Telefisi man yepi papa nanga mama fu kweki den pikin bun?

SON leisi yu kan si en leki wan bun sani fu poti den pikin fu yu meki den luku telefisi, aladi yu e du tra sani. Ma sortu krakti a sani disi kan abi tapu den pikin fu yu?

„Te sma e bari, e lafu, noso e krei tapu telefisi, dan dati kan abi krakti tapu yongu pikin srefi”, na so wan koranti e taki (The New York Times). No so langa pasa, sabiman du wan ondrosuku pe den meki pikin-nengre di abi wán yari, luku syatu felem. Na ini den felem disi, wan umasma ben e sori fa a ben e firi te a ben si wan spesrutu preisani. A koranti e taki: „Te na uma na ini a felem ben e frede gi wan preisani, dan den yongu pikin no ben e prei nanga a sani dati, èn moro furu den ben e frede, den ben e swa den fesi, noso den ben e bari krei. Te na uma ben lobi a preisani, dan moro furu den yongu pikin ben wani prei nanga a sani dati.”

A no de fu taki, dati telefisi kan abi krakti tapu yongu pikin. Ma sortu krakti telefisi abi tapu pikin-nengre baka wan langa pisi ten? Datra Naoki Kataoka, na wan professor di ondrosuku pikin-nengre siki, èn di e wroko na a heiskoro di nen Kawasaki Medical College, na ini a foto Kurashiki, na Yapan. A datra disi ondrosuku furu pikin di tiri srefisrefi èn sma no man si efu den e prisiri, noso efu den e sari. Ala den pikin disi ben luku telefisi noso video wan heri pisi ten. Wan boi di ben abi tu yari no ben man abi bun takimakandra nanga sma, fu di a no ben sabi furu wortu. Sensi a boi disi ben abi wán yari, a ben gwenti luku video fu mamanten te go miti neti. Datra taigi a boi en mama fu no meki a luku video moro, èn fu prei nanga en. Na di a mama du dati, dan fosi a boi kon sabi moro wortu safrisafri. Iya, papa nanga mama musu taki nanga den pikin fu den, èn den musu du sani makandra nanga den.

Yehovah Gado, a Sma di seti na osofamiri, sori krin o prenspari a de fu du sani makandra leki osofamiri, èn san na a moro bun fasi fu du dati. Langa ten pasa a ben taigi a pipel fu en: „Yu musu poti [Gado Wortu] go dipi na ini a manpikin fu yu èn taki fu den te yu e sidon na ini yu oso èn te yu e waka na pasi èn te yu e go didon èn te yu e opo” (Deuteronomium 6:7). A no telefisi, ma na papa nanga mama kan gi pikin a moro bun leri nanga yepi fu den sani di den e taki èn e du, „akruderi a pasi di fiti” gi den.—Odo 22:6.