Aksi fu leisiman

Fu sortu marki Openbaring 7:3 e taki?

Openbaring 7:1-3 e taki: „Baka dati mi si fo engel e tanapu na den fo uku fu grontapu èn den ben e hori den fo winti fu grontapu bun steifi, so taki nowan fu den winti ben kan wai kon na grontapu, na tapu a se, noso na tapu iniwan bon. Dan mi si wan tra engel e opo kon fu a sei pe son e opo, èn a ben abi wan stampu fu a libi Gado; ne a bari nanga wan tranga sten gi den fo engel di ben kisi primisi fu du ogri nanga grontapu èn nanga a se, taki: ’No du ogri nanga grontapu, nanga a se, noso nanga den bon, teleki wi poti wan marki na tapu a fesi-ede fu den srafu fu wi Gado.’”

Te den engel o lusu „den fo winti”, dan „a bigi banawtu” o bigin pe falsi kerki nanga ala tra ogrisma sa kisi pori (Openbaring 7:14). „Den srafu fu wi Gado” na den salfu brada fu Krestes na grontapu (1 Petrus 2:9, 16). Sobun, a profeititori disi e sori taki ala den brada fu Krestes o abi a marki kaba te a bigi banawtu bigin. Ma tra bijbeltekst e sori taki den salfuwan ben kisi wan tra marki na fesi kaba. Fu dati ede wi e taki son leisi fu a fosi marki nanga a lasti marki. San na a difrenti na mindri den tu marki disi?

Luku san sma fu owruten ben gwenti du te den ben e skrifi brifi noso tra dokumenti, èn fu san ede den ben e du dati. Na ini a ten dati, den ben e gebroiki wan stampu fu meki wan marki na tapu brifi noso tra sani fu sori suma seni a brifi, noso suma abi a sani.—1 Kownu 21:8; Yob 14:17.

Paulus ben sori taki di Gado ben salfu den Kresten nanga santa yeye, dan a ben de leki Gado poti wan marki na den tapu. Paulus ben  taki: „Gado na a sma di e gi a dyaranti taki unu nanga wi na fu Krestes, èn na Gado salfu wi. A poti en marki na wi tapu, èn a gi wi a yeye na ini wi ati, leki wan dyaranti fu san wi musu kisi” (2 Korentesma 1:21, 22). Sobun, Yehovah e salfu den Kresten disi nanga santa yeye fu sori taki den na fu en.

Ma Gado e marki den salfuwan tu tron. A fosi marki e difrenti fu a lasti marki, fu di (1) ibri marki wani taki wan tra sani, èn (2) den e kisi den marki na difrenti ten. A fosi marki na fu sori taki wan sma tron wan nyun memre fu a grupu salfu Kresten. A lasti marki na fu sori taki a salfuwan disi tan getrow dorodoro. Soso te wan salfuwan o kisi a lasti marki, dan fosi a marki disi o poti ’na tapu en fesi-ede’ fu ala ten. Disi na fu sori taki now a de trutru wan ’srafu fu wi Gado’ di pasa ala tesi na wan getrow fasi. Na fu a lasti marki disi Openbaring kapitel 7 e taki.—Openbaring 7:3.

Na apostel Paulus ben tyari kon na krin o ten den salfu Kresten kisi a fosi marki. A ben skrifi den taki: „Unu ben howpu na en tapu sosrefi, baka di unu yere a wortu fu waarheid, namku a bun nyunsu di abi fu du nanga a frulusu fu unu. Baka di unu ben kon bribi, dan a meki tu taki a santa yeye di Gado pramisi, poti na un tapu leki wan marki” (Efeisesma 1:13, 14). Bijbel abi furu eksempre di e sori taki den fosi yarihondro Kresten ben kisi wan marki trutru, syatu baka di den yere a bun nyunsu èn di den bigin bribi na ini Krestes (Tori fu den Apostel 8:15-17; 10:44). A marki ben de wan buweisi taki Gado ben feni den bun. Ma disi no wani taki dati Gado ben feni den bun kaba fu kisi a lasti marki. Fu san ede dati de so?

Paulus taki dati a santa yeye ben o tan leki wan marki na tapu den salfu Kresten teleki ’a dei te den sa kon fri’ (Efeisesma 4:30). Disi e sori taki wan pisi ten musu pasa baka te den salfuwan kisi a fosi marki. Iya, nofo tron furu yari musu pasa. Te den salfuwan kisi santa yeye kaba leki wan marki, dan den musu tan getrow teleki ’a dei te den kon fri’ fu a libisma skin fu den. Sobun, den musu tan getrow te na dede (Romesma 8:23; Filipisma 1:23; 2 Petrus 1:10). Dati meki soso na a kaba fu en libi, Paulus ben kan taki: „Mi lon a streilon te na a kaba, mi no lasi bribi. Fu dati ede, a sani di e wakti mi na taki Masra . . . o pai mi nanga regtfardikifasi” (2 Timoteyus 4:6-8). Boiti dati, Yesus ben taigi wan gemeente fu salfu Kresten: „Tan getrow srefi te na dede, dan mi o pai yu nanga libi.”—Openbaring 2:10; 17:14.

A wortu „pai” e sori wi tu taki ten e pasa fu a dei te den salfuwan kisi a fosi marki te go miti a dei te den kisi a lasti marki. Fu san ede wi kan taki dati? Na ini owruten, lonman ben kisi wan pai te den wini wan streilon. Fu man kisi a pai dati, a no ben musu bigin nomo nanga a streilon, ma a ben musu lon a pasi te na a kaba. Na so den salfu Kresten musu horidoro te na a kaba tu. Te den kisi a fosi marki èn den horidoro teleki den kisi a lasti marki, dan fosi den o kisi a pai fu den. A pai di den o kisi na fu libi na ini hemel sondro fu dede.—Mateyus 10:22; Yakobus 1:12.

O ten a fikapisi fu den salfu Kresten di kisi a fosi marki kaba, o kisi a lasti marki? Iniwan fu den salfuwan di de na libi na grontapu ete, o kisi wan marki „na tapu a fesi-ede fu den” fosi a bigi banawtu bigin. Te den engel o lusu den fo winti fu a bigi banawtu, dan ala memre fu a yeye Israel sa abi a lasti marki kaba, aladi wan tu fu den o de na grontapu èn musu dede ete.