A fasi fa Kresten e beri sma musu plisi Gado

YU MAN yere na ala sei fa sma e bari krei fu di den sari. Sma di e row, weri spesrutu blaka krosi, den e krei èn den e trowe densrefi na tapu gron fu di den e sari. Sma e dansi tapu a poku di e naki. Trawan e nyan, den e meki prisiri, den e bari bigi lafu èn den e hori fesa. Wan tu sma di dringi bun furu palm win nanga biri, drungu èn den e didon na gron. O ten den sortu sani disi e pasa? Na ini son kondre, yu kan si den sani disi na wan beri pe hondrohondro sma e kon makandra fu taki den dedewan odi.

Furu Kotoigi fu Yehovah e tan na ini libimakandra pe den famiriman nanga birtisma e bribi wan lo sani fu di den e frede dede. Milyunmilyun sma e bribi taki te wan sma dede, a e tron wan yeye di kan yepi den wan di de na libi noso di kan du den ogri. Den sani disi di sma e bribi, abi fu du nanga furu fu den sani di sma gwenti fu du na wan beri. A no de fu taki dati ala sma e sari te wan sma fu den dede. Yesus nanga en disipel ben sari di lobiwan fu den dede (Yoh. 11:33-35, 38; Tori. 8:2; 9:39). Toku nowan leisi den ben sari leki den sma na ini a ten dati, di ben gwenti fu du ala sortu sani fu sori taki den de nanga bigi sari (Luk. 23:27, 28; 1 Tes. 4:13). Fu san ede Yesus nanga den apostel no ben du dati? Wan reide, na fu di den sabi san e pasa trutru nanga wan sma te a dede.

Bijbel e taki krin: „Den libiwan sabi taki den sa dede; ma den dedewan no sabi notinoti . . . A lobi fu den, a bita-ati fu den, nanga a dyarusu fu den no de moro . . . Nowan wroko noso prakseri noso sabi noso koni de na ini Syeol [a grebi fu libisma], a presi pe yu e go” (Preik. 9:5, 6, 10). Den vers disi fu Bijbel, e sori krin taki te wan sma dede, a no sabi noti moro. A no man denki, a no man firi, a no man taki èn a no man frustan nowan sani. Te Kresten e frustan a prenspari tru tori disi fu Bijbel, dan fa dati abi krakti tapu a fasi fa den e hori beri?

„No fasi den sani moro di no krin”

Awansi fu sortu kondre noso kulturu den Yehovah Kotoigi de, den no wani abi noti fu du nanga den gwenti di sma abi, fu di den e bribi taki den dedewan e libi go doro èn taki den kan du sani gi den libiwan. Sma gwenti fu brokodei gi wan sma di dede, den e hori fesa baka wan beri, den e memre den dedewan ibri yari, den e tyari nyanyan noso tra sani gi dedesma, èn wan sma musu du wan lo sani te en masra noso wefi dede. Ala den gwenti disi no krin èn Gado no e feni den bun fu di den no e kruderi nanga Bijbel. Boiti dati, na den ogri yeye e meki sma bribi taki a sili noso a yeye no e dede (Esek. 18:4). Tru Kresten „no kan nyan na ’a tafra fu Yehovah’ èn na a tafra fu den ogri yeye”, èn fu dati ede den no e hori densrefi na den gwenti disi (1 Kor. 10:21). Den e gi yesi na a komando disi: „Poti yusrefi aparti fu den, . . . èn no fasi den sani moro di no krin” (2 Kor. 6:17). A no makriki ala ten fu no teki prati na den sortu gwenti disi.

Na ini Afrika èn na ini tra kondre, furu sma e bribi taki den yeye fu den afo fu den sa atibron te den no e hori densrefi na son gwenti. Den e si en leki wan seryusu sani efu wan sma no e hori ensrefi na den gwenti èn den e taki dati a libimakandra o kisi wan fluku èn sani no o waka bun nanga den. Fu di Kotoigi fu Yehovah e weigri fu teki prati na den gwenti disi di no e kruderi nanga Bijbel, meki sma fu a libimakandra noso den famiri fu den, e krutu den, den e kosi den èn den no e bemui nanga den. Sma krutu sonwan fu den Kotoigi taki den no  e moksi nanga trawan èn taki den no abi lespeki gi den dedewan. Son leisi, sma di no de na bribi ben teki a beri fu Kresten abra nanga tranga. Fu dati ede, fa wi kan sorgu taki wi no e kisi problema nanga sma di de nomonomo fu hori densrefi na gwenti di Gado no e feni bun? Wan moro prenspari aksi na: San wi kan du fu poti wisrefi aparti fu gwenti di no krin èn di kan pori a matifasi di wi abi nanga Yehovah?

Meki sma kon sabi san na a bosroiti fu yu

Na ini son kondre, a de a gwenti taki famiriman nanga prenspari sma fu a lo, soleki kapten noso basya, e bosroiti fa den o beri a dedesma. Fu dati ede, wan Kresten di e gi yesi na Yehovah, musu meki sma kon sabi taki na Kotoigi fu Yehovah sa orga èn hori a beri fu en na wan fasi di e kruderi nanga Bijbel (2 Kor. 6:14-16). Den sani di e pasa na a beri fu wan Kresten, no musu trobi a konsensi fu tra Kotoigi. Boiti dati, trawan di sabi san wi e bribi èn e leri te a abi fu du nanga den dedewan, no musu naki futu fu den sani di den si na a beri fu wan Kresten.

Te den famiriman e aksi a Kresten gemeente fu hori wan beri, dan den owruman di kisi a frantwortu gi dati, kan gi den wan tu bodoi èn rai di kan yepi den fu hori a beri na wan fasi di e kruderi nanga Bijbel. Efu sma di no de Kotoigi wani du sani di no fiti, dan a de tumusi prenspari fu tanapu kánkan èn fu fruteri den na wan switi fasi èn na wan lespeki fasi, san wi leki Kresten e bribi (1 Petr. 3:15). Ma fa a de te famiriman di no de na bribi de nomonomo fu du sani di no fiti na a beri? Dan den famiriman di de na bribi kan bosroiti fu libi a beri gi den (1 Kor. 10:20). Te disi pasa, dan wan beri-lezing kan hori na a Kownukondre zaal noso na wan tra presi di fiti. Na so fasi den sma di e sari fu di den lasi wan lobiwan na ini dede, kan kisi ’trowstu fu Gado Buku’ (Rom. 15:4). Aladi a dedeskin no de drape, toku a ben o fiti èn a ben o bun fu hori wan lezing (Deut. 34:5, 6, 8). Te sma di no de na bribi wani kon taki fa sani musu waka na a beri, dan dati kan gi den sma di e sari moro broko-ede. Ma wi kan kisi trowstu fu di wi sabi taki Gado, di man gi wi „a krakti di bigi pasa marki”, e si taki wi abi a fasti bosroiti fu du san reti.​—2 Kor. 4:7.

Skrifi na tapu papira san yu wani

Te wan sma skrifi na tapu papira san a wani sma du na a beri fu en, dan a o de moro makriki fu taki nanga famiriman di no de na bribi, fu di nofo tron a de so taki den o lespeki den sani di a sma ben wani. Wan sma kan skrifi fa a beri musu hori, èn pe a beri musu hori èn suma wawan abi a frantwortu fu orga èn teki fesi na a beri. Den sani disi na prenspari sani di wan sma musu skrifi na tapu papira (Gen. 50:5). A ben o moro bun efu a sma poti en nen na tapu a papira èn efu tra sma de kotoigi fu dati. Noso a kan poti na tapu cassette lolo fa a wani taki sma musu beri en. Den sma di e seti sani na fesi, e sori taki den abi a  koni fu man si sani krin èn taki den abi sabi fu Bijbel, fu di den no e wakti teleki den kon owru noso teleki den siki seryusu fosi den o du a sani disi.​—Odo 22:3; Preik. 9:12.

Son sma feni en muilek fu skrifi den sortu sani disi na fesi. Ma te wan Kresten e du dati, dan a e sori taki a lepi èn taki a e broko en ede nanga trawan na wan lobi-ati fasi (Fil. 2:4). A moro bun te a sma srefi e seti den sani disi, na presi taki a libi en gi den famiriman fu en. Na so fasi tra sma no o dwengi den famiriman fu du sani di no fiti èn di no e kruderi nanga den sani di a sma ben bribi di a ben de na libi.

Hori a beri sondro furu pranpran

Na ini furu kondre na Afrika, sma e bribi taki wan beri musu bigi èn taki ala sortu kefalek sani musu pasa na a beri so taki den yeye fu den afo no atibron. Trawan e si den beri leki wan okasi fu ’prodo nanga den gudu di den abi’ noso fu sori sortu hei posisi den abi na ini a libimakandra (1 Yoh. 2:16). A e teki furu ten nanga muiti èn a e kostu furu moni tu fu hori wan beri na a fasi di grontapusma e si leki wan bun beri. Fu meki furu sma kon na a beri, dan son leisi famiriman e anga bigi fowtow fu a dedesma na difrenti presi èn na so den meki bekènti taki a beri o hori. Den e meki bosroko pe a fowtow fu a dedesma de na tapu èn den e prati dati so taki den sma di e row kan weri dati. Den e bai diri dedekisi di abi furu pranpran so taki sma kan taki o bun a beri ben de. Na ini wan Afrikan kondre, sma meki dedekisi srefi di gersi wagi, opolani, boto, nanga tra sani. Den e du dati fu sori o gudu den de. A kan de so tu taki den e puru a dedeskin na ini a kisi èn den e poti en na tapu wan spesrutu bedi di lai nanga moimoi sani. Son leisi te wan uma dede, dan den e weri wan weti trow-yapon gi en, den e weri bun furu gowtu sani nanga krara gi en, èn den e moi en fesi. A ben o fiti te wan fu den futuboi fu Gado ben o teki prati na wan fu den sani disi?

Lepi Kresten e si taki a de wan koni sani fu no du sani nanga tumusi furu pranpran, fu di na sma di no sabi Gado èn di no e broko den ede nanga den wet fu En, e du den sani dati. Wi sabi taki den sani di sma e du fu sori o kefalek den de èn den gwenti di no e kruderi nanga Bijbel, ’no e kon fu a Tata, ma den sani disi e kon fu grontapu di e pasa gowe’ (1 Yoh. 2:15-17). Wi musu luku bun taki wi leki Kresten no o pruberi fu du moro kefalek sani leki  trawan, fu di dati na streilibi èn a sani disi no fiti (Gal. 5:26). Soleki fa a sori, dan a de so taki nofo tron te sma na ini wan libimakandra abi frede gi den dedewan, den beri fu den bigi srefisrefi èn den no man sorgu taki sani e waka na wan bun fasi. Te sma abi a gwenti fu gi grani na den dedewan, dan a kan pasa makriki taki sma di no de na bribi e bigin tyari densrefi na wan fasi di no fiti. Na den sortu beri dati, a kan pasa taki sma e bari krei, den e meki ala sortu babari, den e brasa a dedeskin, den e taki langalanga nanga a dedesma neleki a de na libi, èn den e poti moni nanga tra sani na a dedeskin. Efu so wan sani ben o pasa na wan beri fu wan Kresten, dan dati ben o gi Yehovah nanga en pipel bigi porinen.​—1 Petr. 1:14-16.

Te wi sabi san e pasa trutru nanga den dedewan, dan dati trutru musu gi wi deki-ati fu no hori den beri fu wi leki grontapusma (Ef. 4:17-19). Aladi Yesus ben de a moro prenspari man di libi na grontapu, toku a no ben beri nanga furu pranpran (Yoh. 19:40-42). Den sma di „e denki soleki fa Krestes e denki”, e si wan beri sondro furu pranpran leki wan warti okasi (1 Kor. 2:16). A no de fu taki dati a moro bun fasi fa Kresten kan sorgu taki den no e du sani teige Bijbel wet, na te den e hori den beri fu den pikin èn sondro furu pranpran. Na so fasi sani o waka na wan warti fasi èn na wan fasi di fiti gi den sma di lobi Gado.

Sma musu hori fesa baka wan beri?

A kan de a gwenti taki baka wan beri den famiriman, birtisma, nanga trawan, e kon makandra fu hori wan bigi fesa èn fu dansi tapu poku di e prei bun tranga. Nofo tron, na den sortu fesa disi, sma e dringi bun furu sopi èn den e du hurudu. Son sma e feni taki te den e prisiri na a fasi disi, dan dati e yepi den fu no sari so furu taki wan sma fu den dede. Trawan e feni taki a sani disi na wan pisi fu den kulturu. Ma furu tra sma e bribi taki den musu hori den sortu fesa disi fu gi grani na den dedewan, èn fu sorgu taki a yeye fu a sma di dede kan go na den afo fu den.

Tru Kresten e si o koni a Bijbel rai disi de: „A moro bun fu sari leki fu lafu, bika wan sari fesi o meki na ati kon betre” (Preik. 7:3). Boiti dati, den sabi taki a abi wini te den e sidon prakseri fa a libi syatu èn te den e prakseri a howpu taki wan opobaka de. Iya, den sma di abi wan bun matifasi nanga Yehovah, e si taki „a dei fu dede bun moro leki a dei te wan sma gebore” (Preik. 7:1). Sobun, fu di tru Kresten sabi taki den fesa di sma e hori baka wan beri abi fu du nanga afkodrei sani èn hurudu, meki den no e orga den sortu fesa disi èn den no e go na den sortu fesa disi. Te den ben o de makandra nanga den sma disi di e meki prisiri na den sortu okasi disi, dan dati ben o sori taki den no abi lespeki gi Gado èn taki den no e hori a konsensi fu tra anbegiman fu Yehovah na prakseri.

Meki trawan si a difrenti

Wi de nanga tangi trutru taki wi no de leki tra sma di abi bigi frede gi den dedewan fu di den no sabi den tru tori fu Bijbel (Yoh. 8:32). Wi leki „pikin di de na ini a leti”, e sari na wan fasi di e sori taki wi sabi san e pasa trutru nanga den dedewan. Fu dati ede, wi e tyari wisrefi na wan lespeki fasi, na wan fasi di fiti, èn wi no e rigeri tumusi, fu di wi abi a howpu taki den dedewan sa kisi wan opobaka trutru (Ef. 5:8; Yoh. 5:28, 29). Fu di wi abi a howpu dati, meki wi e hori wisrefi fu no sari soleki fa tra sma e sari di „no abi wan howpu” (1 Tes. 4:13). A howpu disi o gi wi a deki-ati fu tanapu kánkan na ini a soifri anbegi, èn a o meki taki wi no frede libisma.​—1 Petr. 3:13, 14.

Te wi e tan hori wisrefi na den rai fu Bijbel, dan dati o meki sma ’si a difrenti na mindri den sma di e dini Gado nanga den sma di no dini en’ (Mal. 3:18). Wan dei sa doro te dede no sa de moro (Openb. 21:4). Meki a de so taki te wi e wakti fu si a tumusi moi pramisi disi kon tru, Yehovah kan si wi leki sma di de sondro flaka, sondro fowtu èn leki sma di de aparti fu na ogri grontapu disi pe sma e du sani di no e gi Gado grani.​—2 Petr. 3:14.

[Prenki na tapu bladzijde 30]

A de wan koni sani fu skrifi na tapu papira fa wi wani taki a beri fu wi musu hori

[Prenki na tapu bladzijde 31]

Beri fu Kresten musu hori na wan wartifasi èn sondro furu pranpran