Du muiti fu kon abi „a koni fu gi sma leri”
Du muiti fu kon abi „a koni fu gi sma leri”
„Preiki a wortu, . . . frumane sma, warskow den, gi den deki-ati, èn du dati nanga langa pasensi èn nanga a koni fu gi sma leri.”—2 TIM. 4:2.
1. Sortu komando Yesus ben gi den disipel fu en, èn fa a ben de wan eksempre gi den?
ALADI Yesus ben e dresi sma na wan wondru fasi di a ben de na grontapu, toku sma no ben sabi en leki wan sma di ben e du wondru, ma den ben sabi en leki wan leriman (Mark. 12:19; 13:1). A moro prenspari sani gi Yesus, ben de fu preiki a bun nyunsu fu Gado Kownukondre, èn na so a de tu gi den bakaman fu en na ini a ten disi. Kresten kisi a wroko fu tan leri sma fu du ala sani di Yesus ben leri den, so taki den sma dati kan tron disipel.—Mat. 28:19, 20.
2. San wi musu du fu man du a wroko di wi kisi fu preiki a bun nyunsu?
2 Fu di wi wani du a wroko di wi kisi fu meki disipel, meki wi e du muiti doronomo fu tron moro bun leriman. Na ini wan brifi di na apostel Paulus ben skrifi gi Timoteyus di ben gwenti wroko makandra nanga en, a tyari kon na krin fu san ede a de prenspari fu de wan bun leriman. A ben skrifi: „Tan poti prakseri na yusrefi èn na a fasi fa yu e gi leri. Hori yusrefi na den sani disi, bika te yu du disi, dan yu sa frulusu yusrefi èn sosrefi den sma di e arki yu” (1 Tim. 4:16). Den sani di Paulus ben skrifi, no ben de fu sori Timoteyus taki a ben musu gi sma leri soso fu meki den kon sabi sani. Kresten di de bun leriman e doro na ati fu sma èn den e gi sma deki-ati fu tyari kenki kon na ini den libi. A sani dati na wan koni. Sobun, fa wi kan kon abi a „koni fu gi sma leri” te wi e meki den kon sabi a bun nyunsu fu Gado Kownukondre?—2 Tim. 4:2.
Kon abi a „koni fu gi sma leri”
3, 4. (a) Fa wi kan kon abi a „koni fu gi sma leri”? (b) Fa a Theokrasia Diniwroko-skoro e yepi wi fu tron bun leriman?
3 Wan wortubuku e taki dati wan sma kan kisi „koni” ’te a e ondrosuku sani, te a e leri fu du wan sani, noso te a e luku fa wan trawan e du wan sani’. Wi musu poti prakseri na ala den dri sani disi efu wi wani abi bun bakapisi te wi e leri sma a bun nyunsu. Wi kan kon frustan wan tori finifini, soso te wi e begi Gado fu yepi wi te wi e studeri a tori dati. (Leisi Psalm 119:27, 34.) Te wi e luku fa bun leriman e gi leri, dan wi kan leri fu den, so taki wi kan gi leri neleki den. Èn te wi e pruberi doronomo fu du san wi leri, dan dati sa yepi wi fu tron moro bun leriman.—Luk. 6:40; 1 Tim. 4:13-15.
4 Yehovah na wi Gran Leriman. Nanga yepi fu en organisâsi na grontapu a e leri den futuboi fu en fa fu du a preikiwroko di den kisi fu du (Yes. 30:20, 21). Fu dati ede, a Theokrasia Diniwroko-skoro e hori na ini den gemeente ibri wiki, èn dati na fu yepi ala den sma di de tapu a skoro disi fu tron bun preikiman fu Gado Kownukondre. A moro prenspari leribuku fu a skoro disi na Bijbel. A Wortu fu Yehovah di skrifi nanga yepi fu santa yeye, e sori wi san wi musu leri sma. Boiti dati, a e sori wi tu fa fu gi leri na a yoisti fasi èn na wan fasi di fiti. A Theokrasia Diniwroko-skoro e memre wi doronomo taki wi sa tron moro bun leriman te wi e leri sma sani di e kruderi nanga Gado Wortu, te wi e poti bun aksi gi sma, te wi e gi sma leri na wan fasi di makriki fu frustan, èn te wi e sori sma taki wi e broko wi ede trutru nanga den. Meki wi luku ibriwan fu den sani disi. Baka dati, wi sa luku san wi kan du fu doro na ati fu wan bijbelstudie.
Leri sma sani di e kruderi nanga Gado Wortu
5. Pe den sani di wi e leri sma musu komoto, èn fu san ede dati musu de so?
5 Yesus, a moro bun leriman di oiti ben de na grontapu, ben e leri sma sani di e komoto fu Bijbel (Mat. 21:13; Yoh. 6:45; 8:17). A no ben e leri sma en eigi sani, ma a ben e leri sma sani di e komoto fu a Sma di ben seni en kon (Yoh. 7:16-18). Wi musu du a srefi. Sobun, den sani di wi e leri sma te wi e preiki oso fu oso noso te wi de na wan bijbelstudie, musu komoto fu Gado Wortu (2 Tim. 3:16, 17). Awansi o bun wi man fruklari sani gi sma, toku dati no sa abi so furu krakti tapu sma leki te wi sori den san skrifi na ini Gado Wortu. Bijbel trutru abi krakti tapu sma. Awansi sortu tori wi wani yepi a bijbelstudie fu kon frustan, a moro bun fasi fa wi kan du dati, na fu meki a leisi san Gado Wortu e taki fu a tori dati.—Leisi Hebrewsma 4:12.
6. Fa wan leriman kan sorgu taki a bijbelstudie e frustan den sani di a e leri?
6 Ma dati no wani taki dati wan Kresten leriman no abi fu sreka ensrefi, fosi a go studeri Bijbel nanga wan sma. Na presi fu dati, a musu denki bun fosi sortuwan fu den bijbeltekst ensrefi noso a bijbelstudie o leisi na ini Bijbel te a o studeri nanga a sma dati. Nofo tron a moro bun fu leisi den bijbeltekst di e horibaka gi den sani di wi e bribi. A de prenspari tu fu yepi a bijbelstudie fu kon frustan ibri bijbeltekst di a e leisi.—1 Kor. 14:8, 9.
Poti bun aksi
7. Fu san ede a bun fu poti aksi gi sma te wi e studeri Bijbel nanga den?
7 Wan leriman di e poti bun aksi, e meki a bijbelstudie denki fu den sani di a e leri, èn na so a sa man doro na ati fu a bijbelstudie. Sobun, na presi taki yu e fruklari den tekst gi a bijbelstudie fu yu, aksi en fu fruklari a tekst gi yu. Son leisi a kan de fanowdu fu poti wan tra aksi, noso difrenti aksi gi a bijbelstudie fu yepi en fu kon frustan a tekst bun. Te yu e poti den sortu aksi disi gi a bijbelstudie fu yu, dan fu taki en leti, yu no e yepi en nomo fu frustan fu san ede wan sani de so, ma yu e yepi en tu fu bribi a sani dati.—Mat. 17:24-26; Luk. 10:36, 37.
8. Fa yu kan kon sabi san de na ini na ati fu wan bijbelstudie?
8 Den publikâsi fu wi abi aksi nanga piki na ini. A no de fu taki dati bun furu sma di wi e studeri Bijbel nanga den kan piki den aksi na ini a buku makriki, fu di den piki de fu feni na ini den paragraaf. Toku wan bun leriman no wani nomo taki a studenti e gi den yoisti piki. Fu eksempre, kande wan bijbelstudie man fruteri finifini san Bijbel e taki fu hurudu (1 Kor. 6:18). Ma a bun te leriman e poti aksi gi a bijbelstudie fu kon sabi fa ensrefi e denki fu den sani di a e leri. Te a leriman e poti den aksi disi sondro fu afrontu a bijbelstudie, dan a kan kon sabi efu a sma disi e agri nanga den sani di a e leri. A leriman kan aksi en den sani disi: „Fu san ede Bijbel e taki dati a no bun te wan sma abi seks nanga wan sma di no de en trowpatna? Fa yu feni a wet disi di Gado poti? Yu denki taki sma sa kisi wini te den e tyari densrefi na wan fasi di Gado feni bun?” A fasi fa a bijbelstudie e gi piki tapu den aksi disi, kan tyari kon na krin san de na ini en ati.—Leisi Mateyus 16:13-17.
Gi sma leri na wan fasi di makriki fu frustan
9. San wi musu hori na prakseri te wi e gi sma leri fu Bijbel?
9 Furu fu den tru tori di skrifi na ini Gado Wortu makriki fu frustan. Ma a kan taki den leri fu falsi bribi bruya a frustan fu sma di wi e studeri Bijbel nanga den. Wi leki leriman musu meki en makriki gi sma fu kon frustan Bijbel. Bun leriman e gi sma leri na wan fasi di makriki fu frustan, èn den e leri sma tru tori. Te wi e gi leri na a fasi disi, dan wi no sa meki en muilek gi sma fu kon frustan den tru tori fu Bijbel. No taki fu finifini tori di no de prenspari. A no de fanowdu fu taki fu ala sani di abi fu du nanga wan bijbeltekst di wi leisi. Poti prakseri soso na den sani di de fanowdu fu tyari a tori kon na krin di yu wani meki a sma kon frustan. Te a bijbelstudie e kon kisi moro sabi, dan a sa man frustan moro dipi tru tori fu Bijbel.—Hebr. 5:13, 14.
10. Sortu sani wi musu hori na prakseri te wi musu bosroiti o furu wi sa studeri nanga wan bijbelstudie te wi e go na en?
10 O furu wi musu studeri nanga wan bijbelstudie te wi e go na en? We, a leriman musu man si dati. Kande a studenti no man studeri so furu leki a leriman, èn kande a situwâsi fu den e difrenti tu. Ma wan sani di wi leki leriman musu hori na prakseri ala ten, na taki wi musu yepi a bijbelstudie fu kon abi wan tranga bribi. Dati meki wi e gi a bijbelstudie nofo ten fu leisi èn fu frustan den tru tori di skrifi na ini Gado Wortu, so taki den kan bribi den te fu kaba. Wi no sa studeri moro sani leki san a studenti man frustan. Na a srefi ten, wi no e tan tumusi langa tapu wan tori. Te a bijbelstudie frustan wan tori kaba, dan wi musu go doro nanga wan trawan.—Kol. 2:6, 7.
11. Fa na apostel Paulus e leri wi fu tron bun leriman?
11 Te na apostel Paulus ben e fruteri nyunwan a bun nyunsu, dan a ben e du dati na wan makriki fasi. Aladi a ben kisi heiskoro leri, toku a no ben e gebroiki wan lo hebi wortu te a ben e taki nanga sma. (Leisi 1 Korentesma 2:1, 2.) Fu di den tru tori fu Bijbel makriki fu frustan, meki den e hari a prakseri fu opregtisma, èn den e meki den sma disi firi bun. Sma no abi fu teki heiskoro leri fu man frustan den tru tori disi.—Mat. 11:25; Tori. 4:13; 1 Kor. 1:26, 27.
Yepi bijbelstudie fu warderi san den e leri
12, 13. Sortu reide wan bijbelstudie kan abi fu fiti den sani di a e leri? Fruklari dati.
12 Fu man abi bun bakapisi, dan den sani di wi e leri a bijbelstudie, musu doro na ati fu en. A bijbelstudie musu frustan fa a kan fiti den sani di a leri na ini en eigi libi, fa den sani dati sa tyari wini kon gi en, èn fa a sa kon abi wan moro bun libi te a e fiti den rai fu Bijbel.—Yes. 48:17, 18.
13 Fu eksempre, kon meki wi taki dati wi e poti prakseri na Hebrewsma 10:24, 25. A tekst disi e gi Kresten deki-ati fu kon makandra nanga tra Kresten brada nanga sisa, fu kisi deki-ati nanga yepi fu Bijbel, èn fu sori lobi gi makandra. Efu a bijbelstudie no e go na den konmakandra ete, dan wi kan fruteri en syatu fa sani e waka na den konmakandra disi èn san wi sa leri drape. Kande wi kan taigi a bijbelstudie taki den konmakandra disi na pisi fu na anbegi fu wi èn wi kan sori en tu taki den e tyari wini kon gi wi. Baka dati, wi kan aksi en fu kon na den konmakandra. A bijbelstudie no musu fiti den rai fu Bijbel soso fu di a wani plisi a sma di e studeri nanga en, ma a musu du dati fu di a wani gi yesi na Yehovah.—Gal. 6:4, 5.
14, 15. (a) San wan bijbelstudie kan leri fu Yehovah? (b) Fa wan bijbelstudie kan kisi wini te a e kon sabi Gado moro bun?
14 Wan prenspari fasi fa sma e kisi wini te den e studeri Bijbel èn te den e fiti san den e leri, na taki den e kon sabi èn e kon lobi Yehovah leki wan trutru sma (Yes. 42:8). Boiti taki Yehovah na wan lobi-ati Tata, a Mekiman, èn a Sma di abi hemel nanga grontapu, a e meki den wan di lobi èn e dini en, kon sabi den fasi fu en èn den sani di a man du. (Leisi Exodus 34:6, 7.) Di Moses ben musu tyari a pipel fu Israel komoto na ini katibo na Egepte, dan Yehovah meki Moses kon sabi suma na En. A ben taki: „Mi sa tron suma mi wani tron” (Ex. 3:13-15). A sani disi ben wani taki dati Yehovah ben o tron iniwan sani di a ben musu tron fu man du san a ben abi na prakseri gi a pipel fu en. Na so den Israelsma kon sabi Yehovah leki den Frulusuman, leki a Sma di feti gi den, leki a Sma di ben e sorgu gi den, èn leki a Sma di e du san a pramisi. Den kon sabi En tu leki wan Sma di yepi den na tra fasi.—Ex. 15:2, 3; 16:2-5; Yos. 23:14.
15 A kan taki den bijbelstudie fu wi no e ondrofeni taki Yehovah e yepi den na a srefi wondru fasi fa a ben yepi Moses. Ma te a bribi fu den bijbelstudie fu wi e kon moro tranga, te den e kisi moro warderi gi den sani di den e leri, èn te den e fiti den sani dati na ini den libi, dan a no de fu taki dati den sa kon frustan taki den abi Yehovah fanowdu fu gi den deki-ati nanga koni, èn fu tiri den. Te den e du dati, dan den sa kon sabi Yehovah tu leki wan koni Raiman di den kan frutrow, leki a Sma di e kibri den, èn leki a Sma di de klariklari fu gi den ala san den abi fanowdu.—Ps. 55:22; 63:7; Odo 3:5, 6.
Sori a bijbelstudie taki yu e broko yu ede nanga en
16. Fu san ede den koni di wi abi leki leriman, a no den moro prenspari sani?
16 Yu feni taki yu no abi nofo koni fu gi sma bun leri? Efu dati de so, dan no lasi-ati. Yehovah nanga Yesus e tiri a leriwroko di e du na heri grontapu na ini a ten disi (Tori. 1:7, 8; Openb. 14:6). Den kan horibaka gi yu so taki den sani di yu e leri opregtisma kan doro na ati fu den sma dati (Yoh. 6:44). Awansi wan leriman no abi nofo koni, toku a o man yepi a bijbelstudie fu en, efu a abi trutru lobi gi a sma dati. Na apostel Paulus ben sori taki a ben sabi o prenspari a de fu lobi den wan di wi e gi leri.—Leisi 1 Tesalonikasma 2:7, 8.
17. Fa wi kan sori wan bijbelstudie taki wi e broko wi ede trutru nanga en?
17 Te wi e meki ten fu kon leri sabi ibri bijbelstudie moro bun, dan wi e sori tu taki wi e broko wi ede trutru nanga en. Te wi e taki fu Bijbel gronprakseri nanga wan bijbelstudie, dan dati kan yepi wi fu kon sabi moro bun san na a situwâsi fu en. Kande wi sa si taki a e fiti sonwan fu den Bijbel leri kaba na ini en libi. Ma kande a musu tyari ete wan tu kenki kon na ini tra afersi fu en libi. Te wi e yepi a studenti fu kon si fa a kan fiti den sani di a e leri na ini en eigi libi, dan wi kan yepi en na wan lobi-ati fasi fu tron wan trutru disipel fu Krestes.
18. Fu san ede a de prenspari fu begi nanga wi bijbelstudie èn fu begi gi en?
18 Ma san moro prenspari, na taki wi kan begi nanga a bijbelstudie fu wi, èn wi kan begi gi en tu. A musu man si krin taki wi wani yepi en fu kon sabi a Mekiman fu en moro bun, fu kon moro krosibei na En, èn fu kisi wini fu a tiri fu En. (Leisi Psalm 25:4, 5.) Te wi e begi Yehovah fu yepi a studenti fu du den sani di a e leri, dan a studenti sa si o prenspari a de fu tron wan ’sma di e du san a wortu e taki’ (Yak. 1:22). Èn te a studenti e arki den opregti begi fu wi, dan ensrefi sa leri fa fu begi. A e gi prisiri trutru fu yepi bijbelstudie fu kon moro krosibei na Yehovah!
19. Na sortu sani wi sa poti prakseri na ini a tra artikel?
19 A moi fu sabi taki moro leki siksi nanga afu milyun Kotoigi na heri grontapu e meki muiti fu kon abi „a koni fu gi sma leri”, fu di den wani yepi opregtisma fu du ala san Yesus ben leri den. San na den bakapisi fu a preikiwroko di wi e du? Wi sa luku a piki tapu na aksi disi na ini a tra artikel.
Yu e memre disi?
• Fu san ede ala Kresten musu kon abi a „koni fu gi sma leri”?
• San wi kan du fu tron moro bun leriman?
• San kan yepi wi te wi no abi nofo koni fu gi sma leri?
[Aksi fu a tori disi]
[Prenki na tapu bladzijde 9]
Yu de tapu a Theokrasia Diniwroko-skoro?
[Prenki na tapu bladzijde 10]
Fu san ede a de prenspari fu aksi a studenti fu leisi den tekst na ini Bijbel?
[Prenki na tapu bladzijde 12]
Begi nanga a bijbelstudie fu yu èn begi tu gi en