Didibri de trutru?

SORTU denki yu abi fu Didibri? Yu denki taki a de wan trutru sma di e kori trawan fu du ogri sani, noso yu denki taki Didibri na ala ogri di de? Didibri na wan sma di wi musu frede, noso a de soso wan sani di son sma e bribi nomo? A kan taki Didibri abi fu du nanga wan anansitori nomo? A de so taki a wortu „didibri” na wan sortu krakti di e pori sani na hemel nanga grontapu? A de so taki a wortu disi e sori go nomo na a ogri di de na ini libisma, soleki fa furu sabiman fu kerkitori e prakseri na ini a ten disi?

A no de fu fruwondru taki libisma abi difrenti denki fu suma na Didibri. Iya, a muilek trutru fu kon sabi wan sma di abi a koni fu kori sma na so wan fasi taki den no man sabi suma a de trutru! Disi de so, spesrutu efu a sma e du ala muiti fu no meki sma kon sabi suma a de trutru. Bijbel e sori taki Didibri na so wan sma. Bijbel e kari en Satan, èn a e taki: „Satan srefi e tan kenki ensrefi kon tron wan engel fu leti” (2 Korentesma 11:14). Aladi Didibri ogri, toku a e du neleki a bun, so taki a kan kori trawan. Èn efu a man kori sma na so wan fasi taki den e bribi taki a no de kwetikweti, dan dati bun gi en srefisrefi.

Ma suma na Didibri trutru? O ten, èn fa a du kon? Na sortu fasi a abi krakti tapu libisma na ini a ten disi? Efu wi kan kakafutu gi en, dan fa wi musu du dati, so taki a no abi krakti na wi tapu? Bijbel e fruteri krin suma na Didibri èn pe a komoto, èn a e gi soifri piki tapu den aksi disi.

[Prenki na tapu bladzijde 3]

Prakseri o muilek a de fu kon sabi wan sma di e kibri suma a de trutru!