Yesus e sori taki Gado de regtfardiki

„Gado poti Krestes leki wan ofrandi di e meki sma kon bun baka nanga Gado te den e bribi na ini a brudu fu Krestes. Gado du disi fu sori sma taki a de regtfardiki.” —ROM. 3:25.

1, 2. (a) San Bijbel e leri wi fu a situwâsi di libisma de na ini? (b) Na sortu aksi na artikel disi sa poti prakseri?

FURU sma sabi a Bijbel tori di e taki fu na opo di sma ben opo densrefi teige Gado na ini a dyari fu Eden. Wi alamala e ondrofeni den bakapisi fu a sondu fu Adam, soleki fa den wortu disi e tyari kon na krin: „Wán man meki sondu kon na grontapu èn sondu fu en sei tyari dede kon, èn na so fasi ala sma e dede, bika den alamala sondu” (Rom. 5:12). Awinsi fa wi e meki muiti fu du san bun, toku wi e meki fowtu, èn fu dati ede a de fanowdu taki Gado gi wi pardon. Srefi na apostel Paulus ben e sari fu a tori disi, èn fu dati ede a ben taki: „A bun di mi wani du, mi no e du, ma na ogri di mi no wani du, na dati mi e du. Ke, pôti fu mi!”—Rom. 7:19, 24.

² Fu di wi na sondusma, meki a bun te wi e aksi wisrefi den prenspari sani disi: Fa Yesus fu Nasaret ben kan gebore sondro sondu, èn fu san ede a ben teki dopu? Fa a libi fu Yesus sori taki Yehovah de regtfardiki? Ma a moro prenspari aksi na disi: Sortu wini a dede fu Yesus tyari kon?

Den feni taki Gado no de regtfardiki

3. Fa Satan kori Eva?

³ Adam nanga Eva, wi fosi papa nanga mama, ben handri don, fu di den ben weigri fu saka densrefi ondro a tiri fu Gado. Na presi fu dati den teki a tiri fu „a fosi sneki, a wan di den e kari Didibri nanga Satan” (Openb. 12:9). Luku fa dati pasa. Satan ben feni taki Yehovah Gado no e tiri na wan regtfardiki fasi. Fu dati ede a aksi Eva: „A de so trutru taki Gado taki dati un no musu nyan fu ala den bon na ini a dyari?” Eva taigi en taki Gado ben taigi den krin taki den no ben mag fasi a bon dati, noso den ben o dede. Ne Didibri piki en: „Unu no o dede kwetikweti.” A sani disi e sori taki Satan ben feni taki Gado e lei. A go doro fu kori Eva, fu meki a bribi taki Gado ben e kibri wan bun sani gi den. Satan meki Eva bribi tu, taki te a ben o nyan a froktu, a ben o kon de leki Gado fu di a ben o man du san ensrefi wani.—Gen. 3:1-5.

4. Fa libisma kon de na ondro a tiri fu Satan?

⁴ Fu taki en leti, Satan ben taki dati libisma ben o de moro koloku te den ben o libi sondro Gado. Na presi taki Adam saka ensrefi na ondro a tiri fu Gado, a arki a wefi fu en, èn den ala tu nyan a froktu di den no ben mag nyan. Na so Adam ben lasi a tumusi bun matifasi di a ben abi nanga Yehovah, èn a sani dati poti wi na ini katibo fu sondu nanga dede. A sani di Adam du meki tu taki libisma kon na ondro a tiri fu Satan, „a gado fu a grontapu sistema disi”.—2 Kor. 4:4; Rom. 7:14.

5. (a) Fa Yehovah ben du san a taki? (b) Sortu howpu Gado gi den bakapikin fu Adam nanga Eva?

⁵ Yehovah gi Adam nanga Eva dedestrafu soleki fa a ben warskow den (Gen. 3:16-19). Ma dati no wani taki dati den sani di Gado ben abi na prakseri, no ben o kon tru. Kwetikweti! Aladi Yehovah leisi strafu gi Adam nanga Eva, toku a ben gi den bakapikin fu den wan tumusi moi howpu. A meki bekènti taki a ben o meki wan „pikin” kon di Satan ben o masi na en bakafutu. Ma a pramisi Pikin dati ben o kon betre  baka, èn a ben o ’masi na ede fu Satan’ (Gen. 3:15). Bijbel e yepi wi fu kon frustan a tori disi moro bun fu di a e taki fu Yesus Krestes: „Na fu dati ede meki a Manpikin fu Gado ben kon, namku fu tyari wan kaba kon na den wroko fu Didibri” (1 Yoh. 3:8). Ma fa a fasi fa Yesus tyari ensrefi, èn fa a dede fu en sori taki Gado de regtfardiki?

San a dopu fu Yesus wani taki?

6. Fa wi du sabi taki Yesus no ben kisi a sondu fu Adam?

⁶ Di Yesus ben tron wan bigisma, dan a ben musu de a srefi leki Adam di ben de sondro sondu na ini a bigin (Rom. 5:14; 1 Kor. 15:45). Disi wani taki dati Yesus ben musu gebore leki wan sma di no ben abi sondu. Fa dati ben kan? Na engel Gabrièl ben fruklari a tori dati krin gi Maria, a mama fu Yesus. A ben taki: „Santa yeye sa kon na yu tapu, èn a krakti fu a Moro Heiwan sa tapu yu. Fu dati ede sma o kari a pikin di o gebore, a santawan èn a Manpikin fu Gado” (Luk. 1:35). Soleki fa a sori, dan di Yesus ben yongu ete, Maria fruteri en wan tu sani di ben abi fu du nanga a pisi ten di a gebore. Fu dati ede, di Maria nanga Yosef, Yesus en kwekipapa, feni Yesus na ini a tempel fu Gado wan leisi, dan a yongu pikin aksi den: „Unu no sabi taki mi musu de na ini na oso fu mi Tata?” (Luk. 2:49) Soleki fa a sori, dan yonguyongu kaba Yesus ben sabi taki a ben de a Manpikin fu Gado. Dati meki a ben e si en leki wan tumusi prenspari sani fu sori sma taki Gado de regtfardiki.

7. Sortu warti sani Yesus ben abi?

⁷ Yesus ben lobi sani di ben abi fu du nanga Gado, èn fu dati ede a ben e go na den konmakandra doronomo fu teki prati na a anbegi. Fu di a frustan fu en ben de volmaakti, meki a ben musu de so taki a ben teki leri fu ala den sani di sma ben e fruteri en fu den Hebrew Buku fu Bijbel èn fu den sani di a ben leisi na ini den buku disi (Luk. 4:16). Yesus ben abi ete wan sani di ben warti srefisrefi. Iya, a ben abi wan libisma skin di no ben abi sondu, èn di ben kan dini leki ofrandi gi a bun fu libisma. Baka di Yesus teki dopu, dan a ben e begi, èn a kan taki a ben e prakseri a profeititori di skrifi na Psalm 40:6-8.—Luk. 3:21; leisi Hebrewsma 10:5-10. *

8. Fu san ede Yohanes a Dopuman pruberi fu tapu Yesus fu teki dopu?

⁸ Na ini a bigin Yohanes a Dopuman no ben wani dopu Yesus. Fu san ede? Fu di a dopu di Yohanes ben e dopu Dyu ben e sori taki den ben abi berow fu den sondu di den ben du teige a Wet. Yohanes di ben de wan  famiri fu Yesus, ben musu fu sabi taki Yesus ben de regtfardiki, èn taki a no ben abi fu sori berow. Yesus gi Yohanes a dyaranti taki a ben fiti taki a teki dopu. Yesus ben taki: „Na a fasi disi wi e du ala sani di regtfardiki.”—Mat. 3:15.

9. San a dopu fu Yesus ben sori?

⁹ Leki wan sma di no ben abi sondu, Yesus ben kan feni taki neleki Adam, a ben o man tron a papa fu libisma di no abi sondu. Ma Yesus noiti no ben e angri gi a libi dati, fu di a no dati Yehovah ben wani gi en. Gado ben seni Yesus kon na grontapu fu tron a pramisi Manpikin, noso a Mesias. Disi ben wani taki dati Yesus ben musu gi en volmaakti libi leki ofrandi. (Leisi Yesaya 53:5, 6, 12.) A no de fu taki, dati a dopu fu Yesus no ben wani taki a srefi leki a di fu wi. A dopu fu Yesus no ben wani taki dati a ben gi ensrefi abra na Yehovah, bika Yesus ben de wan memre kaba fu a pipel fu Israel di ben gi ensrefi abra na Yehovah. Na presi fu dati, Yesus ben teki dopu fu sori taki a ben de klariklari fu du a wani fu Gado, soleki fa den Buku fu Bijbel ben taki dati a Mesias ben o du.

10. San Gado ben fruwakti fu a Mesias, èn fa Yesus ben feni dati?

¹⁰ Yehovah ben wani taki Yesus ben musu preiki a bun nyun fu Gado Kownukondre, taki a ben musu meki disipel, èn taki a ben musu sreka den disipel dati gi a wroko di den ben o du fu meki tra disipel. A dopu fu Yesus ben wani taki tu dati Yesus ben de klariklari fu nyan pina èn fu dede na wan ogri-ati fasi. Na so a ben o sori taki a ben e horibaka gi Yehovah Gado, a regtfardiki Tiriman fu hemel nanga grontapu. Fu di Yesus ben lobi en Papa trutru, meki a ben e prisiri fu du a wani fu Gado, èn a ben breiti fu gi en skin leki wan srakti-ofrandi (Yoh. 14:31). Yesus ben prisiri tu fu sabi taki a ben kan gi Gado a waarde fu a volmaakti libi fu en leki wan lusu-paiman, so taki a ben kan puru wi na ini katibo fu sondu nanga dede. Gado ben feni en bun taki Yesus ben gi ensrefi fu tyari den bigi frantwortu disi? Iya, Gado ben feni dati bun trutru!

11. Fa Yehovah sori taki a ben teki Yesus leki a pramisi Mesias, noso Krestes?

¹¹ Soleki fa ala den fo Evangelie skrifiman e sori, dan Gado ben taki krin taki a ben feni Yesus bun di Yesus ben opo komoto na ini a watra fu Yordan-liba. Yohanes a Dopuman ben taki: „Mi si a yeye e saka kon fu hemel leki wan doifi, èn a tan na [Yesus] tapu . . . We, na dati mi si èn mi e kotoigi taki a sma disi na a Manpikin fu Gado” (Yoh. 1:32-34). Boiti dati, na a okasi dati, Yehovah ben taki: „Disi na mi Manpikin, a lobiwan di mi feni bun.”—Mat. 3:17; Mark. 1:11; Luk. 3:22.

A tan gi yesi na Gado te na dede

12. San Yesus du na ini den dri nanga afu yari baka di a teki dopu?

¹² Na ini den dri nanga afu yari baka di Yesus teki dopu, a ben e wroko fayafaya fu gi sma leri fu en Papa èn fu sori sma taki Gado na wan regtfardiki Tiriman. Fu di a ben e waka go na ala sei fu a pramisi Kondre, meki a ben e kon weri srefisrefi. Toku noti ben kan tapu fu en fu gi kotoigi dorodoro fu den tru tori fu Bijbel (Yoh. 4:6, 34; 18:37). Yesus ben leri trawan fu a Kownukondre fu Gado. Na wan wondru fasi, a meki sikisma kon betre baka, a gi ipi-ipi sma nyanyan, èn a wiki srefi dedewan. Na so a sori san a Kownukondre ben o du gi libisma.—Mat. 11:4, 5.

13. San Yesus ben leri sma te a abi fu du nanga begi?

¹³ Yesus no ben e teki a grani gi a leri di a ben e gi sma, èn gi a wondru fasi fa a ben e dresi sma. Na presi fu dati, a sori sakafasi, èn a gi ala grani na Yehovah. A sani disi meki taki a de wan tumusi bun eksempre gi wi (Yoh. 5:19; 11:41-44). Yesus meki wi kon sabi tu san na den moro prenspari sani di wi musu begi gi. Wi musu begi taki a nen fu Gado, Yehovah „kon santa”. Wi musu begi tu taki a  regtfardiki tiri fu Gado e kon na ini a presi fu na ogri-ati tiri fu Satan, so taki ’a wani fu En e pasa na grontapu soleki fa a e pasa na hemel’ (Mat. 6:9, 10). Yesus ben gi wi deki-ati tu fu „suku a kownukondre nanga [Gado] en regtfardikifasi fosi”. Te wi e du dati, dan wi e handri na wan fasi di e kruderi nanga den begi fu wi.—Mat. 6:33.

14. Aladi Yesus no ben abi sondu, toku a no ben makriki gi en fu du san Gado ben aksi fu en. Fu san ede dati ben de so?

¹⁴ Di a ten ben e doro taki Yesus ben o gi en libi leki wan srakti-ofrandi, dan a ben e kon frustan moro nanga moro o hebi a frantwortu ben de di ben de na en tapu. Sma no ben o krutu Yesus na wan reti fasi, èn den ben o kiri en na wan ogri-ati fasi. Yesus ben o abi fu horidoro te a ben o kisi den tesi dati. Na so a wani fu en Papa ben o kon tru, èn en Papa no ben o kisi porinen. Feifi dei bifo Yesus dede, dan a begi: „Now a hebi gi mi trutru, ma san mi o taki? Mi Tata, mi e begi yu fu puru mi na ini a sani disi. Ma na fu dati ede a ten disi doro gi mi.” Den wortu disi e sori taki Yesus ben e broko en ede srefisrefi, èn wi kan frustan fu san ede dati ben de so. Toku a no tan denki ensrefi nomo, ma a poti prakseri na wan moro prenspari sani. A go doro fu begi: „Mi Tata, gi yu nen glori.” Yehovah piki en wantewante: „Mi gi mi nen glori èn mi o gi en glori baka” (Yoh. 12:27, 28). Iya, Yesus ben de klariklari fu pasa a moro bigi tesi di iniwan sma oiti ben kisi. Ma di a yere den wortu fu en Papa di de na hemel, dan a no de fu taki dati a sani dati gi en wan moro tranga overtoigi taki a ben o man sori taki Yehovah na wan regtfardiki Tiriman. Iya, a du ala den sani dati!

Sortu wini a dede fu Yesus tyari kon?

15. Fu san ede Yesus ben taki: „A kaba”, syatu bifo a dede?

¹⁵ Di Yesus ben e anga na a pina-postu, èn a ben o hari en lasti bro, dan a taki: „A kaba!” (Yoh. 19:30) A no de fu taki, dati nanga yepi fu a krakti fu Gado, Yesus ben man du bigi sani na ini den dri nanga afu yari baka di a teki dopu te go miti a dede fu en! Di Yesus dede, dan wan bigi gronseki pasa, èn a sani dati meki taki a legre ofsiri fu Rome taki: „Fu tru, a ben de Gado Manpikin” (Mat. 27:54). Soleki fa a sori, dan na ofsiri ben si fa sma ben e spotu Yesus, fu di a ben taki dati a ben de a Manpikin fu Gado. Aladi Yesus nyan so furu pina, toku a tan gi yesi na Gado, èn a sori taki Satan na wan ogri-ati leiman. Satan ben taki fu ala sma di e saka densrefi na ondro a tiri fu Gado: „Alasani disi wan soema abi a sa gi foe hori hemsrefi na libi” (Yob 2:4, Da Bijbel na ini Sranantongo). Fu di Yesus ben tan gi yesi na Gado, meki a sori taki Adam nanga Eva ben kan tan gi yesi na Gado fu di den no ben kisi so wan bigi tesi leki en. Ma san moro prenspari, na taki a libi nanga a dede fu Yesus ben sori krin taki Yehovah na wan regtfardiki Tiriman. (Leisi Odo 27:11.) A de so taki a dede fu Yesus tyari moro wini kon? Iya, a tyari wini kon trutru!

16, 17. (a) Fa den futuboi fu Yehovah di ben e libi fosi a ten fu Krestes, ben kan abi wan bun nen na Yehovah? (b) Fa Yehovah pai en Manpikin fu di a ben e tan gi yesi na en? San Masra Yesus e tan du?

¹⁶ Furu futuboi fu Yehovah ben e libi na a ten fosi Yesus ben kon na grontapu. Den sma disi ben abi wan bun nen na Gado, èn den ben abi a howpu fu kisi wan opobaka (Yes. 25:8; Dan. 12:13). Ma fa a santa Gado Yehovah, ben kan blesi sondu libisma na so wan tumusi moi fasi? Bijbel e taki: „Gado poti Krestes leki wan ofrandi di e meki sma kon bun baka nanga Gado te den e bribi na ini a brudu fu Krestes. Gado du disi fu sori sma taki a de regtfardiki, bika a gi sma pardon fu den sondu di den du na ini a ten di pasa, iya, a pisi ten di a ben e frudrage den sma. Na so fasi Gado ben kan sori  sma na ini a ten disi taki a de regtfardiki, so taki a ben o de regtfardiki te a o fruklari taki a sma di e bribi na ini Yesus, de regtfardiki.”—Rom. 3:25, 26. *

¹⁷ Yehovah gi Yesus wan opobaka, èn a gi en wan moro hei posisi leki san a ben abi fosi a kon na grontapu. Now Yesus e libi na hemel leki wan makti yeye di no o man dede noiti (Hebr. 1:3). Leki Granpriester nanga Kownu, Masra Yesus Krestes e tan yepi den bakaman fu en fu sori taki Gado de regtfardiki. Èn wi de nanga tangi trutru taki Yehovah, wi hemel Tata, na a Sma di e pai ala den wan di e sori taki a de wan regtfardiki Tiriman. A sa pai ala sma tu di e dini en nanga den heri ati neleki fa en Manpikin ben e du dati!—Leisi Psalm 34:2, „Da Bijbel na ini Sranantongo”; Hebrewsma 11:6.

18. Na sortu tori a tra studie-artikel sa poti prakseri?

¹⁸ Sensi a ten fu Abel, reti-ati libisma ben abi wan bun matifasi nanga Yehovah, fu di den ben e sori bribi, èn fu di den ben abi a frutrow taki a pramisi Pikin ben o gebore. Yehovah ben sabi taki en Manpikin ben o tan gi yesi na en, èn a ben sabi tu taki a dede fu en ben o man tapu „a sondu fu grontapu” (Yoh. 1:29). A dede fu Yesus e tyari wini kon tu gi sma di e libi na ini a ten disi (Rom 3:26). Sobun, sortu blesi a lusu-paiman fu Kresten kan tyari kon gi yu? Wi sa taki fu a tori dati na ini a tra studie-artikel.

[Futuwortu]

San yu ben sa piki?

• Fa Satan ben wani sori taki Yehovah no de regtfardiki?

• San a dopu fu Yesus ben sori?

• Sortu wini a dede fu Yesus tyari kon?

[Aksi fu a tori disi]

[Prenki na tapu bladzijde 9]

Yu sabi san a dopu fu Yesus ben sori?