Yu e memre disi ete?

Yu ben prisiri fu leisi den Waktitoren di kon na doro no so langa pasa? We, luku efu yu kan gi wan piki tapu den aksi di e kon now:

• San na wan tu sani di e meki taki sma e du so furu ogri na ini a ten disi?

Wán sani di e meki taki sma e du ogri, na taki nofo tron densrefi e prakseri soso takru sani (Genesis 8:21). Ete wan sani, na taki furu sma no sabi soifri san na a wani fu Gado. Wan tra sani, na taki Satan, a fosi sma di du ogri, e tan abi krakti tapu den afersi fu libisma.—1/1, bladzijde 4-6.

• Sortu bun bakapisi a kan abi te wi e taki wan bun sani na a yoisti ten? (Odo 12:25)

Te wi e taigi wan sma wan bun sani na a yoisti ten, dan dati kan gi a sma a firi taki a warti trutru. A kan gi a sma deki-ati tu èn a kan gi en a firi taki wi lobi en. Boiti dati, efu wi e pruberi fu prèise sma, dan dati sa yepi wi fu poti prakseri na a bun sei fu den.—1/1, bladzijde 16, 17.

• San ben de na ini na ark fu a frubontu?

Na ini na ark fu a frubontu yu ben abi tu plata ston pe a Wet ben skrifi na tapu. Na ini na ark pikinso mana ben de tu. Baka di Korak opo ensrefi teige Gado, sma poti a tiki fu Aron na ini na ark fu a frubontu. Disi ben musu memre sma sortu ogri a pipel na ini a ten fu Korak, ben du (Hebrewsma 9:4). Kande a de so, taki bifo Salomo gi a tempel abra na Gado, sma puru a tiki fu Aron nanga a mana di ben de na ini na ark fu a frubontu.—15/1, bladzijde 31.

• Fu san ede den Dyu di ben e libi na ini a ten fu Nehemia, ben musu tyari udu go na a tempel?

A Wet di Gado ben gi Moses no ben gi sma a komando taki den ben musu tyari udu go na a tempel. Ma na ini a ten fu Nehemia, bun furu udu ben de fanowdu fu man bron den srakti-ofrandi na tapu na altari.—1/2, bladzijde 11.

• San na a dokumenti di Muratori tyari kon na doro?

A de wan pisi fu wan dokumenti di skrifi na ini Latijntongo. A ben skrifi fosi na ini Grikitongo na a kaba fu a di fu tu yarihondro fu wi Gewoon Teri. A de a moro owru dokumenti di abi den nen fu den Kresten Griki Buku fu Bijbel na ini, èn disi e buweisi taki den buku disi de wan pisi fu Bijbel trutru. A dokumenti disi e taki sani tu fu den Kresten Griki Buku fu Bijbel buku nanga den skrifiman.—15/2, bladzijde 13, 14.

• Fu san ede Umakownu Fasti ben e tan weigri fu go na a kownu? (Ester 1:10-12)

Bijbel no e taki fu san ede a ben e weigri fu go. Son sabiman e taki dati a ben weigri fu di a no ben wani lagi ensrefi na fesi den drungu fisitiman fu a kownu. Noso kande na umakownu disi di ben moi srefisrefi, no ben wani saka ensrefi na ondro a kownu trutru. A sani disi ben meki taki a no ben de wan bun eksempre gi den tra wefi di ben e libi na ini a Kownukondre fu Persia.—1/3, bladzijde 9.

• Fa a lusu-paiman kan frulusu wi?

Na ofrandi fu Yesus kan frulusu wi fu a sondu di wi kisi fu Adam nanga Eva. A kan frulusu wi tu fu sani di e tyari dede kon fu di wi abi sondu (Romesma 6:23). Te wan tru Kresten e bribi taki Krestes tyari na ofrandi disi, dan dati sa yepi en fu no abi konsensi fonfon moro. Sosrefi, te wi e bribi taki a pai a lusu-paiman, dan wi no abi fu frede moro taki Gado no sa feni wi bun (1 Yohanes 2:1).—15/3, bladzijde 8.

• Na ini a Wet di Gado gi Moses ben skrifi taki sma no ben musu bori wan pikin krabita na ini a bobimerki fu en mama. San wi kan leri fu a wet disi? (Exodus 23:19)

A kan taki a gwenti disi fu bori wan pikin krabita na ini a bobimerki fu en eigi mama, ben de wan gwenti fu den trakondre sma di ben anbegi falsi gado. Den ben e bribi taki efu den ben o du disi, dan dati ben o meki alen fadon (Lefitikus 20:23). Gado meki wan mama krabita na so wan fasi taki a kan gi a pikin fu en bobimerki, so taki a kan gro. Efu sma ben o bori wan pikin krabita na ini a bobimerki fu en mama, dan dati ben o sori taki den no ben e lespeki a fasi fa Gado ben seti sani na mindri a mama krabita nanga a pikin krabita. Gado ben poti wan wet di ben e tapu sma fu du so wan sani. Disi e sori taki Gado abi safu-ati.—1/4, bladzijde 31.