A lobi fu Krestes e gi wi deki-ati fu sori lobi gi trawan

’Yesus ben lobi den sma fu en di ben de na grontapu, iya, a ben lobi den te na a kaba.’​—YOH. 13:1.

1, 2. (a) Fu san ede a lobi fu Yesus e naki wi ati? (b) Na sortu sani wi sa poti prakseri na ini na artikel disi?

YESUS gi wi a tumusi bun eksempre fa wi musu sori lobi gi trawan. Ala sani fu en e sori taki a lobi trawan. Wi e si dati te wi e luku a fasi fa a ben e tyari ensrefi, a fasi fa a ben e taki, den sani di a ben e leri sma, èn a dede di a dede leki wan srakti-ofrandi gi libisma. Te na a kaba fu en libi na grontapu, a sori lobi gi den sma di a ben e miti, èn spesrutu gi den disipel fu en.

² A tumusi moi fasi fa Yesus sori lobi gi trawan, e sori den bakaman fu en san na a yoisti fasi fa den musu handri nanga trawan. Na eksempre fu Yesus e gi wi deki-ati tu fu sori a srefi sortu lobi gi wi Kresten brada nanga sisa èn gi trawan. Na ini na artikel disi, wi sa luku san den gemeente owruman kan leri fu Yesus, te a abi fu du nanga lobi di den musu sori gi Kresten di du sondu, awansi na seryusu sondu. Wi sa luku tu fa a lobi fu Yesus e gi Kresten deki-ati fu yepi trawan te den abi problema, te rampu e miti den, èn te den e siki.

3. Fa Yesus handri nanga Petrus, aladi Petrus ben meki wan seryusu fowtu?

³ A neti bifo Yesus dede, Petrus, wan apostel fu en, strei dri leisi taki a no ben sabi en (Mark. 14:66-72). Ma di Petrus drai go baka na Yesus, soleki fa Yesus ben taki dati a ben o du, dan Yesus gi en pardon. Yesus gi Petrus bigi frantwortu (Luk. 22:32; Tori. 2:14; 8:14-17; 10:44, 45). San wi e leri fu a fasi fa Yesus handri nanga den wan di ben meki seryusu fowtu?

De leki Krestes te yu e kisi fu du nanga sma di du sondu

4. Na ini sortu situwâsi a de prenspari fu sori a denki fu Krestes?

⁴ Furu situwâsi de pe wi musu sori taki wi abi a denki fu Krestes. Wán fu den situwâsi disi na te wan Kresten du wan seryusu sondu, awansi na wan famiriman, noso wan sma na ini a gemeente. A sani disi kan meki wi firi sari trutru. A sari fu taki dati now di den lasti dei fu a sistema fu Satan doro en heimarki, a yeye fu grontapu e kon abi moro nanga moro krakti tapu sma. A takru fasi fa grontapusma e tyari densrefi kan kon abi krakti tapu yonguwan nanga owruwan, so taki te fu kaba den no abi a fasti bosroiti moro fu waka tapu a smara pasi. Na ini a fosi yari hondro, sonwan fu den Kresten ben musu puru fu a Kresten gemeente, èn trawan fu den ben kisi piri-ai. Na so a de tu na ini a ten disi (1 Kor. 5:11-13; 1 Tim. 5:20). Ma te owruman di musu poti prakseri na den sortu afersi disi e sori a lobi fu Krestes, dan disi kan abi bigi krakti tapu a sma di du sondu.

5. Fa owruman musu teki na eksempre fu Krestes te den e handri nanga Kresten di du sondu?

⁵ Neleki Yesus, owruman musu hori densrefi ala ten na den regtfardiki markitiki fu Yehovah. Te den e du dati, dan den e sori safri-atifasi, switifasi nanga lobi neleki Yehovah. Te wan Kresten abi trutru berow, noso te a „lasi-ati” èn te a e firi „brokosaka” fu di a du wan sondu, dan kande a no sa muilek gi owruman fu ’tyari so wan sma kon tapu a reti pasi baka’ (Ps. 34:18; Gal. 6:1). Ma fa den musu handri nanga wan sma di e weigri fu gi yesi èn di no e sori nowan enkri berow?

6. San den owruman no musu du te den e handri nanga Kresten di du sondu? Fu san ede den no musu du dati?

 ⁶ Kande wan Kresten e weigri fu teki rai di komoto fu Bijbel, noso kande a e gi tra sma a fowtu fu na ogri di a du. Te a sani disi e pasa, dan kande owruman nanga tra Kresten sa atibron. Fu di den owruman sabi sortu problema a Kresten disi tyari kon kaba, meki den kan prakseri fu taigi en fa den e denki fu en èn fu a sani di a du. Ma te den owruman e atibron nanga a sma disi, dan dati kan tyari problema kon. Boiti dati, den no sa sori taki den „e denki soleki fa Krestes e denki” (1 Kor. 2:16; leisi Yakobus 1:19, 20.) Yesus no ben draidrai fu gi wan tu Kresten na ini a ten fu en piri-ai, ma noiti a ben taigi den hati sani (1 Petr. 2:23). Na presi fu dati, a ben sori den krin taki den ben abi na okasi fu sori berow, so taki Yehovah kan feni den bun. Iya, wan fu den moro prenspari reide fu san ede Yesus kon na grontapu, na „fu frulusu sondari”.​—1 Tim. 1:15.

7, 8. Fa owruman musu handri nanga wan Kresten di e kon na fesi wan krutu komte?

⁷ Fa na eksempre fu Yesus musu yepi wi fu kon abi a yoisti denki fu Kresten di musu kisi trangaleri fu a gemeente? Soleki fa wi sabi, dan Bijbel e taki dati Kresten di du sondu musu go na fesi wan krutu komte. Ma hori na prakseri taki a sani disi musu pasa fu kibri na ipi. Na so a Kresten di kisi trangaleri kan kisi deki-ati fu sori berow (2 Kor. 2:6-8). A de wan sari sani taki sonwan fu den Kresten disi no wani sori berow èn taki den musu puru fu a gemeente. Ma a moi fu si taki bakaten, furu fu den e drai kon baka na Yehovah èn na a gemeente fu en. Te owruman e sori taki den abi a denki fu Krestes, dan dati e meki en moro makriki gi a sma fu sori berow èn fu drai kon baka na a gemeente te fu kaba. Bakaten, a kan taki sonwan fu den sma disi no sa memre ala den Bijbel rai di den owruman ben gi den. Ma a no de fu taki dati den no sa frigiti fa den owruman ben sori lespeki nanga lobi gi den.

⁸ Dati meki owruman musu sori „den froktu fu a yeye”, spesrutu a lobi fu Krestes, srefi te Kresten di du sondu e weigri fu teki Bijbel rai (Gal. 5:22, 23). Den no musu hasti densrefi fu puru den sma dati fu a gemeente. Den musu sori taki den wani yepi den sma disi fu drai kon baka na  Yehovah. Sobun, te wan sma di du sondu, abi berow bakaten, soleki fa a de nanga furu Kresten, dan kande a sa de nanga bigi tangi taki Yehovah nanga den ’libisma di a gi leki presenti’, meki en moro makriki gi en fu drai kon baka na a gemeente.​—Ef. 4:8, 11, 12.

De leki Krestes èn sori lobi gi trawan na ini a ten fu a kaba

9. Gi wan eksempre fu sori fa Yesus sori lobi gi den disipel fu en.

⁹ Lukas skrifi fu wan tumusi moi okasi pe Yesus sori lobi gi den disipel fu en. Krestes ben sabi taki a ten ben o doro taki den srudati fu Rome ben o lontu a foto Yerusalem di ben musu kisi pori. A sani disi ben o tapu sma fu lowe komoto na ini a foto. Dati meki Yesus warskow den disipel fu en na wan lobi-ati fasi. A taigi den: „Te unu e si taki legre seti kampu lontu Yerusalem, dan un musu sabi taki a ten doro taki a foto o kisi pori.” San den ben musu du? Yesus gi a krin rai disi: „Dan meki den sma di de na Yudea, bigin lowe go na den bergi, èn den sma di de na ini a foto srefi musu hari gowe fu drape; sosrefi, den sma di de na den boitipresi no musu go na ini a foto; bika disi na a ten te a foto o kisi strafu, so taki ala sani di skrifi na ini Gado Buku, sa kon tru” (Luk. 21:20-22). Baka di den legre fu Rome lontu Yerusalem na ini a yari 66, dan den Kresten di ben e gi yesi na Gado, teki den rai disi.

10, 11. Te wi e luku na eksempre fu den fosi Kresten di ben lowe komoto na Yerusalem, dan fa dati kan yepi wi fu sreka wisrefi gi a bigi banawtu?

¹⁰ Na a pisi ten di den Kresten ben e lowe komoto na ini Yerusalem, dan den ben musu sori lobi gi trawan, neleki fa Krestes ben sori lobi gi den. A no de fu taki, dati den ben musu prati ala sani nanga makandra. Ma a profeititori fu Yesus no ben abi fu du nomo nanga na owru foto di kisi pori. Yesus ben taki: „Wan bigi banawtu o de, di sensi a bigin fu grontapu teleki now no ben de ete, nôno, a no sa kon noiti moro tu.” (Mat. 24:17, 18, 21). Fosi a „bigi banawtu” dati di musu kon ete, èn sosrefi na a ten fu a banawtu dati, wi kan kisi fu du tu nanga problema, èn kande wi sa pina. Ma te wi abi a denki fu Krestes, dan dati sa yepi wi fu pasa den muilek ten dati.

¹¹ Na a ten dati, wi sa musu teki na eksempre fu Yesus, èn wi sa musu sori lobi gi trawan. Fu dati ede, Paulus gi wi a rai disi: „Meki ibriwan fu wi plisi tra sma nanga sani di bun, so taki dati kan gi den deki-ati. Bika srefi Krestes no ben plisi ensrefi . . . Meki a de so, taki Gado di e meki wi horidoro èn di e gi wi trowstu, yepi unu fu abi a srefi denki di Krestes Yesus ben abi.”​—Rom. 15:2, 3, 5.

12. Sortu lobi wi musu kon abi na ini a ten disi, èn fu san ede?

 ¹² Petrus, di ben kisi wini tu fu a lobi fu Krestes, ben gi den Kresten deki-ati fu kon abi „lobi sondro fu hoigri” èn fu „gi yesi na a waarheid”. Den ben musu ’lobi makandra fu a dipi fu den ati’ (1 Petr. 1:22). Na ini a ten disi, wi musu du moro muiti fu kon abi den fasi disi di Krestes ben abi. Nownow kaba a pipel fu Gado e kisi moro nanga moro tesi. Nowan sma musu poti en frutrow tapu iniwan sani fu a grontapu disi. A bruya ekonomia fu a ten disi e sori taki wi no kan du dati. (Leisi 1 Yohanes 2:15-17.) Ma fu di a kaba fu a sistema disi e kon krosibei, meki wi musu kon moro krosibei na Yehovah èn na makandra. Boiti dati, wi musu meki bun mati na ini a gemeente. Paulus ben gi a rai disi: „Neleki fa brada lobi makandra, na so un musu abi dipi firi gi makandra. Unu fosi musu bigin sori trawan lespeki” (Rom. 12:10). Petrus ben sori moro fini o prenspari a sani dati de. A ben taki: „A moro prenspari sani, na taki un musu lobi makandra komoto fu a dipi fu un ati, bika lobi e tapu bun furu sondu.”​—1 Petr. 4:8.

13-15. Fa son Kresten brada sori trutru lobi gi trawan baka di rampu miti den sma dati?

¹³ Na heri grontapu, sma sabi Yehovah Kotoigi leki sma di e sori trutru lobi gi trawan. Luku na eksempre fu den Kotoigi di ben de klariklari fu yepi sma, baka di bigi winti pori bigi kontren na a zuidsei fu Amerkankondre na ini 2005. Moro leki 20.000 Kotoigi teki na eksempre fu Yesus, èn den gowe libi den bunbun oso nanga den bunbun wroko fu go yepi den Kresten brada nanga sisa di ben de na nowtu.

¹⁴ Na ini wán kontren, a watra fu a se wasi sowan 80 kilometer kon na a syoro, èn a watra ben hei sowan 10 meter. Di a watra hari gowe baka na se, dan pikinmoro afu fu den oso nanga den tra gebow ben kisi pori dorodoro. Kotoigi fu difrenti kondre ben de klariklari fu go yepi na ini a kontren dati. Den go nanga ala den koni, den wrokosani, nanga tra sani fu bow oso èn den ben de klariklari fu du iniwan wroko di ben de fu du. Luku na eksempre fu tu sisa. Den sisa disi den masra dede kaba. Den lai den sani fu den na ini wan pick-up, èn den rèi moro leki 3000 kilometer fu go yepi sma na ini a kontren drape. Wán fu den sisa disi tan na ini a kontren, èn te now ete a e yepi a komte di e seti sani fu yepi sma di de na nowtu. Boiti dati, a e dini drape leki gewoon pionier.

¹⁵ Moro leki 5600 oso fu Kotoigi èn fu tra sma na ini a kontren dati, bow baka, noso den seti kon bun baka. Fa den Kotoigi drape e feni en taki den Kresten brada nanga sisa fu den e sori so furu lobi gi den? A bigi winti ben pori wan sisa en oso èn a sisa disi go tan na ini wan wagi. A daki fu a wagi ben leki èn a stoof pe a ben bori na tapu, ben broko. Den brada bow wan moi pikin oso gi en. A sisa ben e tanapu na fesi a moi nyun oso fu en, èn a ben e krei fu di a ben de nanga tangi gi san Yehovah nanga den Kresten brada nanga sisa ben du gi en. Den Kotoigi di ben lasi den oso, ben kisi wan tra presi fu tan fu wan syatu pisi ten. Di den oso fu den Kotoigi disi  bow baka, dan furu fu den tan ete wán noso moro yari na ini den presi pe den ben go tan fu wan pisi ten. Fu san ede den ben du dati? So taki Kotoigi di ben kon yepi nanga a wroko ben kan tan na ini a nyun oso fu den. Disi na wan heri moi fasi fa Kresten sori taki den abi a denki fu Krestes!

Sori trutru lobi gi den sikiwan

16, 17. Na sortu fasi wi kan sori trutru lobi gi den sikiwan?

¹⁶ A tru taki furu fu wi no kisi fu du nanga bigi rampu. Ma pikinmoro ibriwan fu wi e kisi fu du nanga siki, awansi na wisrefi e siki noso wan famiriman fu wi. A fasi fa Yesus ben handri nanga sikisma, na wan eksempre gi wi. Fu di a ben lobi den sma disi, meki a ben abi sari-ati nanga den. Di ipi-ipi sma ben tyari den sikisma kon na en, dan „a ben meki ala sma di no ben firi bun, kon betre”.​—Mat. 8:16; 14:14.

¹⁷ Na ini a ten disi, Kresten no man dresi sikisma na wan wondru fasi, soleki fa Yesus ben man du dati. Ma neleki Yesus, den abi sari-ati nanga sikisma. Fa den e sori dati? Wan buweisi fu dati, na taki owruman e sori taki den abi a denki fu Krestes, fu di den seti sani fu yepi sikisma na ini a gemeente. Na so den e du san skrifi na Mateyus 25:39, 40. * (Leisi en.)

18. Fa tu sisa sori trutru lobi gi wan tra sisa, èn san ben de a bakapisi?

¹⁸ A no de fu taki, dati wan sma no abi fu de wan owruman fu man du bun gi trawan. Luku na eksempre fu Charlene. A sisa disi ben abi 44 yari èn a ben abi kanker. Datra ben taigi en taki a ben abi tin dei nomo fu libi. Tu Kotoigi sisa, namku Sharon nanga Nicolette, ben si taki Charlene ben abi yepi fanowdu. Den kon si tu taki a ben hebi gi en masra fu sorgu gi en. Dati meki den bosroiti fu yepi Charlene fu pasa den dei fu en. Te fu kaba, den tin dei kon tron siksi wiki, ma den tu sisa sori lobi gi Charlene te na a kaba fu en libi. Sharon e taki: „A muilek te yu sabi taki wan sma no sa kon betre moro. Ma Yehovah gi wi krakti. Na ondrofeni disi meki taki wi kon moro krosibei na en èn na makandra.” A masra fu Charlene e taki: „Noiti mi no sa frigiti a yepi di den tu lobi sisa disi gi mi, èn a switifasi di den sori gi mi. Fu di den ben abi a bun fu wi na prakseri èn fu di den ben abi wan bun denki fu sani, meki a ben de moro makriki gi mi èn gi Charlene fu pasa a lasti tesi disi. Boiti dati, den sisa disi ben de wan bigi yepi èn wan trowstu gi mi. Mi sa de nanga tangi ala ten gi den sani di den du gi mi. A muiti di den du, tranga a bribi di mi abi na ini Yehovah èn a meki tu taki mi kisi moro lobi gi den Kresten brada nanga sisa na heri grontapu.”

19, 20. (a) Na sortu feifi sani wi poti prakseri? (b) Sortu fasti bosroiti yu abi?

¹⁹ Na ini den dri studie-artikel disi, wi poti prakseri na feifi sani di abi fu du nanga a denki fu Yesus. Wi luku tu fa wi kan kon abi a denki fu en èn fa wi kan handri neleki en. Meki wi abi „safri-ati nanga sakafasi” neleki Yesus (Mat. 11:29). Wi musu du muiti tu fu handri na wan switi fasi nanga trawan, awinsi wi e si den fowtu nanga den swakifasi fu den. Èn wi no musu frede fu gi yesi na ala den komando fu Yehovah, awinsi wi e kisi tesi.

²⁰ Leki lasti, meki wi sori trutru lobi gi ala wi Kresten brada nanga sisa, neleki fa Krestes srefi ben du dati, „te na a kaba”. Te wi abi a lobi dati, dan sma sa si wi leki den trutru bakaman fu Yesus (Yoh. 13:1, 34, 35). Iya, „tan lobi den brada fu unu” (Hebr. 13:1). No draidrai fu du dati! Abi a fasti bosroiti fu prèise Yehovah èn fu yepi trawan! Yehovah sa blesi a tranga muiti di yu e du.

[Futuwortu]

Yu kan tyari disi kon na krin?

• Fa owruman kan sori taki den abi a denki fu Krestes te den e kisi fu du nanga Kresten di du sondu?

• Fu san ede a de tumusi prenspari fu sori trutru lobi gi trawan na ini den lasti dei disi?

• Fa wi kan sori trutru lobi gi den sikiwan?

[Aksi fu a tori disi]

[Prenki na tapu bladzijde 17]

Owruman wani yepi sma di du sondu, fu drai kon baka na Yehovah

[Prenki na tapu bladzijde 18]

Fa den Kresten di ben lowe komoto na ini Yerusalem sori taki den ben abi a denki fu Krestes?

[Prenki na tapu bladzijde 19]

Sma sabi Yehovah Kotoigi leki sma di e sori trutru lobi gi trawan