Kakafutu gi takru denki!

DI RAMPU ben e miti na famiri-edeman Yob, dan den dri mati fu en, namku Elifas, Bildad, nanga Sofar kon luku en. Den ben kon fu sori taki den ben e firi sari gi en, èn den ben kon sosrefi fu trowstu en (Yob 2:11). A moro prenspariwan fu den dri mati disi ben de Elifas, èn a kan taki en ben de a moro owruwan fu den sosrefi. En fosi bigin taki èn a ben taki moro langa leki den trawan. Te wi e luku den dri taki di Elifas ben hori, dan sortu denki a ben abi?

Elifas ben taki fu wan ondrofeni di a ben abi nanga wan yeye wan leisi, èn disi na san a ben taki: „Èn wan yeye srefi pasa na mi fesi; mi kisi gro-skin. A tan tanapu, ma mi no ben man si en krin; wan sani ben de na mi fesi; ala sani ben pî, ne mi yere wan sten now” (Yob 4:15, 16). Sortu yeye ben kon abi krakti tapu a denki fu Elifas? A fasi fa Elifas ben e krutukrutu baka dati, e sori krin taki a yeye no ben de wan fu den regtfardiki engel fu Yehovah (Yob 4:17, 18). A ben de wan ogri yeye. Efu a ben de wan bun yeye, dan Yehovah no ben o piri-ai gi Elifas nanga den tu mati fu en taki den fruteri lei, a no so? (Yob 42:7) Iya, wan ogri yeye ben kon abi krakti tapu Elifas. Den sani di a ben taki, e sori taki a no ben e denki soleki fa Gado e denki.

Te wi e luku den sani di Elifas ben taki, dan sortu denki a ben abi? Fu san ede a de prenspari taki wi e luku bun nanga takru denki? Èn san wi kan du fu kakafutu gi den denki dati?

„A no abi bribi na ini den futuboi fu en”

Na ini ala den dri taki fu en, Elifas ben meki a gersi leki Gado e aksi so furu fu sma, taki awansi san den futuboi fu en e du, noiti dati bun nofo gi en. „Luku! A no abi bribi na ini den futuboi fu en”, na so Elifas ben taigi Yob, „èn a e krutu den engel fu en taki den abi fowtu” (Yob 4:18, futuwortu). Bakaten Elifas taki fu Gado: „A no e frutrow den santawan fu en, èn fu taki en leti, den hemel srefi no krin na ini en ai” (Yob 15:15). A aksi sosrefi: „A de so taki na Almaktiwan e prisiri taki yu de regtfardiki?” (Yob 22:3). Bildad ben abi a srefi denki disi, fu di a ben taki: „A mun de drape srefi, ma a no e skèin krin, èn den stari srefi no krin na ini [Gado] en ai.”​—Yob 25:5.

Wi musu luku bun taki wi no e kisi a denki disi. A kan meki wi feni taki Gado e fruwakti tumusi furu fu wi. Te wi abi a denki disi, dan dati kan pori a banti di wi abi nanga Yehovah. Ma boiti dati, te wi abi a denki disi, dan fa wi ben o feni en te wi e kisi trangaleri? Na presi taki wi sa de klariklari fu teki a trangaleri, a kan pasa taki wi e „kisi atibron nanga Yehovah srefi”, èn kande wi e kon abi bita-ati gi en (Odo 19:3). A sani dati trutru ben o pori a banti di wi abi nanga Gado!

„Wan man di gosontu èn di tranga na skin fasi, warti gi Gado?”

Boiti taki sma e denki taki Gado e aksi tumusi furu fu libisma, den e denki sosrefi taki libisma  no warti noti gi en. Na ini a di fu dri taki fu en, Elifas ben poti na aksi disi: „A de so taki wan man di gosontu èn di tranga na skin fasi, warti gi Gado? Iniwan sma di abi a koni fu man si sani krin warti gi en?” (Yob 22:2) Nanga den wortu disi, Elifas ben wani taki dati libisma no warti noti gi Gado. Bildad ben abi wan srefi sortu denki. A ben taki: „Fa wan libisma di e dede kan abi reti na Gado, èn fa wan sma di wan uma meki, kan de krin?” (Yob 25:4) Te yu e luku san Bildad taki, dan fa Yob, di ben de noti moro leki wan libisma nomo di man dede, ben kan prefuru srefi fu denki taki a regtfardiki na ini Gado ai?

Son sma na ini a ten disi e denki takru fu densrefi, èn a sani disi e moro den fu tru. Wan tu sani di kande meki taki den kisi so wan denki, na a fasi fa den ben kweki, den problema fu a libi, noso a kan taki sma e tegu gi den fu di den de fu wan tra ras noso wan tra kulturu. Ma Satan nanga den ogri yeye fu en lobi fu kwinsi sma tu. Efu den kan meki wan sma firi taki nowan sani di a e du, bun nofo gi na Almakti Gado, dan a sma dati sa firi brokosaka moro esi. Te fu kaba, so wan sma ben kan drifi gowe fu a libilibi Gado, iya, a ben kan drai baka srefi gi en.​—Hebrewsma 2:1; 3:12.

Te wi e kon moro owru èn te wi e kisi problema nanga a gosontu fu wi, dan wi no man du so furu moro. Te wi e luku a prati di wi abi now na ini a Kownukondre diniwroko, èn te wi e prakseri san wi ben e du di wi ben moro yongu, di wi ben moro gosontu, èn di wi ben abi moro krakti, dan a kan gersi leki wi e du pikinso nomo. A prenspari trutru fu sabi taki Satan nanga den ogri yeye fu en wani wi fu denki taki san wi e du, no bun nofo gi Gado! Wi musu kakafutu gi a denki dati.

Fa fu kakafutu gi takru denki

Aladi Satan ben e meki Yob pina, toku Yob ben taki: „Teleki mi lasti bro, mi no sa libi mi soifri retifasi!” (Yob 27:5) Fu di Yob ben lobi Gado, meki a ben abi a fasti bosroiti fu tan hori en soifri retifasi awansi san pasa, èn a no meki noti kenki en prakseri. Wi e si wan prenspari sani dyaso di kan yepi wi fu kakafutu gi takru denki. Wi musu kon frustan bun o bigi a lobi fu Gado de, èn wi musu leri fu abi trutru warderi gi a lobi dati. Boiti dati, wi musu kisi dipi lobi gi en. Disi o pasa te wi e studeri Gado Wortu doronomo èn te wi e denki dipi fu san wi e leri, aladi wi e begi Gado tu fu yepi wi.

Fu gi wan eksempre, Yohanes 3:16 e taki: „Gado ben lobi grontapu so te, taki a gi en wan-enkri Manpikin.” Yehovah abi dipi lobi gi libisma, èn wi kan si dati te wi e luku a fasi fa a handri nanga libisma na ini a ten di pasa. A denki di wi e denki dipi fu den eksempre fu fositen, musu meki wi kisi moro warderi gi Yehovah èn a musu meki wi kisi moro lobi gi en sosrefi, èn na a fasi dati wi sa man kakafutu gi takru denki.

Luku a fasi fa Yehovah ben handri nanga Abraham na a ten di a ben o pori Sodom nanga Gomora. Abraham ben aksi Yehovah aiti leisi efu trutru a ben o krutu den pipel disi. Ma noiti Yehovah sori atibron, èn noiti a ben fruferi fu di Abraham ben aksi en den sani dati. Na presi fu dati, a piki Abraham na wan fasi di meki a firi korostu èn di trowstu en (Genesis 18:22-33). Bakaten di Gado frulusu Lot nanga en famiri fu Sodom, dan Lot aksi Gado efu a ben kan lowe go na wan foto di ben de krosibei, na presi fu lowe go na den bergi. Yehovah piki en: „Luku, mi e hori yu na prakseri na ini a tori disi tu, fu di mi no sa drai a foto tapu, a foto di yu taki fu en” (Genesis 19:18-22). A tru taki den tori disi e sori taki Yehovah na wan tiriman di e fruwakti tumusi furu fu sma, di no abi lobi gi sma, èn di e basi sma nomo? Nôno. Den e sori suma a de trutru, iya, a de wan lobi-ati Tiriman di abi switifasi, safri-atifasi, èn di e broko en ede nanga sma.

Den eksempre fu Aron, David, nanga Manase fu owruten Israel e sori taki Gado a no wan sma di e suku fowtu nomo na trawan èn di feni taki nowan sma bun nofo gi en. Aron ben du dri seryusu sondu. A ben meki wan gowtu pikin kaw, a ben krutu Moses makandra nanga en sisa Miryam, èn a ben misi fu santa Gado èn fu gi en grani na Meriba. Toku Gado ben si den bun fasi di a ben abi, èn a gi en primisi fu tan  dini leki granpriester te na en dede.​—Exodus 32:3, 4; Numeri 12:1, 2; 20:9-13.

Kownu David ben du bigi sondu na a ten di a ben de kownu. A ben du sutadu, a ben seti sani so taki wan man lasi en libi sondro taki a man ben abi fowtu, èn a ben teri a pipel sondro taki Gado ben taigi en fu du dati. Ma Yehovah si taki David ben abi berow èn a tan hori ensrefi na wan loyaal fasi na Kownukondre frubontu, fu di a gi pasi taki David dini leki kownu te na en dede.​—2 Samuel 12:9; 1 Kroniki 21:1-7.

Kownu Manase fu Yudea ben seti altari gi Bâal, a ben meki den manpikin fu en bron na ini faya, a ben gi sma deki-ati fu du afkodrei, èn a ben bow altari gi falsi anbegi na ini a tempel dyari. Ma baka di a sori berow nanga en heri ati, dan Yehovah gi en pardon, a meki a kon fri, èn a meki a tron kownu baka (2 Kroniki 33:1-13). Wan Gado di feni taki nowan sma bun nofo, e du den sortu sani disi? Kwetikweti!

A falsi kragiman srefi na a wan di abi fowtu

A no musu fruwondru wi taki Satan srefi na a sma di abi ala den fasi di a taki dati Yehovah abi. Satan no abi switifasi, a no e sori sari-ati gi trawan, èn a e fruwakti tumusi furu fu trawan. Wi kan si disi krin te wi e luku taki sma fu fositen ben e gi pikin-nengre leki ofrandi na ini a falsi anbegi fu den. Den Israelsma di ben fadon komoto na bribi, ben e bron den manpikin nanga den umapikin fu den na ini faya, èn dati ben de wan sani di no ben kon na ini Yehovah prakseri srefisrefi.​—Yeremia 7:31.

A no Yehovah, ma na Satan e suku fowtu nomo na trawan. Openbaring 12:10 e taki dati Satan na ’a sma di e taki ogri fu wi brada èn di e taki lei fu den na fesi wi Gado dei nanga neti!’ Na a tra sei, a psalm skrifiman ben singi fu Yehovah: „Efu na fowtu yu ben musu luku, o Yah, o Yehovah, dan suma ben kan tan tanapu? Bika na yu e gi pardon trutru.”​—Psalm 130:3, 4.

Te sma no sa abi takru denki moro

A ben musu fu de wan frulekti gi den engel taki Satan Didibri nanga den ogri yeye fu en ben fringi komoto fu hemel! (Openbaring 12:7-9) Baka dati, den ogri yeye disi no ben man abi nowan enkri krakti moro tapu den sani di na engel famiri fu Yehovah na ini hemel ben e du.​—Danièl 10:13.

Den sma di e tan na grontapu sa de nanga bigi prisiri na ini a ten di de heri krosibei. Heri esi, wan engel sa komoto fu hemel nanga a sroto fu a peti di no abi gron èn nanga wan bigi keti na ini en anu; a sa tai Satan nanga den ogri yeye fu en, èn a sa fringi den go na ini a peti pe den no o man du noti (Openbaring 20:1-3). A sa de wan frulekti trutru gi wi te dati pasa!

Na a srefi ten, wi musu luku bun fu no kisi takru denki. Te wi e si taki wi e kisi takru noso fowtu denki, dan wi musu puru den denki dati na wi ede fu di wi e prakseri a lobi di Yehovah abi gi wi. Te wi e du dati, dan ’a vrede fu Gado di bigi moro leki san libisma man frustan, sa kibri wi ati èn wi frustan’.​—Filipisma 4:6, 7.

[Prenki na tapu bladzijde 26]

Yob ben kakafutu gi takru denki

[Prenki na tapu bladzijde 28]

Lot ben kon sabi taki Yehovah na wan Tiriman di e broko en ede nanga sma