A preikiwroko e go na fesi na ini Uganda

UGANDA de na a owstusei fu Afrika, leti na mindrisei fu a bigi lagipresi di nen Great Rift Valley. A kondre disi di de na tapu na agersi lin di e prati grontapu na ini tu pisi, na wan heri moi kondre. Uganda abi bergi, lagipresi, bun furu busi, nanga difrenti sortu meti. Fu di a kondre disi de na ini a bigi hei kontren fu Afrika, meki a weer drape no faya tumusi, èn yu abi wan moi kontren di langa hondrohondro kilometer, èn di lai nanga bergi.

Na ini wan tu pikin kondre nomo a de so taki snew e fadon na a wan sei fu a kondre, èn taki a waran na a tra sei fu a kondre. Uganda na wan fu den kondre disi. Na a westsei fu a kondre yu abi den Bergi fu a Mun, noso den Ruwenzoribergi di abi snew na tapu na ede fu den, èn na a owstusei yu abi presi pe alen no e fadon so furu. Na ini den opo presi fu Uganda yu abi asaw, bofru, nanga lew. Na tapu den bergi, èn sosrefi dipi na ini den busi yu abi bigi kesikesi, soleki gorilla nanga chimpansee, èn moro leki 1000 difrenti sortu fowru. Furu kondre na ini Afrika e pina fu di bigi dreiten de drape èn fu di furu sma de nanga angri, ma Uganda abi bun furu liba nanga presi pe watra de. Wan fu den presi disi na a Victoriameer, di de wan fu den moro bigi meer na grontapu. Na a noordsei wan pikin liba e meki a Victoriameer miti a Nijl-liba. Fu dati ede, a no e fruwondru wi taki wan heiman fu Ingrisikondre ben kari a kondre disi „a peri fu Afrika”!

„A peri” e brenki na ini a ten disi

Ma a moro moi sani fu Uganda, na den sma fu a kondre, fu di den abi switifasi, èn fu di den abi difrenti kulturu. Na ini a kondre disi pe moro furu sma e kari densrefi Kresten, difrenti sortu pipel nanga kulturu de. Te nanga a dei fu tide den sma disi abi den eigi gwenti nanga den eigi fasi fa den e weri krosi.

Na ini a ten disi, moro nanga moro fu den Ugandasma e arki a bun nyunsu fu Bijbel di e taki fu a ten te vrede sa de na heri grontapu (Psalm 37:11; Openbaring 21:4). A no makriki fu tyari a boskopu disi gi ala sma, fu di a kondre disi bigi leki Ingrisikondre.

A preikiwroko disi bigin go na fesi di a fosi  sma fu a kondre dati teki dopu leki wan Kotoigi fu Yehovah na ini 1955. A sma dati teki dopu na ini a Victoriameer. Te fu kaba „a pikinwan” gro kon tron wán dusun preikiman na ini 1992. Sensi a ten dati a wroko tan go na fesi. A sani disi de akruderi a dyaranti di Gado ben gi di a ben taki: „Misrefi, Yehovah, sa meki a go moro esi te a ten gi dati doro.”

Den Kotoigi e preiki gi sma di e taki wan tra tongo

Ingrisitongo na a moro prenspari tongo fu a kondre èn pikinmoro ala sma e taki a tongo disi, spesrutu na skoro. Ma toku disi no de a mamatongo fu furu Ugandasma. Fu dati ede, den Yehovah Kotoigi e meki muiti fu preiki a bun nyunsu na ini den tongo di bun furu sma e taki. A sani disi ben de prenspari, fu di moro leki 80 procent fu den 25 milyun sma na ini a kondre e libi na ini boitipresi, noso na ini pikin foto. Na ini na aladei libi, den sma disi moro furu e taki a mamatongo fu den nanga makandra. Den Kotoigi musu meki furu muiti fu man tyari a boskopu disi gi den sma dati, èn fu man gi den san den abi fanowdu na yeye fasi.

Toku, Yehovah Kotoigi pruberi fu yepi den sma disi fu di den e gi kotoigi na sma na ini den eigi tongo, èn fu di den e sreka Bijbel publikâsi na ini difrenti tongo. Na a Bijkantoro na ini a mamafoto Kampala, grupu sma e vertaal publikâsi na ini fo tongo, namku Acholitongo, Lhukonzotongo, Lugandatongo, nanga Runyankoretongo. Boiti dati, na ini a heri kondre, den Kotoigi hori bigi konmakandra na ini difrenti tongo, èn tu tron so furu sma leki a nomru fu Yehovah Kotoigi na ini Uganda, ben kon na den konmakandra disi. A sani disi e sori krin taki a muiti di den Kotoigi e du fu fruteri sma a bun nyunsu na ini difrenti tongo, e meki taki a wroko e go na fesi heri esi. Ma moro de fu du ete.

Pionier e teki fesi na ini a wroko

Ibri yari den gemeente e teki prati na programa di seti fu go preiki sowan dri mun langa na ini farawe kontren (Tori fu den Apostel 16:9). Moro nanga moro fayafaya yongu pionier, noso furu ten preikiman e teki fesi na ini a wroko disi. Den e go na farawe kontren, èn son leisi den sma drape noiti bifo no yere a bun nyunsu.

Tu Kotoigi ben musu go dini dri mun langa leki spesrutu pionier na ini Bushenyi, wan pikin  foto na a westsei fu Uganda. Den go preiki makandra nanga a wan-enkri Kotoigi fu Yehovah di de na ini a kontren dati, èn den yepi en sosrefi fu orga Kresten konmakandra. Na ini wán mun ten, den tu pionier ben man studeri Bijbel nanga 40 sma, èn 17 fu den sma dati bigin go na den konmakandra fu Yehovah Kotoigi. Den pionier e fruteri: „Sonwan fu den sma di wi ben gi wan brochure di nen San Gado e aksi foe wi? * kon na wi oso wan tu dei baka dati, èn den sori wi wan tu pisi papira pe den ben skrifi den piki tapu den aksi na ini a brochure. Den ben wani sabi efu den piki ben bun.” Tide na a dei, wan gemeente de na ini a foto dati, èn a gemeente disi abi en eigi Kownukondre zaal.

Tu pionier go na wan kontren na a westsei fu Uganda pe sma noiti bifo ben yere a bun nyunsu. Den ben skrifi: „Den sma dyaso e angri fu yere a waarheid fu Bijbel. Na ini den dri mun di wi de dyaso, wi ben man hori 86 bijbelstudie.” Fosi yu denki, wan grupu fu Kotoigi ben seti na ini a kontren dati.

Tra fayafaya preikiman di e yepi nanga a wroko

Sonwan fu den fayafaya pionier e dini furu yari langa kaba. Bifo Patrick ben tron wan Kotoigi fu Yehovah, a ben e prei poku na ini a legre fu Idi Amin, a tiriman fu Uganda. Na ini 1983 Patrick teki dopu, èn siksi mun baka dati, a go na ini a furuten diniwroko. Tide na a dei, a de wan kring-opziener di e go na difrenti gemeente fu gi den deki-ati.

Margaret teki dopu na ini 1962. Aladi a ben abi pikinmoro 80 yari èn a dyonku fu en ben e gi en problema, toku a e wroko sowan 70 yuru wan mun na ini a preikiwroko, fu fruteri den birtisma fu en fu a howpu di Bijbel e gi. A e poti den publikâsi na tapu wan bangi na fesi en oso, èn a e taki nanga iniwan sma di e waka pasa èn di wani arki a bun nyunsu di abi fu du nanga wan grontapu pe vrede sa de.

Simon, wan gronman fu na owstusei fu Uganda, ben e suku a waarheid 16 yari langa kaba. Na ini 1995 a feni wan tu publikâsi di Yehovah Kotoigi tyari kon na doro. Den sani di a leisi meki taki a ben e angri fu kon sabi moro fu Gado Kownukondre èn fu a tumusi moi prakseri di Yehovah abi gi grontapu. Fu di nowan Yehovah Kotoigi no ben de na ini Kamuli, a dorpu pe Simon ben e libi, meki a go na a foto Kampala di ben de sowan 140 kilometer moro fara, fu suku den Kotoigi disi. Tide na a dei, wan gemeente de na ini a dorpu fu en.

 „Yehovah Kotoigi no e gowe moro”

Soleki fa a de na ini tra kontren na ini Afrika, na so furu sma wani si taki wan kerki grupu abi wan bun presi pe den e kon makandra fu anbegi. A sani disi ben de wan bigi problema gi sonwan fu den gemeente fu Yehovah Kotoigi, fu di den no ben abi a moni fu bow wan bun Kownukondre zaal. Wi no man taki fa den brada disi ben de nanga tangi di wan programa ben seti na a kaba fu 1999, fu bow Kownukondre zaal na ini wan syatu pisi ten na heri grontapu. Na ini den feifi yari baka dati, 40 nyun Kownukondre zaal bow na ini Uganda. Tide na a dei, pikinmoro ala den gemeente abi den eigi Kownukondre zaal di bow sondro tumusi furu pranpran. Te den brada e bow den zaal disi, dan den sma na ini a kontren drape e kon frustan taki „Yehovah Kotoigi no e gowe moro”. A sani disi meki taki a wroko go na fesi.

Wan pikin gemeente na a noordsei fu Uganda ben gwenti fu hori konmakandra na ondro wan tu bigi manyabon. Di den Kotoigi feni wan pisi gron, dan a wroko go na fesi heri esi. Den brada fu a bow-grupu bigin bow a Kownukondre zaal, makandra nanga den Kotoigi fu a presi drape. Na ini a birti drape, wan man di ben de wan prenspari politiekman fosi, no ben man bribi di a si fa a wroko ben e go. A taigi den brada taki den ben kan gebroiki a presi pe a ben e poti en wagi, fu hori konmakandra teleki a Kownukondre zaal ben kaba bow. A bigin studeri Bijbel tu nanga wán fu den brada fu a bow-grupu. Now a de wan fayafaya preikiman di dopu, èn a e prisiri fu anbegi Yehovah na ini a moi nyun Kownukondre zaal dati!

Di wan Kownukondre zaal ben e bow na a zuid-owstusei fu a kondre, dan wan mesreman ben si fa den Kotoigi ben e sori switifasi nanga lobi gi trawan, èn fa den ben e wroko makandra. A ben lobi a sani disi so te, taki a bosroiti fu yepi den nanga a wroko. Di a wroko ben e kon na wan kaba, dan a wroko a heri neti srefi fu yepi den brada fu klari a Kownukondre zaal, so taki den ben kan gi en abra na Yehovah a mamanten baka dati. A man disi ben taki: „Unu na den wan-enkri sma di no e taki nomo dati den lobi makandra trutru, ma unu e du dati tu.”

A wroko e go na fesi aladi problema de

Now di den Kotoigi e preiki na ini nyun kontren na ini Uganda, a nomru fu Kotoigi e tan gro, èn furu sma di wani sabi moro fu a waarheid, e kon na den gemeente. Ma den brada e broko den ede trutru nanga a bigi nomru fu sma di lowe gowe fu a kondre fu den fu kon tan na ini Uganda. A pipel fu Yehovah na ini den kondre krosibei fu Uganda, ben e pina tu leki bakapisi fu borgu-orloku. Kotoigi na ini den loweman kampu sori taki den abi bigi frutrow na ini Yehovah. Wan fositen heiman fu wan kondre krosibei fu Uganda, ben frufolgu den Kotoigi na a ten di a wroko fu den ben tapu na ini a kondre dati. A man disi e taki dati a ben abi wan switi libi. A ben studeri Bijbel na ini wan fu den loweman kampu, èn a tron wan Kotoigi bakaten. A ben taki: „Na ini a grontapu disi, wan gudu libi nanga wan hei posisi no abi waarde trutru. Mi pôti èn mi e siki now, ma toku mi abi wan moro bun libi leki fosi. Mi sabi Yehovah, èn mi de nanga tangi taki mi kan taki nanga en na ini begi. Aladi mi abi wan tranga howpu gi a ten di e kon, toku mi sabi fu san ede mi musu horidoro te mi e kisi problema na ini a ten disi. Fu dati ede mi abi wan korostu firi di noiti bifo mi ben abi.”

Sma e taki dati efu yu e poti wan tiki na ini a fatu gron fu Uganda na neti, dan mamanten a sa sutu rutu. Fu di a wroko e go na fesi na ini a kondre dati, meki wi kan taki dati a gron na yeye fasi fatu tu. A wroko e gro heri bun tu. Wi e taki Yehovah Gado tangi fu di a gi moro fu den difrenti pipel na ini Uganda na okasi fu kon sabi a Kownukondre fu en. Yesus ben agersi a Kownukondre nanga wan „peri di warti furu”. Moro nanga moro Ugandasma e kon sabi a Kownukondre dati.—Mateyus 13:45, 46.

[Futuwortu]

[Karta na tapu bladzijde 8]

(Efu yu wani si pe den sani disi skrifi, luku a tijdschrift)

SUDAN

UGANDA

Nijl-liba

Kamuli

Tororo

Kampala

Bushenyi

Victoria-meer

KENIA

TANSANIA

RWANDA

[Prenki na tapu bladzijde 9]

Dri fu den someni fayafaya pionier

[Prenki na tapu bladzijde 10]

Patrick

[Prenki na tapu bladzijde 10]

Margaret

[Prenki na tapu bladzijde 10]

Simon

[Prenki na tapu bladzijde 10]

Wan distrikt kongres na ini Tororo

[Sma di abi a reti fu a prenki na tapu bladzijde 8]

Background: © Uganda Tourist Board