Den engel „na yeye di musu dini trawan”

„A no den alamala na yeye di musu dini trawan, èn di Gado seni kon fu dini den sma di o kisi frulusu?”​—HEBR. 1:14.

1. Sortu trowstu wi e kisi fu den wortu di skrifi na Mateyus 18:10 nanga Hebrewsma 1:14?

YESUS KRESTES ben warskow iniwan sma di ben kan meki den futuboi fu en naki futu. A ben taki: „Luku bun taki unu no e wisiwasi wan fu den pikinwan disi, bika mi e taigi unu taki ala ten den engel fu den na ini hemel, e si mi Tata di de na hemel” (Mat. 18:10). Disi na san na apostel Paulus ben skrifi fu den engel di e dini Gado: „A no den alamala na yeye di musu dini trawan, èn di Gado seni kon fu dini den sma di o kisi frulusu?” (Hebr. 1:14) Den wortu dati de wan trowstu gi wi èn den e gi wi a dyaranti taki Gado e gebroiki den engel fu en fu yepi libisma. San Bijbel e fruteri wi fu den engel? Fa den engel disi e yepi wi? San wi kan leri fu na eksempre fu den?

2, 3. San na wan tu fu den frantwortu di den engel na hemel abi?

² Milyunmilyun reti-ati engel de na hemel. Den alamala ’tranga srefisrefi, èn den e du san Gado e taki’. (Ps. 103:20; leisi Openbaring 5:11.) Ala den engel disi abi den eigi fasi, den abi sosrefi den fasi fu Gado, èn den abi a grani fu teki den eigi bosroiti. Den orga heri bun, èn den abi hei posisi na ini a seti fu Gado. A gran engel na Mikael (a nen di Yesus abi na hemel) (Dan. 10:13; Yud. 9). Na engel disi di de a „fosiwan fu ala sani di Gado meki”, na „a Wortu”, noso a Sma di e taki gi Gado. Yehovah gebroiki en fu meki ala tra sani.​—Kol. 1:15-17; Yoh. 1:1-3.

³ A grupu engel di e fadon na ondro a gran engel, na den seraf. Den engel disi e meki a santafasi fu Yehovah bekènti, èn den e sorgu taki a pipel fu En e tan anbegi en na a yoisti fasi. Wan tra grupu engel, na den syerub. Den engel disi e horibaka gi a reti di Gado abi fu tiri hemel nanga grontapu (Gen. 3:24; Yes. 6:1-3, 6, 7). Tra engel, noso boskopuman, e du a wani fu Gado na difrenti fasi.​—Hebr. 12:22, 23.

4. Fa den engel ben e firi di Gado ben e meki grontapu? Efu libisma ben gebroiki na aparti grani di den abi na a yoisti fasi, dan sortu blesi dati ben o tyari kon gi den?

⁴ Ala den engel ben e prisiri di Gado „ben e meki grontapu”, èn den ben breiti fu teki prati  na a wroko di den ben kisi fu du aladi grontapu ben e seti kon tron a tanpresi fu libisma (Yob 38:4, 7). Yehovah ben meki libisma „pikinso moro lagi leki den engel”, ma a ben meki den leki wan „prenki” fu Ensrefi. A sani disi meki taki libisma man sori den tumusi moi fasi fu a Mekiman (Hebr. 2:7; Gen. 1:26). Adam, Eva, nanga den bakapikin fu den ben kisi a grani tu fu teki den eigi bosroiti. Efu den ben gebroiki a grani disi na a yoisti fasi, dan den ben o man libi na ini wan paradijs grontapu leki memre fu Yehovah en osofamiri di de na hemel èn na grontapu.

5, 6. San ben pasa na hemel, èn san Gado du?

⁵ Den santa engel ben musu fu skreki di den si fa tra engel bigin opo densrefi teige Gado. Wan fu den engel no ben e si en leki wan grani moro fu prèise Yehovah, ma a ben wani sma fu anbegi en. A bigin krutu a reti di Yehovah abi fu tiri ala sani, èn a prefuru fu seti en eigi tirimakti. Na so a du kon taki na engel disi tron Satan (san wani taki „Gensman”). Nanga yepi fu a fosi lei di skrifi, Satan kori a fosi man nanga uma fu opo densrefi teige a lobi-ati Mekiman fu den.​—Gen. 3:4, 5; Yoh. 8:44.

⁶ Yehovah no draidrai fu krutu Satan, èn a du dati nanga yepi fu a fosi Bijbel profeititori di e taki: „Mi o meki yu nanga na uma tron feanti, èn yu pikin nanga en pikin o de feanti. A pikin fu na uma o masi yu ede, èn yu o gi a pikin fu na uma mankeri na en bakafutu” (Gen. 3:15). Satan nanga na „uma” fu Gado ben o de feanti. Iya, Yehovah ben e si en hemel organisâsi fu engel leki En lobi wefi. A profeititori disi e gi wi wan trutru howpu, aladi a ben tan wan „santa kibritori” di ben o kon na krin safrisafri. Gado ben o meki wan engel fu en hemel organisâsi tyari wan kaba kon na ala sma noso engel di ben opo densrefi tu teige En. Gado ben o gebroiki na engel disi tu fu tyari „den sani di de na ini hemel nanga den sani di de na grontapu” kon na wán.​—Ef. 1:8-10.

7. San son engel du na ini a ten fu Noa, èn san Yehovah du nanga den?

⁷ Na ini a ten fu Noa, wan grupu engel gowe libi „a reti tanpresi” fu den, èn den teki libisma skin fu di den ben wani suku den eigi prisiri na grontapu (Yud. 6; Gen. 6:1-4). Yehovah trowe den engel dati go na ini bigi dungru, èn na so den tron „ogri yeye” nanga ogri feanti fu den futuboi fu Gado.​—Ef. 6:11-13; 2 Petr. 2:4.

Fa den engel e yepi wi?

8, 9. Fa Yehovah gebroiki engel fu yepi libisma?

⁸ Abraham, Yakob, Moses, Yosua, Yesaya, Danièl, Yesus, Petrus, Yohanes, nanga Paulus ben kisi yepi fu engel. Den reti-ati engel strafu sma soleki fa Gado ben wani dati, den meki libisma kon sabi profeititori nanga tra sani di den ben musu sabi, èn nanga yepi fu den, libisma kon abi a Wèt di Gado ben gi Moses (2 Kow. 19:35; Dan. 10:5, 11, 14; Tori. 7:53; Openb. 1:1). Fu di wi abi a heri Bijbel now, meki a no de fanowdu moro taki engel e tyari boskopu gi wi di e komoto fu Gado (2 Tim. 3:16, 17). Ma aladi wi no man si den engel, toku den e wroko fayafaya fu du a wani fu Gado èn fu horibaka gi den futuboi fu en.

⁹ Bijbel e gi wi a dyaranti disi: „Na engel fu Yehovah e seti kampu lontu den wan di e frede Gado, èn a e frulusu den” (Ps. 34:7; 91:11). Fu di Satan ben feni taki libisma no o tan gi yesi na Gado te tesi e miti den, meki Yehovah e gi pasi taki Satan e tesi wi na ala sortu fasi (Luk. 21:16-19). Ma Gado sabi o langa a musu gi pasi taki wi e kisi tesi, fu man sabi efu wi sa tan gi yesi na En. (Leisi 1 Korentesma 10:13.) Den engel de klariklari ala ten fu du a wani fu Gado. Den frulusu Sadrak, Meisak, Abedneikow, Danièl, nanga Petrus, ma den no tapu pasi gi feanti fu kiri Stefanus nanga Yakobus (Dan. 3:17, 18, 28; 6:22; Tori. 7:59, 60; 12:1-3, 7, 11). Den situwâsi nanga den afersi ben e difrenti fu makandra. Sma kiri sonwan fu den brada fu wi tu di ben de na ini Nazi strafuman-kampu. Ma Yehovah sorgu taki furu trawan tan na libi.

10. Boiti taki engel kan yepi wi, na sortu tra fasi wi kan kisi yepi tu?

¹⁰ Bijbel no e taki dati ibri sma na grontapu abi wan engel di e kibri en gi ogri. Wi abi a frutrow  taki te wi e begi Gado, dan „awansi san wi e aksi en akruderi a wani fu en, a e yere wi” (1 Yoh. 5:14). A no de fu taki dati Yehovah kan seni wan engel fu kon yepi wi, ma kande a sa yepi wi na wan tra fasi. Kande den Kresten brada nanga sisa fu wi sa gi wi yepi nanga trowstu. Kande Gado sa gi wi a koni nanga a krakti di wi abi fanowdu fu horidoro te wi abi ’wan maka na ini wi skin’ di e pina wi neleki te „wan engel fu Satan” e pina wi.​—2 Kor. 12:7-10; 1 Tes. 5:14.

Teki na eksempre fu Yesus

11. Fa Gado gebroiki engel fu yepi Yesus? San Yesus sori fu di a tan gi yesi na Gado?

¹¹ Prakseri fa Yehovah gebroiki engel na ini a tori fu Yesus. Den engel meki bekènti taki a ben o gebore èn taki a ben o kisi wan opobaka. Den yepi en tu di a ben de na grontapu. Den engel ben kan tapu pasi gi sma fu grabu Yesus èn fu kiri en na wan ogri-ati fasi. Na presi fu dati, Gado seni wan engel fu gi en deki-ati (Mat. 28:5, 6; Luk. 2:8-11; 22:43). Yesus dede leki wan srakti-ofrandi, soleki fa Yehovah ben wani dati. A sani disi sori taki wan man di no ben abi sondu ben kan tan gi yesi na Gado, aladi a ben e kisi bun hebi tesi. Dati meki Yehovah gi Yesus wan opobaka fu libi na hemel sondro taki a o man dede. Yehovah gi en sosrefi „ala makti”, èn a meki den engel saka densrefi na ondro en (Mat. 28:18; Tori. 2:32; 1 Petr. 3:22). Na so Yesus sori taki a de a moro prenspari „pikin” fu na „uma” fu Gado.​—Gen. 3:15; Gal. 3:16.

12. Fa wi kan de nanga wan „krin frustan”, neleki Yesus?

¹² Yesus ben sabi taki a no bun fu tesi Yehovah. A ben sabi taki a no ben kan fruwakti taki engel ben o kon frulusu en te a ben e du espresi sani di ben kan meki taki ogri miti en. (Leisi Mateyus 4:5-7.) Sobun, meki wi de leki Yesus di ben e libi nanga „krin frustan”. Iya, meki wi no du espresi sani di kan tyari problema kon gi wi, ma meki wi horidoro te wi e kisi frulusu, aladi wi e frutrow na tapu taki Yehovah sa yepi wi.​—Tit. 2:12.

San wi kan leri fu den engel di e tan gi yesi na Gado?

13. San wi kan leri fu na eksempre fu den reti-ati engel na ini 2 Petrus 2:9-11?

¹³ Di na apostel Petrus ben e piri-ai gi den wan di ben e „taki ogri” fu den salfu futuboi fu Yehovah, dan a taki fu a bun eksempre fu den engel di e tan gi yesi na Gado. Aladi den engel disi abi bigi makti, toku den e weigri fu krutu den salfu futuboi dati, fu di den „abi lespeki gi Yehovah”. (Leisi 2 Petrus 2:9-11.) Meki wi weigri tu fu krutu trawan, meki wi sori lespeki gi den wan di e teki fesi na ini a gemeente, èn meki wi libi sani gi Yehovah, a Moro Hei Krutuman.​—Rom. 12:18, 19; Hebr. 13:17.

14. Fa den engel e sori wi taki wi musu dini Gado nanga sakafasi?

¹⁴ Den engel fu Yehovah e sori wi na wan moi fasi fa wi kan dini Gado nanga sakafasi. Son engel ben weigri fu meki libisma kon sabi a nen fu den (Gen. 32:29; Krut. 13:17, 18). Aladi milyunmilyun engel de na hemel, toku Bijbel  e kari soso a nen fu Mikael nanga Gabrièl. Kande a sani disi na fu tapu wi fu anbegi engel, fu di a sani dati no bun (Luk. 1:26; Openb. 12:7). Di na apostel Yohanes saka kindi fu anbegi wan engel, dan na engel taigi en: „No du dati! Mi srefi na wan srafu neleki yu èn neleki den brada fu yu di de profeiti” (Openb. 22:8, 9). Na Gado wawan wi musu anbegi, èn na en wawan wi musu begi tu.​—Leisi Mateyus 4:8-10.

15. Fa den engel e leri wi taki wi musu abi pasensi?

¹⁵ Den engel e sori wi tu taki wi musu abi pasensi. Aladi den trutru wani sabi den santa kibritori fu Gado, toku den no sabi ala den tori disi. Bijbel e taki: „Na den srefi sani disi den engel e angri fu kon sabi” (1 Petr. 1:12). Sobun, san den e du? Den e wakti nanga pasensi teleki Gado e sori „koni na furu difrenti fasi”, èn a sa du dati „nanga yepi fu a gemeente”.​—Ef. 3:10, 11.

16. Fa a fasi fa wi e tyari wisrefi abi krakti tapu den engel?

¹⁶ Kresten di e kisi tesi de leki ’sma di den poti na ini stadion so taki engel kan luku den’ (1 Kor. 4:9). Den engel e prisiri tu fu si fa wi e tan gi yesi na Gado, èn den breiti te wan sma di sondu e sori berow (Luk. 15:10). Den engel e si fa Kresten sisa e tyari densrefi na wan fasi di Gado feni bun. Bijbel e sori taki „na uma musu poti wan sani na tapu en ede fu sori taki a de na a man ondro” (1 Kor. 11:3, 10). Iya, den engel breiti fu si fa Kresten uma nanga ala tra futuboi fu Gado na grontapu e fiti densrefi na den seti na ini a gemeente, èn fa den e saka densrefi na ondro den wan di e teki fesi. Te Kresten uma e gi yesi na a fasi disi, dan dati e memre den hemel manpikin fu Gado taki den musu gi yesi tu.

Den engel e horibaka fayafaya gi a preikiwroko

17, 18. Fu san ede wi kan taki dati den engel e horibaka gi a preikiwroko fu wi?

¹⁷ Engel abi wan prati na wan tu fu den moi sani di pasa na ini „a dei fu Masra”. Di a Kownukondre seti na ini 1914, dan den ben abi wan prati na a okasi dati. Èn di Gado meki „Mikael nanga den engel fu en” fringi Satan nanga den ogri yeye fu en go na grontapu, dan den ben abi wan prati na a sani dati tu (Openb. 1:10; 11:15; 12:5-9). Na apostel Yohanes ben si fa  wan „engel e frei na loktu; a ben abi têgo bun nyunsu di a ben musu meki bekènti leki prisiri nyunsu na den sma di e libi na grontapu”. Na engel ben taki nanga tranga sten: „Un frede Gado èn gi en glori, bika a yuru doro kaba taki a o krutu sma; fu dati ede, anbegi a Sma di meki hemel, grontapu, a se, nanga ala den presi pe watra e komopo” (Openb. 14:6, 7). A sani disi e gi den futuboi fu Yehovah a dyaranti taki te den e preiki a bun nyunsu fu a Kownukondre aladi den e kisi ogri-ati gens fu Didibri, dan den engel e horibaka gi den.​—Openb. 12:13, 17.

¹⁸ Na ini a ten disi, engel e tyari wi go tu na reti-ati sma. Ma den no e taki nanga wi neleki fa wan engel ben taki nanga Filipus fu sori en taki a ben musu go na a heiman fu Etiopia (Tori. 8:26-29). Aladi dati de so, toku den sani di preikiman ondrofeni na ini a ten disi, e sori taki den engel e horibaka gi a Kownukondre preikiwroko di wi e du. Èn den e du dati aladi wi no man si den. Boiti dati, den e tyari wi go na den wan di „abi a yoisti denki fu man kisi têgo libi” (Tori. 13:48). * A de prenspari trutru taki wi e teki prati na a preikiwroko doronomo! Na so wi o man yepi fu feni den wan di e angri fu „anbegi [a Tata] nanga yeye èn nanga waarheid”!​—Yoh. 4:23, 24.

19, 20. San den engel o yepi fu du „na a kaba fu a grontapu sistema”?

¹⁹ Di Yesus ben taki fu a ten fu wi, dan a sori taki „na a kaba fu a grontapu sistema” den engel o „puru den ogriwan na mindri den regtfardikiwan” (Mat. 13:37-43, 49). Engel sa yepi tu fu tyari den salfuwan kon na wán fu a lasti leisi èn fu marki den fu a lasti leisi tu (Leisi Mateyus 24:31; Openb. 7:1-3). Boiti dati, makandra nanga tra engel, Yesus sa „prati den skapu fu den bokoboko”.​—Mat. 25:31-33, 46.

²⁰ „Te Masra Yesus o komoto fu hemel fu sori ensrefi makandra nanga den tranga engel fu en”, dan ala ’den sma di no sabi Gado èn den sma di no e gi yesi na a bun nyunsu fu wi Masra Yesus’, sa kisi pori (2 Tes. 1:6-10). Di Yohanes si na ini wan fisyun fa a sani dati pasa, dan a taki dati Yesus nanga den hemel legre fu den engel ben e rèi na tapu weti asi fu go feti wan regtfardiki feti.​—Openb. 19:11-14.

21. San na engel di „ben hori a sroto fu a dipi peti di no abi gron, èn sosrefi wan bigi keti”, sa du nanga Satan nanga den ogri yeye fu en?

²¹ Yohanes ben „si wan engel e saka komoto fu hemel, èn na ini en anu a ben hori a sroto fu a dipi peti di no abi gron, èn sosrefi wan bigi keti”. Na engel disi na a gran engel Mikael di sa tai Didibri èn a sa fringi en go na ini a dungru peti. Soleki fa a sori, dan a sa du a srefi nanga den ogri yeye. Na a kaba fu a Dusun Yari Tiri fu Krestes, den ogri yeye disi sa kon lusu fu wan syatu pisi ten, èn na a ten dati, libisma di no sa abi sondu, sa kisi wan lasti tesi. Baka dati, Satan nanga ala trawan di opo densrefi teige Gado, sa kisi pori (Openb. 20:1-3, 7-10; 1 Yoh. 3:8). Nowan sma sa opo ensrefi moro teige Gado.

22. Sortu prati den engel o abi na ini den sani di o pasa heri esi? Fa wi musu si a frantwortu di den engel abi?

²² Heri esi wi sa kisi frulusu fu na ogri sistema fu Satan. Den engel sa abi prenspari frantwortu te den bigi sani disi o pasa. Den sani dati sa sori taki na Yehovah abi a reti fu tiri, èn den sa meki den sani di A abi na prakseri gi libisma èn gi grontapu, kon tru dorodoro. Den reti-ati engel trutru na „yeye di musu dini trawan, èn di Gado seni kon fu dini den sma di o kisi frulusu”. Dati meki wi musu de nanga tangi taki Yehovah e gebroiki den engel fu yepi wi fu du a wani fu en èn fu kisi têgo libi.

[Futuwortu]

San yu ben sa piki?

• Fa den engel orga?

• San son engel du na ini a ten fu Noa?

• Fa Gado gebroiki den engel fu en fu yepi wi?

• Sortu frantwortu den reti-ati engel abi na ini a ten fu wi?

[Aksi fu a tori disi]

[Prenki na tapu bladzijde 21]

Den engel e prisiri fu du a wani fu Gado

[Prenki na tapu bladzijde  23]

Den engel de klariklari ala ten fu du a wani fu Gado, neleki fa Danièl ondrofeni dati

[Prenki na tapu bladzijde 24]

Abi deki-ati, fu di engel e horibaka gi a Kownukondre preikiwroko!

[Sma di abi a reti fu a prenki]

Globe: NASA photo