Yu e memre disi ete?

Yu ben prisiri fu leisi den Waktitoren di kon na doro no so langa pasa? Luku efu yu kan gi piki tapu den aksi di e kon now:

• Efu wan pikin dede fosi a gebore, dan so wan pikin kan kisi wan opobaka?

A libi fu wan sma e bigin te a mama kon de nanga bere. Yehovah kan gi ibri sma wan opobaka awansi o bigi a de, noso awansi o pikin a de, bika „Gado man du ala sani” (Mark. 10:27). Ma Bijbel no e sori krin taki wan pikin di dede na ini en mamabere, o kisi wan opobaka.​—15/4, bladzijde 12, 13.

• San wi kan leri fu den mira, den klipdas, den sprenka, nanga den kamrawenke?

Den fo sani disi e sori wi taki Gado poti koni na ini den. Den e du spesrutu sani di e sori o koni Gado de (Odo 30:24-28).​—15/4, bladzijde 16-19.

• Gado e kenki en prakseri?

Nôno, Gado no e kenki en prakseri. Na presi fu dati, a gi a pipel fu en san den abi fanowdu na ini difrenti situwâsi, èn a e du dati gi a bun fu den.​—yuli-september, bladzijde 27.

• Fu san ede Bijbel e taki dati wan ten de fu tan tiri?

Wan sma di e tan tiri e sori taki a abi lespeki gi trawan, a e sori taki a koni, èn taki a abi a koni fu man si sani krin. Boiti dati, te wan sma wani denki dipi fu sani, dan a de prenspari taki a e tan tiri (Ps. 37:7; 63:6; Odo. 11:12).​—15/5, bladzijde 3-5.

• Na Gado e strafu wi te wi abi problema?

Nôno. Gado wani taki a pipel fu en musu de koloku èn taki ogri no miti den. Disi de fu si te wi e luku san ben pasa di Gado meki den fosi libisma. A ben poti den na ini „a dyari fu Eden”, wan moi dyari di de leki wan paradijs, pe den ben o libi sondro wan problema.​—yuli-september, bladzijde 28.

• Omeni kownu fu Yuda ben sori taki den ben de fayafaya gi na oso fu Gado?

Tinaneigi kownu ben tiri a zuidsei kownukondre fu Yuda, ma fo kownu ben de fayafaya gi na oso fu Yehovah. Den fo kownu disi ben de, Asa, Yosafat, Heskia, nanga Yosia.​—15/6, bladzijde 7-11.

• A de so taki ala den salfu Kresten na grontapu e yepi prati yeye nyanyan?

Nôno. Ala den brada nanga sisa di salfu nanga a yeye fu Gado, de wan memre fu a srafu-grupu. Ma na den salfu brada fu a Tiri Skin e teki fesi na ini a wroko fu gi den futuboi fu Gado yeye nyanyan.—15/6, bladzijde 22-24.

• Fa Bijbel studenti kan kibri densrefi gi ogri yeye?

Wan fasi fa den kan du dati, na taki den no musu abi noti fu du nanga den kulturu gwenti.​—yuli-september, bladzijde 15.

• Fu san ede a fasi fa Yesus ben e handri nanga sma, ben difrenti fu a fasi fa den kerki fesiman ben e handri nanga den?

Den kerki fesiman no ben lobi den mofinawan. Na presi fu dati, den ben e wisiwasi den. Boiti dati, den no ben lobi Gado. Yesus lobi en Tata èn a ben abi sari-ati nanga den sma disi (Mat. 9:36). Yesus ben abi safu-ati, a ben abi sari-ati, èn a ben e sori switifasi gi sma.​—15/7, bladzijde 15.

• Fa Yehovah leri Yona fu abi sari-ati?

Yehovah meki wan krabasibon gro, èn baka dati, a meki wan woron nyan a bon teleki a kon dede. Na so Yehovah ben kan meki Yona kon frustan taki a ben musu abi sari-ati.​—yuli-september, bladzijde 18.