’Luku bun fa unu e tyari unsrefi!’
’Luku bun fa unu e tyari unsrefi!’
„Fu di ala den sani disi o smèlter gowe na a fasi disi, meki un musu luku taki unu e tyari unsrefi na wan santa fasi èn taki unu e du sani di e sori taki unu e dini Gado na wan getrow fasi!”—2 PETR. 3:11.
1. Fu san ede a di fu tu brifi fu Petrus ben de wan seryusu warskow gi den Kresten na ini a ten fu en?
DI NA apostel Petrus ben skrifi a di fu tu brifi fu en nanga yepi fu santa yeye, dan a Kresten gemeente ben kisi furu frufolgu kaba. Toku a gemeente no lasi a faya gi a diniwroko, èn a tan gro. Dati meki Didibri gebroiki wan tra triki di ben abi bun bakapisi furu leisi kaba. Soleki fa Petrus ben tyari kon na krin, dan Satan ben wani pori a bribi fu a pipel fu Gado nanga yepi fu falsi leriman di ben abi ’ai di furu nanga sutadu’, èn di ben abi ’soso gridifasi na ini den ati’ (2 Petr. 2:1-3, 14; Yud. 4). Fu dati ede, a di fu tu brifi fu Petrus na wan seryusu warskow fu tan gi yesi na Gado.
2. San kapitel 3 fu a di fu tu brifi fu Petrus e tyari kon na krin, èn sortu sani wi musu aksi wi srefi?
2 Petrus ben skrifi: „Solanga mi de na ini a tenti disi ete, mi e si en leki wan bun sani fu memre unu na den sani disi so taki unu kan de na ai, bika mi sabi taki dyonsro mi o komoto na ini mi tenti . . . Fu dati ede, ala ten mi sa du ala muiti tu, so taki te mi no de moro, unsrefi sa man memre den sani disi” (2 Petr. 1:13-15). Iya, Petrus ben sabi taki heri esi sma ben o kiri en, ma a ben wani taki den Kresten ben e tan hori den warskow fu en na prakseri. Èn soleki fa wi e si, den warskow fu en skrifi na ini Bijbel, èn wi alamala na ini a ten disi kan leisi den. Kapitel 3 fu a di fu tu brifi fu Petrus prenspari srefisrefi gi wi, fu di a e poti prakseri na „den lasti dei” fu a grontapu disi, èn a e poti prakseri tu na a pori di na agersi hemel nanga grontapu o kisi (2 Petr. 3:3, 7, 10). Sortu rai Petrus e gi wi? Te wi e fiti a rai fu en na ini wi libi, dan fa dati kan yepi wi fu tron sma di Yehovah feni bun?
3, 4. (a) San Petrus ben taki, èn sortu warskow a gi wi? (b) Na sortu dri tori wi sa poti prakseri?
3 Baka di Petrus taki fu a pori di a grontapu fu Satan o kisi, dan a taki: „Un musu luku taki unu e tyari unsrefi na wan santa fasi èn taki unu e du sani di e sori taki unu e dini Gado na wan getrow fasi!” (2 Petr. 3:11, 12) Nanga den wortu disi Petrus e sori krin taki soso den wan di e du a wani fu Yehovah èn di e sori fasi di A lobi o pasa ’a dei fu en atibron’ libilibi (Yes. 61:2). Dati meki na apostel ben taki moro fara: „Fu dati ede, un lobiwan, fu di a de so taki unu sabi den sani disi na fesi, meki un musu luku bun taki den lei fu den wan di e trangayesi a wet, no e hari unu gowe, so taki unu no tanapu kánkan moro.”—2 Petr. 3:17.
4 Fu di Petrus ben de wan fu den sma di ben ’sabi sani na fesi’, meki a ben sabi taki na ini den lasti dei, Kresten ben o abi fu tan na ai trutru fu man tan gi yesi na Gado. Bakaten, na apostel Yohanes fruklari finifini fu san ede dati ben de so. Na ini wan fisyun, a ben si taki den fringi Satan komoto na hemel, èn taki a ben e puru „bigi atibron” tapu den wan di e ’du san den komando fu Gado e taki, èn di kisi a wroko fu kotoigi fu Yesus’ (Openb. 12:9, 12, 17). Den salfu futuboi fu Gado di e tan gi yesi na en, èn den „tra skapu” di e horibaka gi den, o wini a strei (Yoh. 10:16). Ma fa a de nanga ibriwan fu wi? Wi sa tan gi yesi na Gado? Wi o man du dati, te wi e (1) kweki fasi di Gado lobi, (2) te wi e tyari wisrefi na wan fasi di fiti èn te wi e anbegi Gado na wan fasi di a feni bun, èn (3) te wi abi a yoisti denki fu den tesi di e miti wi. Meki wi poti prakseri na den tori disi.
Kweki fasi di Gado lobi
5, 6. Sortu fasi wi musu kweki, èn fu san ede wi musu du „ala muiti” fu kweki den fasi dati?
5 Na a bigin fu a di fu tu brifi fu en, Petrus skrifi: „Boiti taki unu abi bribi, unu fu un sei musu du ala muiti fu abi bunfasi tu, èn boiti taki unu abi bunfasi, un musu abi sabi, boiti taki unu abi sabi, un musu man dwengi unsrefi, boiti taki unu e dwengi unsrefi, un musu horidoro, boiti taki unu e horidoro, un musu dini Gado na wan getrow fasi, boiti taki unu e dini Gado na wan getrow fasi, un musu lobi un brada, èn boiti taki unu lobi un brada, un musu lobi ala sma. Bika, efu unu abi den sani disi, èn efu unu abi den bogobogo, dan den sa tapu unu fu tron sma di no e du noti èn di no e meki froktu, te a abi fu du nanga a soifri sabi fu wi Masra Yesus Krestes.”—2 Petr. 1:5-8.
6 A no de fu taki, dati wi musu du „ala muiti” fu teki prati na sani di sa yepi wi fu kweki fasi di Gado lobi. Fu eksempre, wi musu meki muiti fu go na ala den Kresten konmakandra, wi musu meki muiti fu leisi Bijbel ibri dei, èn fu studeri Gado Wortu doronomo. Èn kande wi musu meki tranga muiti fu man hori na Osofamiri Anbegi doronomo, èn kande wi musu sreka sani bun na fesi tu, fu man hori en na wan fasi di e gi prisiri èn di e tyari wini kon gi na osofamiri. Ma te wi e du den sani disi doronomo, dan a e kon moro makriki gi wi fu hori wisrefi na den gwenti disi, spesrutu te wi e si sortu wini den e tyari kon gi wi.
7, 8. (a) San son sma taki fu na Osofamiri Anbegi? (b) Sortu wini yu e kisi fu na Osofamiri Anbegi?
7 Luku san wan sisa ben skrifi fu na Osofamiri Anbegi: „A e gi wi okasi fu leri furu sani.” Wan tra sisa e taki: „Fu taki en leti, mi no ben wani taki wan kaba kon na a bukustudie. Mi ben lobi a konmakandra dati moro ala trawan. Ma now di wi e hori na Osofamiri Anbegi, mi e si taki Yehovah sabi san wi abi fanowdu, èn o ten wi abi dati fanowdu.” Wan osofamiri-edeman e taki: „Na Osofamiri Anbegi e yepi wi trutru. A e gi wi prisiri srefisrefi taki wi abi wan dei pe wi kan poti prakseri na sani di wi leki trowpaar abi fanowdu! Wi ala tu e si taki a e kon moro makriki gi wi fu sori a froktu fu a yeye, èn now wi e du a diniwroko fu wi nanga moro prisiri.” Wan tra osofamiri-edeman e taki: „Den pikin e ondrosuku sani gi densrefi, èn den e leri furu sani. Boiti dati, a e gi den furu prisiri. A seti disi e gi wi wan moro tranga overtoigi taki Yehovah sabi san na den broko-ede fu wi, èn taki a e piki den begi fu wi.” Na so yu e denki tu fu a moi seti disi?
8 No meki pikinpikin sani tapu yu fu hori na Osofamiri Anbegi. Wan trowpaar ben taki: „Den fo wiki di pasa, pikinmoro wi no hori a studie fu wi, fu di ibri fodewroko neti wan sani ben e pasa. Ma wi no meki den sani dati tapu wi fu hori a studie.” A no de fu taki, dati son leisi yu sa abi fu hori a studie na wan tra ten. Ma toku yu musu abi a fasti bosroiti fu hori na Osofamiri Anbegi doronomo, èn fu no dyompo nowan enkri wiki!
9. Fa Yehovah gi Yeremia deki-ati, èn san wi e leri fu na eksempre disi?
9 A profeiti Yeremia na wan bun eksempre gi wi. Yehovah gi Yeremia a deki-ati di a ben abi fanowdu, èn Yeremia ben breiti srefisrefi. Na so a ben man tan preiki gi sma di no ben wani arki a boskopu fu en. Yeremia e taki: ’Den boskopu fu Yehovah de leki wan faya na ini mi bonyo’ (Yer. 20:8, 9). A deki-ati di Yehovah ben gi Yeremia, ben yepi en tu fu horidoro na ini den muilek ten, syatu bifo Yerusalem kisi pori. Na ini a ten disi, wi abi ala den buku di de wan pisi fu a Wortu fu Gado. Te wi e studeri a Wortu disi fayafaya, èn te wi e si sani soleki fa Gado e si sani, dan neleki Yeremia, wi o tan du a diniwroko fu wi nanga prisiri. Boiti dati, wi o tan gi yesi na Gado awinsi tesi e miti wi, wi o tan tyari wisrefi na wan fasi di fiti, èn wi o tan anbegi Gado na wan fasi di a feni bun.—Yak. 5:10.
Tan ’sondro flaka èn sondro fowtu’
10, 11. Fu san ede wi musu du ala muiti fu tan ’sondro flaka èn sondro fowtu’, èn fa wi kan du dati?
10 Wi leki Kresten sabi taki wi e libi na ini den lasti dei. Fu dati ede, a no e fruwondru wi taki grontapusma e poti ala den prakseri na sani di Yehovah e tegu gi. Dati na sani soleki gridifasi, yayolibi, nanga ogridu. Te yu luku en bun, dan Satan abi a denki disi: ’Efu mi no man tapu skreki gi den futuboi fu Gado, dan kande mi kan pori a denki fu den’ (Openb. 2:13, 14). Dati meki wi musu gi yesi na a lobi-ati rai disi di Petrus e gi wi: „Un musu du ala muiti fu meki [Gado] si wi te fu kaba leki sma di de sondro flaka, sondro fowtu, èn na ini vrede.”—2 Petr. 3:14.
11 Soleki fa wi si, dan Petrus e gi wi a rai baka fu „du ala muiti”. A de krin taki Yehovah, a sma di meki Petrus skrifi den wortu dati, sabi taki wi musu du tranga muiti fu kakafutu gi a doti grontapu fu Satan, so taki wi kan tan ’sondro flaka èn sondro fowtu’. Disi wani taki dati wi musu kibri wi ati so taki wi no e kon abi takru lostu. (Leisi Odo 4:23; Yakobus 1:14, 15.) Wi musu kakafutu tu gi den wan di no e frustan a fasi fa wi leki Kresten e libi, èn gi den wan di „e taki ogri fu [wi]”.—1 Petr. 4:4.
12. Sortu dyaranti wi e kisi na Lukas 11:13?
12 Fu di wi abi sondu, meki a no makriki ala ten fu du san bun (Rom. 7:21-25). Ma te wi e begi Yehovah fu yepi wi, dan wi sa abi bun bakapisi, fu di Yehovah de klariklari fu gi santa yeye na den wan di e aksi en dati nanga den heri ati (Luk. 11:13). A yeye sa yepi wi fu kweki fasi di Gado feni bun, èn a sa yepi fu kakafutu gi den problema fu a libi. Boiti dati, a santa yeye sa yepi wi fu pasa den tesi di e miti wi, èn di kan kon moro furu now di a dei fu Yehovah e kon moro krosibei.
Meki tesi tranga a bribi fu yu
13. Te tesi e miti wi, dan san o yepi wi fu horidoro?
13 Solanga wi e libi na ini a grontapu disi, wi o kisi difrenti tesi. Ma na presi taki yu e lasi-ati, a moro bun fu si den tesi leki okasi fu sori Gado taki yu lobi en. Si den tu leki okasi fu tranga a bribi di yu abi na ini En, èn na ini a Wortu fu En. A disipel Yakobus ben skrifi: „Un musu prisiri srefisrefi, mi brada, te difrenti tesi e miti unu, fu di unu sabi taki a bribi fu unu di kisi tesi na a fasi disi, e meki taki unu man horidoro” (Yak. 1:2-4). Hori na prakseri tu taki „Yehovah sabi fa fu frulusu sma di e dini en na wan getrow fasi te tesi miti den”.—2 Petr. 2:9.
14. Fa na eksempre fu Yosef e gi yu deki-ati?
14 Luku na eksempre fu Yosef, a manpikin fu Yakob. En eigi brada ben seri en leki srafu (Gen. 37:23-28; 42:21). Yosef lasi bribi fu di den brada fu en ben handri so takru nanga en? A ben kisi bita-ati fu di Gado ben gi pasi taki na ogri dati miti en? Gado Wortu e sori krin taki a no ben de so kwetikweti! Boiti dati, Yosef ben kisi moro tesi. Bakaten, sma ben taki dati a ben dwengi wan uma fu abi seks nanga en, aladi dati no ben tru. Den poti en na strafu-oso fu a sani dati ede. Ma toku a tan du san Gado feni bun (Gen. 39:9-21). Yosef meki den tesi dati tranga a bribi fu en, èn fu dati ede a kisi furu blesi.
15. San wi kan leri fu na eksempre fu Naomi?
15 A tru taki tesi kan meki wi sari, èn den kan meki wi lasi-ati srefi. Kande Yosef ben firi so, ten na ten. A no de fu taki, dati tra reti-ati futuboi fu Gado ben e firi so. Luku na eksempre fu Naomi, di ben lasi en masra nanga den tu manpikin fu en na ini dede. A ben taki: „No kari mi Naomi. Kari mi Mara [san wani taki „Bita”], bika na Almaktiwan tyari soso sari kon na ini mi libi” (Rut 1:20, 21). Wi kan frustan taki Naomi ben e firi so. Ma neleki Yosef, a no lasi bribi na ini Gado, èn a tan gi yesi na Yehovah. Fu dati ede, Yehovah blesi a lobi-ati uma disi (Rut 4:13-17, 22). San moro prenspari, na taki na ini a Paradijs di o kon, Gado o tyari wan kaba kon na ala takru bakapisi di Satan nanga na ogri grontapu fu en tyari kon gi libisma. Bijbel e taki: „Sma no o memre den fositen sani moro, èn den sani dati no o abi krakti na den tapu moro.”—Yes. 65:17.
16. Fa wi musu denki fu begi, èn fu san ede wi musu abi a denki dati?
16 Awinsi sortu tesi e miti wi, wi sa man horidoro fu di wi sabi taki Gado lobi wi. (Leisi Romesma 8:35-39.) Aladi Satan sa tan du muiti fu meki wi lasi-ati, toku a no sa abi bun bakapisi efu wi e tan „nanga krin frustan”, èn efu wi e „tan hori na prakseri taki a de fanowdu fu begi” (1 Petr. 4:7). Yesus ben taki: „Tan na ai èn begi ala ten taki unu man lowe gi ala den sani di musu pasa, èn taki unu kan tanapu na fesi a Manpikin fu libisma” (Luk. 21:36). A rai di Yesus gi wi fu „begi ala ten”, e sori krin taki na ini a ten disi wi musu si en leki wan seryusu sani fu kon sabi efu wi abi wan bun nen na Yesus, èn na en Papa. Soso den wan di abi wan bun nen na Gado o abi a howpu fu pasa a dei fu Yehovah libilibi.
Tan dini Yehovah fayafaya
17. Efu a muilek fu preiki na ini a kontren fu yu, dan fa yu kan kisi wini fu na bun eksempre fu den profeiti fu owruten?
17 Te wi e teki prati na sani di abi fu du nanga na anbegi fu wi, dan dati e gi wi krakti baka. A sani disi e memre wi na den wortu disi fu Petrus: „Un musu luku taki unu e tyari unsrefi na wan santa fasi èn taki unu e du sani di e sori taki unu e dini Gado na wan getrow fasi!” (2 Petr. 3:11) A moro prenspari sani di wi musu du, na taki wi musu preiki a bun nyunsu (Mat. 24:14). A tru taki na ini son kontren a no makriki fu preiki, èn kande dati e kon fu di sma no wani arki a boskopu fu wi, fu di sma e gens a wroko fu wi, noso fu di den e poti ala den prakseri na den broko-ede fu a libi. Na ini owruten, den futuboi fu Yehovah ben kisi fu du tu nanga den sortu sma disi. Toku den no gi abra noiti, ma den tan go na den sma „ibri tron baka” fu tyari a boskopu fu Gado gi den. (Leisi 2 Kroniki 36:15, 16; Yer. 7:24-26) San yepi den fu horidoro? Den no ben si a wroko fu den soleki fa grontapu e si dati, ma den ben si en soleki fa Yehovah e si dati. Boiti dati, den ben si en leki wan tumusi bigi grani fu tyari a nen fu Gado.—Yer. 15:16.
18. Fa a Kownukondre preikiwroko sa yepi fu gi grani na a nen fu Gado na ini a ten di e kon?
18 Wi sosrefi abi a grani fu meki a nen fu Yehovah bekènti, èn fu meki sma kon sabi san a o du. Denki a tori disi: Fu di wi e preiki a bun nyunsu, meki te a bigi dei fu Gado doro, den feanti fu en noiti no o man taki dati den no kon sabi fu En, èn fu a wani fu En. Iya, neleki Farao fu owruten, den o sabi taki na Yehovah e feti nanga den (Ex. 8:1, 20; 14:25). Na a srefi ten, Yehovah sa gi grani na den reti-ati futuboi fu en, fu di a o meki sma kon sabi krin taki na den ben e teki presi gi en.—Leisi Esekièl 2:5; 33:33.
19. Fa wi kan sori taki wi wani kisi wini fu a pasensi fu Yehovah?
19 Na a kaba fu a di fu tu brifi fu en, Petrus taigi den Kresten brada nanga sisa fu en a sani disi: „Un musu si a pasensi fu wi Masra leki frulusu” (2 Petr. 3:15). Iya, meki wi tan kisi wini fu a pasensi fu Yehovah. Fa wi kan du dati? We, wi musu kweki fasi di a lobi, wi musu tan ’sondro flaka èn sondro fowtu’, wi musu tan abi wan yoisti denki fu tesi, èn wi musu tan teki prati fayafaya na a Kownukondre preikiwroko. Te wi e du dati, dan wi sa kisi den têgo blesi di den ’nyun hemel nanga a nyun grontapu’ sa tyari kon.—2 Petr. 3:13.
Yu e memre disi ete?
• Fa wi kan kweki den fasi di Gado lobi?
• Fa wi kan tan ’sondro flaka èn sondro fowtu’?
• San wi kan leri fu Yosef nanga Naomi?
• Fu san ede wi musu si en leki wan bigi grani fu teki prati na a preikiwroko?
[Aksi fu a tori disi]
[Prenki na tapu bladzijde 9]
Fa unu leki masra kan kweki den fasi di Gado lobi, èn fa unu kan yepi un osofamiri fu du a srefi?
[Prenki na tapu bladzijde 10]
San wi kan leri fu a fasi fa Yosef kakafutu gi tesi?