Yu na wan ’futuboi fu a no-frudini bun-ati fu Gado’?

„Neleki fa brada lobi makandra, na so un musu abi dipi firi gi makandra. Unu fosi musu bigin sori trawan lespeki.”​—ROM. 12:10.

1. Sortu dyaranti Gado Wortu e gi wi?

GADO WORTU e gi wi a dyaranti doronomo taki Yehovah sa yepi wi te wi e firi brokosaka. Fu eksempre, luku den wortu disi di e gi wi trowstu: „Yehovah e yepi ala sma di e fadon. A e yepi ala sma di beni go na gron, fu opo tanapu.” „A e dresi den wan di e firi broko-saka, èn a e tai den soro fu den” (Ps. 145:14; 147:3). Boiti dati, wi hemel Tata srefi e taki: „Mi, Yehovah yu Gado, e grabu yu hori na yu reti-anu. Mi na a Sma di e taigi yu: ’No frede. Misrefi o yepi yu.’”​—Yes. 41:13.

2. Fa Yehovah e yepi den futuboi fu en?

² Ma fa Yehovah di e tan na hemel ’e grabu wi anu hori’? Fa a e yepi wi fu ’opo tanapu te wi beni go na gron’ fu di wi e sari? Yehovah Gado e yepi wi na difrenti fasi. Fu eksempre, a e gi a pipel fu en „a krakti di bigi pasa marki” nanga yepi fu en santa yeye (2 Kor. 4:7; Yoh. 14:16, 17). Den futuboi fu Gado e firi tu fa a boskopu di skrifi na ini Gado Wortu, Bijbel, e gi den krakti (Hebr. 4:12). Ete wan fasi de fa Yehovah e gi wi krakti? Wi e kisi piki tapu na aksi dati na ini a fosi brifi fu Petrus.

’A no-frudini bun-ati di Gado e sori na difrenti fasi’

3. (a) San na apostel Petrus e taki fu den tesi di kan miti wi? (b) Fu sortu sani a lasti pisi fu a fosi brifi fu Petrus e taki?

³ Na ini wan brifi di na apostel Petrus skrifi gi den salfu Kresten, a e taigi den taki den abi bun reide fu de nanga prisiri, fu di den sa kisi bigi blesi. Petrus e taki moro fara: „Efu na so a musu de, unu de nanga sari fu wan syatu pisi ten fu di unu kisi difrenti tesi” (1 Petr. 1:1-6). Poti prakseri na a wortu „difrenti”. A wortu disi e sori taki wi sa kisi difrenti sortu tesi. Ma dati a no ala san Petrus e taki. A no ben wani taki den Kresten brada nanga sisa fu en aksi densrefi efu den ben o man horidoro te furu difrenti tesi ben o miti den. Dati meki Petrus e sori den taki den kan de seiker taki Yehovah sa yepi den ibri leisi te den e kisi tesi, awansi sortu tesi na dati. Na apostel Petrus e gi den a dyaranti dati na a kabapisi fu a brifi fu en pe a e taki fu sani di abi fu du nanga „a kaba fu ala sani”.​—1 Petr. 4:7.

4. Fu san ede den wortu na 1 Petrus 4:10 de wan trowstu gi wi?

⁴ Petrus e taki: „Ibriwan fu unu di kisi wan presenti, musu gebroiki dati fu dini makandra leki bun futuboi fu a no-frudini bun-ati di Gado sori unu na difrenti fasi” (1 Petr. 4:10). Na ini a tekst disi Petrus e gebroiki a wortu „difrenti” ete wan leisi. Te yu e luku en bun, dan Petrus e taki dati aladi wi e kisi difrenti sortu tesi, toku Gado e sori wi no-frudini bun-ati tu na difrenti fasi. Fu san ede den wortu disi de wan trowstu gi wi? Den wortu disi e sori taki awansi sortu tesi wi e kisi, ala ten a no-frudini bun-ati fu Gado sa yepi wi fu horidoro. Ma te yu e luku den wortu fu Petrus, dan yu no e si fa Yehovah e sori no-frudini bun-ati gi wi? A e du dati nanga yepi fu wi Kresten brada nanga sisa.

Wi musu „dini makandra”

5. (a) San ibri Kresten musu du? (b) Sortu aksi e opo kon?

⁵ Luku san Petrus e taigi ala memre fu a  Kresten gemeente: „A moro prenspari sani, na taki un musu lobi makandra komoto fu a dipi fu un ati.” A e taki moro fara: „Ibriwan fu unu di kisi wan presenti, musu gebroiki dati fu dini makandra” (1 Petr. 4:8, 10). Sobun, ibri sma na ini a gemeente musu yepi fu bow den Kresten brada nanga sisa fu en. Wi kisi wan prenspari sani di de fu Yehovah, èn wi musu prati a sani dati gi tra sma. San wi kisi? Petrus e taki dati a sani dati na „wan presenti”. San na a presenti? Fa wi musu „gebroiki en fu dini makandra”?

6. San na wan tu presenti di wi leki Kresten kisi?

⁶ Gado Wortu e taki: „Ibri bun presenti nanga ibri volmaakti kado e kon fu tapusei” (Yak. 1:17). Iya, a reide fu san ede Yehovah gi a pipel fu en difrenti presenti, na fu di a ben wani sori no-frudini bun-ati gi wi. Wan tumusi moi presenti di Yehovah gi wi, na a santa yeye fu en. A presenti dati e yepi wi fu kweki den fasi fu Gado, èn dati na fasi soleki lobi, bunfasi, nanga switifasi. Te wi abi den fasi dati, dan wi sa sori den Kresten brada nanga sisa fu wi taki wi lobi den, èn wi sa de klariklari fu yepi den. Tra bun fasi di wi kan kweki nanga yepi fu a santa yeye, na koni nanga sabi (1 Kor. 2:10-16; Gal. 5:22, 23). Fu taki en leti, wi kan si ala wi krakti nanga ala den koni di wi abi, leki presenti di wi kan gebroiki fu gi wi hemel Tata grani nanga glori. Gado gi wi a frantwortu fu gebroiki den koni nanga den fasi fu wi fu sori den Kresten brada nanga sisa fu wi a no-frudini bun-ati fu en.

„Gebroiki dati fu dini makandra” —Na sortu fasi?

7. (a) San wi e leri fu den wortu na 1 Petrus 4:10? (b) Sortu sani wi musu aksi wisrefi, èn fu san ede wi musu du dati?

⁷ Den wortu di Petrus ben taki na 1 Petrus 4:10, e sori taki ibriwan fu wi kisi wan presenti. Dati na den difrenti fasi nanga koni di wi abi. Ibri sma abi tra fasi nanga tra koni, èn son sma e sori son fasi moro leki tra sma, noso den abi moro koni leki tra sma. Ma toku ibriwan fu wi e kisi a rai fu „gebroiki dati [namku, iniwan presenti di wi kisi] fu dini makandra”. Boiti dati, den wortu „gebroiki dati . . . leki bun futuboi”, na wan komando. Dati meki wi musu aksi wisrefi a sani disi: ’Mi trutru e gebroiki den presenti di mi kisi fu tranga mi Kresten brada nanga sisa?’ (Luku 1 Timoteyus 5:9, 10.) ’Noso mi e gebroiki den koni di mi kisi fu Yehovah soso fu kisi wini gi misrefi? Mi e gebroiki den fu kisi gudu noso fu kisi  biginen?’ (1 Kor. 4:7) Te wi e gebroiki den presenti fu wi „fu dini makandra”, dan wi sa plisi Yehovah.—Odo 19:17; leisi Hebrewsma 13:16.

8, 9. (a) San na wan tu fu den fasi fa Kresten na heri grontapu e dini den brada nanga sisa fu den? (b) Fa den brada nanga sisa na ini a gemeente fu yu e yepi makandra?

⁸ Gado Wortu e taki fu den difrenti fasi fa den fosi Kresten ben e dini makandra. (Leisi Romesma 15:25, 26; 2 Timoteyus 1:16-18.) Na ini a ten disi tru Kresten e du a srefi. Den e gi yesi na a komando di den kisi fu gebroiki a presenti di den kisi fu dini makandra, èn den e du dati nanga den heri ati. Luku wan tu fu den fasi fa den e du dati.

⁹ Furu brada e teki furu yuru ibri mun fu sreka densrefi gi den prati di den abi na den konmakandra. Na den konmakandra den e meki den sma drape kon sabi den prenspari sani di den leri, èn den e du dati na wan fasi di e gi a heri gemeente deki-ati fu horidoro (1 Tim. 5:17). Bun furu brada nanga sisa e sori lobi nanga switifasi gi den tra sma na ini a gemeente (Rom. 12:15). Sonwan fu den gwenti fu go luku brada nanga sisa di e firi brokosaka, èn den e begi nanga den (1 Tes. 5:14). Te Kresten brada noso sisa e kisi fu du nanga tesi, dan son Kresten e seni wan brifi noso wan karta gi den fu gi den deki-ati. Te son brada noso sisa no man kon na den konmakandra fu di den siki, noso fu di den swaki, dan son Kresten e yepi den na wan switi fasi. Te rampu pasa di e pori den oso fu Kresten brada nanga sisa, dan dusundusun Kotoigi e yepi fu bow den oso dati baka. A lobi nanga a yepi di sma e kisi fu den brada nanga sisa disi di e broko den ede nanga trawan, na buweisi fu a ’no-frudini bun-ati di Gado e sori sma na difrenti fasi’.​—Leisi 1 Petrus 4:11.

Sortuwan moro prenspari?

10. (a) Na sortu tu sani Paulus ben e poti prakseri na ini a diniwroko di a ben e du gi Gado? (b) Fa wi e teki na eksempre fu Paulus na ini a ten disi?

¹⁰ Boiti taki den futuboi fu Gado kisi wan presenti di den musu gebroiki fu dini den Kresten brada nanga sisa fu den, den musu tyari sosrefi wan boskopu gi tra sma. Na apostel Paulus ben taki fu den tu sani disi di a ben musu du leki futuboi fu Yehovah. A ben skrifi a gemeente na ini Efeise fu fruteri den fu ’a frantwortu di a ben kisi fu sori den a no-frudini bun-ati fu Gado’ so taki den ben kan kisi wini fu dati (Ef. 3:2). Ma a ben taki tu: „Wi e taki fu di Gado ben feni en bun fu gi wi a frantwortu fu preiki a bun nyunsu” (1 Tes. 2:4). Neleki Paulus, wi sabi tu taki wi kisi a frantwortu fu dini leki preikiman fu Gado en Kownukondre. Sobun, wi wani teki na eksempre di Paulus ben gi leki preikiman di ben e wroko tranga fu preiki a bun nyunsu. Dati meki wi e teki prati fayafaya na a preikiwroko (Tori. 20:20, 21; 1 Kor. 11:1). Wi sabi taki te wi e preiki a Kownukondre boskopu, dan dati kan kibri a libi fu sma. Ma na a srefi ten, wi e suku okasi tu fu gi wi Kresten brada nanga sisa „wan presenti na yeye fasi”.​—Leisi Romesma 1:11, 12; 10:13-15.

11. Fa wi musu si a frantwortu di wi kisi fu preiki èn fu gi wi Kresten brada nanga sisa deki-ati?

¹¹ Sortuwan fu den tu sani disi moro prenspari na ini a Kresten diniwroko? A de a srefi leki te yu ben o aksi: Sortuwan fu den frei fu wan fowru moro prenspari? A piki de krin. Wan fowru abi ala tu frei fanowdu fu man frei. Na so a de tu taki wi musu du ala den tu sani disi na ini a diniwroko di wi e du gi Gado. Na so Gado sa feni a diniwroko fu wi bun. Sobun, wi no musu denki taki a frantwortu di wi kisi fu preiki a bun nyunsu no abi noti fu du nanga frantwortu di wi kisi fu gi wi Kresten brada nanga sisa deki-ati. Na presi fu dati, wi musu abi a srefi denki leki na apostel Petrus èn na apostel Paulus di ben si den tu frantwortu disi leki sani di abi fu du nanga makandra. Fa den abi fu du nanga makandra?

12. Fa wi de leki wan wrokosani na ini Yehovah en anu?

¹² Leki preikiman wi e pruberi fu gi leri na  so wan fasi taki wi man doro na ati fu tra sma nanga a boskopu fu Gado Kownukondre di e gi sma deki-ati. Wi e howpu taki a sani dati sa yepi sma fu tron disipel fu Krestes. Ma wi e gebroiki sosrefi iniwan koni èn iniwan presenti di wi kisi fu pruberi fu gi wi Kresten brada nanga sisa deki-ati. Dati meki wi e taigi den sani di e meki den firi bun, èn wi e yepi den te den abi yepi fanowdu. Na so wi e sori a no-frudini bun-ati fu Gado (Odo 3:27; 12:25). Wi e howpu taki den sani dati sa yepi den sma disi fu tan disipel fu Krestes. Te wi e preiki a bun nyunsu gi sma èn te wi e „dini makandra”, dan wi abi a tumusi moi grani fu de leki wan wrokosani na ini Yehovah en anu.​—Gal. 6:10.

„Un musu abi dipi firi gi makandra”

13. San o pasa te wi no e „dini makandra”?

¹³ Paulus ben gi den Kresten brada nanga sisa fu en a rai disi: „Neleki fa brada lobi makandra, na so un musu abi dipi firi gi makandra. Unu fosi musu bigin sori trawan lespeki” (Rom. 12:10). Iya, te wi abi dipi firi gi wi Kresten brada nanga sisa, dan dati e gi wi deki-ati fu du ala san wi man fu sori den a no-frudini bun-ati fu Gado. Wi sabi taki efu Satan ben o man tapu wi fu „dini makandra”, dan dati ben o pori a wánfasi fu wi (Kol. 3:14). Boiti dati, te wánfasi no de na wi mindri, dan wi no sa de fayafaya na ini a preikiwroko. Satan sabi heri bun taki a musu broko wán frei fu wi nomo fu sorgu taki wi no man frei moro.

14. Suma e kisi wini fu di wi e „dini makandra”? Gi wan eksempre.

¹⁴ Te wi e „dini makandra” dan dati no e tyari wini kon soso gi den sma di e ondrofeni a no-frudini bun-ati fu Gado. Wi di e sori trawan a no-frudini bun-ati fu Gado, e kisi wini tu (Odo 11:25). Fu eksempre, luku a tori fu Ryan nanga Roni, wan trowpaar di e libi na ini a foto Illinois, na Amerkankondre. Di den tu sma disi kon sabi taki a bigi winti Katrina ben pori hondrohondro oso fu tra Kotoigi, dan den libi a wroko fu den, den froisi gowe libi na oso fu den, èn den bai wan bigi wagi pe den ben kan libi na ini. Den seti a wagi disi moro bun, èn den hari go na a foto Louisiana di ben de 1400 kilometer moro fara. Den tan drape moro leki wán yari, èn den gebroiki den ten, den krakti, nanga den moni fu yepi den Kresten brada nanga sisa fu den. Ryan di abi 29 yari, e taki: „Mi kon moro  krosibei na Gado fu di mi yepi sma di ben kisi fu du nanga rampu. Mi si fa Yehovah e sorgu gi a pipel fu en.” Ryan e taki moro fara: „Fu di mi wroko nanga brada di owru moro mi, meki mi leri fa fu yepi den brada nanga sisa. Mi leri tu taki gi wi leki yonguwan, furu wroko de fu du na ini na organisâsi fu Yehovah.” Roni, di abi 25 yari, e taki: „Mi breiti taki mi ben man yepi tra sma. Noiti ete mi ben e firi so koloku. Mi sabi taki na ini den yari di e kon, mi sa tan kisi wini fu a tumusi moi ondrofeni disi.”

15. Sortu bun reide wi abi fu tan dini leki futuboi fu a no-frudini bun-ati fu Gado?

¹⁵ Iya, te wi e gi yesi na den komando di Gado gi wi fu preiki a bun nyunsu èn fu gi wi Kresten brada nanga sisa deki-ati, dan wi nanga den sma dati sa kisi blesi. Den sma di wi e yepi e kon moro krosibei na Yehovah, èn wi e kisi trutru prisiri fu di wi yepi trawan (Tori. 20:35). Den brada nanga sisa na ini a gemeente sa kon abi moro lobi gi makandra, fu di ibri memre e sori switifasi gi makandra. Boiti dati, a lobi di wi e sori gi makandra e sori krin taki wi na tru Kresten. Yesus ben taki: „Na a fasi disi ala sma o sabi taki unu na mi disipel, te unu lobi makandra” (Yoh. 13:35). Ma wi lobi-ati Tata, Yehovah, musu kisi ala grani, fu di den sani di den futuboi fu en na grontapu e du, e sori taki a trutru wani yepi den wan di de na nowtu. Dati meki wi abi bun reide fu gebroiki a presenti di wi kisi fu ’dini makandra leki bun futuboi fu a no-frudini bun-ati fu Gado’! Yu sa tan du dati?​—Leisi Hebrewsma 6:10.

Yu e memre disi ete?

• Na sortu fasi Yehovah e gi den futuboi fu en deki-ati?

• Sortu prenspari sani wi kisi fu Yehovah?

• San na wan tu fasi fa wi kan dini wi Kresten brada nanga sisa?

• Fu san ede wi sa tan gebroiki a presenti di wi kisi fu „dini makandra”?

[Aksi fu a tori disi]

[Prenki na tapu bladzijde 13]

Yu e gebroiki a „presenti” di yu kisi fu dini trawan, noso yu e gebroiki dati fu kisi wini gi yusrefi?

[Prenki na tapu bladzijde 15]

Wi e preiki a bun nyunsu gi trawan èn wi e yepi wi Kresten brada nanga sisa

[Prenki na tapu bladzijde 16]

Kresten di de klariklari fu yepi trawan di kisi fu du nanga rampu, musu kisi prèise