Oiti sma sa libi na ini vrede ibri dei fu a yari?

„Glori gi Gado na ini den moro hei presi na hemel èn vrede na grontapu gi sma di Gado feni bun.”—Lukas 2:14.

MILYUNMILYUN sma sabi den wortu disi di den engel fu Gado ben taigi den skapuman di ben e luku den skapu fu den na neti. Na so den engel ben meki bekènti taki Yesus gebore. Na a pisi ten di den kerki e si leki a ten di Yesus gebore, furu sokari Kresten e du ala san den man fu tyari densrefi na wan bun fasi. Na Kresnetiten furu sma e meki muiti fu sori den fasi di den engel ben taki fu den, namku den e pruberi fu de nanga prisiri, fu abi vrede, èn fu du bun.

Den bun fasi disi abi krakti srefi tapu sma di no e hori Kresneti. Den sma disi sosrefi lobi den moi fasi disi di trawan e sori na Kresnetiten. Te sma no abi fu go na skoro noso na wroko na Kresnetiten, dan den abi na okasi fu rostu pikinso, fu abi demakandra nanga famiriman èn mati, noso den kan abi wan prisiriten. A no de fu taki dati furu opregtisma e si Kresneti leki wan ten fu gi grani na Yesus Krestes.

Awansi fa sma e si Kresneti, furu fu den e agri taki nofo tron sma e sori bun fasi na a ten dati wawan. Syatu baka dati, sma e bigin tyari densrefi baka soleki fa den ben gwenti. Wan bangi fu Kanada ben skrifi na ini wan brifi: „Furu sokari Kresten e tyari densrefi leki Kresten wan tu wiki nomo na ini a yari. Na a ten dati den e du wan lo bun sani gi trawan, ma baka Nyun Yari dei den e bigin suku den eigi bun baka, sondro fu broko den ede nanga tra sma” (Royal Bank of Canada). A srefi brifi dati e taki dati a heri problema nanga den bun fasi di sma e sori na Kresnetiten, na taki sma no e sori den fasi dati „ibri dei fu a yari”.

Efu yu e agri noso efu yu no e agri nanga san skrifi na ini a brifi, den sani dati e meki prenspari aksi opo kon. Oiti sma sa de klariklari fu du bun gi trawan èn fu broko den ede nanga trawan ibri dei? Wi kan fruwakti taki den sani di den engel meki bekènti na a neti di Yesus gebore, sa kon tru? Noso a de so taki a howpu di sma abi taki trutru vrede sa de, noiti no sa kon tru?