Fa wi kan sori sari-ati gi trawan?
Fa wi kan sori sari-ati gi trawan?
„Meki wi du bun gi ala sma, ma spesrutu gi den wan di de na ini a srefi bribi leki wi.”—GALASIASMA 6:10.
1, 2. Fa na agersitori fu a bun Samariasma e leri wi fu sori sari-ati gi trawan?
DI WAN man di ben sabi a Wet bun ben e taki nanga Yesus, dan a man aksi en: „Suma na den tra sma di mi musu lobi?” Yesus fruteri en na agersi tori disi: „Wan man ben saka komoto fu Yerusalem go na Yerikow, di fufuruman ròs en; den puru en krosi na en skin èn den fon en te fu dede, dan den gowe libi en drape. We, na so a pasa now taki wan priester ben e waka a pasi dati, ma di a si a man, a waka pasa na abrasei. A srefi sani wan Leifisma du tu; di a doro drape èn a si a man, dan a waka pasa na abrasei. Ma wan Samariasma di ben waka a pasi dati, kon si a man èn di a si en, a firi sari gi en. Dati meki a go na a man, a tai den soro fu en, dan a kanti oli nanga win na tapu den soro. Baka dati, a poti a man na tapu en eigi buriki èn a tyari en go na wan presi pe sma ben kan yuru kamra èn a sorgu a man. A tamara fu en a teki tu denari, dan a gi dati na a sma di ben abi a presi, èn a taigi en: ’Sorgu gi a man èn efu yu gebroiki moro moni leki san mi gi yu, dan mi o pai yu baka, te mi o kon dyaso baka.’” Ne Yesus aksi a man: „Suma fu den dri sma yu denki, ben sori taki den lobi a man di fufuruman ben ròs?” A man piki: „A sma di ben sori taki a ben abi sari-ati nanga a man.”—Lukas 10:25, 29-37a.
2 A fasi fa a Samariasma handri nanga a man di ben kisi mankeri, e sori krin san na trutru sari-ati! Fu di a Samariasma disi ben e firi sari gi a trawan, meki a yepi en. Boiti dati, a Samariasma no ben sabi a man di ben de na nowtu. Awansi sma de fu wan tra kondre, awansi den abi wan tra bribi, noso awansi den kweki na wan tra fasi, toku wi kan sori sari-ati gi den. Baka di Yesus fruteri na agersitori fu a bun Samariasma, a gi den arkiman a rai disi: „Go du a srefi sani tu” (Lukas 10:37b). Wi kan teki a rai disi èn wi kan pruberi fu sori sari-ati gi trawan. Ma fa wi kan du dati? Fa wi kan sori sari-ati gi trawan na ini wi aladei libi?
„Efu wan brada . . . no abi krosi fu tapu en skin”
3, 4. Fu san ede wi musu si en leki wan tumusi prenspari sani fu sori sari-ati gi den Kresten brada nanga sisa fu wi?
3 Na apostel Paulus ben taki: „Solanga a ten bun ete gi dati, meki wi du bun gi ala sma, ma spesrutu gi den wan di de na ini a srefi bribi leki wi” (Galasiasma 6:10). Fu dati ede, meki wi luku fosi fa wi kan sori moro sari-ati gi den Kresten brada nanga sisa fu wi.
4 Na disipel Yakobus ben wani gi tru Kresten a rai fu sori sari-ati gi makandra, èn fu dati ede a skrifi den: „Te wan sma no abi a gwenti fu sori sari-ati gi trawan, dan Gado no sa sori sari-ati gi a sma dati te a sa krutu en” (Yakobus 2:13). Den tra sani di Yakobus ben taki, e sori wi na sortu fasi wi kan sori sari-ati gi trawan. Fu eksempre, na ini Yakobus 1:27 skrifi: „Na anbegi di krin èn di de sondro flaka, soleki fa wi Gado nanga Tata e si dati, na disi: fu sorgu gi sma di de na nowtu, namku gi pikin di no abi papa nanga mama moro èn gi uma di lasi den masra na ini dede, èn un no musu meki grontapu flaka unu.” Yakobus 2:15, 16 e taki: „Efu wan brada noso wan sisa no abi krosi fu tapu en skin èn efu a no abi nofo nyanyan gi a dei, ma toku wan fu unu e taigi den: ’Tan bun, hori un skin waran, sorgu taki unu nyan un bere furu’, ma unu no e gi den san den abi fanowdu gi den skin, dan sortu bun unu du?”
5, 6. Fa wi kan sori moro sari-ati gi den Kresten brada nanga sisa na ini wi gemeente?
5 Na ini a tru anbegi, a de fanowdu taki wi e broko wi ede nanga trawan èn taki wi e yepi den wan di de na nowtu. Wi no kan taigi sma nomo taki wi e howpu taki ala sani sa waka bun nanga den. Na presi fu dati, wi musu firi sari trutru gi den wan di de na ini bigi nowtu, èn dati sa meki taki wi o du wan sani fu yepi den (1 Yohanes 3:17, 18). Iya, wan tu fu den sani di wi kan du fu sori taki wi abi sari-ati nanga trawan, na fu bori wan nyan gi wan sma di siki, wi kan du wan tu wroko gi wan owru sma, noso wi kan meki sma rèi nanga wi go na den Kresten konmakandra te dati de fanowdu. Iya, wi musu de klariklari fu gebroiki wi moni fu yepi den wan di abi yepi fanowdu trutru.—Deuteronomium 15:7-10.
6 Ma aladi a de prenspari fu gi den Kresten brada nanga sisa fu wi sani di den abi fanowdu, toku a de moro prenspari fu yepi den fu kon abi wan tranga bribi. Wi e kisi a rai fu „taki na wan fasi di e trowstu den sma di lasi-ati, fu yepi den swakiwan” (1 Tesalonikasma 5:14). „Den uma di owru kaba”, e kisi a rai fu de „sma di e leri trawan bun sani” (Titus 2:3). Disi na san Bijbel e taki fu den Kresten owruman: „Ibriwan musu buweisi fu de leki wan kibripresi gi a winti èn wan kibripresi gi a sibibusi.”—Yesaya 32:2.
7. Fa na eksempre fu den disipel na ini Siria Antiokia e leri wi fu sori sari-ati gi trawan?
7 Den fosi Kresten ben e yepi sma na ini a gemeente fu den, soleki uma di lasi den masra na ini dede, pikin di no abi papa nanga mama, èn den wan di abi yepi nanga deki-ati fanowdu. Ma den ben e seti sani fu yepi brada nanga sisa na ini tra gemeente tu. Fu eksempre, di a profeiti Agabus ben taki dati „wan bigi angriten ben o miti sma na heri grontapu”, dan den disipel na ini Siria Antiokia „bosroiti taki ibriwan fu den ben o seni san iniwan fu den ben man gi fu yepi den brada di ben e tan na ini Yudea”. „Den meki Barnabas nanga Saulus” tyari a moni disi go gi den owruman drape (Tori fu den Apostel 11:28-30). Fa a de na ini a ten disi? „A getrow èn koni srafu” seti komte fu yepi den brada nanga sisa fu wi di e pina, kande fu di rampu soleki, bigi draiwinti, gronseki, nanga bigi frudu miti den (Mateyus 24:45). Te wi de klariklari fu gi wi ten, wi krakti, nanga wi gudu fu horibaka gi a seti disi, dan dati na wan moi fasi fa wi e sori sari-ati gi trawan.
„Efu unu e tan gi a wan sma moro grani leki a trawan”
8. Fu san ede a no sa makriki gi wi fu sori sari-ati gi trawan te wi lobi a wan sma moro a trawan?
8 Yakobus warskow Kresten gi wan sani di e tapu sma fu sori sari-ati èn fu hori densrefi na „a moro hei wet” fu lobi. A ben skrifi: „Efu unu e tan gi a wan sma moro grani leki a trawan, dan unu e du wan sondu, èn a wet e krutu unu leki sma di pasa a wet” (Yakobus 2:8, 9). Te wi e sori taki wi lobi gudusma noso heihei sma moro leki trawan, dan dati kan tapu wi yesi gi „den kragi fu a mofinawan di e bari kari fu suku yepi” (Odo 21:13). Te wi lobi a wan sma moro a trawan, dan dati sa tapu wi fu sori sari-ati gi trawan. Te wi e sori sari-ati gi ala sma di abi yepi fanowdu, dan na so fasi wi e sori taki wi no lobi a wan sma moro a trawan.
9. Fu san ede a no fowtu fu sori furu switifasi gi spesrutu sma?
9 Ma disi wani taki dati wi noiti musu sori furu switifasi gi spesrutu sma? Kwetikweti. Luku san na apostel Paulus ben skrifi fu Epafroditus, na ini a brifi di a skrifi gi den Kresten na ini Filipi: „Tan abi furu lespeki gi den sortu man dati.” Fu san ede? „Bika na fu a wroko fu Masra meki pikinmoro a dede di a tyari en libi kon na ini kefar, èn a du disi so taki a kan du ala den sani di unsrefi no kan du gi mi, fu di unu no de dyaso” (Filipisma 2:25, 29, 30). Fu di Epafroditus ben dini na wan getrow fasi, meki a ben warti fu kisi prèise. Boiti dati, na ini 1 Timoteyus 5:17, wi e leisi: „Meki den owru man di e teki fesi na wan bun fasi kisi dobru grani, spesrutu den wan di e wroko tranga fu taki fu a wortu fu Gado èn fu leri sma a wortu dati.” Te wan sma abi bun fasi, dan a bun tu fu prèise a sma gi dati. Te wi e du dati, dan wi no e sori taki wi lobi a wan sma moro a trawan.
„A koni fu Gado . . . de klariklari fu sori sari-ati”
10. Fu san ede wi musu basi wi tongo?
10 Yakobus ben taki fu a tongo: „A de wan ogri sani di sma no man basi, èn a man kiri sma trutru. Nanga a tongo wi e prèise Yehovah, iya, a Tata, èn nanga a srefi tongo disi wi e fluku libisma sosrefi di meki ’leki Gado’. Na a srefi mofo dati e blesi èn e fluku sma.” Yakobus ben taki moro fara: „Ma efu a de so taki unu abi bita dyarusu na ini un ati, èn taki unu lobi fu meki trobi, dan un no musu meki bigi, bika unu no e tyari unsrefi akruderi a waarheid. Disi a no a koni di e komoto fu Gado, ma a de fu grontapu, a de fu libisma, èn fu den ogri yeye. Bika pe dyarusu de èn pe sma lobi fu meki trobi, na drape bruya nanga ibri sortu ogri de. Ma na a fosi presi, a koni fu Gado e meki taki wan sma de krin, èn a e meki sosrefi taki a lobi vrede, a de klariklari fu fiti ensrefi, a de klariklari fu gi yesi, a de klariklari fu sori sari-ati èn fu du bun, a no lobi a wan sma moro a trawan, èn a no e hoigri.”—Yakobus 3:8-10a, 14-17.
11. Fa wi kan gebroiki wi tongo fu sori taki wi abi sari-ati nanga trawan?
11 Fu dati ede, a fasi fa wi e gebroiki wi tongo e sori efu wi abi a koni di „de klariklari fu sori sari-ati”. Ma fa a ben o de te wi e meki bigi, te wi e lei, noso te wi e fruteri takru sani fu trawan, soso fu di wi e dyarusu na den tapu, noso fu di wi abi wan kesekese nanga den? Psalm 94:4 e taki: „Ala den sma di no e du san bun, e tan meki bigi gi densrefi.” Èn a no de fu taki dati wi kan pori a bun nen fu trawan heri esi, te wi e fruteri takru sani fu den! (Psalm 64:2-4) Boiti dati, prakseri sortu problema kan kon te „wan falsi kotoigi e fruteri soso lei” (Odo 14:5; 1 Kownu 21:7-13). Baka te Yakobus taki fa sma e gebroiki a tongo fu taki sani di no fiti, dan a e taki moro fara: „A no bun, mi brada, taki den sani disi e tan pasa” (Yakobus 3:10b). Fu man sori trutru sari-ati gi trawan, dan wi musu gebroiki wi tongo fu taki sani di fiti, sani di e tyari vrede kon, èn sani di e sori taki wi no e fruwakti tumusi furu fu trawan. Yesus ben taki: „Mi e taigi unu taki efu sma e taki dondon sani, dan den sa musu gi frantwortu fu dati na tapu a Krutudei” (Mateyus 12:36). A de prenspari trutru taki wi e gebroiki wi tongo na wan fasi di e sori taki wi abi sari-ati gi trawan!
„Gi sma pardon gi den sondu fu den”
12, 13. (a) Fa na agersitori fu a srafu di ben musu pai a kownu bun furu moni, e leri wi fu sori sari-ati gi trawan? (b) San a wani taki fu gi wi brada pardon „te nanga seibitenti na seibi tron”?
12 Na agersitori di Yesus ben fruteri fu a srafu di ben musu pai a kownu 60.000.000 denari, e sori wi wan tra fasi fa wi kan sori sari-ati gi trawan. Fu di a srafu no ben man pai a paiman, meki a begi a kownu fu sori sari-ati gi en. „Fu di a masra fu a srafu dati ben firi sari gi en”, meki a srafu no ben abi fu pai a paiman moro. Ma a srafu gowe èn a miti wan tra srafu di ben musu pai en 100 denari nomo, ma fu di a srafu no ben abi sari-ati nanga a trawan, meki a meki den poti en na strafu-oso. Di a kownu yere san pasa, dan a seni kari a srafu di a ben sori sari-ati gi, kon na en, èn a taigi en: „Yu takru srafu yu; fu di yu begi mi so, meki mi taki dati yu no ben abi fu pai mi noti moro. Dan yu no ben musu abi sari-ati nanga a tra srafu tu, neleki fa mi ben abi sari-ati nanga yu?” Ne a kownu meki sma tyari en go na den waktiman fu a strafu-oso. Na a kaba fu na agersitori, Yesus taki: „Na so mi Tata na hemel sa du tu nanga unu te unu no e gi un brada pardon nanga un heri ati.”—Mateyus 18:23-35.
13 Na agersitori di kari na fesi e sori krin taki te wi abi sari-ati nanga trawan, dan wi sa de klariklari fu gi den pardon! Yehovah gi wi pardon gi den someni sondu di wi du. Dati meki wi musu „gi den sma pardon fu den sondu fu den”, a no so? (Mateyus 6:14, 15) Bifo Yesus ben fruteri na agersitori fu a srafu di no ben abi sari-ati nanga trawan, dan Petrus aksi en: „Masra, omeni tron mi musu gi mi brada pardon te a sondu teige mi? Mi musu du dati te nanga seibi tron?” Yesus piki en: „Mi e taigi yu, a no te nanga seibi tron, ma te nanga seibitenti na seibi tron” (Mateyus 18:21, 22). Iya, wan sma di abi sari-ati nanga trawan, de klariklari fu gi sma pardon „te nanga seibitenti na seibi tron”, dati wani taki, ala ten.
14. Fa wi kan sori sari-ati gi trawan na ini wi aladei libi, soleki fa Mateyus 7:1-4 e sori?
14 Na ini a Bergitaki fu en, Yesus sori ete wan fasi fa wi kan sori sari-ati gi trawan. A ben taki: „Un no krutu sma, so taki trawan no krutu unu; bika na a fasi fa unu e krutu trawan, na a srefi fasi dati den sa krutu unu . . . Dan fu san ede yu e luku a splentri na ini yu brada ai, ma yu no e si a postu na ini yu eigi ai? Noso fa yu kan taigi yu brada: ’Kon meki mi puru a splentri na ini yu ai’, aladi wan postu de na ini yu eigi ai?” (Mateyus 7:1-4). Fu dati ede, wi kan sori sari-ati gi trawan na ini wi aladei libi, te wi e frudrage den swakifasi fu den sondro taki wi e krutu den.
„Du bun gi ala sma”
15. Fu san ede wi no musu sori sari-ati gi wi Kresten brada nanga sisa wawan?
15 Aladi a Bijbel buku Yakobus e sori taki Kresten musu sori sari-ati gi makandra, toku dati no wani taki dati wi musu sori sari-ati soso gi den Kresten brada nanga sisa fu wi. Psalm 145:9 e taki: „Yehovah bun gi ala sma, èn a e sori sari-ati gi ala sani di a meki.” Wi e kisi a rai fu „waka baka na eksempre fu Gado”, èn fu „du bun gi ala sma” (Efeisesma 5:1; Galasiasma 6:10). Aladi wi no lobi „grontapu nanga den sani fu grontapu”, toku wi e suku fu yepi grontapusma di de na nowtu.—1 Yohanes 2:15.
16. Sortu sani wi musu hori na prakseri te wi wani sori sari-ati gi trawan?
16 Wi leki Kresten de klariklari fu du iniwan sani di de fanowdu fu yepi sma di e pina leki bakapisi fu „sani di pasa sondro fu sma fruwakti dati”, noso sma di de na ini bigi problema (Preikiman 9:11). A no de fu taki, dati wi srefi musu sabi san wi kan du èn omeni wi kan du (Odo 3:27). Te wi e du bun sani fu yepi trawan, dan wi musu luku bun taki den sani dati no e meki sma kon lesi (Odo 20:1, 4; 2 Tesalonikasma 3:10-12). Fu dati ede, wan sma di e sori trutru sari-ati gi trawan, e firi sari gi den sma dati, èn a e denki bun san na a moro bun fasi fa a kan yepi den sma dati.
17. San na a moro bun fasi fa wi kan sori sari-ati gi den wan di no de na bribi?
17 A moro bun fasi fa wi kan sori sari-ati gi sma di no de na bribi, na fu fruteri den a boskopu fu Bijbel. Fu san ede? Fu di bun furu sma na ini a ten disi no sabi noti fu Gado. Fu di furu sma no sabi fa fu lusu den problema di e miti den, èn fu di den no abi wan tru howpu gi a ten di e kon, meki ’sma e pina den èn den e waka bruyabruya leki skapu di no abi skapuman’ (Mateyus 9:36). A boskopu fu Gado Wortu kan de leki ’wan lampu gi den futu’ fu den sma disi, èn a kan sori den fa fu lusu den problema na ini den libi. A kan de ’wan leti tu na tapu den pasi’ fu di Bijbel e taki san Gado o du na ini a ten di e kon. A sani disi e gi den wan moi howpu (Psalm 119:105). A de wan grani trutru fu fruteri den wan di de na ini bigi problema, den moi tru tori fu Gado! Fu di a „bigi banawtu” de krosibei, meki disi na a ten fu teki prati fayafaya na a Kownukondre preikiwroko, èn fu meki disipel (Mateyus 24:3-8, 21, 22, 36-41; 28:19, 20). Wan moro bun fasi no de fa wi kan sori sari-ati gi trawan.
Gi trawan „san de na ini unu”
18, 19. Fu san ede wi musu meki muiti fu sori moro sari-ati gi trawan?
18 Yesus ben taki: „Un musu du pôtisma wan bun fu di unu abi sari-ati nanga den èn un musu gi den san de na ini unu” (Lukas 11:41). Efu wi wani du bun gi wan sma di abi yepi fanowdu, dan wi musu du dati na wan lobi-ati fasi èn nanga wi heri ati. Dan fosi wi kan taki dati wi sori trutru sari-ati gi a sma (2 Korentesma 9:7). Tide na a dei, grontapu lai nanga sma di no e firi gi trawan, di e denki densrefi nomo, èn di no e broko den ede nanga sma di e pina èn di abi problema. Dati meki a e gi sma deki-ati trutru te wi e sori trutru sari-ati gi den!
19 Sobun, meki wi du muiti fu sori moro sari-ati gi trawan na ini wi aladei libi. O moro wi e sori sari-ati gi trawan, o moro wi sa kon de leki Gado. Disi sa yepi wi fu abi wan trutru bun marki na ini a libi, èn fu de koloku.—Mateyus 5:7.
San yu leri?
• Fu san ede a de fanowdu taki wi e sori sari-ati gi wi Kresten brada nanga sisa?
• Fa wi kan sori sari-ati gi wi Kresten brada nanga sisa?
• Fa wi kan du san bun gi den wan di no de na bribi?
[Aksi fu a tori disi]
[Prenki na tapu bladzijde 26]
A Samariasma sori sari-ati gi a tra man
[Prenki na tapu bladzijde 27]
Kresten lobi fu sori sari-ati gi trawan
[Prenki na tapu bladzijde 30]
A moro bun fasi fa wi kan sori sari-ati gi sma di no de na bribi, na fu fruteri den a boskopu fu Bijbel