’Preiki a Wortu fu Gado sondro frede’

„Santa yeye kon na tapu den . . . èn den ben e taki a wortu fu Gado sondro frede.”—TORI. 4:31.

1, 2. Fu san ede wi musu meki muiti fu du a preikiwroko fu wi bun?

DRI dei fosi Yesus dede, a ben taigi den disipel fu en: „A bun nyunsu disi fu a kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon.” Bifo Yesus go na hemel baka di a kisi wan opobaka, a gi den bakaman fu en a komando fu ’go na sma fu ala kondre fu meki den tron disipel, èn fu leri den fu du ala san Yesus ben komanderi den fu du’. A pramisi den taki a ben o de nanga den „te na a kaba fu a grontapu sistema”.—Mat. 24:14; 26:1, 2; 28:19, 20.

² Leki Yehovah Kotoigi, wi e teki prati fayafaya na wan wroko di ben bigin na ini a fosi yarihondro. Nowan tra wroko prenspari moro a wroko di wi abi fu preiki a bun nyunsu fu a Kownukondre èn fu meki disipel. Fu dati ede, a prenspari taki wi e du a preikiwroko bun! Na ini na artikel disi, wi sa luku fa a santa yeye kan yepi wi fu taki sondro frede te wi de na ini a preikiwroko. Den tu tra artikel sa sori fa a yeye fu Yehovah kan yepi wi fu tron bun leriman, èn fu preiki doronomo.

Wi musu abi deki-ati

3. Fu san ede wi musu abi deki-ati fu man preiki a bun nyunsu fu a Kownukondre?

³ A wroko di Gado gi wi fu preiki a bun nyunsu fu a Kownukondre, na wan bigi grani. Ma son leisi, a no makriki fu du a wroko disi. Aladi son sma de klariklari fu arki a bun nyunsu fu Gado Kownukondre, toku furu sma de neleki den sma fu a ten fu Noa. Yesus ben taki dati den sma dati „no ben poti prakseri na san ben e pasa, teleki a frudu kon èn a wai den alamala puru” (Mat. 24:38, 39). Boiti  dati, son sma e spotu wi, noso den e gens wi (2 Petr. 3:3). Wi kan kisi gens fu tirimakti, fu sma na skoro, noso na wrokope, noso fu krosibei famiriman srefi. Boiti dati, wi e kisi fu du tu nanga wi eigi swakifasi. Kande wi na sma di e syensyen, noso di e frede taki sma no sa handri na wan switi fasi nanga wi. Furu sani de di kan meki en muilek gi wi fu taki a wortu fu Gado „sondro frede” (Ef. 6:19, 20). Wi musu abi deki-ati fu man tan taki a wortu fu Gado. San kan yepi wi fu kon abi deki-ati?

4. (a) San a wani taki te wan sma e taki sondro frede? (b) Fa na apostel Paulus ben kisi deki-ati fu taki nanga den sma na ini Tesalonika?

⁴ A Griki wortu di vertaal nanga „sondro frede”, wani taki dati wan sma e taki sani soleki fa a de. Ma dati no wani taki dati wi e taki na wan fasi di e hati den firi fu trawan (Kol. 4:6). Aladi wi musu abi deki-ati, toku wi wani libi na ini vrede nanga ala sma (Rom. 12:18). Boiti dati, te wi e preiki a bun nyunsu fu Gado Kownukondre, wi musu luku bun tu taki wi no e afrontu sma, sondro taki wi ben abi dati na prakseri. Iya, fu man sori deki-ati na wan yoisti fasi, dan wi musu meki muiti fu kweki tra fasi tu. A deki-ati disi no e kon fu wisrefi, èn wi no e kisi en tu fu di wi e frutrow tapu wisrefi. Di Paulus nanga den mati fu en ben de na ini Filipi, dan ’sma ben du sani nanga den na wan syen fasi’. Fa den man disi ben ’kon abi deki-ati’ fu taki nanga den sma di ben e libi na ini Tesalonika? Paulus ben skrifi: „Wi Gado gi wi deki-ati”. (Leisi 1 Tesalonikasma 2:2.) Yehovah Gado kan gi wi deki-ati tu, so taki wi no e frede moro fu preiki gi sma.

5. Fa Yehovah meki Petrus, Yohanes, nanga den tra disipel kon abi deki-ati?

⁵ Di „den tiriman [fu a pipel], den owru man, nanga den leriman fu Wet” ben e gens Petrus nanga Yohanes, dan den tu apostel disi ben taki: „Efu a de so trutru taki Gado feni en bun taki wi e arki unu na presi fu En, dati unsrefi musu sabi. Ma wi no man tapu fu taki fu den sani di wi si èn di wi yere.” Petrus, Yohanes, nanga den tra bribiman no ben begi Gado fu tyari wan kaba kon na a frufolgu di den ben e kisi. Na presi fu dati, den ben taki: „Yehovah, luku fa den e tapu skreki gi wi; grantangi, meki den srafu fu yu tan taki a wortu fu yu sondro frede” (Tori. 4:5, 19, 20, 29). San Yehovah du? (Leisi Tori fu den Apostel 4:31.) Yehovah yepi den, fu di a gi den a santa fu en, èn na so den ben man teki deki-ati. A yeye fu Gado kan meki wi kisi deki-ati tu. Sobun, fa wi kan kisi a yeye fu Gado, èn fa wi kan meki a yeye dati tiri wi na ini a diniwroko?

Fa wi kan kon abi deki-ati?

6, 7. San na a moro makriki fasi fa wi kan kisi a santa yeye fu Gado? Gi wan tu eksempre.

⁶ A moro makriki fasi fa wi kan kisi a santa yeye fu Gado, na te wi e aksi fu en. Yesus ben taigi den arkiman fu en: „Efu unu di abi takru fasi, sabi fa fu gi un pikin bun sani, dan a no abi misi taki a Tata di de na hemel sa gi santa yeye na den sma di e aksi en!” (Luk. 11:13) Iya, wi musu begi Gado doronomo fu gi wi santa yeye. Kande wi e frede fu du stratiwroko, fu gi kotoigi te wi e kisi na okasi, noso fu preiki na ini bisnis kontren. Te dati de so, dan wi kan begi Yehovah fu gi wi a santa yeye fu en, èn wi kan aksi en fu yepi wi fu kon abi deki-ati.—1 Tes. 5:17.

⁷ Dati na san wan Kresten uma di nen Rosa, ben du. * Wan dei, di Rosa ben de na wrokope, wan skoromisi di e wroko makandra nanga en, ben e leisi wan raportu di wan tra skoro ben meki. A raportu ben e taki fa sma no e handri na wan bun fasi nanga pikin. Fu di a skoromisi ben e broko en ede nanga a sani disi, meki a taki: „San e pasa na ini a grontapu disi?” Rosa ben si disi leki wan okasi fu gi kotoigi, èn a no ben kan meki na okasi disi pasa. San a du so taki a ben kan kisi a deki-ati fu taki? Rosa e taki: „Mi begi Yehovah, èn mi aksi en fu yepi mi nanga en santa yeye.” Rosa  ben man gi wan bun kotoigi, èn a ben meki mofo nanga a skoromisi fu taki wan tra leisi fu a tori. Luku a tori tu fu Milane, wan meisje di abi feifi yari, èn di e libi na ini New York City. Milane e taki: „Ibri dei fosi mi e go na skoro, mi nanga mi mama e begi Yehovah.” San den e aksi Yehovah? Den e aksi En fu gi Milane deki-ati fu du san reti, èn fu taki fu a Gado fu en! Milane en mama e taki: „Disi yepi Milane fu fruteri trawan fa a e denki fu friyari-oso nanga fesadei. A yepi en tu fu no teki prati na den fesa dati.” Den eksempre disi e sori taki begi kan yepi wi fu kon abi deki-ati, a no so?

8. San wi kan leri fu a fasi fa a profeiti Yeremia ben kon abi deki-ati?

⁸ Luku tu san ben yepi a profeiti Yeremia fu kon abi deki-ati. Di Yehovah ben poti en leki profeiti gi den pipel, dan Yeremia ben piki: „Mi no sabi srefisrefi fa fu taki. Mi na wan boi ete” (Yer. 1:4-6). Ma bakaten, Yeremia ben e preiki so fayafaya, taki furu sma ben e feni taki a ben weri den ede fu di a ben e taki soso fu rampu (Yer. 38:4). Moro leki 65 yari, a meki den krutu boskopu fu Yehovah bekènti sondro frede. Sowan 600 yari bakaten, furu sma na ini Israel ben sabi Yeremia leki wan man di ben e preiki nanga deki-ati. Dati meki, di den yere fa Yesus ben e taki sondro frede, dan sonwan fu den ben e denki taki a ben de Yeremia di ben kisi libi baka (Mat. 16:13, 14). Aladi Yeremia no ben wani du a wroko fu en fosi, toku a no ben syensyen moro te fu kaba. San ben yepi en? Yeremia ben taki: „A boskopu fu Gado de leki wan faya na ini mi ati èn na ini mi bonyo. Mi kon weri fu hori en gi misrefi” (Yer. 20:9). Iya, fu di a wortu fu Yehovah ben abi krakti tapu Yeremia, meki a ben man taki sondro frede.

9. Fu san ede a wortu fu Gado kan abi krakti na wi tapu, neleki fa a ben abi krakti tapu Yeremia?

⁹ Na ini a brifi di na apostel Paulus ben skrifi gi den Hebrewsma, a ben taki: „A wortu fu Gado de na libi, a abi krakti, èn a srapu moro iniwan feti-owru di e koti na tu sei; a e koti go so dipi taki a e prati sili nanga yeye srefi, èn a e prati bonyo nanga a bonyo-fatu fu makandra; a man si krin san na ati e denki èn san a abi na prakseri” (Hebr. 4:12). A boskopu, noso a wortu fu Gado, kan abi krakti na wi tapu, neleki fa a ben abi krakti tapu Yeremia. Hori na prakseri taki aladi libisma skrifi Bijbel, toku a no a koni fu den de na ini, fu di a ben skrifi nanga yepi fu a santa yeye fu Gado. Na 2 Petrus 1:21 skrifi: „Noiti profeititori kon de fu di libisma ben wani, ma libisma ben taki san ben komoto fu Gado, fu di a santa yeye ben e tiri den.” Te wi e meki ten fu studeri Bijbel bun, dan wi o furu wi frustan nanga a boskopu di skrifi nanga yepi fu santa yeye. (Leisi 1 Korentesma 2:10.) A boskopu dati o de „leki wan faya” na ini wi, èn wi no o man hori en gi wisrefi.

10, 11. (a) Efu wi wani taki sondro frede, dan fa wi musu studeri Bijbel? (b) Kari awinsi wán sani di yu wani du so taki yu kan studeri Bijbel moro bun.

 ¹⁰ Efu wi wani taki a studeri di wi e studeri Bijbel abi krakti na wi tapu, dan wi musu du dati na so wan fasi, taki a boskopu na ini Bijbel e doro na ati fu wi. Fu eksempre, a profeiti Esekièl ben kisi wan fisyun, èn na ini a fisyun dati a ben musu nyan wan bukulolo di ben abi wan seryusu boskopu gi sma di no ben o wani arki. Esekièl ben musu poti ala en prakseri na a boskopu, èn a ben musu frustan en heri bun. Na so a ben o switi gi en fu meki a boskopu bekènti, iya, a ben o switi neleki oni.—Leisi Esekièl 2:8–3:4, 7-9.

¹¹ A situwâsi fu wi de neleki a di fu Esekièl. Na ini a ten disi, furu sma no wani arki a Bijbel boskopu. Efu wi wani tan taki a wortu fu Gado, dan a de prenspari taki wi e studeri Bijbel na so wan fasi, taki wi e frustan èn e bribi san wi e leri. Wi no musu studeri Bijbel wanwan leisi nomo, ma wi musu studeri en doronomo. Wi musu abi a srefi denki leki a psalm skrifiman, di ben singi: „Meki den sani di mi e taki nanga mi mofo nanga den sani di mi e prakseri dipi na ini mi ati, kon de sani di yu feni bun. Yehovah, yu de leki wan bigi ston gi mi. Yu na mi Frulusuman” (Ps. 19:14). A prenspari srefisrefi taki wi e meki ten fu denki dipi fu den sani di wi e leisi, so taki den tru tori fu Bijbel kan saka dipi na ini wi ati! Iya, wi musu meki muiti fu studeri Bijbel moro bun. *

12. Fu san ede wi kan taki dati den Kresten konmakandra e yepi wi fu teki a tiri fu a santa yeye?

¹² Wan tra fasi fa wi kan kisi wini fu a santa yeye fu Yehovah, na te wi e ’poti prakseri na makandra, so taki wi kan gi makandra deki-ati fu abi lobi èn fu du bun wroko’. Boiti dati, wi ’no musu misi konmakandra’ (Hebr. 10:24, 25). Te wi e meki tranga muiti fu go doronomo na den Kresten konmakandra, fu arki bun, èn fu du san wi leri, dan dati na heri bun fasi fa wi kan meki a yeye tiri wi. Fu taki en leti, a yeye fu Yehovah e tiri wi nanga yepi fu a gemeente, a no so?—Leisi Openbaring 3:6.

Den wini di wi e kisi te wi e kon abi deki-ati

13. San wi kan leri te wi e luku a fasi fa den fosi Kresten du a preikiwroko?

¹³ A santa yeye na a moro tranga krakti na hemel èn na grontapu, èn a kan gi libisma a krakti fu du a wani fu Yehovah. A santa yeye ben gi den fosi Kresten a krakti fu preiki na ini furu kondre. Den ben preiki a bun nyunsu „gi ala sma na grontapu” (Kol. 1:23). Te wi e prakseri taki furu fu den Kresten dati „no ben kisi furu skoro, ma taki den ben de neleki ala tra sma”, dan a de krin taki na a santa yeye ben e tiri den.—Tori. 4:13.

14. San kan yepi wi fu „de nanga faya nanga yepi fu a yeye”?

 ¹⁴ Te wi e meki a santa yeye tiri a libi fu wi, dan dati kan yepi wi tu fu du a diniwroko sondro frede. Te wi e begi Gado doronomo fu gi wi a yeye fu en, te wi e studeri Bijbel fayafaya, te wi e denki dipi fu den sani di wi e leisi, te wi e begi Gado fu yepi wi frustan den sani dati, èn te wi e go na den Kresten konmakandra doronomo, dan dati kan yepi wi fu „de nanga faya nanga yepi fu a yeye” (Rom. 12:11). Luku san Bijbel e taki fu ’wan Dyu di ben nen Apolos, èn di ben doro na ini Efeise’. A man disi „ben de wan sma fu Aleksandria, èn a ben de wan bun takiman”. Bijbel e taki: „Fu di a ben de fayafaya, meki a bigin taki nanga sma, èn na wan yoisti fasi a bigin leri sma sani di abi fu du nanga Yesus” (Tori. 18:24, 25). Te wi „de nanga faya nanga yepi fu a yeye”, dan dati kan gi wi moro deki-ati fu preiki oso fu oso, èn fu gi kotoigi na tra okasi.

15. Sortu wini wi e kisi te wi abi moro deki-ati fu taki?

¹⁵ Te wi kon abi moro deki-ati fu gi kotoigi, dan dati abi bun krakti na wi tapu. Wi o denki tra fasi fu a preikiwroko, fu di wi o frustan moro bun sortu wini a e tyari kon gi sma, èn wi o frustan tu o prenspari a wroko disi de. Wi o prisiri moro fu du a diniwroko, fu di wi o man preiki moro bun. Èn te wi e frustan moro bun taki furu ten no de moro fu du a preikiwroko, dan wi o du a wroko disi nanga moro faya.

16. San wi musu du efu wi no e du a diniwroko fayafaya moro?

¹⁶ San wi kan du te wi no e du a diniwroko fu wi so fayafaya moro leki fosi? Efu dati de so, dan a bun fu ondrosuku wisrefi nanga wan krin ati. Paulus ben skrifi: „Tan ondrosuku efu unu de na bribi; tan buweisi sortu sma unu de” (2 Kor. 13:5). Aksi yusrefi: ’Mi de nanga faya ete nanga yepi fu a yeye? Mi e aksi Yehovah fu gi mi en santa yeye? Den begi fu mi e sori taki mi abi a frutrow taki a sa yepi mi fu du a wani fu en? Te mi e begi, dan mi e taki en tangi gi a grani di a gi wi fu du a diniwroko? Fa mi e studeri Bijbel? Omeni ten mi e teki fu denki dipi fu den sani di mi e leisi èn e yere? Mi e teki prati fayafaya na den gemeente konmakandra?’ Te yu e poti prakseri na den aksi disi, dan dati kan yepi yu fu si pe yu musu tyari kenki kon.

Meki a yeye fu Gado yepi yu fu kon abi deki-ati

17, 18. (a) Fa a preikiwroko e waka na ini a ten disi? (b) San kan yepi wi fu „taki fri” te wi e preiki a bun nyunsu fu Gado Kownukondre?

¹⁷ Baka di Yesus kisi wan opobaka, a ben taigi den disipel fu en: „Unu sa kisi krakti te a santa yeye kon na un tapu, èn unu sa de kotoigi fu mi na ini Yerusalem, na ini heri Yudea nanga Samaria, èn te na den moro farawe presi fu grontapu” (Tori. 1:8). A wroko di ben bigin na ini a fosi yarihondro, e du now na heri grontapu. Moro leki seibi milyun Yehovah Kotoigi e preiki a bun nyunsu fu a Kownukondre na ini moro leki 230 kondre. Ibri yari, den e wroko 1.5 milyard yuru na ini a diniwroko. A e gi wi furu prisiri fu teki prati fayafaya na wan wroko di no sa du noiti moro!

¹⁸ Neleki fa a ben de na ini a fosi yarihondro, a yeye fu Gado e tiri a preikiwroko di e du na heri grontapu na ini a ten disi. Efu wi e meki a yeye tiri wi, dan wi o man „taki fri” na ini a diniwroko (Tori. 28:31). Sobun, meki wi teki a tiri fu a santa yeye te wi e preiki a bun nyunsu fu Gado Kownukondre!

[Futuwortu]

San yu leri?

• Fu san ede wi musu abi deki-ati fu man taki a wortu fu Gado?

• San yepi den fosi disipel fu taki sondro frede?

• San kan yepi wi fu kon abi deki-ati?

• Sortu wini wi e kisi te wi kon abi deki-ati?

[Aksi fu a tori disi]

[Prenki na tapu bladzijde 7]

Fa papa nanga mama kan yepi den pikin fu den fu kon abi deki-ati?

[Prenki na tapu bladzijde 8]

Wan syatu begi kan yepi yu fu taki sondro frede na ini a preikiwroko