Aksi fu leisiman

A de so taki a sneki di ben taki nanga Eva ben abi futu?

Soleki fa a skrifi na Genesis 3:14, dan Yehovah Gado ben taki nanga a sneki di ben kori Eva na ini a dyari fu Eden. Gado ben taki: „Fu di yu du a sani disi, meki yu tron a moro frufruktu-wan fu ala den meti, iya, fu ala den osometi nanga den busimeti. Na tapu yu bere yu o kroipi èn yu heri libi langa yu o nyan doti fu gron.” Bijbel no e sori taki a sneki ben abi futu fosi a kori Eva, èn taki a lasi den bakaten. Den wortu di skrifi na ini Genesis 3:14 kan gi son sma a denki dati. Toku a no abi fu de so taki a sneki ben abi futu bifo Gado fluku en. Fu san ede wi kan taki dati?

A moro prenspari reide fu san ede wi kan taki dati, na fu di a sma di Yehovah ben krutu trutru, ben de Satan, a yeye di gebroiki a sneki fu kori Eva. Bijbel e kari Satan „a tata fu ala lei” èn „a fosi sneki”. Den tu nen disi abi fu du nanga a sani di Satan du. Iya, a gebroiki a sneki fu taki nanga Eva, fu meki a trangayesi Gado.—Yohanes 8:44; Openbaring 20:2.

Na Gado meki sneki, èn a de krin taki Adam ben kari den meti disi sneki kaba, bifo Satan kori Eva. Sneki no abi frustan, èn fu dati ede a no a meti disi kori Eva trutru. A no ben sabi taki Satan ben e gebroiki en, èn a no ben man frustan fu san ede Gado krutu den wan di trangayesi En.

Dan fu san ede Gado krutu a sneki? Wan sneki e kroipi na tapu en bere, èn a e sutu en tongo kon na doro neleki a e nyan doti. Disi na wan bun fasi fu agersi a syen di Satan kisi. Satan ben de wán fu den moro hei engel na hemel, ma now a kisi syen fu di a de na ini wan situwâsi di Bijbel e kari Tartarus.—2 Petrus 2:4

Boiti dati, neleki fa wan sneki kan beti wan sma na en bakafutu, na so Satan di kisi syen ben o ’masi a bakafutu’ fu a „pikin” fu Gado (Genesis 3:15). Yesus Krestes, na a moro prenspari pikin, èn den wrokoman fu Satan pina en fu wan pisi ten. Ma te fu kaba Krestes nanga den salfu brada fu en di kisi wan opobaka, sa masi na ede fu na agersi sneki, èn dati wani taki dati a o kisi pori fu têgo (Romesma 16:20). Sobun, a fluku di Gado fluku a trutru sneki, e sori krin sortu syen a „fosi sneki”, Satan Didibri, kisi, èn a e sori tu taki a o kisi pori te fu kaba.