„Te wan sma e frede Yehovah, dan dati na wan koni sani”

„A BOSROITI fu a tori, now di sma yere ala sani, de: Frede a tru Gado èn hori den komando fu en. Bika disi na a heri plekti fu libisma” (Preikiman 12:13). Nanga yepi fu a santa yeye fu Gado, Kownu Salomo fu owruten Israel kon na a tumusi prenspari bosroiti disi! A famiri-edeman Yob ben frustan tu o prenspari a de fu frede Gado, bika a ben taki: „Luku! Te wan sma e frede Yehovah, dan dati na wan koni sani, èn te wan sma no e du ogri, dan a abi frustan.”​—Yob 28:28.

Bijbel sori taki a de tumusi prenspari fu frede Yehovah. Fu san ede a de wan koni sani fu leri fu frede Gado? Sortu wini wisrefi, noso wi leki wan grupu fu tru anbegiman kan kisi te wi e frede Gado? Vers 26 te nanga 35 fu Odo kapitel 14 e gi a piki tapu den aksi disi. *

A sma di kan meki wi kisi „tranga frutrow”

Salomo e taki: „Na ini a frede gi Yehovah wan tranga frutrow de, èn gi den manpikin fu en, wan presi sa de pe den kan lowe go” (Odo 14:26). A wan-enkri Sma di kan meki wan man di e frede Gado kisi frutrow, na a loyaal èn almakti Gado, Yehovah. Fu dati ede a no e fruwondru wi taki so wan man e waka go miti a tamara nanga tranga frutrow! A abi wan koloku tamara di e go nanga langa.

Ma san wi kan taki fu a tamara fu den wan di e frutrow tapu grontapu, namku den sani di grontapusma abi na prakseri, den organisâsi fu den, a fasi fa den e si sani, nanga den gudu fu den? Awansi sortu tamara den e prakseri taki den o kisi, a o de wan syatu tamara, bika Bijbel e taki: „Grontapu e pasa gowe nanga den lostu fu en, ma a sma di e du a wani fu Gado sa tan fu têgo” (1 Yohanes 2:17). Fu dati ede, yu denki taki wan sani de fu san ede wi musu „lobi grontapu nanga den sani fu grontapu”?​—1 Yohanes 2:15.

San papa nanga mama kan du fu meki taki ’wan presi sa de pe den pikin fu den kan lowe go’? A psalm skrifiman ben singi: „Kon, un manpikin, arki mi; mi sa leri unu a frede gi Yehovah” (Psalm 34:11). Papa nanga mama kan sori den pikin fu den fa fu frede Yehovah, te densrefi e gi den pikin fu den wan bun eksempre èn te den e gi den pikin leri. Na so fasi a sa de moro makriki gi den pikin fu gro kon tron bigi man nanga uma di abi wan tranga frutrow na ini Yehovah.​—Odo 22:6.

Salomo e taki moro fara: „Te wan sma e frede Yehovah, dan a kan tan na libi, èn a kan wai pasi gi den trapu di abi dede leki bakapisi” (Odo 14:27). Te wan sma e frede Yehovah, dan „a kan tan na libi” fu di a tru Gado na „a sma pe libi watra e komoto” (Yeremia 2:13). Te wi e tan leri sabi Yehovah nanga Yesus Krestes, dan wi kan kisi têgo libi (Yohanes 17:3). Te wi e frede Gado, dan wi o man wai pasi tu gi den trapu di abi dede leki bakapisi. Fa so? Odo 13:14 e taki: „A wet fu a koni sma e gi libi, èn a e meki wan sma drai baka gi den trapu fu dede.” Te wi e frede Yehovah, te wi e gi yesi na a wet fu en, èn te wi e meki a Wortu fu en tiri wi, dan dati sa kibri wi fu no du ogri èn wi no sa kisi firi nanga prakseri  di abi so wan bigi krakti na wi tapu taki wi dede tumusi yongu.

A „e gi wan kownu glori”

Na ini a moro bigi pisi ten di Salomo ben e tiri, a ben de wan kownu di ben e frede Gado èn di ben gi yesi na Yehovah. Disi ben meki taki a ben de wan bun tiriman. Fa wi du sabi taki wan kownu de wan bun tiriman? Odo 14:28 e piki: „Te a pipel furu, dan dati e gi wan kownu glori, ma te wan hei tiriman no abi borgu na en ondro, dan dati sa meki a fadon.” Efu sani e go bun nanga den sma di e libi na ondro a tiri fu wan kownu, dan wi sabi taki a kownu e tiri bun. Te bun furu sma wani taki a kownu disi e tan tiri den, dan wi kan taki dati a de wan bun tiriman. Salomo ben „abi sma na en ondro, fu [a Redi] se te go miti [a Mindrikondre] se èn fu [Eufraat] liba te na den uku fu grontapu” (Psalm 72:6-8). Di a ben de tiriman, dan vrede ben de pasa marki èn ala sani ben e waka bun na ini a kondre (1 Kownu 4:24, 25). Salomo ben de wan heri bun tiriman. Na a tra sei, te a pipel no feni wan hei tiriman bun, dan dati na wan syen gi a tiriman disi.

We, san wi kan taki fu a glori fu a Moro Bigi Salomo, a Mesias Kownu, Yesus Krestes? Prakseri fu den sma di de na en ondro na ini a ten disi srefi. Na heri grontapu, moro leki siksi milyun man nanga uma di e frede Gado, teki a bosroiti kaba fu libi na ondro a tiri fu Krestes. Den e bribi na ini Yesus èn leki wán man, den e horibaka gi a tru anbegi fu a libi Gado (Yohanes 14:1). Na a kaba fu a Dusun Yari Tiri, a sa de so taki ala den sma di de na ini a memre fu Gado, kisi wan opobaka. Na a ten dati, soso koloku sma di de opregti èn di sori taki den e warderi a Kownu fu den, o libi na ini wan paradijs na grontapu. Dati o de wan trutru buweisi taki Krestes na wan bun tiriman! Kon meki wi tan howpu tapu a tumusi moi Kownukondre dati.

Sortu wini wi kan kisi na yeye fasi èn na skin fasi

Te wi e frede Gado, dan dati kan gi wi wan korostu ati nanga wan korostu firi. Disi de so fu di koni kan meki wi du furu sani, èn tu fu den na taki wi kan teki yoisti bosroiti èn wi man abi a koni fu si sani krin. Odo 14:29 e taki: „A sma di no e atibron esi abi a koni fu si sani krin, pasa marki, ma a sma di no abi pasensi, e opo lawfasi.” Efu wi abi a koni fu man si sani krin, dan wi e kon frustan taki te wi no e dwengi na atibron fu wi, disi kan pori a banti di wi abi nanga Gado. „Feantifasi, kesekese, dyarusu, faya-ati, trobi, pratifasi” na wan tu fu den sani di kan tapu wi fu „kisi a kownukondre fu Gado” (Galasiasma 5:19-21). Wi e kisi a rai fu no atibron, srefi te wi ben sa abi a reti fu dati (Efeisesma 4:26, 27). Sosrefi, te wi no abi pasensi, dan wi kan taki èn du dondon sani di kan meki wi sari bakaten.

Te a kownu fu Israel e sori sortu takru bakapisi atibron kan abi gi wan sma, dan a e taki: „Wan korostu ati na a libi fu den pisi fu a skin, ma dyarusu fasi e pori den bonyo” (Odo 14:30). Wan tu fu den siki di wan sma kan kisi te a e tan atibron noso te a de nanga faya-ati, na taki en bro de na tapu doronomo, en brudu e hei, a e kon siki na en lefre, èn na en alvleesklier. Datra kon si tu taki te wan sma siki na en maag, te a abi krasikrasi, fokofoko-siki, siki na a buba fu en skin, nanga beresiki, dan atibron nanga faya-ati kan meki den siki disi kon moro ogri, noso den kan meki srefi taki wan sma e kisi den sortu siki disi. Na a tra sei a de so taki „wan ati di no bruya, e meki a skin kon na libi” (Odo 14:30). Fu dati ede a de wan koni sani te ’wi e du muiti fu du den sani di e tyari vrede kon èn den sani di e gi makandra deki-ati’.​—Romesma 14:19.

Te wi e frede Gado, dan dati sa yepi wi fu no teki sma sei

Salomo e taki: „A sma di e fufuru a mofinawan e pori a nen fu en Mekiman, ma a sma di e du a pôtiwan bun, e gi En glori” (Odo 14:31). Wan sma di e frede Gado, e frustan taki ala libisma abi a srefi Mekiman, namku Yehovah Gado. Fu dati ede, a mofinawan na wan libisma tu, èn a fasi fa wi e handri nanga en, kan pori a nen fu a Sma di meki libisma, noso a kan gi en  nen glori. Efu wi wani gi Gado glori, dan wi no musu teki sma sei, ma wi musu handri nanga ala sma na wan opregti fasi. Sondro fu teki sma sei, wi musu sori taki wi e poti prakseri tu na sani di wan pôti Kresten abi fanowdu na yeye fasi. Wi musu fruteri pôtisma nanga gudusma a bun nyunsu fu Gado Kownukondre.

A koni kownu e taki san na ete wan wini di wi kan kisi te wi e frede Gado: „Den sa pusu wan ogri sma trowe fu di a e du ogri, ma wan regtfardiki sma sa kisi frulusu fu di a de regtfardiki” (Odo 14:32, futuwortu). Fa den e pusu wan ogri sma trowe? Son Bijbel sabiman denki taki disi wani taki dati te rampu e miti wan ogriman, dan noiti moro a sa man go bun nanga en. Na a tra sei, te problema e miti a sma di e frede Gado, dan a sa kisi frulusu fu di a de wan reti-ati sma. Fu di a sma disi e frutrow tapu Yehovah dorodoro, meki a abi a srefi fasti bosroiti leki Yob, di ben taki: „Teleki mi lasti bro, mi no sa libi mi soifri retifasi!”​—Yob 27:5.

Te wi wani hori wi soifri retifasi, dan wi musu frede Gado èn wi musu abi a koni fu en. Pe wi kan feni koni dan? „Koni de na ini na ati fu a sma di abi frustan,” na so Odo 14:33 e piki, „èn den donwan sa kon sabi san na disi.” Iya, koni de fu feni na ini na ati fu wan sma di abi frustan. Ma fa don sma kan kon sabi san na koni? Soleki fa wan buku e taki, dan „a donwan, di e du ala muiti fu sori taki a koni, e taki soso sani di a e si leki koni sani, ma bakaten a e kon si taki a ben taki wan don sani”.

A „e gi wan pipel glori”

A kownu fu Israel ben sori wi fa a frede gi Gado kan abi krakti tapu wan sma, ma now a e poti wi prakseri na fa a sani disi kan abi krakti tapu wan heri pipel. A e taki: „Regtfardikifasi e gi wan kondre glori, ma sondu na wan syen gi a pipel fu a kondre” (Odo 14:34). Disi ben de krin fu si na a pipel Israel! Di Israel ben hori ensrefi na den hei markitiki fu Gado, a bakapisi ben de taki den ben kisi moro glori leki den tra pipel na den lontu. Ma di den ben trangayesi Gado doronomo, a bakapisi ben de taki den ben kisi syen èn te fu kaba Yehovah drai baka gi den. Na ini a ten disi a pipel fu Gado musu hori densrefi na a srefi gronprakseri disi tu. A Kresten gemeente de tra fasi leki grontapu fu di a e hori ensrefi na den regtfardiki gronprakseri fu Gado. Ma ibriwan fu wi musu libi wan krin libi, efu wi wani tan hori wisrefi na den hei markitiki dati. Te wi e du sondu, dan disi e tyari soso syen kon na wi tapu, sosrefi na tapu a gemeente èn na tapu Gado.

Salomo di e sori san kan meki wan kownu firi prisiri, e taki: „Wan kownu e prisiri nanga wan futuboi di handri nanga koni, ma a e atibron nanga a futuboi di e handri na wan syen fasi” (Odo 14:35). Odo 16:13 e taki tu: „A mofo fu wan regtfardiki sma na wan prisiri sani gi wan bigi kownu; a lobi a sma di e taki opregti sani.” Iya, wi Fesiman èn Kownu Yesus Krestes e prisiri srefisrefi te wi e handri na wan regtfardiki fasi èn na wan koni fasi; a e prisiri tu te wi e gebroiki wi mofo fu preiki a Kownukondre èn fu meki disipel. Iya, meki wi tan du furu muiti fu dati ede, fu du a wroko dati aladi wi e prisiri fu den blesi di wi e kisi te wi e frede a tru Gado.

[Futuwortu]

[Prenki na tapu bladzijde 15]

Sma kan leri fu frede Gado