Yu sa abi bun bakapisi te yu de na ai

YU DE na ai fu si te okasi e opo kon fu preiki gi sma na ini a kontren fu yu? Wi Kresten brada nanga sisa na ini na owruten foto Turku, na ini Fensikondre, ben de na ai, èn fu dati ede den ben abi bun bakapisi.

Wan pisi ten pasa, den brada na ini Turku pe wan lanpresi de gi sipi, kon si taki wan grupu man fu Asia ben doro na ini a foto. Den ben kon drape fu klari wan wroko na wan fu den bigi sipi di sma ben e meki drape. Bakaten, wan brada kon sabi na ini sortu hotel den wrokoman disi ben e tan. A kon sabi tu taki fruku mamanten, bus ben e kon teki den man disi na den hotel fu tyari den go na a lanpe. Wantewante a meki den brada fu na Ingrisitongo gemeente na ini Turku kon sabi dati.

Den owruman fu a gemeente dati kon si taki wan okasi ben opo gi den fu prati a Kownukondre boskopu gi den someni trakondre sma di ben kon drape. Wantewante den seti sani fu preiki gi den wrokoman disi. A sonde fu a wiki dati, tin preikiman kon makandra seibi yuru mamanten krosibei fu a presi pe den bus e stop. Ma wrokoman no ben e kon. Den brada bigin aksi densrefi efu den ben lati, noso efu den wrokoman ben gowe libi Turku. Ne den si taki wan wrokoman di ben e weri wrokokrosi ben e beni na uku e kon. Baka dati, wan tra wrokoman ben e kon, èn te fu kaba den si moro fu den. Fosi yu denki, wan bigi grupu wrokoman ben kon makandra krosibei fu a presi pe den bus e stop. Den preikiman bigin preiki wantewante, èn den gebroiki Ingrisitongo publikâsi fu taki nanga den wrokoman. Koloku taki a ben teki moro leki wán yuru fosi ala den wrokoman ben feni wan presi na ini den bus. Na so den brada nanga sisa ben abi nofo okasi fu taki nanga furu fu den. Di den bus rèi gowe, dan den wrokoman ben e gowe nanga 126 pikin buku èn nanga 329 tijdschrift!

Den tumusi moi bakapisi disi gi den brada deki-ati fu go preiki baka gi den wrokoman a wiki baka dati, di a kring-opziener ben kon na a gemeente. Na wan ten fu 6.30 yuru mamanten, aladi alen ben e kon, a kring-opziener hori wan preikiwroko konmakandra, èn 24 preikiman go na a presi pe den bus e stop. Disi leisi, den ben e tyari publikâsi tu na ini Tagalogtongo, fu di den ben si taki furu fu den wrokoman ben de fu den Filippijnen. A mamanten dati, di den bus ben e rèi go na a lanpe, dan den wrokoman ben teki 7 buku, 69 pikin buku, nanga 479 tijdschrift tyari go nanga den. Yu kan frustan taki den brada nanga sisa di ben preiki a mamanten dati, ben breiti srefisrefi!

Bifo den wrokoman drai go baka na a kondre fu den, den brada ben man tyari gobaka na wan tu fu den na ini a hotel, fu fruklari a Kownukondre boskopu moro fini gi den. Sonwan fu den wrokoman ben taki dati den ben miti Yehovah Kotoigi kaba di den ben de na tra presi fu grontapu. Den wrokoman ben taki dati den ben breiti taki den brada nanga sisa ben meki muiti fu preiki gi den di den ben e tan na ini Fensikondre.

Yu de na ai fu si te okasi e opo kon fu preiki gi sma na ini a kontren fu yu gemeente? Yu e du muiti fu preiki gi sma di abi wan tra kulturu? Efu dati de so, dan kande yu ondrofeni moi sani tu neleki den brada nanga sisa fu wi na ini Turku.

[Karta/​Prenki na tapu bladzijde 32]

(Efu yu wani si pe den sani disi skrifi, luku a tijdschrift)

FENSIKONDRE

HELSINKI

Turku

[Sma di abi a reti fu a prenki na tapu bladzijde 32]

STX Europe