Yu e taki a „soifri tongo” bun?
Yu e taki a „soifri tongo” bun?
„Mi sa meki den pipel taki wan soifri tongo, so taki den alamala kan kari a nen fu Yehovah.”—SEF. 3:9.
1. Sortu tumusi moi presenti Yehovah gi wi?
A TAKI di libisma man taki, no kon fu densrefi, ma na a Mekiman fu den, Yehovah Gado, gi den a presenti disi (Ex. 4:11, 12). Boiti taki a gi Adam a koni fu taki, a gi en a koni tu fu meki nyun wortu (Gen. 2:19, 20, 23). Disi na trutru wan tumusi moi presenti! A presenti disi meki taki libisma man taki srefi nanga den hemel Tata, èn den man prèise en bigi nen.
2. Fu san ede libisma no e taki wán tongo moro?
2 Na ini den fosi 1700 yari di libisma ben de na grontapu, ala sma ben e taki wán tongo nomo, iya, den ben abi „wán fasi fu taki” (Gen. 11:1). Baka dati, sma na ini a ten fu Nimrod bigin opo densrefi teige Gado. Yehovah ben taki dati libisma ben musu panya go na ala sei fu grontapu. Ma den trangayesi sma ben wani tan na wán presi nomo. Dati meki den kon na wán na a presi di kisi a nen Babel bakaten. Den bigin bow wan bigi toren, ma den no ben du dati fu gi glori na Yehovah. Den ben du dati fu gi densrefi „biginen”. Dati meki Yehovah bruya a tongo fu den trangayesi sma dati, èn a meki den taki difrenti tongo. Leki bakapisi fu dati, den panya go na ala sei fu grontapu.—Leisi Genesis 11:4-8.
3. San pasa di Yehovah bruya a tongo fu den trangayesi sma na Babel?
3 Na ini a ten disi, sma na grontapu e taki dusundusun tongo. Son sma e taki dati moro leki 6800 tongo de. Ibriwan fu den tongo disi e taki na wan tra fasi, fu di den sma di e taki den tongo disi e denki heri tra fasi. A sani disi e sori taki di Yehovah Gado bruya a tongo fu den trangayesi sma, dan a meki den frigiti ala sani fu a tongo di den ben e taki fosi. Boiti taki a poti nyun wortu na ini den frustan, a kenki sosrefi a fasi fa den ben e denki. Wan tra sani di a du, na taki a meki den gebroiki den wortu na wan heri tra fasi fu tyari den prakseri fu den kon na krin. Dati meki a no e fruwondru wi taki sma bigin kari a presi pe a toren ben de, „Bruya”, noso Babel! (Gen. 11:9). A moi fu sabi taki Bijbel wawan e fruteri wi krin fa a du kon taki libisma e taki difrenti tongo na ini a ten disi.
Wan nyun èn soifri tongo
4. San ben o pasa na ini a ten fu wi, soleki fa Yehovah ben taki na fesi?
4 Kande yu feni taki a Bijbel tori di e fruteri fa Gado bruya a tongo fu den sma na Babel, na wan moi tori. Ma wan moro moi sani pasa na ini a ten disi, èn a sani disi moro prenspari srefi. Yehovah ben meki a profeiti Sefanya skrifi a profeititori disi: „Na a ten dati mi sa meki den pipel taki wan soifri tongo, so taki den alamala kan kari a nen fu Yehovah, fu man dini en leki wán man” (Sef. 3:9). San na a „soifri tongo”? Fa wi kan leri taki a tongo disi bun?
5. San na a soifri tongo èn san pasa fu di sma bigin taki a tongo disi?
5 A soifri tongo na den tru tori di abi fu du nanga Yehovah Gado èn nanga den sani di a o du, soleki fa skrifi na ini Bijbel, a Wortu fu en. Den sma di man taki na agersi tongo dati e frustan krin san na a Kownukondre fu Gado. Den sma disi e frustan krin tu fa a Kownukondre dati o santa a nen fu Yehovah, fa a sa meki sma kon sabi taki na Yehovah wawan abi a reti fu tiri, èn fa a o tyari têgo blesi kon gi den sma di e gi yesi na En. San na a bakapisi te sma e bigin taki a soifri tongo? Bijbel e taki dati sma sa „kari a nen fu Yehovah” èn den sa „dini en leki wán man”. Tra fasi leki san den sma na Babel ben du, den sma di bigin taki a soifri tongo disi e prèise Yehovah en nen èn den e libi na ini wánfasi leki a pipel fu en.
Fa wi kan leri taki a soifri tongo?
6, 7. (a) San wan sma musu du te a e leri taki wan nyun tongo, èn fa dati kan yepi en te a e leri taki a soifri tongo? (b) Na sortu sani wi sa poti prakseri now?
6 Te wan sma e bigin leri wan tra tongo, dan a no musu suku nomo fu leri nyun wortu na ede. Wan sma di e leri wan nyun tongo musu leri denki na wan tra fasi. Son leisi, sma di e taki wan tra tongo e frustan sani na wan heri tra fasi, èn den e lafu fu heri tra sani. Fu man taki den nyun wortu na wan yoisti fasi, dan wan sma sa abi fu gebroiki en tongo na wan tra fasi. Na so a de tu te wi e leri taki a soifri tongo di abi fu du nanga den tru tori fu Bijbel. A no musu de so nomo, taki wi e kon sabi wan tu prenspari Bijbel leri. Fu man taki a tongo disi bun, dan wi musu kenki a fasi fa wi e denki.—Leisi Romesma 12:2; Efeisesma 4:23.
7 San o yepi wi fu frustan a soifri tongo èn fu taki en bun? Neleki fa a de nanga iniwan tongo di wi e leri taki, wan tu prenspari sani de di kan yepi wi fu taki a soifri tongo bun. Wi sa poti prakseri na wan tu prenspari sani di sma e du te den e leri wan tra tongo. Wi sa luku fa den sani disi kan yepi wi te wi e leri taki a nyun agersi tongo disi.
Taki a soifri tongo bun
8, 9. San wi musu du te wi wani leri taki a soifri tongo, èn fu san ede a sani disi prenspari so?
8 Arki bun. Te wan sma e yere wan tra tongo fu a fosi leisi, dan kande a no man frustan notinoti (Yes. 33:19). Ma te wan sma e pruberi fu arki bun te trawan e taki a tongo dati, dan a o bigin frustan san sonwan fu den wortu wani taki, èn a o kon sabi tu fa sma e taki spesrutu sani. Bijbel e gi wi a srefi sortu rai disi. A e taki: „A de fanowdu taki wi e poti moro prakseri leki san wi gwenti na den sani di wi yere, so taki noiti wi no sa drifi gowe” (Hebr. 2:1). Ibri tron baka, Yesus ben e gi den bakaman fu en a rai disi: „A sma di abi yesi, meki a arki” (Mat. 11:15; 13:43; Mark. 4:23; Luk. 14:35). Iya, wi musu ’arki èn wi musu frustan’ san den sani di wi e yere wani taki. Disi sa yepi wi fu kon frustan a soifri tongo moro bun.—Mat. 15:10; Mark. 7:14.
9 Fu man arki bun, dan wi musu poti ala wi prakseri na san wi e yere. Te wi e du dati, dan wi sa kisi wini trutru (Luk. 8:18). Te wi de na den Kresten konmakandra, dan wi e poti ala wi prakseri na a leri di wi e kisi drape? Noso a de so taki tra sani e hari wi prakseri? A de tumusi prenspari taki wi e du ala muiti fu poti prakseri na a leri di wi e kisi na den konmakandra. Te wi no e du dati, dan wi kan kon lesi fu arki.—Hebr. 5:11.
10, 11. (a) Boiti taki wi musu arki bun, sortu tra sani wi musu du? (b) Te wi e taki a soifri tongo, dan san wi musu du tu?
10 Leri fu den wan di e taki a tongo bun. Boiti taki sma musu arki bun te den e leri taki wan nyun tongo, den musu pruberi tu fu taki neleki den wan di e taki a tongo bun. Te den e du dati, dan den no sa bigin taki a tongo na wan fasi di sma no man frustan. Na so a de tu taki wi musu leri fu den wan di abi a ’koni fu leri sma’ a nyun tongo (2 Tim. 4:2). Aksi trawan fu yepi yu. De klariklari fu teki leri te trawan e sori yu sortu fowtu yu meki.—Leisi Hebrewsma 12:5, 6, 11.
11 Te wi e taki a soifri tongo, dan dati no wani taki nomo dati wi e bribi den tru tori fu Bijbel èn taki wi e yepi trawan fu kon sabi den tori dati. Wi musu hori wisrefi tu na den wet nanga den gronprakseri fu Gado. Wan sani di sa yepi wi fu du disi, na te wi e teki na eksempre fu trawan. Dati wani taki dati wi musu kon abi bribi neleki den èn wi musu kon de fayafaya neleki den. Boiti dati, wi musu pruberi tu fu libi neleki Yesus (1 Kor. 11:1; Hebr. 12:2; 13:7). Te wi e tan meki muiti fu du dati, dan disi sa tyari wánfasi kon na mindri a pipel fu Gado. Fu taki en leti, wi alamala o taki a soifri tongo na a srefi fasi.—1 Kor. 4:16, 17.
12. Te wi e pruberi fu leri sani na ede, dan fa dati kan yepi wi fu taki wan tongo bun?
12 Du muiti fu leri sani na ede. Sma di e leri wan tra tongo musu leri furu nyun sani na ede. Disi wani taki dati den musu leri nyun wortu na ede èn den musu leri na ede tu fa sma e taki spesrutu sani. Efu wan Kresten wani taki a soifri tongo bun, dan a kan de wan bigi yepi gi en te a e leri sani na ede. A no de fu taki, dati a de wan bun sani fu sabi den nen fu den buku fu Bijbel a wan baka a trawan. Son sma pruberi fu leri wan tu tekst na ede. Trawan ben si en leki wan bun sani fu leri Kownukondre singi na ede, den leri den nen fu den lo fu Israel èn den nen fu den 12 apostel. Den leri sosrefi den difrenti fasi fu a froktu fu a yeye. Na ini owruten, furu Israelsma ben e leri den psalm na ede. Na ini a ten disi, wan yongu boi ben sabi moro leki 80 Bijbel vers na ede na a ten di a ben abi siksi yari nomo, èn a ben sabi soifri san skrifi na ini ibriwan fu den tekst dati. A ben o bun te wi ben o meki moro muiti fu leri sani na ede, a no so?
13. Fu san ede a bun fu poti prakseri na sani ibri tron baka?
13 Te wi e poti prakseri na sani ibri tron baka, dan dati e yepi wi fu no frigiti den sani di wi sabi kaba. Disi na wan prenspari fasi fa wi e kisi leri leki Kresten. Na apostel Petrus ben taki: „Mi sa de klariklari ala ten fu memre unu na den sani disi, aladi unu sabi den èn e tanapu kánkan na ini a waarheid di de na ini unu” (2 Petr. 1:12). Fu san ede wi musu poti prakseri na sani ibri tron baka? Fu di dati e yepi wi fu frustan sani moro bun, èn wi sa meki moro muiti fu tan gi yesi na Yehovah (Ps. 119:129). Te wi e poti prakseri doronomo na den markitiki nanga den gronprakseri fu Gado, dan dati e yepi wi fu ondrosuku wisrefi, èn a e yepi wi tu fu sorgu taki wi no e tron ’sma di e frigiti san den yere’ (Yak. 1:22-25). Te wi no e tan poti prakseri na den tru tori fu Bijbel, dan tra sani sa abi krakti tapu na ati fu wi, èn kande wi no o man taki a soifri tongo bun moro.
14. San o yepi wi te wi e studeri a soifri tongo?
14 Leisi nanga wan tranga sten (Openb. 1:3). Son sma di e suku fu leri wan tra tongo, no e taki a tongo so taki den kan yere efu den e taki en bun. A sani disi no e yepi sma trutru fu taki a tongo bun. Te wi e leri taki a soifri tongo, dan son leisi a bun fu leisi „nanga wan safri sten”, so taki wi kan poti ala wi prakseri na san wi e leisi. (Leisi Psalm 1:1, 2.) Te wi e du dati, dan wi o man hori den sani di wi e leisi moro bun na ede. Na ini Hebrewtongo, den wortu di vertaal nanga „leisi nanga wan safri sten”, abi fu du nanga a denki di sma e denki dipi fu sani. Te wi nyan, dan a e teki ten fosi a skin fu wi e teki a nyanyan dati. Na so a de tu nanga den sani di wi e leisi. Wi musu teki ten fu denki dipi fu den sani di wi e leisi, fu man frustan krin san den sani dati wani taki. Wi e teki nofo ten fu denki dipi fu den sani di wi e studeri? Te wi kaba leisi Bijbel, dan wi musu denki dipi fu den sani di wi leisi.
15. San o yepi wi fu kon sabi fa wi musu gebroiki den „wortu” fu a soifri tongo?
15 Ondrosuku fa sma di e taki a soifri tongo e gebroiki den wortu. Te wi e leri taki wan tra tongo, dan baka wan pisi ten a bun fu ondrosuku fa den sma di e taki a tongo dati e gebroiki den wortu fu tyari kon na krin san den abi na prakseri. Disi sa yepi wi fu kon frustan fa den sma e taki a tongo, so taki wi kan leri taki a tongo bun. Ibri tongo e difrenti te a abi fu du nanga a fasi fa sma e gebroiki den wortu. Na so a de tu nanga a soifri tongo. A soifri tongo e gi wi na ’eksempre di e sori wi den bun sani di wi musu leri’ (2 Tim. 1:13). Wi musu teki na „eksempre” dati.
16. Sortu sani no musu pasa nanga wi, èn fa wi kan sorgu taki a sani dati no pasa nanga wi?
16 Tan go na fesi. Son leisi wan sma e leri taki wan tra tongo pikinso, ma baka wan pisi ten a e tapu fu leri taki en moro bun. Wan srefi sortu sani kan pasa nanga den wan di e leri taki a soifri tongo. (Leisi Hebrewsma 5:11-14.) Fa wi kan sorgu taki a sani disi no pasa nanga wi? De klariklari fu tan leri a tongo disi moro bun. Bijbel e gi wi a rai disi: „Now di wi leri den fosi sani kaba di abi fu du nanga Krestes, dan meki wi du muiti fu tron lepi sma. No meki wi poti wan fondamenti baka fu di wi e go leri baka taki sma musu abi berow fu den wroko di abi dede leki bakapisi, èn taki den musu bribi na ini Gado, sosrefi taki wi e leri baka fu den difrenti sortu dopu di de, èn fu a poti di sma e poti anu na tapu trawan, fu na opobaka fu den dedesma, èn fu a têgo krutu.”—Hebr. 6:1, 2.
17. Fu san ede a bun fu studeri doronomo? Gi wan eksempre.
17 Poti fasti ten na wan sei fu studeri. Te yu e studeri syatu èn te yu e du dati doronomo, dan dati moro bun leki te yu e studeri langa, wanwan leisi nomo. Studeri na ten te yu no abi furu sani na yu ede. Te wi e leri taki wan nyun tongo, dan a de leki te wi e koti wan pasi opo na ini a busi. O moro yu e waka a pasi dati, o moro makriki a sa de fu pasa drape. Te sma no e waka a pasi dati wan langa pisi ten, dan a no o teki langa fosi a pasi o gro tapu baka. Sobun, wi musu tan meki muiti fu studeri doronomo! (Dan. 6:16, 20) Tan begi èn „de na ai doronomo”, te yu e leri taki a soifri tongo di abi fu du nanga den tru tori fu Bijbel.—Ef. 6:18.
18. Fu san ede wi musu taki a soifri tongo na ibri okasi?
18 No frede fu taki! Kande son sma di e leri wan nyun tongo e frede fu taki a tongo, fu di den e syensyen, noso fu di den e frede fu meki fowtu. Te den e du dati, dan den no sa leri taki a tongo bun. Te wan sma wani leri taki wan tongo bun, dan a musu taki a tongo so furu leki a man. O moro a sma e taki a nyun tongo, o moro makriki a sa kon de gi en fu taki a tongo dati. Na so a de tu te wi e leri taki a soifri tongo. Wi musu taki a tongo disi na ibri okasi. Bijbel e taki: „Nanga na ati wan sma e bribi, èn dati sa meki taki a o kon de regtfardiki, ma nanga a mofo a e meki bekènti na sma taki a e bribi, èn dati sa meki taki a o kisi frulusu” (Rom. 10:10). Wan okasi pe wi meki ’bekènti na sma taki wi abi bribi’, na di wi teki dopu. Ma wi e meki bekènti tu taki wi abi bribi, te wi e taki fu Yehovah na ibri okasi, èn te wi e teki prati na a preikiwroko (Mat. 28:19, 20; Hebr. 13:15). Na den Kresten konmakandra wi abi na okasi fu gi krin èn syatu piki na ini a soifri tongo.—Leisi Hebrewsma 10:23-25.
Wi alamala musu taki a soifri tongo fu prèise Yehovah
19, 20. (a) Sortu tumusi moi sani Yehovah Kotoigi e du na ini a ten disi? (b) Sortu fasti bosroiti yu abi?
19 A no de fu taki dati a ben o moi srefisrefi efu wi ben de na ini Yerusalem tapu sonde mamanten, 6 Sivan fu a yari 33! Na a dei dati, syatu bifo neigi yuru mamanten, den wan di ben kon makandra na ini wan sodro kamra, „bigin taki na ini difrenti tongo” na wan wondru fasi (Tori. 2:4). Na ini a ten disi, Gado no e meki den futuboi fu en taki na wan wondru fasi na ini tra tongo (1 Kor. 13:8). Ma toku, Yehovah Kotoigi e meki a bun nyunsu fu a Kownukondre bekènti na ini moro leki 430 tongo.
20 Wi de nanga tangi trutru taki wi alamala e taki a soifri tongo fu Bijbel, awansi sortu tongo wi e taki! Te yu e luku en bun, dan disi de heri tra fasi leki san ben pasa na Babel. A de neleki a pipel fu Yehovah e taki wán tongo fu prèise en nen (1 Kor. 1:10). Meki a de so taki wi abi a fasti bosroiti fu tan dini „leki wán man” makandra nanga den brada nanga sisa fu wi na heri grontapu, aladi wi e tan leri taki a soifri tongo moro bun. Na so wi sa gi glori na wi hemel Tata, Yehovah.—Leisi Psalm 150:1-6.
San yu ben sa piki?
• San na a soifri tongo?
• San wan sma di e taki a soifri tongo musu du?
• San o yepi wi fu taki a soifri tongo bun?
[Aksi fu a tori disi]
[Faki na tapu bladzijde 23]
Sani di yu kan du fu leri taki a soifri tongo moro bun
◆ Arki bun.
◆ Leri fu den wan di e taki a tongo bun.
◆ Leri sani na ede, èn poti prakseri na sani ibri tron baka.
◆ Leisi nanga wan tranga sten.
◆ Ondrosuku fa sma di e taki a soifri tongo e gebroiki den wortu.
◆ Tan go na fesi.
◆ Poti fasti ten na wan sei fu studeri.
◆ Taki a tongo.
[Prenki na tapu bladzijde 24]
A pipel fu Yehovah e taki a soifri tongo leki wán man