Wi musu broko wi ede nanga san trawan e denki fu wi?

PIKINMORO ala sma lobi fu kisi prèise. Te wi e kisi prèise, dan dati kan meki wi firi koloku, iya, wi e firi taki wi du wan bun sani. Te trawan e taki bun fu sani di wi du, dan dati kan meki srefi taki wi o pruberi fu du den sani dati moro bun. Ma wi sa firi heri tra fasi te wi e si taki son sma no feni wi bun. Te sma e piki wi syatu, noso te den e taki wan sani fu krutu wi, dan dati kan meki wi firi brokosaka. A fasi fa trawan e denki fu wi kan abi bigi krakti tapu a fasi fa wi e si wisrefi.

A no ben o bun te wi no e broko wi ede nanga a fasi fa trawan e si wi. Fu taki en leti, a kan de fu wi eigi bun te trawan e taigi wi efu wi e tyari wisrefi na wan bun fasi, noso na wan fasi di no bun. Te trawan e krutu wi akruderi hei gronprakseri, dan a denki fu den kan abi wan bun krakti na wi tapu, fu di a sa gi wi deki-ati fu tyari wisrefi na wan reti fasi (1 Korentesma 10:31-33). Ma furu tron a de so, taki trawan abi wan takru denki fu wi, sondro taki den abi reide gi dati. Prakseri a fowtu denki di den priester edeman nanga tra sma sosrefi ben abi fu Yesus di den „bigin bari taki: ’Spikri en na wan postu! Spikri en na wan postu!’” (Lukas 23:13, 21-25) Son leisi sma abi wan takru denki fu wi fu di den arki leitori, fu di den e dyarusu na wi tapu, noso fu di den e krutu wi sondro fu sabi suma na wi trutru. Te dati de so, dan a no de fanowdu fu broko wi ede nanga den sortu denki dati. Fu dati ede wi musu leri fu krutu sani na wan yoisti fasi èn wi musu sabi o ten a de fanowdu fu broko wi ede nanga a fasi fa trawan e denki fu wi.

A denki fu suma de prenspari?

Wi wani taki den lobiwan fu wi na ini a waarheid musu feni wi bun. Dati na den famiriman fu wi di de na bribi èn sosrefi den Kresten brada nanga sisa fu wi (Romesma 15:2; Kolosesma 3:18-21). A lobi nanga a lespeki di wi Kresten brada nanga sisa abi gi wi, èn a gwenti di den abi fu „gi makandra deki-ati” wani taki furu gi wi (Romesma 1:11, 12). Nanga ’sakafasi wi e si trawan moro hei leki wisrefi’ (Filipisma 2:2-4). Boiti dati, wi wani taki „den wan di e teki fesi” na wi mindri, namku den owruman na ini a gemeente, feni wi bun, èn wi e warderi en tu te dati de so.​—Hebrewsma 13:17.

Wan tra sani di moi fu abi tu, na „wan bun nen na sma na dorosei” (1 Timoteyus 3:7). A e gi prisiri trutru te famiriman fu wi di no de na bribi, sma na wi wrokope, èn sosrefi birtisma e lespeki wi! Èn wi e meki muiti fu sorgu taki den sma di wi e preiki gi, e kisi wan bun denki fu wi so taki den sa wani arki a Kownukondre boskopu, a no so? Te wi abi wan bun nen na ini a libimakandra leki sma di e tyari densrefi na wan krin fasi, leki sma di de opregti, èn sondro bedrigifasi, dan dati e gi glori na Gado (1 Petrus 2:12). Ma noiti wi musu poti Bijbel gronprakseri na wan sei, soso fu kan meki trawan feni wi bun, èn wi no musu abi hoigrifasi tu soso fu wi kan naki den ati. Wi musu sabi taki wi no sa man plisi ala sma. Yesus ben taki: „Efu unu ben de wan pisi fu grontapu, dan grontapu ben o lobi unu, bika unu ben o de fu grontapu. Ma fu di unu no de wan pisi fu grontapu èn mi teki unu puru na grontapu, dati meki grontapu e teige unu” (Yohanes 15:19). San wi kan du fu meki taki den wan di e gens wi, e kisi lespeki gi wi?

Fa fu meki den gensman fu wi lespeki wi

„Fu mi nen ede, meki sma o teige unu”, na so Yesus ben warskow, „ma a sma di horidoro te na a kaba, sa feni frulusu” (Mateyus 10:22). Fu di sma e teige wi, meki son leisi den e taki ogri-ati sani fu wi. Lantiman di e denki takru fu wi sondro taki  den abi wan bun reide gi dati, ben kan feni taki „wi e opo wisrefi teige a tirimakti”, noso taki „wi e suku fu gens a tirimakti”. Gensman di no frede fu taki san den e denki, kan feni taki wi na wan kerkigrupu di e suku fu tyari problema kon, èn taki sma musu tapu pasi gi wi (Tori fu den Apostel 28:22). Son leisi wi kan buweisi den sma disi taki den falsi kragi fu den no tru. Fa wi kan du dati? Wi musu du soleki fa na apostel Petrus ben gi leki rai, namku: „Un musu de srekasreka fu opo taki gi unsrefi na fesi ala sma di e aksi unu fu a howpu di de na ini unu, ma du dati na wan safri fasi èn nanga bigi lespeki” (1 Petrus 3:15). Boiti dati, wi musu ’taki na wan fasi di fiti, so taki sma no man feni fowtu na wi tapu. Na so fasi a sma di teki a sei fu den gensman sa kisi syen fu di a no man taki nowan takru sani fu wi’.​—Titus 2:8.

Aladi wi e pruberi fu krin wi nen te sma gi wi porinen, wi no musu lasi-ati noso bruya te sma e taki takru fu wi sondro taki den abi reide gi dati. Sma ben kragi taki Yesus, a volmaakti Manpikin fu Gado, no ben sori lespeki gi Gado, taki a ben e gi sma deki-ati fu opo densrefi teige a tirimakti, èn taki a ben e du afkodrei srefi (Mateyus 9:3; Markus 3:22; Yohanes 19:12). Na apostel Paulus ben kisi porinen (1 Korentesma 4:13). Yesus nanga Paulus no ben e poti prakseri na den takru sani di sma ben e taki fu den, èn den tan du a wroko fu den fayafaya (Mateyus 15:14). Den ben sabi taki awansi san den ben e du, den feanti fu den noiti no ben o lobi den, fu di „heri grontapu de na ini a makti fu na ogriwan” (1 Yohanes 5:19). Na ini a ten disi, sma e taki ogri fu wi tu. Wi no abi fu frede te ogri-ati gensman e fruteri lei fu wi.​—Mateyus 5:11.

Denki di prenspari trutru

Furu tron a de so taki sma abi difrenti denki fu wi. Difrenti sani kan meki taki sma abi den denki dati, èn a kan de so tu taki den yere difrenti sani fu wi. Son sma e prèise wi èn den e gi wi grani, ma trawan e kosi wi èn den e teige wi. Ma solanga wi e libi akruderi Bijbel gronprakseri, wi abi ala reide fu de koloku èn fu firi korostu.

Na apostel Paulus ben skrifi: „Na Gado srefi ben meki sma skrifi ala den sani di de na ini Gado Buku; den sani disi bun fu gi leri, fu frumane sma, fu poti sani kon reti, fu leri sma na wan regtfardiki fasi, so taki a sma di de fu Gado kan kon bun dorodoro èn de srekasreka fu du ibri bun wroko” (2 Timoteyus 3:16, 17). Yehovah Gado èn a Manpikin fu en, Yesus Krestes, sa feni wi bun te wi de klariklari fu meki Gado Wortu tiri wi na ini ala sani. Bika te yu luku en bun, a denki di de moro prenspari, na di fu Yehovah nanga di fu en Manpikin. Na a denki di den abi fu wi e sori o warti wi de trutru. Te fu kaba a de so, taki wi sa kisi libi soso te den feni wi bun.​—Yohanes 5:27; Yakobus 1:12.

[Prenspari pisi na tapu bladzijde 30]

„Mi e syen te trawan e prèise mi, bika dipi na ini mi ati mi e angri fu kisi prèise.”​—RABINDRANATH TAGORE, WAN PUWEMA SKRIFIMAN FU INDIA

[Prenki na tapu bladzijde 31]

A denki fu wi Kresten brada nanga sisa prenspari gi wi

[Sma di abi a reti fu a prenki na tapu bladzijde 30]

Culver Pictures