„De nanga krin frustan dorodoro”

„Wan sma di no abi ondrofeni, e bribi ibri wortu, ma a koniwan e luku pe a e poti en futu.”—ODO 14:15.

1, 2. (a) San wi e leri fu den sani di miti Lot na ini Sodom? (b) San a wani taki fu „de nanga krin frustan”?

DI ABRAHAM gi Lot na okasi fu de a fosiwan fu bosroiti sortu sei fu a kondre a ben wani go, dan den ai fu Lot fadon tapu wan moi kontren di ben lai nanga liba èn di ben „gersi a dyari fu Yehovah”. A no de fu taki, dati Lot ben feni a kontren wan moi presi fu tan nanga na osofamiri fu en. Dati meki „Lot ben teki a heri Yordandistrikt gi ensrefi” èn a seti kampu krosibei fu Sodom. Ma en ai kori en, fu di den sma di ben e libi na ini a kontren drape, ben de „den man fu Sodom [di] ben ogri srefisrefi. Den ben du tumusi furu takru sondu na fesi Yehovah” (Genesis 13:7-13). Bakaten, sani no waka bun srefisrefi gi Lot nanga en osofamiri. Te fu kaba, en nanga den umapikin fu en ben abi fu go libi na ini wan bergi-olo (Genesis 19:17, 23-26, 30). A kondre di ben gersi so moi na a bigin, no ben de kwetikweti soleki fa a ben denki.

² Na ini a ten disi, den futuboi fu Gado kan leri wan sani fu a tori fu Lot. Te wi musu teki bosroiti, dan wi musu luku bun nanga sani di kan poti wi ini problema èn wi musu luku bun taki wi no teki wan bosroiti wantewante efu wi no sabi fa sani de trutru. Dati meki a fiti taki Gado Wortu e gi wi a deki-ati disi: „De nanga krin frustan dorodoro” (1 Petrus 1:13). Soleki fa Bijbel sabiman R.C.H. Lenski e taki, dan den wortu ’de nanga krin frustan’ wani taki dati ’wan sma no e bruya esi-esi; a e prakseri bun fosi a du wan sani èn a e krutu sani na wan yoisti fasi, èn dati e meki taki a kan teki a yoisti bosroiti’. Meki wi go poti prakseri na wan tu situwâsi pe wi musu de nanga krin frustan.

Prakseri bun fosi yu bigin nanga wan bisnis

3. Efu wan sma kon aksi wi fu bigin wan bisnis nanga en, dan fu san ede wi musu prakseri bun, fosi wi teki wan bosroiti?

³ Kon meki wi taki dati wan sma di de fu frutrow, e aksi yu fu bigin wan bisnis nanga en. Kande a sma disi na wan anbegiman fu Yehovah. A kan taki a breiti fu di a e prakseri fa a bisnis kan waka bun, èn a e gi yu deki-ati fu teki wan bosroiti esi-esi so taki yu no lasi a moi okasi disi. Kande yu e bigin si kaba fa yu nanga na osofamiri fu yu e libi wan moro bun libi, èn kande yu e bigin denki srefi taki a bisnis disi kan gi yu a ten fu du moro na ini a Kresten gemeente. Ma Odo 14:15 e warskow wi taki: „Wan sma di no abi ondrofeni, e bribi ibri wortu, ma a koniwan e luku pe a e poti en futu.” Furu tron te wan sma e prakseri fu bigin wan bisnis, dan na ini a heri prisiri fu en, a no e denki bun san a kan lasi, sortu takru bakapisi a sani disi kan abi gi en, èn sortu sani di a no ben e fruwakti kan pasa (Yakobus 4:13, 14). Iya, na ini den sortu situwâsi dati a de prenspari trutru fu de nanga krin frustan ala ten!

4. Fa wi kan ’luku pe wi e poti wi futu’ te wi e prakseri fu bigin wan bisnis nanga wan sma?

⁴ Wan koni sma e prakseri bun, fosi a bigin wan bisnis nanga wan trawan (Odo 21:5). Te a sma disi e du dati, dan furu tron a e kon sabi sani di a no ben sabi fosi, èn di ben kan abi takru bakapisi gi en. Luku a situwâsi disi: Wan sma abi na prakseri fu bigin wan bisnis, èn dati meki a wani leni moni na yu. A e pramisi yu taki, efu yu leni en a moni dati, dan yu o meki furu moni. A sani di a sma e aksi yu kan gersi wan moi sani, ma san kan pasa efu a no e waka bun? A de so taki a sma di leni moni na yu, e agri fu pai yu a moni baka awinsi fa a bisnis fu en e waka, noso a o pai yu  baka soso te a bisnis fu en e waka bun? Nanga tra wortu, yu kan lasi yu moni te a bisnis no e drai? Wan tra sani di yu kan aksi yusrefi na disi: „Fu san ede a e suku fu leni moni na sma? A de so taki bangi no wani leni en a moni, fu di den e frede taki a bisnis fu en no o waka bun?” Te yu e teki ten fu prakseri san kan pasa, dan dati kan yepi yu fu denki bun fa a sani di a sma aksi yu, bifo yu teki wan bosroiti.—Odo 13:16; 22:3.

5. (a) Sortu koni sani Yeremia du di a bai wan pisi gron? (b) Te yu e du bisnis, fu san ede a bun ala ten fu meki wan dokumenti di e sori sortu kruderi yu meki nanga wan sma?

⁵ Di a profeiti Yeremia bai wan pisi gron na en neef di ben de wan anbegiman fu Yehovah, dan na fesi wan tu kotoigi, a meki wan dokumenti di ben sori taki a bai a gron fu en neef (Yeremia 32:9-12). Na ini a ten disi, wan koni sma o sorgu taki te a e du bisnis nanga trawan, awinsi na famiriman noso tra bribiman, a e meki wan dokumenti di e sori sortu kruderi a meki nanga a sma. * Te sma skrifi finifini sortu kruderi den meki nanga trawan èn te den e sreka sani bun na fesi, dan dati sa meki taki den no e kisi trobi èn taki den e tan abi wánfasi. Na a tra sei, te sma no e skrifi sortu kruderi den meki nanga trawan, dan furu tron dati na wan fu den sani di e tyari problema kon na mindri futuboi fu Yehovah te den e du bisnis nanga makandra. A de wan sari sani taki den sortu problema disi kan broko sma ati. A kan meki sma kisi bita-ati tu, èn a kan meki den go na baka na yeye fasi.

6. Fu san ede wi musu luku bun nanga bigi-ai?

⁶ Wi musu luku bun tu nanga bigi-ai (Lukas 12:15). Efu wan sma abi a howpu taki a o meki furu moni nanga wan bisnis, dan dati kan meki taki a no e prakseri fu den takru bakapisi di kan miti en èn a kan meki taki a bigin wan bisnis di no sa waka bun. Srefi son sma di ben abi moi grani na ini a diniwroko fu Yehovah, poti densrefi na ini a problema disi. Gado Wortu e gi wi a warskow: „No meki a fasi fa unu e libi sori taki unu lobi moni, ma un musu de tevrede nanga den sani di unu abi now” (Hebrewsma 13:5). Te wan Kresten e prakseri fu bigin nanga wan bisnis, dan a musu aksi ensrefi: ’A de fanowdu trutru fu bigin nanga a bisnis?’ Te wi de tevrede nanga sani soleki nyanyan, krosi, nanga wan presi fu tan, èn te wi e poti na anbegi fu Yehovah na a fosi presi na ini wi libi, dan dati sa kibri wi gi „ala sortu ogri sani”.—1 Timoteyus 6:6-10.

Den problema di Kresten abi di no trow

7. (a) Sortu tyalensi e miti furu Kresten di no trow? (b) Fa wi kan sori taki wi wani tan getrow na Yehovah te wi e suku wan trowpatna?

⁷ Furu futuboi fu Yehovah wani trow, ma den no feni wan bun patna ete. Na ini son kondre, a libimakandra drape e fruwakti taki sma musu trow, èn dati kan de wan bigi tyalensi gi sma di no trow. Ma a kan taki wan Kresten no man feni wan trowpatna so makriki na mindri tra Kotoigi na ini a Kresten gemeente (Odo 13:12). Toku Kresten sa wani hori densrefi na a komando di Bijbel e gi fu trow „soso na ini Masra”, fu di na so fasi den e sori taki den wani tan getrow na Yehovah (1 Korentesma 7:39). Efu Kresten di no trow no wani taki sma e dwengi den fu trow èn efu den wani kakafutu gi den tesi di den e kisi, dan den musu de nanga krin frustan ala ten.

8. Sortu tesi wan yongu uma fu Sulem ben ondrofeni, èn fa wan Kresten uma na ini a ten disi kan kisi a srefi tesi?

⁸ A Singi fu Salomo e taki fu wan yongu uma fu Sulem di a kownu feni moi. A yongu uma disi no  gudu, èn a kweki na wan boitipresi. A abi firi kaba gi wan tra yonkuman, ma toku a kownu e pruberi fu korikori en nanga den furu gudu di a abi, iya, a e pruberi fu drai a meisje ede nanga den kefalek sani di a du, èn nanga moi wortu (Singi fu Salomo 1:9-11; 3:7-10; 6:8-10, 13). Efu yu na wan Kresten uma, dan a kan taki wan sma e suku yu, aladi yu no abi firi gi en. A kan taki wan sma na wrokope, kande wan fu den bigi basi, e bigin prèise yu. A kan taki a e bigin du sani gi yu, noso taki a e suku okasi fu de nanga yu. Luku bun te sma e pruberi fu korikori yu na so wan fasi. Aladi a no abi fu de so taki a sma e suku fu de nanga yu, noso taki a e suku fu abi seks nanga yu, toku furu tron dati na san den sortu sma disi wani. Neleki a yongu uma fu Sulem, na so yu musu de „wan skotu” (Singi fu Salomo 8:4, 10). Efu wan sma e du sani fu sori taki a wani de nanga yu, aladi yu no wani, dan sori a sma krin fa yu e denki. Meki den sma na yu wrokope kon sabi na a bigin kaba, taki yu na wan Yehovah Kotoigi èn gebroiki ibri okasi fu gi kotoigi na den. Te yu e du dati, dan dati sa de wan kibri gi yu.

9. San na wan tu takru bakapisi di kan miti yu, te yu e go tapu Internet fu hori nanga wan sma di yu no sabi? (Luku a faki na tapu bladzijde 25.)

⁹ Na ini a ten disi, furu sma e gebroiki a computer fu go tapu Internet fu suku wan trowpatna. Son sma e si disi leki wan sani fu yepi den fu kon sabi sma di den no ben o kon sabi na wan tra fasi. Ma te yu e hori nanga wan sma di yu no sabi, dan dati kan abi furu takru bakapisi gi yu. Te yu de tapu Internet, dan a muilek fu kon sabi san tru èn san no tru (Psalm 26:4). A no ala ten te wan sma e taki dati a de wan futuboi fu Yehovah, dan dati de so trutru. Boiti dati, sma di e hori nanga makandra nanga yepi fu Internet, kan kisi tranga firi gi makandra makriki, èn dati kan meki taki den no man si sani moro na wan yoisti fasi (Odo 28:26). A no de wan koni sani fu abi wan krosibei banti nanga wan sma di yu no sabi so bun, awansi tapu Internet yu e gebroiki noso wan tra sani.—1 Korentesma 15:33.

10. Fa Kresten di no trow ete kan kisi deki-ati fu tra brada nanga sisa?

¹⁰ Yehovah ’lobi den futuboi fu en trutru’ (Yakobus 5:11). A sabi taki son tron den problema di Kresten e kisi fu di den no man trow, kan meki den lasi-ati, èn a e warderi a loyaalfasi fu den. Fa trawan kan gi den deki-ati? We, den sma disi e tan gi yesi na Yehovah èn den e du sani gi trawan sondro fu denki densrefi nomo, èn dati meki wi musu prèise den doronomo (Krutuman 11:39, 40). Te wi orga wan prisiri demakandra, dan wi kan gi den wan kari tu, so taki den kan abi demakandra nanga sma di sa gi den deki-ati. Yu du dati na ini a ten di pasa? Boiti dati, wi kan aksi Yehovah na ini begi fu yepi den fu tan tranga na  yeye fasi èn fu abi prisiri na ini a dini di den e dini en. Meki wi sori taki wi e warderi den loyaal wan disi neleki fa Yehovah e du dati, fu di wi e poti prakseri na den na wan opregti fasi.—Psalm 37:28.

Fa fu handri te yu siki

11. Sortu tyalensi wan sma kan abi te a abi seryusu problema nanga en gosontu?

¹¹ A e meki wi lasi-ati trutru te wi, noso wan lobiwan fu wi abi wan seryusu siki! (Yesaya 38:1-3) Te wi e suku bun datrayepi, dan a de tumusi prenspari fu gi yesi na Bijbel gronprakseri. Fu eksempre, Kresten e sorgu taki den e gi yesi na a komando di skrifi na ini Bijbel taki den no musu teki brudu. Den e sorgu tu taki den no e teki datrayepi di abi fu du nanga afkodrei, soso fu kon betre baka, noso fu tan gosontu (Tori fu den Apostel 15:28, 29; Galasiasma 5:19-21). Ma gi den wan di no sabi furu fu datratori, a kan de wan bigi tyalensi fu kon sabi sortu datrayepi bun gi den, iya, a kan bruya den srefi. San kan yepi wi fu de nanga krin frustan ala ten?

12. Fa wan Kresten kan kon abi a yoisti denki fu den difrenti sortu datrayepi di de?

¹² „A koniwan e luku pe a e poti en futu”, fu di a e ondrosuku sani moro fini na ini Bijbel èn na ini Kresten publikâsi (Odo 14:15). Son presi de na grontapu di no abi furu datra nanga ati-oso, èn a kan taki osodresi na den wan-enkri dresi di den sma drape abi. Efu wi e prakseri fu gebroiki den dresi disi, dan kande wi kan feni wan tu moi rai na ini De Wachttoren fu 15 april 1987, bladzijde 26-29. A tijdschrift disi e yepi wi fu luku bun nanga ogri di kan miti wi. Fu eksempre, kande wi musu kon sabi den sani disi: A de so taki a dresiman e wroko nanga bonu? A de so taki a fasi fa a e dresi sma e sori taki a e bribi taki sma e siki èn dede fu di den e meki den gado (noso den yeye fu den afo fu den) atibron? A de so taki a e bribi taki sma kon siki fu di feanti wisi den? Te a e meki a dresi, yu sabi efu a e tyari ofrandi, efu a e taki mofo, noso efu a e du tra sani di abi fu du nanga bonu? (Deuteronomium 18:10-12) Te wi e ondrosuku sani na so wan fasi, dan dati sa yepi wi fu gi yesi na a rai fu Bijbel di e taki: „Ondrosuku ala sani finifini, èn tan hori yusrefi na sani di bun” (1 Tesalonikasma 5:21). * A sa yepi wi fu no feni nomonomo taki a wan dresi betre moro a trawan.

13, 14. (a) Fa wi kan sori taki wi de nanga krin frustan te wi e poti prakseri na a gosontu fu wi? (b) Fu san ede wi musu luku bun fa wi e taki nanga trawan fu gosontu tori èn fu datratori?

¹³ Na ini ala sani di wi e du na ini a libi wi musu de nanga krin frustan, srefi te a abi fu du nanga wi gosontu (Filipisma 4:5). Te wi e poti prakseri na a gosontu fu wi na a yoisti fasi, dan dati e sori taki wi e warderi a libi di wi kisi leki wan warti kado. Te wi siki, dan a de fanowdu taki wi suku datrayepi. Ma wi sa gosontu dorodoro, soso te a ten doro taki Gado sa „dresi den pipel” (Openbaring 22:1, 2). Wi musu luku bun fu no poti so furu prakseri na wi gosontu, taki wi e frigiti den moro prenspari sani di wi abi fanowdu na yeye fasi.—Mateyus 5:3; Filipisma 1:10.

¹⁴ Te wi e taki nanga trawan fu datratori, dan wi musu luku bun dati wi no e taki tumusi furu fu en èn wi musu luku bun tu fa wi e taki fu en. Te wi e go na den Kresten konmakandra nanga den bigi konmakandra fu de nanga wi brada nanga sisa fu kisi deki-ati, dan wi no sa taki nanga den soso fu wi gosontu, noso fu datratori. Boiti dati, a datrayepi di wan sma e bosroiti fu teki, abi fu du nanga Bijbel gronprakseri, a konsensi fu en,èn a banti di a abi nanga Yehovah. Fu dati ede, a no  ben o de wan lobi-ati sani te wi ben o dwengi wan tra bribiman fu du san wi e taigi en, noso fu dwengi en fu no arki a konsensi fu en. Aladi wan sma kan suku rai na wan lepi brada noso sisa na ini a gemeente, toku ibri Kresten musu „tyari en eigi lai”, noso teki a frantwortu gi den bosroiti di a e teki, èn „ibriwan fu wi o abi fu gi Gado frantwortu”.—Galasiasma 6:5; Romesma 14:12, 22, 23.

Te wi abi broko-ede

15. Fa wi kan handri son leisi, te sani e miti wi di e gi wi broko-ede?

¹⁵ Srefi getrow futuboi fu Yehovah kan taki, noso du dondon sani, te sani e miti den di e gi den broko-ede (Preikiman 7:7). Di Yob ben e kisi hebi tesi, dan a ben kon abi wan fowtu fasi fu denki, ma a ben musu leri fu kon si sani na a yoisti fasi baka (Yob 35:2, 3; 40:6-8). Aladi „Moses ben de a moro safri-ati sma fu ala libisma di ben de na grontapu”, toku na wán okasi a ben kisi so wan bigi atibron, taki a taki sani sondro fu prakseri bun fosi (Numeri 12:3; 20:7-12; Psalm 106:32, 33). Na wan heri moi fasi, David ben sori taki a ben man dwengi ensrefi fu no kiri Kownu Saul, ma di Nabal taki hati sani fu David èn a kosi den fetiman fu en, David atibron srefisrefi èn a ben lasi ensrefi. Na di Abigail kon taki nanga en, dan a kisi ensrefi baka, èn na so fasi a ben kan wai pasi gi wan bigi fowtu di a ben o meki.—1 Samuel 24:2-7; 25:9-13, 32, 33.

16. San kan yepi wi fu denki, fosi wi du wan sani?

¹⁶ Wi srefi kan kisi fu du nanga sani di e gi wi broko-ede. Dati kan meki taki wi no man si sani na wan yoisti fasi moro. Te wi e prakseri bun fu den sani di trawan e taigi wi, neleki fa David ben du, dan dati sa yepi wi fu no handri sondro fu denki bun fosi èn fu no hasti wisrefi fu du sondu (Odo 19:2). Gado Wortu e gi wi a deki-ati disi tu: „De nanga atibron, ma no sondu. Taki san yu abi fu taki, ma du dati na ini yu ati, te yu de na tapu yu bedi, èn tan tiri” (Psalm 4:4). Fosi wi du wan sani, noso teki wan bosroiti, dan a bun fu wakti, teleki wi man denki krin baka, efu a kan (Odo 14:17, 29). Wi kan begi Yehovah fayafaya, „èn a vrede fu Gado di bigi moro leki san libisma man frustan, sa kibri [wi] ati èn [wi] frustan nanga yepi fu Krestes Yesus” (Filipisma 4:6, 7). A korostu firi disi di Gado e gi wi, sa meki taki wi e kisi wisrefi baka, èn a sa yepi wi fu tan nanga krin frustan ala ten.

17. Fu san ede wi musu frutrow tapu Yehovah fu kan de nanga krin frustan ala ten?

¹⁷ Awinsi wi meki tranga muiti fu wai pasi gi ogri èn fu handri nanga koni, toku wi alamala e meki fowtu (Yakobus 3:2). A kan taki wi o meki wan bigi fowtu, sondro fu wi sabi (Psalm 19:12, 13). Boiti dati, sondro Yehovah wi leki libisma, no man bosroiti gi wisrefi fa wi musu handri, èn wi no abi a reti srefi fu du dati (Yeremia 10:23). Wi breiti trutru taki a e gi wi a deki-ati disi: „Mi sa meki yu kisi a koni fu man si sani krin èn mi sa leri yu a pasi di yu musu waka. Mi sa gi yu rai nanga mi ai na yu tapu” (Psalm 32:8). Iya, Yehovah kan yepi wi fu de nanga krin frustan ala ten.

[Futuwortu]

San yu ben sa piki?

Fa wi kan tan nanga krin frustan ala ten

• te wan sma wani du bisnis nanga wi?

• te wi e suku wan trowpatna?

• te wi siki?

• te sani e miti wi di e gi wi broko-ede?

[Aksi fu a tori disi]

[Faki na tapu bladzijde 25]

Yu kan frutrow a sani disi?

Sma kan gebroiki a computer fu go tapu Internet pe den kan suku wan trowpatna. Drape yu kan leisi den sani disi:

„Aladi wi du ala san wi man fu kon sabi den sma di e gebroiki a yepisani disi, toku wi no kan gi yu a dyaranti taki den sani di a sma skrifi fu ensrefi de tru.”

„Wi no kan gi yu a dyaranti taki ala sani di yu e leisi dyaso de tru, soifri, noso bun.”

„Den sani di skrifi dyaso no kon fu wi, ma na tra sma skrifi den. Na den poti den eigi denki, noso gi den eigi rai. Den skrifi sani fu densrefi, . . . ma den sani dati no abi fu de tru.”

[Prenki na tapu bladzijde 23]

„A koniwan e luku pe a e poti en futu”

[Prenki na tapu bladzijde 24, 25]

Fa Kresten uma kan waka baka na eksempre fu a yongu uma fu Sulem?

[Prenki na tapu bladzijde 26]

„Ondrosuku ala sani finifini, èn tan hori yusrefi na sani di bun”