Wan sani di o meki wi de koloku trutru

ALA libisma abi a reti fu „pruberi fu kon de koloku”. Na so den sma ben denki di meki a dokumenti di e sori taki Amerkankondre teki srefidensi. Ma fu pruberi fu doro wan marki èn fu doro wan marki trutru, na tu sani. Aladi a de so taki furu yonguwan e pruberi fu tron pôpi pokuman, singiman, nanga sportman, omeni fu den e kon pôpi trutru? „Yu no sa kon pôpi so makriki”, na so wan pôpi singiman e taki di ben abi fu meki tranga muiti fu kon tron wan bigi pokuman.

Efu yu feni taki yu no sa man de koloku, dan yu no abi fu lasi-ati. Te yu e pruberi na a yoisti fasi fu kon de koloku, dan yu sa kon de koloku trutru. Fu san ede dati de so? Na artikel na fesi ben taki fu „a koloku Gado”, Yehovah (1 Timoteyus 1:11). Na ini Bijbel, Gado e sori wi san wi musu du so taki a muiti di wi e meki fu kon de koloku, no sa de fu soso. Yehovah kan yepi yu te yu e kisi fu du nanga den sani di e meki sma sari furu tron. Fu eksempre, luku fa a e trowstu yu te wan lobiwan fu yu dede.

Te wan lobiwan fu yu dede

Dede e tyari bun gi libisma? Dede e prati papa nanga mama fu den pikin fu den. A e prati bun mati fu makandra, èn a e meki taki sma na ini wan libimakandra no abi a dyaranti moro taki sani sa waka bun gi den. Te wan sma na ini wan famiri dede, dan dati kan meki taki na osofamiri di ben de koloku fosi, e sari srefisrefi.

A no de fu taki dati dede na wan sari sani. Ma son sma no e agri nanga dati, fu di den feni  taki dede na wan blesi. Luku san pasa, baka di na ogri winti Katrina wai na ini a kontren fu a Golf fu Meksikow na ini augustus 2005. Na a beri fu wán fu den sma di lasi en libi, wan domri ben taki: „A no Katrina kiri en. Na Gado kari en kon na hemel.” Fu di wan ati-oso wrokoman ben wani trowstu wan yongu uma di en mama dede, meki a taigi na uma fu no broko en ede, bika Gado ben teki en mama go na hemel. Na uma bari krei: „Ma fu san ede a ben abi fu teki en puru na mi?”

A no de fu taki dati den fowtu denki disi di sma abi fu den dedewan, furu tron no e trowstu sma. Fu san ede? Fu di den denki disi no e sori san e pasa trutru nanga den dedewan. San de moro ogri srefi, na taki den e meki sma denki taki Gado e teki den lobiwan puru fu den famiri nanga mati fu den, èn taki a e du dati na wan fasi di e gi sma sari. Na presi taki den denki disi e trowstu sma, den e meki sma si Gado leki wan ogriman di e meki taki sma dede. Ma Gado Wortu e sori san e pasa trutru nanga den dedewan.

Bijbel e taki dati dede na wan feanti. A e agersi dede nanga wan kownu di tiri libisma (Romesma 5:17; 1 Korentesma 15:26). Dede na wan feanti di abi so furu makti taki nowan libisma man kakafutu gi en, èn dati e kon na krin ibri leisi te wan lobiwan fu wi dede. A no de fu taki dati a Bijbel waarheid disi e sori krin taki sma e sari èn e lasi howpu trutru te wan lobiwan fu den dede. Ma a de so taki Gado e gebroiki a feanti disi fu teki den lobiwan fu wi tyari go na hemel? Meki Bijbel srefi piki na aksi dati.

Preikiman 9:5, 10 e taki: „Den dedewan no sabi notinoti . . . nowan wroko noso prakseri noso sabi noso koni de na ini Syeol, a presi pe yu e go.” San na Syeol? Dati na a grebi pe ala libisma e go te den dede. Den dedewan na ini a grebi no man du noti, den no man buweigi, den no man firi, èn den no man prakseri nowan enkri sani. A de neleki den de na ini wan dipi sribi. * Na so Bijbel e sori krin taki Gado no e teki den lobiwan fu wi di dede, so taki den kan de nanga en na ini hemel. Fu di den sma disi dede, meki den no man du noti na ini a grebi.

Yesus ben sori taki disi tru, baka di en mati Lasarus dede. Yesus ben agersi dede nanga a sribi di wan sma e sribi. Efu Lasarus ben go na hemel fu de nanga na Almakti Gado, dan Yesus no ben o du en wan bun te a ben o meki en kon baka na grontapu fu dede baka te fu kaba. A tori disi di skrifi nanga yepi fu santa yeye, e taki dati di Yesus ben de na a beripe, dan a taki nanga krakti sten: „Lasarus, kon na doro!” Bijbel e taki moro fara: „A man di ben dede, kon na doro.” Lasarus bigin libi baka. Yesus ben sabi taki Lasarus no ben gowe libi grontapu noiti. A ben e didon na ini a grebi, èn a no ben de na libi.—Yohanes 11:11-14, 34, 38-44.

A sani disi di skrifi na ini Bijbel e yepi wi fu  frustan taki Gado no e meki sma dede fu teki den tyari go na hemel. Fu dati ede wi kan kon krosibei na Gado, fu di wi sabi taki a no en e meki taki wi e sari. Wi kan abi a frutrow tu taki a sabi heri bun fa wi e sari te wan lobiwan fu wi dede. Èn a Bijbel waarheid di abi fu du nanga a situwâsi fu den dedewan, e sori taki den no e pina na ini helfaya noso na ini vagevuur, ma taki den e didon na ini a grebi, èn taki den no de na libi. Sobun, te wi e prakseri den lobiwan fu wi di dede, dan wi no abi fu atibron nanga Gado, èn wi no abi fu frede fu di wi no sabi san pasa nanga den. Boiti dati, Yehovah e gi moro trowstu na ini Bijbel.

Wi sa de koloku te wi abi wan howpu

Den bijbeltekst di wi ben luku e sori taki a de tumusi prenspari fu abi wan howpu, fu man de koloku. Na ini Bijbel, a wortu di vertaal leki „howpu” wani taki dati „wan sma e fruwakti wan bun sani di a sa kisi seiker”. Meki wi go luku a tori fu Yesus baka di a ben gi Lasarus wan opobaka, fu si fa wi sa de koloku te wi abi wan howpu.

Tu reide de fu san ede Yesus ben du a wondru dati. Wan reide ben de fu no meki Marta, Maria, nanga den tra mati fu Lasarus, sari moro. Den ben kan abi demakandra baka nanga a lobiwan fu den. Ma Yesus ben sori Marta wan moro prenspari reide fu san ede a ben du a wondru. Yesus ben taki: „Mi no ben taigi yu taki yu o si a glori fu Gado te yu e bribi?” (Yohanes 11:40) Na ini The New Testament in Modern English, di J. B. Phillips skrifi, a lasti pisi fu a tekst disi vertaal leki „a wondru di Gado man du”. Di Yesus gi Lasarus wan opobaka, dan na so fasi a sori wi na fesi san Yehovah Gado man du, èn san A o du na ini a ten di e kon. Luku wan tu tra tori di e taki moro fara fu „a wondru di Gado man du”.

Na ini Yohanes 5:28, 29 Yesus ben taki: „No fruwondru fu disi, bika a yuru o kon te ala den sma di de na ini den grebi o yere en sten, èn den o komopo drape.” Disi wani taki dati ala den dedewan na ini Syeol, sosrefi den lobiwan fu wi, sa kisi libi baka. Tori fu den Apostel 24:15 e taki fini fu a tumusi moi sani disi di o pasa. Drape skrifi: „Gado sa gi wan opobaka na den regtfardikiwan èn na den onregtfardikiwan.” Sobun, srefi „den onregtfardikiwan”, namku den someni sma di no ben sabi Yehovah èn di no ben e dini en, sa kisi wan okasi fu plisi Gado na ini a ten di e kon.

Pe sma o kisi wan opobaka? Psalm 37:29 e taki: „Den regtfardikisma srefi sa abi grontapu leki a gudu fu den, èn den sa libi na tapu fu têgo.” Prakseri san dati wani taki! Famiriman nanga mati di lasi den lobiwan fu den na ini dede, sa miti den lobiwan dati baka dyaso na grontapu. Te yu e prakseri fa yu o prisiri baka nanga den lobiwan fu yu di dede, dan a no de fu taki dati yu sa firi koloku trutru.

Yehovah wani taki yu musu de koloku

Wi ben luku tu fasi kaba fa Yehovah kan meki wi de moro koloku, aladi wi abi problema. Na a fosi presi a e gi wi sabi èn a e tiri wi nanga yepi fu Bijbel, so taki wi sa sabi san fu du te wi e kisi problema. Boiti taki Bijbel e yepi wi fu no sari tumusi te wan lobiwan fu wi dede, a rai na ini kan yepi wi tu fu sabi san fu du te wi abi moni problema èn te wi e siki. A kan gi wi a krakti fu horidoro te sma na ini a libimakandra no e handri bun nanga wi, èn te dyugudyugu de na politiek sei. Èn te yu e teki a rai fu Bijbel, dan dati sa yepi yu fu sabi san fu du te yu e kisi fu du nanga tra problema.

Na a di fu tu presi, te wi e studeri Bijbel, dan wi e kisi wan howpu di bun moro leki iniwan sani di libisma man gi. Bijbel e gi wi a howpu taki mati nanga famiriman o kisi wan opobaka. Openbaring 21:3, 4 e taki fini fu disi: „Gado srefi o de nanga [libisma]. A o figi ala watra puru na den ai, èn dede no sa de moro; nowan sari, noso krei, noso pen no sa de moro. Den fositen sani pasa gowe.” Disi wani taki dati iniwan sani di e meki yu sari now, no sa de moro. Den sani di Bijbel e pramisi sa kon tru, èn yu kan ondrofeni dati tu. A sabi di wi  sabi nomo taki sani sa waka bun na ini a ten di e kon, e gi wi wan korostu firi. Te wi sabi taki wi no o pina fu têgo baka te wi dede, dan dati e meki wi de koloku.

Fu eksempre: Wan tu yari pasa, Maria ben si fa en masra di ben abi kanker pina teleki a dede. A ben e sari ete taki en masra dede, di en nanga den dri umapikin fu en ben musu komoto na ini na oso fu den fu di den ben abi moni problema. Baka tu yari, Maria kon sabi taki a abi kanker. A du tu bigi oparâsi, èn a abi hebi pen ibri dei. Aladi a abi den problema disi, toku a abi so wan bun denki fu sani, taki a e gi tra sma deki-ati. San a e du fu tan koloku?

Maria e taki: „Te mi abi wan problema, mi e pruberi fu no tan prakseri a sani dati. Mi no e aksi misrefi sani soleki: ’Fu san ede a sani disi pasa nanga mi? Fu san ede mi musu pina so? Fu san ede mi ben musu kon siki?’ Te mi e denki takru fu sani, dan dati e meki mi lasi krakti. Na presi fu dati, mi e gebroiki mi krakti fu dini Yehovah èn fu yepi trawan. Den sani dati e meki mi de koloku.”

Fa a howpu di Maria abi e yepi en? A abi a howpu taki na ini a ten di e kon Yehovah sa puru siki nanga tra problema di a libisma famiri abi. Te a e go na ati-oso fu kisi datra-yepi, dan a e taki fu a howpu fu en nanga tra sma di abi kanker èn di lasi-ati. O prenspari a howpu disi de gi Maria? A e taki: „Furu tron mi e prakseri a sani di Bijbel e taki na ini Hebrewsma 6:19, pe Paulus e taki dati howpu na wan ankra gi a sili. Efu wan sma no abi na ankra disi, dan a sa drifi gowe neleki wan boto di wan ogri winti e tyari go-kon. Ma efu wan sma tai na a ankra dati, dan sani sa waka bun nanga en aladi furu problema e miti en.” A „howpu” dati di Maria abi „fu libi fu têgo soleki fa Gado, di no man lei, pramisi” e yepi en fu tan koloku. Te yu abi a howpu disi dan yu kan de koloku tu.—Titus 1:2.

Te yu e studeri Bijbel, dan dati kan yepi yu fu de koloku trutru, aladi yu abi problema. Ma kande yu e aksi yusrefi fu san ede a ben o bun fu studeri Bijbel. Yehovah Kotoigi sa breiti fu sori yu na ini Bijbel san yu musu sabi so taki yu kan de koloku trutru. Aladi yu e wakti a kontru fu a howpu di Yehovah e gi wi, yu kan de wan fu den sma disi: „Dem sa kisi prisiri, en dem sa breiti, en sari nanga djeme sa lowe.”—Yesaya 35:10, Da Bijbel na ini Sranantongo.

[Futuwortu]

[Prenki na tapu bladzijde 5]

A Bijbel waarheid wawan kan meki taki wan sma no e sari tumusi

[Prenki na tapu bladzijde 7]

A howpu di Bijbel e gi taki den wan di dede sa kisi wan opobaka, kan yepi yu fu de koloku