Sma e suku fu kon sabi san na a moro prenspari sani na ini a libi

NA INI a Bergitaki fu Yesus, a ben taki: „Blesi de tapu den sma di kon si tak’ den abi Gado fanowdu” (Mateyus 5:3, Nyun Testamenti). Kande yu e agri nanga a sani disi di Yesus ben taki. Furu sma feni taki a moro prenspari sani na ini a libi, na fu de koloku, èn den kan de koloku soso te den de wan mati fu Gado. Ma fa wi kan leri sabi Gado, èn fa wi kan tron mati fu en?

Wan sma di sabi Gado e frustan krin fa Gado e denki fu sani èn fu san ede A e du sani. Efu wi wani de mati fu Gado, dan wi musu lobi en, wi musu de getrow na en, èn wi musu abi dipi lespeki gi sani di abi fu du nanga na anbegi fu en.

Fa yu kan tron wan mati fu Gado? So furu kerki de, èn den alamala e taki difrenti sani di sma musu du fu tron wan mati fu Gado. Son sma e taki dati den teki Masra di den ben de na wan fu den bigi konmakandra di kerki e hori. Trawan e dringi win èn e nyan hosti na a Avondmaal fu kan de wan mati fu Gado. Ma na dati sma musu du fu tron mati fu Gado?

Furu sma e feni taki dati no de so. Den e bribi taki den kan de mati fu Gado, sondro taki den e go na wan kerki. Trawan feni taki sma di wani kon sabi san na a moro prenspari sani na ini a libi èn di wani de koloku trutru, no abi fu go na wan kerki èn den no abi fu de mati fu Gado srefi. Den feni taki na libi den musu libi bun nomo nanga trawan efu den wani de koloku trutru.

A de krin fu si taki sma abi difrenti denki fu a tori disi. Dusundusun buku de di e taki fa sma kan tron mati fu Gado. Nofo tron, sma di e leisi den buku disi e si taki den no e feni yepi trutru èn den e bruya moro. Ma wán buku de di kan yepi wi trutru fu kon sabi san na a moro prenspari sani na ini a libi. A buku disi na Bijbel, èn a e sori taki a moro prenspari sani na ini a libi na fu de wan mati fu Gado (2 Timoteyus 3:16). Meki wi go luku na ini Bijbel san a wani taki fu de wan mati fu Gado èn o prenspari dati de.

[Sma di abi a reti fu a prenki na tapu a kafti]

COVER: Background: © Mark Hamblin/age fotostock