Yehovah e prisiri te yu e tan gi yesi na en

„Sori taki yu koni, mi manpikin, èn meki mi ati prisiri, so taki mi kan gi wan piki na a sma di e spotu mi.”​—ODO 27:11.

1, 2. (a) San Satan ben taki fu libisma na ini a buku Yob? (b) San e sori taki Satan tan tyalensi Yehovah baka a ten fu Yob?

YEHOVAH ben gi pasi taki Satan tesi en futuboi Yob, fu di Satan ben wani si efu Yob ben o tan gi yesi na a Gado fu en. Leki bakapisi fu dati, Yob lasi den meti fu en, den pikin fu en dede, èn a kon siki. Ma Satan no ben prakseri nomo fu tesi Yob. A ben taki: „Skin foe skin; ja, alasani disi wan soema abi a sa gi foe hori hemsrefi na libi.” A sani disi di Satan ben taki, meki wan afersi opo kon di no ben abi fu du nanga Yob wawan, ma nanga bun furu tra sma te na a dei fu tide.​—Yob 2:4.

² Sowan 600 yari baka di Yob ben kisi tesi, a santa yeye meki Salomo skrifi: „Sori taki yu koni, mi manpikin, èn meki mi ati prisiri, so taki mi kan gi wan piki na a sma di e spotu mi” (Odo 27:11). A de krin taki Satan ben e tyalensi Yehovah ete na a ten dati. Boiti dati, na ini wan fisyun di na apostel Yohanes ben kisi fu Gado, a si fa Satan ben e krutu den futuboi fu Gado. A si tu taki wan pisi ten baka di a Kownukondre fu Gado seti na ini 1914, Yesus puru Satan na hemel. Iya, srefi na ini a ten disi pe wi de so krosibei fu a kaba fu na ogri sistema disi, Satan e tesi den futuboi fu Gado ete, fu si efu den sa tan gi yesi na En!​—Openb. 12:10.

3. Sortu prenspari sani wi e leri fu a buku Yob?

³ Meki wi go poti prakseri na dri sani di wi e leri fu a buku Yob. A fosi sani na taki den tesi di Yob kisi e tyari kon na krin suma na a trutru feanti fu libisma, èn suma e meki taki a pipel fu  Gado e kisi gens. A feanti dati na Satan Didibri. A di fu tu sani na taki awansi sortu tesi wi e kisi, te wi abi wan bun matifasi nanga Gado, dan wi sa tan gi yesi na en. A di fu dri sani, na taki te wi e kisi tesi, dan Gado e yepi wi, neleki fa a ben yepi Yob. Na ini a ten disi, Yehovah e horibaka gi wi nanga yepi fu en Wortu, en organisâsi, nanga en santa yeye.

Tan hori na prakseri suma na a trutru feanti

4. Suma de frantwortu gi den problema di de na grontapu na ini a ten disi?

⁴ Furu sma no e bribi taki Satan de. Sobun, aladi den sani di e pasa na grontapu e meki den frede, toku den no sabi suma trutru e meki den sani disi pasa. A sma dati na Satan Didibri. A no de fu taki dati libisma srefi de frantwortu gi furu fu den problema di e miti den. A fosi papa nanga mama fu wi, Adam nanga Eva, bosroiti fu libi sondro a tiri fu a Mekiman fu den. Èn sensi a ten dati, furu fu den bakapikin fu den du sani di no bun kwetikweti. Ma awansi fa a no fa, na Didibri ben kori Eva fu opo ensrefi teige Gado. Na en seti wan grontapu sistema di a e gebroiki fu tiri sondu libisma di o dede te fu kaba. Fu di Satan na „a gado fu a grontapu sistema disi”, meki furu libisma e sori den srefi fasi fu en. Iya, furu libisma abi bigifasi, den lobi fu strei nanga trawan, den e dyarusu tapu trawan, den gridi, den e bedrigi trawan, èn den e opo densrefi teige trawan (2 Kor. 4:4; 1 Tim. 2:14; 3:6; leisi Yakobus 3:14, 15.) Fu di libisma e sori den fasi disi, meki furu problema de na ini politiek èn na ini kerki. Boiti dati, libisma abi bita-ati, den e du kruktudu, èn den lobi dyugudyugu. Na den sani disi nofo tron e meki taki libisma abi problema.

5. San wi wani du nanga a tumusi prenspari sabi di wi abi?

⁵ A no de fu taki dati wi leki futuboi fu Yehovah abi tumusi prenspari sabi! Iya, wi e frustan suma de frantwortu gi den problema fu grontapu, èn den problema disi e kon bigi moro nanga moro. A sani disi e gi wi deki-ati fu fruteri sma na ini a preikiwroko suma na a trutru feanti fu libisma, a no so? Èn wi no breiti taki wi kan opo taki gi a tru Gado, Yehovah? Wi no breiti tu taki wi kan fruteri trawan fa Gado sa tyari wan kaba kon na Satan èn na den problema di e miti libisma?

6, 7. (a) Suma de frantwortu gi a frufolgu di tru anbegiman e kisi? (b) Fa wi kan teki na eksempre fu Elihu fu owruten?

⁶ Boiti taki Satan de frantwortu gi furu fu den sari sani di e miti libisma, en na a sma tu di e meki taki a pipel fu Gado e kisi gens. Satan de nomonomo fu tesi wi. Yesus Krestes ben taigi na apostel Petrus: „Simon, Simon, Satan de fayafaya fu kisi unu, so taki a kan wai unu puru neleki fa wan sma e wai aleisi buba puru” (Luk.  22:31). Na so a de tu taki ibriwan fu wi di e waka baka Yesus, sa ondrofeni tesi, awansi fa a no fa. Petrus ben agersi Didibri nanga „wan lew di e bari, fu di a e suku fu swari wan sma.” Èn Paulus ben taki: „Ala den wan di wani dini Gado na wan getrow fasi èn di de wán nanga Krestes Yesus, sa kisi frufolgu tu.”​—1 Petr. 5:8; 2 Tim. 3:12.

⁷ Te wan tesi e miti wan Kresten brada noso sisa fu wi, dan fa wi kan sori taki wi e tan hori na prakseri suma na a trutru feanti fu libisma? Na presi taki wi no e bumui moro nanga a Kresten dati, wi e teki na eksempre fu Elihu fu owruten. A man disi ben taki nanga Yob leki wan tru mati. Wi e horibaka gi wi Kresten brada noso sisa di e kakafutu gi Satan, a feanti fu libisma (Odo 3:27; 1 Tes. 5:25). Wi e du dati fu di wi wani yepi wi Kresten brada noso sisa fu tan frutrow tapu Gado, awansi san e pasa. Na so wi sa meki Yehovah en ati prisiri.

8. Fa a du kon taki Satan no ben man tapu Yob fu gi grani na Yehovah?

⁸ A fosi sani di Satan meki Yob lasi, na den meti fu en. Den meti dati ben warti gi Yob, èn kande a ben e sorgu en famiri nanga yepi fu den meti disi. Ma Yob ben e gebroiki den meti disi tu fu anbegi Gado. Baka di Yob ben santa den pikin fu en, dan „a ben opo froekoe mamanten, en a ben meki bron-ofrandi foe da nomru foe dem alamala; bikasi Job ben taki: Kande dem manpikin foe mi ben doe sondoe en dem ben kosi Gado na ini dem. Da so Job ben doe dorodoro” (Yob 1:4, 5). Sobun, Yob doronomo tyari meti leki ofrandi gi Yehovah. Di a bigin kisi tesi, dan a no ben man tyari den ofrandi disi moro. Yob no ben abi „warti sani” moro di a ben kan gebroiki fu gi grani na Yehovah (Odo 3:9). Ma a ben kan gi Yehovah grani nanga en mofo, èn na dati a du tu!

Kon abi wan bun matifasi nanga Yehovah

9. San na a moro warti sani di wi abi?

⁹ Awansi wi gudu noso pôti, awansi wi yongu noso owru, noso awansi wi gosontu noso siki, wi kan kon abi wan bun matifasi nanga Yehovah. Awansi sortu tesi e miti wi, te wi abi wan bun matifasi nanga Yehovah, dan dati sa yepi wi fu tan gi yesi na en. Na so wi sa meki En ati prisiri. Srefi son sma di no ben abi furu sabi fu a tru anbegi, opo taki gi Gado nanga deki-ati, èn den tan gi yesi na en.

10, 11. (a) Fa wan fu den sisa fu wi handri di a kisi tesi? (b) Sortu krakti piki a sisa disi gi Satan?

¹⁰ Luku na eksempre fu Valentina Garnovskaya. A sisa disi na wan fu den someni Kotoigi na ini Rosiakondre di neleki Yob tan gi yesi na Gado, aladi a ben e kisi hebi tesi. Na ini 1945, di a ben abi sowan 20 yari, wan brada gi en kotoigi. A brada disi go tu leisi baka na en fu taki nanga en fu Bijbel, ma baka dati a no si a brada noiti moro. Ma toku Valentina bigin preiki gi den birtisma fu en. A sani disi meki taki skowtu hori en, èn den seni en go na wan  strafuman-kampu pe a ben musu koti strafu aiti yari langa. Na ini 1953 den lusu en, èn a go doro wantewante nanga a preikiwroko. Skowtu hori en agen, èn den poti en na strafu-oso. Disi leisi a ben musu koti strafu tin yari langa. Baka di a ben koti strafu wan tu yari langa na ini wan strafuman-kampu, dan den seni en go na wan trawan. Na ini a kampu dati, wan tu sisa ben de di ben abi wan Bijbel. Wan dei, wan fu den sisa sori Valentina a Bijbel. Valentina ben breiti srefisrefi di a si a Bijbel dati! Prakseri taki a wan-enkri tra Bijbel di Valentina ben si oiti, na a wan di a brada ben abi di ben gi en kotoigi na ini 1945!

¹¹ Na ini 1967, den lusu Valentina, èn te fu kaba a ben man teki dopu tu na ini watra fu sori taki a ben gi ensrefi abra na Yehovah. Na ini a pisi ten disi di a ben fri, a teki prati fayafaya na a preikiwroko, teleki 1969. Ma a yari dati, skowtu hori en ete wan leisi, èn disi leisi a ben musu koti dri yari strafu na strafu-oso. Ma toku Valentina tan preiki. Fosi a dede na ini 2001, a ben yepi 44 sma fu kon leri sabi a tru bribi. A ben koti strafu 21 yari langa na ini strafu-oso èn na ini strafuman-kampu. A ben de klariklari fu libi ala sani fu man tan gi yesi na Gado, èn a ben de klariklari tu fu koti strafu. Na a kaba fu en libi, Valentina taki: „Noiti mi ben abi mi eigi tanpresi. Ala den sani di mi abi ben e fiti na ini wán tas nomo, ma mi ben de koloku, èn a ben e gi mi prisiri fu dini Yehovah.” Dati na trutru wan krakti fasi fa Valentina sori Satan taki a no ben abi leti di a taki dati libisma no sa tan gi yesi na Gado te den e kisi tesi! (Yob 1:9-11). Wi kan de seiker taki a meki Yehovah en ati prisiri. Èn wi kan de seiker tu taki Yehovah e wakti fayafaya teleki a ten doro taki a sa gi wan opobaka na Valentina èn na ala tra sma di tan gi yesi na En te na a dede fu den.—Yob 14:15.

12. Fu san ede wi musu lobi Yehovah fu man abi wan bun matifasi nanga en?

¹² Na fu di wi lobi Yehovah, meki wi abi wan bun matifasi nanga en. Wi abi warderi gi den fasi fu Gado, èn wi e du ala san wi man fu libi na wan fasi di e kruderi nanga a wani fu en. Tra fasi leki san Didibri e taki, wi lobi Yehovah fu di wisrefi wani dati, èn wi e du dati nanga wi heri ati. A lobi disi e gi wi krakti fu tan gi yesi na Gado te wi e kisi tesi. Yehovah fu en sei ’sa kibri a pasi fu den wan di e tai hori na en’.​—Odo 2:8; Ps. 97:10.

13. Fa Yehovah e si den sani di wi e du gi en?

¹³ A lobi di wi abi gi Yehovah e gi wi deki-ati fu gi grani na a nen fu en, awansi wi feni taki wi no man du furu. Yehovah e si taki wi lobi en trutru, èn a no e krutu wi te wi no man du ala san wi ben sa wani du. San prenspari gi en, a no soso den sani di wi e du, ma na a reide fu san ede wi e du den sani dati. Aladi Yob ben e sari srefisrefi, èn aladi a ben e kisi furu tesi, toku a meki den man di ben krutu en kon sabi taki a lobi Yehovah, èn a fruteri den tu fu den fasi fu En. (Leisi Yob 10:12; 28:28.) Na ini a lasti kapitel fu a buku Yob, Gado taki dati a ben atibron nanga Elifas, Bildad, nanga Sofar, fu di den sani di den ben taki no ben tru. Boiti dati, Yehovah sori taki a ben feni Yob bun. Iya, fo leisi a kari en „Mi dinari” èn a taigi en fu begi gi den falsi trowstuman (Yob 42:7-9). Meki wi handri na so wan fasi tu taki Yehovah feni wi bun.

Yehovah e horibaka gi den futuboi fu en di e horidoro

14. Fa Yehovah yepi Yob fu kon abi wan tra denki fu sani?

¹⁴ Yob tan gi yesi na Gado, aladi a ben abi sondu. Son leisi te a ben e kisi hebi tesi, dan a  ben abi wan fowtu denki fu sani. Fu eksempre, a ben taigi Yehovah: „Mi bari gi Joe, en Joe no jere mi . . . Nanga Joe tranga anoe, Joe ben feti agensi mi.” Ma Yob ben de nomonomo fu sori taki a no ben abi fowtu, fu di a ben taki: „Joe sabi taki mi no de ogri”, èn a ben taki tu: „A no de bikasi mi abi takroedoe na ini mi anoe; mi begi de krin toe” (Yob 10:7; 16:17; 30:20, 21). Boiti dati, Yehovah yepi Yob na wan switi fasi. A poti difrenti aksi gi Yob fu meki a poti prakseri na moro prenspari sani. Den aksi disi yepi Yob tu fu kon frustan moro bun taki Gado hei moro ala sma èn taki libisma no man teki densrefi gersi En. Yob teki a rai dati, èn a bigin denki tra fasi.​—Leisi Yob 40:8; 42:2, 6.

15, 16. Na sortu fasi Yehovah e yepi den futuboi fu en na ini a ten disi?

¹⁵ Na ini a ten disi, Yehovah e tiri den futuboi fu en na wan switi fasi tu. Èn wi e kisi furu wini fu a sani dati. Fu eksempre, Yesus Krestes dede leki wan srakti-ofrandi gi wi, èn na so wi kan kisi pardon fu sondu. Nanga yepi fu na ofrandi dati, wi kan abi wan bun matifasi nanga Gado, aladi wi na sondusma (Yak. 4:8; 1 Yoh. 2:1). Te wi e kisi tesi, dan wi e begi Gado tu fu yepi wi èn fu gi wi krakti nanga yepi fu en santa yeye. Boiti dati, wi abi a heri Bijbel, èn efu wi e leisi en èn e denki dipi fu den sani di skrifi na ini, dan wi e sreka wisrefi gi den tesi di wi sa kisi. Te wi e studeri Gado Wortu, dan dati e yepi wi fu frustan moro bun suma na a Sma di abi a reti fu tiri hemel nanga grontapu, èn fu san ede wi musu tan gi yesi na en.

¹⁶ Wan tra fasi fa wi e kisi yepi, na taki wi de na ini wan organisâsi fu Kresten brada nanga sisa na heri grontapu, èn Yehovah e gi wi den sani di wi abi fanowdu fu man tan abi wan tranga bribi. A e du dati nanga yepi fu „a getrow èn koni srafu” (Mat. 24:45-47). Na ini ibriwan fu den pikinmoro 100.000 gemeente fu Yehovah Kotoigi, konmakandra e hori pe wi e kisi leri, èn pe wi e kisi deki-ati fu tan horidoro te wi e kisi tesi. Na eksempre fu Sheila e tyari dati kon na krin. A meisje disi di abi 15 yari, de wan Kotoigi di e libi na ini Doisrikondre.

17. Fa na ondrofenitori fu wan meisje e sori taki a de wan koni sani fu go na den Kresten konmakandra doronomo?

¹⁷ Wan dei di Sheila ben de na skoro, dan a sma di ben e teki fesi na ini a klas, gowe libi a klas fu wan syatu pisi ten. Den pikin fu a klas bosroiti fu gebroiki wan spesrutu bord fu luku efu den ben kan taki nanga ogri yeye. Sheila gowe libi a klas wantewante, èn di a yere bakaten san ben pasa, dan a ben breiti taki a ben du dati. Di den pikin ben e gebroiki a bord dati, dan wan tu fu den studenti firi taki ogri yeye ben de na ini a klas. Fu di den ben frede, meki den lon komoto na ini a klas. Ma san meki taki Sheila bosroiti fu gowe libi a klas wantewante? Sheila e taki: „Syatu fosi a sani disi pasa, wan takimakandra ben hori na ini a Kownukondre zaal, fu sori sortu ogri kan miti sma te den e gebroiki a bord dati. Na so mi ben sabi san fu du. Mi ben wani meki Yehovah en ati prisiri, neleki fa Bijbel e taki dati na Odo 27:11.” Koloku taki Sheila ben de na a konmakandra èn taki a arki a programa bun!

18. Sortu fasti bosroiti yu abi?

¹⁸ Ibriwan fu wi musu abi a fasti bosroiti fu tan teki a tiri fu Gado en organisâsi. Wi musu go na den konmakandra doronomo, wi musu studeri den Bijbel publikâsi doronomo, wi musu begi doronomo, èn wi musu abi demakandra doronomo nanga lepi Kresten. Te wi e du den sani disi, dan wi sa kisi a rai nanga a yepi di wi abi fanowdu. Yehovah wani taki wi musu wini a feti nanga Satan, èn a abi a frutrow taki wi sa tan gi yesi na En. A de wan grani trutru taki wi man gi glori na Yehovah en nen, èn taki wi man meki na ati fu En prisiri!

Yu e memre disi ete?

• Gi sortu situwâsi nanga tesi Satan de frantwortu?

• San na a moro prenspari sani di wi abi?

• Fu san ede wi abi wan bun matifasi nanga Yehovah?

• San na wan tu fasi fa Yehovah e yepi wi na ini a ten disi?

[Aksi fu a tori disi]

[Prenki na tapu bladzijde 8]

Yu de klariklari fu fruteri trawan den tumusi prenspari sani di yu sabi?

[Prenki na tapu bladzijde 9]

Wi kan yepi den Kresten brada nanga sisa fu wi fu tan frutrow tapu Gado

[Prenki na tapu bladzijde 10]

Valentina ben de klariklari fu libi ala sani, soso fu man tan gi yesi na Gado