Den feni gudu di ben kibri

OITI yu feni wan gudu na wan presi pe yu no ben fruwakti taki yu ben o feni wan gudu drape? Na dati ben pasa nanga Ivo Laud, wan Yehovah Kotoigi di e libi na ini Estkondre. Tapu 27 maart 2005, a ben e yepi Alma Vardja, wan grani Kotoigi, fu broko wan pikin owru maksin puru. Di den ben broko a skotu puru, dan den si taki wan planga ben spikri na a wán sei fu wan postu. Di den puru a planga, dan den si taki wan olo ben koti na ini a postu. Na olo ben bradi 10 centimeter, a ben langa 1,2 meter, èn a ben dipi 10 centimeter. Na olo disi ben tapu nanga a srefi sortu udu leki a di fu a postu. San den sma disi ben feni? (1) Wan presi pe sma ben kibri gudu! Sortu gudu ben kibri drape? Suma ben poti den drape?

Na ini na olo, den tu Kotoigi feni difrenti paki di ben domru bun na ini papira. (2) Den paki ben abi publikâsi fu Yehovah Kotoigi na ini. Furu fu den publikâsi dati ben de  Waktitoren studie-artikel, èn wan tu fu den ben de studie-artikel fu 1947. (3) Wan sma ben teki en ten fu skrifi den publikâsi disi nanga anu, èn a ben du dati na ini Est-tongo. Sonwan fu den paki ben abi sani na ini di yepi wi fu kon sabi suma ben kibri den publikâsi na ini na olo. Den sani dati ben de dokumenti di ben e sori sortu aksi skowtu ben poti gi Villem Vardja, a masra fu Alma. Dokumenti ben de tu di ben e taki fu den yari di Villem Vardja ben de na strafu-oso. Fu san ede a ben musu koti strafu?

Villem Vardja ben de wan Kotoigi di ben abi frantwortu na ini Gemeente Tartu, èn bakaten na ini a gemeente Otepää na ini Estkondre. Na a ten dati, Estkondre ben de wan Communist kondre di ben de na ondro a makti fu a Sovyet-Unie. Soleki fa a sori, dan Villem Vardja ben kon sabi den tru tori fu Bijbel wan pisi ten bifo a Di Fu Tu Grontapufeti ben bigin. Wan tu yari baka dati, tapu 24 december 1948, den Communist tiriman meki skowtu hori Brada Vardja, fu di a ben e du a Kresten diniwroko fu en. Den sikrit skowtu poti wan lo aksi gi en, èn den handri na wan ogri-ati fasi nanga en, fu di den ben wani taki a taigi den suma na den tra Kresten brada nanga sisa fu en. Den skowtu weigri fu gi en na okasi fu opo taki gi ensrefi na fesi krutubangi. Den seni en go na wan fu den strafuman-kampu fu Rosiakondre, pe a ben musu koti strafu tin yari langa.

Villem Vardja tan dini Yehovah te na a dede fu en tapu 6 maart 1990. En wefi no ben sabi srefisrefi taki a ben kibri den publikâsi dati na ini na olo. Kande a ben kibri den fu di a no ben wani taki en wefi kisi problema efu skowtu ben o poti aksi gi en. Fu san ede Villem ben musu kibri den publikâsi? A ben du dati fu di a KGB (wan grupu skowtu fu Sovyet-Unie di ben e wroko kibrikibri) ben e kon ondrosuku den oso fu Yehovah Kotoigi, na ten te den Kotoigi no ben e fruwakti dati. Den skowtu ben e kon luku efu den Kotoigi ben abi Bijbel publikâsi. A kan taki Brada Vardja ben kibri den publikâsi, fu sorgu taki te a KGB ben teki ala den tra publikâsi fu den Kresten brada nanga sisa fu en, dan den ben o abi yeye nyanyan ete. Wan pisi ten na fesi, na ini a waran pisi ten fu a yari 1990, sma ben feni publikâsi tu di ben kibri na tra presi. Wan fu den presi dati ben de na ini Tartu, na a zuidsei fu Estkondre. Na Villem Vardja ben kibri den buku dati tu.

Fu san ede wi e si den buku dati leki gudu? Fu di Brada Villem Vardja teki en ten fu skrifi den publikâsi abra, èn a kibri den bun. Disi e sori o furu warderi den Kotoigi ben abi gi a yeye nyanyan di den ben abi na a ten dati (Mat. 24:45). Yu abi warderi gi den Bijbel publikâsi di yu e kisi now na ini a kondre pe yu e tan? Wan fu den publikâsi dati na A Waktitoren di de fu kisi na ini Estitongo, èn na ini moro leki 170 tra tongo.