San fu du te sma no e handri bun nanga yu?

IBRI sma ondrofeni wan leisi kaba taki sma no handri bun nanga en. Son leisi wi kan feni nomo taki sma no handri bun nanga wi, ma tra leisi baka, sma trutru no e handri bun nanga wi.

Te sma no e handri bun nanga wi, dan a sani dati e hati wi, èn a bribi fu wi kan kon swaki. Kande wi sa wani du wan sani nomonomo na a situwâsi dati. Fu san ede dati de so? Wan reide, na taki wi Mekiman, Yehovah Gado di „no e du kruktudu”, meki libisma na so wan fasi taki den no lobi en te sma no e handri bun nanga trawan (Deuteronomium 32:4: Genesis 1:26). Ma son leisi wi e kon de na ini situwâsi pe sma no e handri bun nanga wi. Wan koniman ben taki wan leisi: „Èn mi fu mi sei ben drai fu luku ala den fasi fa sma e kwinsi trawan na ondro a son, èn luku!, den watra-ai fu den wan di ben e kisi kwinsi, ma den no ben abi nowan sma fu trowstu den; èn den wan di ben e kwinsi den ben abi makti, so taki den no ben abi nowan sma fu trowstu den” (Preikiman 4:1). We, san wi kan du te sma no e handri bun nanga wi?

O ten wi kan taki dati sma no handri bun nanga wi?

Wan sma di no e handri bun nanga trawan, no e hori ensrefi na regtfardiki markitiki. Na sortu markitiki libisma musu hori densrefi fu man handri bun nanga trawan? A no de fu taki dati wi Mekiman di regtfardiki ala ten, abi a reti fu poti markitiki gi wi di e sori wi san bun èn san no bun. Soleki fa Yehovah e si en, dan wan sma di e hori ensrefi na ’den wet di e sori sma fa fu libi, no e du sani di no reti’ (Esekièl 33:15). Sobun, di Yehovah meki a fosi libisma, dan A gi en wan konsensi di e yepi en fu sabi san bun èn san no bun (Romesma 2:14, 15). Boiti dati, Yehovah meki sma skrifi sani na ini Bijbel, a Wortu fu en, fu leri wi san reti èn san no reti.

Ma san fu du te wi feni taki wan sma no handri bun nanga wi? Wi musu luku bun efu dati de so trutru. Fu eksempre, luku a situwâsi di a Hebrew profeiti Yona ben de na ini. Yehovah ben seni en fu go taigi den Ninefeisma taki wan rampu ben o miti den. Di Yona kisi a komando dati, dan a lowe gowe, èn a no du san Yehovah ben taigi en fu du. Ma te fu kaba a go na Ninefei èn a warskow den sma drape taki Yehovah ben o pori a foto fu den heri esi. Fu di den sma gi yesi na a warskow disi, meki Yehovah bosroiti fu no pori a foto disi, ma fu kibri den sma di ben e libi drape. Fa Yona ben feni a sani disi? „Yona no ben feni a sani disi bun srefisrefi, èn a kisi bigi atibron” (Yona 4:1). A ben feni taki Yehovah no ben handri bun nanga en kwetikweti.

Fu di Yehovah sabi san de na ini sma ati èn fu di a „lobi regtfardikifasi nanga retidu”, meki a de krin taki A ben teki a yoisti bosroiti (Psalm 33:5). Yona ben musu kon frustan taki a bosroiti  di Yehovah ben teki, ben de wan regtfardiki bosroiti. Te wi feni taki sma no handri na wan regtfardiki fasi nanga wi, dan a bun fu aksi wisrefi: „Yehovah ben o denki a srefi fu a tori?”

Te sma no e handri bun nanga wi

Bijbel e taki fu difrenti sma di ondrofeni taki trawan no handri bun nanga den. Wi kan leri furu te wi e luku san den sma disi du di den ben de na ini a muilek situwâsi disi. Luku a tori fu Yosef. Fu di den brada fu en ben e dyarusu na en tapu, meki den seri en, èn te fu kaba a tron wan srafu na ini Egepte. Di Yosef ben de na ini Egepte, dan a wefi fu a basi fu en pruberi fu kisi Yosef fu du hurudu nanga en. Ma di Yosef no ben wani du dati, dan na uma disi lei gi Yosef taki na Yosef ben wani du hurudu nanga en. A sani disi meki taki den poti Yosef na strafu-oso. Ma toku, a bribi fu en ben tranga moro leki den isri keti di sma ben gebroiki fu tai en. Aladi sma no ben handri bun nanga en, toku a no gi pasi taki a bribi fu en kon swaki, èn a no lasi frutrow na ini Yehovah.—Genesis 37:18-28; 39:4-20; Psalm 105:17-19.

Sma no ben handri bun tu nanga Nabot. Iseibel, a wefi fu Kownu Akab fu Israel, handri na wan kruka fasi nanga a man disi. A kownu ben wani abi a gron fu Nabot di ben de na sei a kownu-oso, ma a gron disi ben de wan famirigudu. Wan Israelsma no ben mag seri a famirigudu fu en fu ala ten gi wan tra sma, èn fu dati ede Nabot no ben wani seri a gron gi a kownu (Lefitikus 25:23). Ne, na ogri-ati wefi fu Akab meki falsi kotoigi lei gi Nabot taki Nabot ben taki ogri fu Gado èn fu a kownu. A sani disi meki taki den kiri Nabot nanga den manpikin fu en. Prakseri fa Nabot ben e firi di a pipel ben e fringi ston na en tapu fu kiri en!—1 Kownu 21:1-14; 2 Kownu 9:26.

Ma toku, den sani di miti Yosef nanga Nabot no e doro den ogri-ati sani di sma du nanga Krestes Yesus. Yesus ben kisi dedestrafu fu di sma fruteri lei fu en èn fu di den no krutu en na wan reti fasi. A granman fu Rome di ben krutu na afersi fu Yesus ben sabi taki Yesus no ben du no wan ogri, ma toku a no ben abi a deki-ati fu opo taki gi en (Yohanes 18:38-40). Iya, nowan  sma ondrofeni den ogri-ati sani di Satan meki Yesus ondrofeni!

A de so taki Yehovah no e broko en ede nanga den takru sani di miti den sma dati? Kwetikweti! Yehovah no ben e si den tori dati soleki fa libisma ben e si den (Yesaya 55:8, 9). Fu di sma ben seri Yosef fu tron wan srafu, meki a ben man kibri en famiri. A ben kisi a frantwortu fu prati nyanyan gi sma èn gi en famiri, di wan bigi angriten broko na ini Egepte. Denki a tori disi. Efu Yehovah no ben gi pasi taki den takru sani disi miti Yosef, dan Yosef no ben o de na strafu-oso. Na drape a fruklari den dren fu tu tra strafuman. Bakaten, wan fu den strafuman disi fruteri Farao fu Yosef, èn na so Yosef kisi a frantwortu te fu kaba fu prati nyanyan gi sma.—Genesis 40:1; 41:9-14; 45:4-8.

Fa a de nanga Nabot? Pruberi fu si a tori disi tu soleki fa Yehovah ben si en. Yehovah kan gi sma wan opobaka, èn gi Yehovah, Nabot ben de na libi, srefi di a dedeskin fu en ben e didon na gron (1 Kownu 21:19; Lukas 20:37, 38). Nabot musu wakti teleki Yehovah o gi en wan opobaka, ma a no o abi fu wakti langa, fu di den dedewan no sabi notinoti (Preikiman 9:5). Boiti dati, Yehovah no ben feni en bun san ben pasa nanga Nabot, èn fu dati ede a strafu Akab nanga en osofamiri.—2 Kownu 9:21, 24, 26, 35, 36; 10:1-11; Yohanes 5:28, 29.

Ma sma ben kiri Yesus tu. Toku Gado gi en wan opobaka èn a poti en „moro hei leki ala tiri, ala hei makti, ala krakti, nanga ala heihei sma, èn moro hei leki ala nen” (Efeisesma 1:20, 21). Aladi Satan meki sma handri takru nanga Krestes Yesus, toku dati no tapu Yehovah fu gi en Manpikin grani. Yesus ben de seiker taki wantewante Yehovah ben kan tyari wan kaba kon na den ogri di miti en, efu A ben wani dati. Ma Krestes ben sabi tu taki Yehovah abi en eigi ten te a o meki den sani di Bijbel e taki kon tru, èn te a o tyari wan kaba kon na ala ogri.

A no de fu taki dati Satan nanga den bakaman fu en du ogri nanga regtfardikisma, ma te fu kaba Yehovah meki sani kon bun baka èn a tyari wan kaba kon na a ogri dati. Na dati a sa du tu na ini a ten di e kon. Sobun, te sma no e handri bun nanga wi, dan wi musu wakti Gado.—Deuteronomium 25:16; Romesma 12:17-19.

Yehovah kan gi pasi taki sma no e handri bun nanga wi

Yehovah kan abi reide tu fu no tyari wan kenki kon na ini wan spesrutu situwâsi. A kan gi pasi taki sma no e handri bun nanga wi, fu di a wani leri wi fu tron moro bun Kresten. A no de fu taki dati ’Gado no e tesi sma nanga ogri sani’ (Yakobus 1:13). Toku, a kan gi pasi taki wi e kon de na ini wan situwâsi, sondro taki a e puru wi na ini, èn a kan yepi wi te wi e teki a leri di a e gi wi. Bijbel e gi wi a dyaranti disi: „Baka te unu pina wan syatu pisi ten, dan a Gado di e sori sma en no-frudini bun-ati na ala fasi . . . sa gi unu leri dorodoro so taki unu de srekasreka; a sa meki unu tanapu kánkan, a sa meki unu kon tranga.”—1 Petrus 5:10.

Ma a de so tu taki te Yehovah e gi pasi taki sma no e handri bun nanga wi, dan den sma dati e kisi okasi fu kenki den fasi fu den. Wan tu wiki nomo baka di sma kiri Yesus, dan wan tu Dyu ben arki den sani di Petrus ben taigi den, èn „den konsensi fon den trutru”. Den ben de klariklari fu gi yesi na a wortu fu Gado, èn den teki dopu.—Tori fu den Apostel 2:36-42.

A tru taki a no ala sma di no e handri bun, sa kenki den fasi fu den. Sonwan fu den kan du moro takru sani srefi. Ma Odo 29:1 e taki: „Wan man di kisi piri-ai ibri tron baka, ma di e tranga en neki, wantronso den sa broko en, èn dresi no sa de gi en.” Iya, te fu kaba Yehovah sa tyari wan kaba kon na den wan di e tan tyari densrefi na wan fasi di no fiti.—Preikiman 8:11-13.

Aladi sma e tan handri takru nanga wi, toku wi kan de seiker taki Yehovah sa yepi wi fu pasa den tesi dati. Èn a no de fu taki dati a sa tyari wan kaba kon na ala den takru sani di wi ondrofeni na ini na ogri sistema disi. Boiti dati, a pramisi wi taki wi sa kisi têgo libi te fu kaba na ini a nyun grontapu pe „regtfardikifasi o tan”.—2 Petrus 3:13.

[Prenki na tapu bladzijde 16, 17]

Fa Nabot ben e firi di sma ben e handri na so wan takru fasi nanga en?