Leri fu den fowtu fu den Israelsma

DEN Israelsma ben sabi san Yehovah ben fruwakti fu den te den ben o go na ini a Pramisi Kondre. Nanga yepi fu Moses, Gado gi den a komando disi: „Un musu yagi ala sma di e tan na ini a kondre, èn un musu pori ala den ston popki nanga den isri popki fu den. Un musu broko ala den santa hei presi fu den tu.”—Num. 33:52.

Den Israelsma no ben musu meki frubontu nanga den sma fu a kondre, èn den no ben musu trow nanga den (Deut. 7:2, 3). Iya, a pipel fu Gado ben kisi a warskow: „Luku bun taki unu no meki wan frubontu nanga den sma fu den kondre pe unu e go, bika dati kan tyari unu na ini problema” (Ex. 34:12). Ma toku den Israelsma trangayesi Gado èn den kon na ini problema. San meki taki den no gi yesi na Gado? Fa den sani di den du èn den sani di pasa nanga den, de leki wan warskow gi wi?—1 Kor. 10:11.

Fa krosibei demakandra meki taki den du afkodrei

Na a bigin di den Israelsma ben teki a Pramisi Kondre abra, dan den ben wini den sma di ben libi drape. Ma den manpikin fu Israel no gi yesi na ala den komando fu Gado. Den no yagi den feanti gowe (Krut. 1:1–2:10). Na presi taki den du dati, den Israelsma bigin libi na mindri den „seibi pipel” di ben libi na ini a kondre, èn fu di den ben abi furu demakandra nanga den sma fu den kondre dati, meki den tron mati fu den (Deut. 7:1). Fa a sani disi ben abi krakti tapu den Israelsma? Bijbel e taki: „Den Israelsma teki den umapikin fu den pipel disi leki wefi gi densrefi, èn den meki den eigi umapikin trow nanga den manpikin fu den pipel disi. Den go dini den gado fu den pipel tu. Na so den manpikin fu Israel du sani di Yehovah no feni bun. Den frigiti Yehovah, a Gado fu den, èn den go anbegi den Bâal-gado èn den santa postu” (Krut. 3:5-7). Fu di den Israelsma ben abi demakandra nanga den sma di ben libi na ini a kondre, meki sonwan fu den trow nanga den sma dati èn den bigin anbegi den gado fu den. Di den Israelsma bigin trow nanga den sma dati, dan safrisafri den no ben yagi den sma gowe fu a kondre moro. Den Israelsma pori a tru anbegi èn den bigin anbegi falsi gado srefi.

Ogri ben kan miti den Israelsma di den sma fu a Pramisi Kondre ben de den feanti, fu di den sma disi ben kan go feti nanga  den. Ma now di den sma disi tron mati fu den Israelsma, dan moro ogri ben kan miti den, fu di den sma disi ben kan pori a denki fu den Israelsma nanga a matifasi di den ben abi nanga Gado. Poti prakseri na sortu tra fasi den Israelsma ben kan pori a matifasi di den ben abi nanga Gado.

Fa gronwroko meki taki den bigin anbegi Bâal

Di den manpikin fu Israel go na ini a Pramisi Kondre, dan den no froisi fu a wán presi go na a trawan moro, ma furu fu den tron gronman. Den wroko a gron kande na a srefi fasi leki den Kanansma, di ben du a wroko dati fosi den. Soleki fa a sori, a fasi fu wroko gron no ben de a wan-enkri sani di den Israelsma teki abra fu den Kanansma. Fu di den Israelsma ben abi demakandra nanga den sma fu a kondre, meki den sma fu a kondre kori den fu teki a bribi fu den abra di ben abi fu du nanga gronwroko.

Den Kanansma ben anbegi furu Bâal gado, fu di den ben bribi taki den gado disi ben meki a gron gi moro nyanyan. Boiti taki den Israelsma wroko a gron èn piki den sani di den prani, te fu kaba den bigin anbegi den gado fu den Kanansma tu, fu di den bigin bribi taki den gado dati e meki den sani fu den gi furu nyanyan. Sobun, furu Israelsma ben du neleki den ben anbegi Yehovah, ma fu taki en leti, den ben teki prati na sani di Gado no feni bun kwetikweti.

Tumusi prenspari warskow gi wi na ini a ten disi

A no de fu taki dati di den Israelsma miti fu a fosi leisi nanga den sma di ben libi na ini a Pramisi Kondre, den no ben abi a prakseri fu anbegi Bâal èn fu du den ogri sani di sma ben du na ini na anbegi dati. Ma na a demakandra di den ben abi nanga den sma fu a kondre meki taki den go anbegi Bâal. Wi kan fruwakti fu kisi den srefi sortu takru bakapisi dati te wi abi demakandra nanga sma di abi bun maniri kande, ma di no e anbegi a srefi Gado leki wi, di no e tyari densrefi leki wi, èn di no e hori densrefi na den srefi markitiki nanga gronprakseri leki wi. A no de fu taki dati na ini son situwâsi a kan de fanowdu fu de makandra nanga sma di no de na bribi, soleki na wi wrokope, na skoro, noso na oso srefi. Ma den sani di miti den Israelsma musu de leki warskow gi wi fu no suku demakandra nanga den sortu sma disi, fu di na so wi e suku problema gi wisrefi. Bijbel e taki san o de a bakapisi: „Takru kompe e pori bun gwenti.”—1 Kor. 15:33.

Na ini a ten disi, wi e kisi furu tesi di de leki den tesi di den Israelsma ben kisi. Na ini a libimakandra fu a ten disi, furu sani èn furu sma de di trawan e si leki gado. Wan tu fu den sani disi na moni, pôpi sma di e singi noso di e du sport, politiek sistema, son kerki fesiman, èn srefi memre fu wi famiri. Iniwan fu den sani disi kan tron a moro prenspari sani na ini wi libi. Te wi e kon tron mati fu sma di no lobi Yehovah, dan dati kan pori a matifasi di wi abi nanga En.

Wan prenspari sani fu na Bâal anbegi, na taki sma di no trow nanga makandra ben e abi seks. Furu Israelsma ben fadon na ini a trapu disi. Wan tu futuboi fu Gado e fadon na ini a srefi sortu trapu disi. Fu eksempre, wan Kresten di lobi fu kon sabi nyun sani noso di no e luku bun, kan pori a krin konsensi fu en makriki. Srefi na ini en eigi oso disi kan pasa te a e go na tapu Internet èn te a e si morsu seks prenki drape. A ben o de wan sari sani trutru efu wan Kresten fadon na ini a trapu fu luku morsu seks prenki tapu Internet!

„Koloku fu den sma di e hori densrefi na den frumane fu en”

A de na wisrefi fu bosroiti efu wi o gi yesi na Yehovah noso efu wi no o gi yesi na en, te a abi fu du nanga den sma di wi e teki leki mati (Deut. 30:19, 20). Fu dati ede, wi musu aksi wisrefi: ’Nanga suma mi abi demakandra te mi abi prisiriten? Fa den e si den wet fu Gado, èn fa den e tyari densrefi? Den e anbegi Yehovah? A demakandra di mi o abi nanga den sa gi mi deki-ati fu de wan moro bun Kresten?’

A psalm skrifiman ben singi: „Koloku fu den sma di tan sondro fowtu na tapu a pasi fu den, den sma di e waka na ini a wet fu Yehovah. Koloku fu den sma di e hori densrefi na den frumane fu en; den e tan suku en nanga den heri ati” (Ps. 119:1, 2). Iya, „koloku fu ibriwan sma di e frede Yehovah, èn di e waka den pasi fu en” (Ps. 128:1). Te a abi fu du nanga den sma di wi e teki leki mati, dan meki wi leri fu den fowtu fu den Israelsma, èn meki wi gi yesi dorodoro na Yehovah.—Odo 13:20.

[Prenki na tapu bladzijde 26]

Te wi abi krosibei demakandra nanga sma di no lobi Yehovah, dan dati kan meki taki wi du afkodrei