Den Kotoigi wini wan krutu-afersi na a Hei Krutubangi fu Europa

TAPU 11 yanuari 2007, a Hei Krutubangi fu Europa na ini Straatsburg, na Fransikondre, teki wan bosroiti na ini wan afersi di ben abi fu du nanga Yehovah Kotoigi na ini Rosiakondre. Ala den krutuman fu a Hei Krutubangi disi di e feti gi den reti fu libisma, ben e agri nanga makandra. A bosroiti di den teki, gi Yehovah Kotoigi a reti fu anbegi Gado fri, èn den krutu na afersi fu den na wan reti fasi. Meki wi go luku fu san ede den Kotoigi ben tyari na afersi go na krutu.

Na ini a foto Chelyabinsk, na Rosiakondre, yu abi wan gemeente fu Yehovah Kotoigi pe furu fu den memre na dofusma. Den ben e kon makandra na wan heiskoro pe den ben e yuru wan klas. Tapu sonde 16 april 2000, na amra-basi fu a Commissie voor de rechten van de mens (wan komte di e feti gi den reti fu libisma), kon drape makandra nanga dri skowtu, ma wán fu den no ben e weri skowtukrosi. Fu di den lantiman disi, èn spesrutu na amra-basi, no ben lobi Yehovah Kotoigi, meki den tapu a konmakandra fu den. Den ben feni taki Yehovah Kotoigi ben e hori konmakandra sondro taki lanti ben gi den primisi fu du dati. Ma a sani disi no ben tru. Ne, bigin fu 1 mei 2000, den Kotoigi no ben mag yuru a klas moro.

Yehovah Kotoigi go taigi a lanti-afkati san ben pasa, ma a sani dati no yepi. A Wet fu Rosiakondre èn na organisâsi fu Europa di e feti gi den reti fu libisma, e horibaka gi a reti di sma abi fu anbegi Gado fri èn fu hori konmakandra. Fu dati ede, den Kotoigi tyari na afersi go na krutubangi, èn baka dati den tyari en go na wan moro hei krutubangi. Wan pisi ten na fesi, tapu 30 yuli 1999, a hei krutubangi fu Rosiakondre ben bosroiti na ini wan tra krutu afersi, taki „sma de fri fu abi den eigi denki èn fu anbegi Gado, soleki fa a Wet fu Rosiakondre ben e sori. A sani disi ben musu pasa ’sondro taki trawan ben e tapu pasi gi den’. Dati ben wani taki dati sma no abi primisi fanowdu fu lanti fu anbegi Gado na presi di sreka gi dati”. Ma toku, den krutubangi fu Rosiakondre no ben wani krutu na afersi fu den Kotoigi.

Tapu 17 december 2001, den Kotoigi tyari na afersi go na a Hei Krutubangi fu Europa di e feti gi den reti fu libisma. Tapu 9 september 2004, den hori a krutu. Luku syatu sortu bosroiti a Krutubangi teki te fu kaba:

„A Krutubangi taki dati den lantiman pasa a wet di e gi sma a reti fu anbegi Gado fri, fu di den tapu a konmakandra fu den Kotoigi tapu 16 april 2000.”

„Den lantiman no ben abi a reti fu tapu a konmakandra di den Kotoigi ben e hori na a skoro, fu di den Kotoigi no ben pasa no wan wet.”

„A Krutubangi ben taki dati a Wet fu a Hei Krutubangi fu Rosiakondre e sori taki sma no abi primisi fu lanti fanowdu fu kon makandra fu anbegi Gado.”

„Dati meki, di den lantiman tapu a konmakandra fu den Kotoigi tapu 16 april 2000, den pasa Artikel 9 fu a wet di e sori taki sma abi a reti fu anbegi Gado fri.”

„A Krutubangi taki dati den krutubangi fu a kondre no tyari a frantwortu di den abi . . . fu sorgu taki na afersi krutu na wan reti fasi. Den pasa Artikel 6 fu a wet di e gi sma a reti fu kisi krutu na wan regtfardiki fasi.”

Yehovah Kotoigi de nanga tangi taki Gado meki den wini na afersi di den ben tyari go na a Hei Krutubangi fu Europa di e feti gi den reti fu libisma (Psalm 98:1). Sortu krakti a bosroiti fu a Hei Krutubangi sa abi tapu afersi di abi fu du nanga anbegi? Disi na san Joseph K. Grieboski, na edeman fu a Institute on Religion and Public Policy (wan organisâsi di e feti gi a reti di sma abi fu anbegi Gado fri) ben taki: „Disi na ete wan prenspari bosroiti di abi krakti tapu a reti di libisma na ini heri Europa abi fu anbegi Gado fri, fu di ala den kondre di kan go suku yepi na a Hei Krutubangi fu Europa, sa kisi wini fu a sani disi.”