Tangi fu a bun-ati fu Yehovah meki wi na futuboi fu en
Tangi fu a bun-ati fu Yehovah meki wi na futuboi fu en
„Wi na fu Yehovah.”—ROM. 14:8.
1, 2. (a) Sortu grani wi abi? (b) Na sortu aksi wi sa poti prakseri?
YEHOVAH ben gi den Israelsma wan tumusi moi grani di a taigi den: „Unu sa tron wan spesrutu gudu gi mi na mindri ala tra pipel” (Ex. 19:5). Na ini a ten disi, memre fu a Kresten gemeente abi a grani tu fu de futuboi fu Yehovah (1 Petr. 2:9; Openb. 7:9, 14, 15). A grani disi kan tyari wini kon gi wi fu têgo.
2 Boiti taki a de wan grani fu de futuboi fu Yehovah, a de wan frantwortu tu. Kande son sma e aksi densrefi: ’Mi o man du san Yehovah e fruwakti fu mi? Efu oiti mi brokokindi gi sondu, dan a de so taki a no sa feni mi bun moro? Te mi tron wan futuboi fu Yehovah, dan dati wani taki dati mi no sa de fri moro fu libi soleki fa mi wani?’ A prenspari fu poti prakseri na den aksi disi. Ma wi musu poti prakseri fosi na wan tra aksi, èn dati na: Sortu wini wi e kisi te wi na futuboi fu Yehovah?
Wi sa de koloku te wi na futuboi fu Yehovah
3. Sortu wini a tyari kon gi Rakab, di a bosroiti fu tron wan futuboi fu Yehovah?
3 A de so taki a e tyari wini kon te sma de futuboi fu Yehovah? Luku a tori fu Rakab, wan huru-uma di ben e libi na ini Yerikow fu owruten. A no de fu taki, dati a ben kweki na ini na anbegi fu den tegu gado fu Kanan. Ma di a yere taki Yehovah ben yepi den Israelsma fu wini den feanti fu den, dan a kon si taki Yehovah na a tru Gado. Dati meki Rakab yepi a pipel fu Gado aladi a ben kan lasi en libi, èn na so a poti en libi na ini den anu. Bijbel e taki: „A no ben de so tu taki a huru-uma Rakab ben de regtfardiki fu den sani ede di a ben du? Bika Rakab ben teki den boskopuman na ini en oso, èn a ben meki den waka wan tra pasi gowe” (Yak. 2:25). Prakseri sortu wini a tyari kon gi en fu di a tron wan memre fu wan pipel di ben e anbegi Gado na wan krin fasi. A pipel disi ben e sori lobi gi trawan, èn den ben e handri na wan reti-ati fasi nanga trawan, soleki fa a Wet fu Gado ben leri den. Rakab ben musu fu breiti taki a ben drai baka gi a libi di a ben abi fosi! A trow nanga wan Israelsma, èn a kweki en manpikin, Boas, kon tron wan man di ben lobi Gado trutru.—Yos. 6:25; Rut 2:4-12; Mat. 1:5, 6.
4. Sortu wini a tyari kon gi Rut di a bosroiti fu dini Yehovah?
4 Rut di ben de wan Moabsma, ben bosroiti tu fu dini Yehovah. A kan taki di a ben yongu ete, a ben e anbegi a gado Kamos èn sosrefi den tra gado fu Moab. Ma a kon leri sabi a tru Gado, Yehovah, èn a trow nanga wan Israelsma di ben kon suku wan moro bun libi na ini a kondre fu en. (Leisi Rut 1:1-6.) Bakaten, Rut nanga Orpa hari go na Betlehem makandra nanga Naomi, a mama fu a masra fu den. Ma Naomi gi den tu yongu uma deki-ati fu drai go baka na a pipel fu den. A no ben o makriki gi den fu libi na ini Israel. Orpa „drai go baka na a pipel nanga den gado fu en”, soleki fa Naomi ben taigi en fu du. Ma Rut no du dati. Fu di a ben abi bribi, meki a ben sabi suma a ben wani dini. A taigi Naomi: „No dwengi mi fu gowe libi yu èn fu drai go baka sondro yu. Pe yu e go, na drape mi o go. Pe yu e sribi, na drape mi o sribi. Yu pipel o de mi pipel, èn yu Gado o de mi Gado” (Rut 1:15, 16). Fu di Rut ben bosroiti fu dini Yehovah, meki a kisi wini fu a Wet fu Gado, di ben sori taki umasma di ben lasi den masra na ini dede, sosrefi pôtiwan, nanga sma di no ben abi gron, ben musu kisi yepi. Fu di Yehovah ben e sorgu gi Rut, meki a ben de koloku, a ben kisi kibri, èn a ben abi a dyaranti taki sani ben o waka bun nanga en.
5. Te yu e luku den sma di e dini Yehovah nanga den heri ati, dan san yu e si?
5 Kande yu sabi wan tu sma di gi densrefi abra na Yehovah, èn di e dini en omeni tenti yari langa kaba nanga den heri ati. Aksi den sortu wini den kisi fu di den e dini Yehovah. Aladi wi alamala e kisi problema, toku bun furu buweisi de di e sori krin taki a psalm skrifiman ben abi leti di a skrifi: „Koloku fu den sma di abi Yehovah leki Gado!”—Ps. 144:15.
Yehovah no e aksi tumusi furu fu wi
6. Fu san ede wi no musu frede taki wi no o man du san Yehovah e fruwakti fu wi?
6 Kande yu e aksi yusrefi efu yu o man du san Yehovah e fruwakti fu yu. Wan sma ben kan feni taki a o hebi tumusi gi en fu de wan futuboi fu Gado, fu gi yesi na den wet fu en, èn fu preiki a Wortu fu en. Fu eksempre, di Gado ben seni Moses fu go taki nanga den Israelsma èn nanga a kownu fu Egepte, dan Moses ben feni taki a no ben bun nofo fu du a wroko dati. Ma Gado no ben aksi Moses fu du wan sani di a no ben o man du. Yehovah ’sori en san a ben musu du’. (Leisi Exodus 3:11; 4:1, 10, 13-15.) Fu di Moses teki a yepi di a kisi, meki a ondrofeni a prisiri di a e gi fu du a wani fu Gado. Yehovah no e aksi tumusi furu tu fu wi. A sabi taki wi na sondu libisma, èn a wani yepi wi (Ps. 103:14). Te wi leki bakaman fu Yesus e dini Gado, dan dati no de wan hebi. Na presi fu dati, a e gi wi furu prisiri, fu di a libi dati e tyari wini kon gi trawan, èn Yehovah sa breiti nanga wi. Yesus ben taki: „Un kon na mi, . . . èn mi sa gi unu krakti baka. Teki mi tyatyari na un tapu èn leri fu mi, bika mi abi safri-ati nanga sakafasi.”—Mat. 11:28, 29.
7. Fu san ede yu kan abi na overtoigi taki Yehovah sa yepi yu fu du san a e aksi fu yu?
7 Ala ten Yehovah sa gi wi a deki-ati di wi abi fanowdu, solanga wi abi a frutrow taki a sa gi wi krakti. Fu eksempre, Yeremia no ben de wan takiman. Dati meki di Yehovah teki en leki En profeiti, dan Yeremia taki: „Ke Yehovah, mi Moro Hei Masra! Luku, mi no sabi srefisrefi fa fu taki. Mi na wan boi ete.” Bakaten, a ben taki tu: „Mi no o taki na ini en nen moro” (Yer. 1:6; 20:9). Ma fu di Yehovah ben gi Yeremia deki-ati, meki 40 yari langa a ben man preiki wan boskopu di trawan no ben wani yere. Ibri tron baka, Yehovah gi en deki-ati nanga den wortu disi: „Mi de nanga yu. Mi o kibri yu èn mi o frulusu yu.”—Yer. 1:8, 19; 15:20.
8. Fa wi e sori taki wi e frutrow tapu Yehovah?
8 Neleki fa Yehovah ben tranga Moses nanga Yeremia, na so a kan yepi wi leki Kresten fu du san a e fruwakti fu wi na ini a ten disi. Ma a de prenspari taki wi abi frutrow na ini Gado. Bijbel e taki: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala san yu e du, èn ensrefi sa meki yu pasi kon reti. yu heri ati” (Odo 3:5, 6). Wi e sori taki wi e frutrow tapu Yehovah, te wi e teki a yepi di a e gi wi nanga yepi fu a Wortu fu en èn nanga yepi fu a gemeente. Te wi e meki Yehovah tiri wi na ini a libi, dan noti no sa tapu wi fu tan dini en nanga wi heri ati.
Yehovah e sorgu gi ibriwan fu den futuboi fu en
9, 10. Sortu kibri wi sa kisi, soleki fa Psalm 91 e sori dati?
9 Aladi son sma e prakseri efu den o gi densrefi abra na Yehovah, toku a kan taki den e broko den ede nanga wan tu sani. Kande den frede taki den o du wan sondu, taki den o lasi a grani di den abi fu de wan futuboi fu Yehovah, èn taki a no o feni den bun moro. Koloku taki Yehovah e yepi wi na ala sortu fasi so taki wi no e lasi a tumusi moi matifasi di wi abi nanga en. Meki wi go luku fa Psalm 91 e tyari dati kon na krin.
10 A Psalm dati e bigin nanga den wortu disi: „Iniwan sma di e tan libi na a presi pe a Moro Heiwan e kibri en, o man tan na ini a kowrupe fu na Almaktiwan. Mi o taigi Yehovah: ’Yu na mi kibripe èn mi fortresi, mi Gado di mi o frutrow.’ Na en o frulusu yu puru na a trapu fu a sma di e fanga fowru” (Ps. 91:1-3). Luku taki Gado e pramisi taki a o kibri den wan di lobi en èn di e frutrow na en tapu. (Leisi Psalm 91:9, 14.) Fa a ben o kibri den? We, Yehovah kibri a libi fu sonwan fu den owruten futuboi fu en. Son leisi a ben e kibri a famirilin fu a Mesias di a ben pramisi libisma. Ma furu tra futuboi di ben tan gi yesi na Gado, ben musu koti strafu, sma fon den, èn den kiri den na wan ogri-ati fasi (Hebr. 11:34-39). Den sma disi kisi a deki-ati fu horidoro, fu di Yehovah ben e horibaka gi den, so taki den ben kan tan gi yesi na en. Dati meki Psalm 91 na wan pramisi di Gado e gi wi taki a sa tan kibri wi na yeye fasi.
11. San na ’a presi pe a Moro Heiwan e kibri sma’, èn sortu sma e kisi kibri drape?
11 Den wortu ’A presi pe a Moro Heiwan e kibri sma’, na wan agersi presi pe sma e kisi kibri na yeye fasi. Den sma di e tan na ini a presi dati, na fisitiman fu Gado, èn den e kisi kibri fu iniwan sani èn iniwan sma di kan swaki a bribi fu den èn di kan pori a lobi di den abi gi Gado (Ps. 15:1, 2; 121:5). A presi disi na wan kibripresi, fu di sma di no e bribi na ini Gado, no man frustan san a wani taki. Dyaso Yehovah e kibri den sma di e taki: ’Yu na mi Gado di mi sa frutrow.’ Te wi e tan na ini na agersi kibripresi disi, dan wi no o abi fu frede tumusi taki Gado no sa feni wi bun moro. Iya, wi no sa abi fu frede tumusi taki wi sa fadon na ini a trapu fu Satan, „a sma di e fanga fowru”.
12. Sortu sani kan pori a matifasi di wi abi nanga Gado?
12 Sortu sani kan pori a matifasi di wi abi nanga Gado? A psalm skrifiman e kari difrenti sani, èn wan fu den na „a takru siki di e panya go na ala sei na ini dungru, . . . [nanga] sani di e tyari pori kon na mindridei” (Ps. 91:5, 6). „A sma di e fanga fowru”, fanga furu sma fu di den kon abi na angri fu libi soleki fa densrefi wani (2 Kor. 11:3). A e fanga son sma fu di a e gi den deki-ati fu kon gridi, fu abi bigifasi, èn fu feti baka gudu. Trawan baka, a e fanga fu di a e kori den fu abi tranga lobi gi a kondre fu den, fu bribi na ini na evolutie-leri, èn fu teki prati na falsi anbegi (Kol. 2:8). Èn furu sma fadon na ini wan trapu fu di den ben abi seks nanga sma di no de den trowpatna. Den ogri disi di e pori a bribi fu sma, meki taki milyunmilyun sma lasi a lobi di den ben abi gi Gado.—Leisi Psalm 91:7-10; Mat. 24:12.
San kan yepi wi fu no lasi a lobi di wi abi gi Gado?
13. Fa Yehovah e kibri wi gi sani di kan pori a bribi fu wi?
13 Fa Yehovah e kibri a pipel fu en gi sani di kan pori a bribi fu den? A psalm e taki : „A o taigi den engel fu en fu no meki nowan sani pasa nanga yu” (Ps. 91:11). Den engel fu hemel e tiri èn e kibri wi so taki wi kan preiki a bun nyunsu (Openb. 14:6). Boiti den engel, Kresten owruman e kibri wi tu, so taki Satan no e kori wi nanga yepi fu falsi denki. Fu man du dati, den e hori densrefi finifini na Bijbel te den e gi leri. Den kan yepi iniwan sma di e meki muiti fu tapu nanga den fasi di grontapusma abi (Tit. 1:9; 1 Petr. 5:2). Boiti dati, „a getrow èn koni srafu” e gi wi yeye nyanyan di e yepi wi fu sorgu taki na evolutie-leri no abi krakti na wi tapu, fu no feti fu kisi gudu nanga biginen, fu kakafutu gi den takru lostu fu a skin, èn gi furu tra takru sani di kan abi krakti na wi tapu (Mat. 25:45). San yepi yu fu kakafutu gi wan tu fu den sani dati?
14. Fa wi kan kisi wini fu a kibri di Gado e gi wi?
14 San wi musu du fu man tan na ini a ’presi pe Gado e kibri sma’? Neleki fa wi musu luku bun doronomo taki wi no e kisi ongoloku, taki ogriman no e du ogri nanga wi, noso taki wi no e kisi siki, na so wi musu luku bun doronomo gi sani di kan pori a bribi fu wi. Fu dati ede, wi musu kisi wini doronomo fu den rai di Yehovah e gi wi na ini den publikâsi fu wi, na den gemeente konmakandra, èn na den bigi konmakandra. Wi e suku rai tu na den owruman. Èn wi e kisi wini tu fu den difrenti fasi di wi Kresten brada nanga sisa abi. Iya, te wi abi demakandra nanga a gemeente, dan dati e yepi wi fu tron koni sma.—Odo 13:20; leisi 1 Petrus 4:10.
15. Fu san ede wi abi a frutrow taki Yehovah man kibri wi gi iniwan sani di kan meki taki a no feni wi bun moro?
15 Wi no abi nowan reide fu tweifri taki Yehovah no man kibri wi gi iniwan sani di kan meki taki a no feni wi bun moro (Rom. 8:38, 39). A kibri a gemeente gi makti kerki fesiman nanga tiriman di nofo tron no ben suku fu kiri wi, ma fu pori a matifasi di wi abi nanga wi santa Gado. A de krin taki a sani di Yehovah ben pramisi wi, kon tru. Yehovah ben taki: „Awinsi sortu fetisani sma meki fu feti nanga yu, a no o abi bun bakapisi.”—Yes. 54:17.
Suma kan meki wi de fri?
16. Fu san ede grontapu no kan meki wi de fri?
16 A de so taki wi no sa de fri moro soleki fa wi wani te wi de futuboi fu Yehovah? Nôno, dati no de so. Ma efu wi ben de wan pisi fu grontapu, dan wi ben o lasi a fri di wi abi. Grontapusma no e anbegi Yehovah èn den de na ondro a makti fu wan ogri-ati gado di e hori sma na ini katibo (Yoh. 14:30). Fu eksempre, a sistema fu Satan e meki problema opo kon na ekonomia sei, fu meki sma lasi a fri fu den. (Luku Openbaring 13:16, 17.) A sondu skin fu libisma e kori den tu so taki den e tron srafu fu sondu (Yoh. 8:34; Hebr. 3:13). Sobun, sma di no e bribi na ini Gado, kan gi wi deki-ati fu libi na wan fasi di no e kruderi nanga den leri fu Yehovah, fu di den wani gi wi a denki taki dati sa meki wi de fri. Ma sma di e arki den, heri esi sa si taki den tron srafu fu wan sondu libi di e meki taki sma no abi lespeki moro gi den.—Rom. 1:24-32.
17. Na sortu fasi Yehovah e meki wi de fri?
17 Ma te wi e poti wi frutrow tapu Yehovah, dan a sa fri wi fu iniwan sani di kan du wi ogri. Te wi e luku en bun, dan a situwâsi fu wi de leki a di fu wan sma di e poti en libi na ini na anu fu wan koni datra, di kan dresi en fu wan takru siki. Wi alamala abi wan takru siki, iya, wi alamala na sondusma. Ma soso te wi frutrow tapu Yehovah nanga yepi fu a srakti-ofrandi fu Krestes, dan wi kan abi a howpu fu kisi frulusu fu den bakapisi fu sondu nanga dede, èn fu libi fu têgo (Yoh. 3:36). O moro wi e kon sabi wan datra, o moro wi sa frutrow en. Na so a de tu taki te wi e tan leri sabi Yehovah, dan wi sa kon abi moro frutrow na ini en. Dati meki wi e tan studeri Gado Wortu finifini fu di dati sa yepi wi fu lobi en so te, taki wi no sa frede srefisrefi fu tron futuboi fu en.—1 Yoh. 4:18.
18. Fa sani sa waka nanga den futuboi fu Yehovah?
18 Yehovah e gi ibri sma na okasi fu teki en eigi bosroiti. A Wortu fu en e taki: „Teki a libi, dan unu nanga un bakapikin o tan na libi. Unu o tan na libi efu unu lobi Yehovah un Gado” (Deut. 30:19, 20). Gado wani taki wisrefi musu bosroiti taki wi wani dini en, èn na so wi e sori taki wi lobi en. Te wi na futuboi fu Gado, dan wi no sa lasi a fri di wi abi, ma wi kan de seiker taki wi sa de koloku fu ala ten.
19. Fu san ede wi musu si en leki bun-ati fu Yehovah taki wi na futuboi fu en?
19 Fu di wi na sondusma, meki wi no e frudini en fu de wan futuboi fu wan volmaakti Gado. Na soso fu di Gado e sori bun-ati gi wi, meki wi kan de futuboi fu en (2 Tim. 1:9). Dati meki Paulus skrifi: „Efu wi e libi, dan wi e libi gi Yehovah, èn efu wi e dede, dan wi e dede gi Yehovah. Fu dati ede, awansi wi e libi noso wi e dede, wi na fu Yehovah” (Rom. 14:8). A no de fu taki dati noiti a sa hati wi taki wi tron futuboi fu Yehovah.
San yu ben sa piki?
• Sortu wini a e tyari kon te wi na futuboi fu Yehovah?
• Fu san ede wi man du san Gado e fruwakti fu wi?
• Fa Yehovah e kibri den futuboi fu en?
[Aksi fu a tori disi]
[Prenki na tapu bladzijde 8]
Aksi trawan fa den kisi wini fu di den de futuboi fu Yehovah
[Prenki na tapu bladzijde 10]
San na wan tu fasi fa Yehovah e kibri wi?