den feni taki a de wan moi sani te wan sma e sori a fasi disi. Fu di dati de so, meki wi sa go poti prakseri na den aksi di e kon now: A warti trutru fu de loyaal? Efu dati de so, dan na suma wi musu de loyaal, èn na sortu fasi wi musu de loyaal na den? Sortu wini wi e kisi te wi de loyaal?

[Futuwortu]

[Prenspari pisi na tapu bladzijde 3]

Aladi furu sma feni taki loyaalfasi na wan moi fasi, toku furu sma no de loyaal