Mi dini na wan ten di a wroko ben e go na fesi moi

Soleki fa Harley Harris fruteri

Tapu 2 september 1950, wi ben de na ini a foto Kennett, na Missouri, na Amerkankondre. Wi ben de na wan kring konmakandra, èn wan bigi grupu sma ben lontu wi. A komsarsi tyari srudati kon fu kibri wi gi a grupu sma di ben e meki opruru. Den srudati di ben tanapu na seipasi, ben hari den gon nanga bayonet. Wi waka go na den wagi fu wi aladi sma ben e bari sani gi wi, èn wi rèi go na Cape Girardeau, na ini Missouri. Drape a kring konmakandra go doro. Na drape mi teki dopu di mi ben abi 14 yari. Ma meki mi fruteri unu fa a du kon taki mi bigin dini Yehovah aladi so furu dyugudyugu ben de.

SYATU baka 1930, mi granpapa nanga granmama èn den aiti pikin fu den ben yere wan tu fu den lezing fu Brada Rutherford tapu gramofon plaat. Mi papa nanga mama, Bay nanga Mildred Harris, teki dopu na ini 1935 na a kongres di ben hori na ini Washington, D.C. Den ben breiti srefisrefi fu de memre fu a „bigi ipi”, di ben kon na krin na a kongres dati!—Openb. 7:9, 14.

A tra yari fu en, mi gebore. Wan yari baka dati, mi papa nanga mama froisi go na wan kontren na ini Mississippi pe Kotoigi no ben de. Di wi ben e libi na ini a kontren dati, dan wan kring-opziener srefi no ben de fu fisiti wi. Mi famiri ben e skrifi brifi gi Bethel èn Bethel ben e skrifi den baka, èn wi ben e go na den bigi konmakandra. Wan pisi ten, disi ben de a wan-enkri fasi fa wi ben abi demakandra nanga tra brada nanga sisa.

Mi horidoro na a ten fu frufolgu

Na a ten fu a Di Fu Tu Grontapufeti, Yehovah Kotoigi ben kisi furu frufolgu fu di den no ben e teki sei na ini a feti. Wi ben froisi go na Mountain Home, na ini Arkansas. Wan dei, mi nanga mi papa ben e du stratiwroko. Wantronso wan man grabu den tijdschrift fu mi papa, èn leti drape a sutu faya gi den meki den bron. A man taigi wi taki wi na wisiwasi sma fu di wi no ben wani go feti. Fu di mi ben abi feifi yari nomo, meki mi bigin krei. Mi papa luku a man nomo èn a no taki noti, teleki a man waka gowe.

Bun sma ben de tu di ben lobi wi. Wan leisi di wan grupu sma ben lontu wi di wi ben de na ini wi wagi, dan na afkati fu a kontren ben e waka pasa. „San e pasa dyaso?”, na so a taki. Wan man piki en: „Den Yehovah Kotoigi disi no wani feti gi a kondre fu den!” Ne na afkati dyompo na tapu a lanki sei a doro fu wi wagi, èn a bari: „Mi feti na ini a Fosi Grontapufeti, èn mi o feti na ini a wan disi tu! Libi den sma meki  den gowe. Den no e du nowan sma ogri!” Na so a grupu sma hari gowe sondro fu taki wan sani. Wi ben de nanga tangi trutru taki den bun sma disi ben sori switifasi gi wi!—Tori. 27:3.

Den kongres e gi wi deki-ati

A kongres di ben hori na ini Sint Louis, na Missouri, na ini 1941, ben de soifri san wi ben abi fanowdu. Soleki fa wan raportu e sori, dan moro leki 115.000 sma ben de drape. Ala nanga ala 3903 sma teki dopu, èn dati ben furu srefisrefi! Mi man memre a lezing fu Brada Rutherford heri bun ete. A lezing dati ben nen „Pikin fu a Kownu”. A ben e taki langalanga nanga wi leki yonguwan, èn wi alamala kisi wan fu den moi blaw buku di nen Kinderen (Pikin-nengre). A kongres disi ben sreka mi gi san ben o pasa a yari baka dati. Na ini a yari dati mi ben o bigin go na lagiskoro. Den ben seni mi nanga den umapikin fu mi omu gowe fu skoro, fu di wi no ben wani taki a fraga odi. Ibri dei wi ben e go baka na skoro fu luku efu den edeman fu a skoro ben kenki prakseri. Furu mamanten wi ben e waka na ini a busi go na skoro, ma dati ben de fu soso fu di den ben e seni wi go baka na oso. Ma mi ben si a sani disi leki wan fasi fu sori taki wi ben e tan horibaka gi Gado Kownukondre.

Ma a no ben teki langa fosi a Hei Krutubangi fu Amerkankondre bosroiti taki sma no ben de fruplekti fu taki a fraga odi. Te fu kaba, wi ben man go baka na skoro. A skoromeester du ala san a man fu yepi wi so taki wi ben kan teki den les di wi ben misi. Den tra pikin na skoro ben sori lespeki gi wi tu.

Mi kan memre tu a kongres di ben hori na ini Cleveland, na Ohio, na ini 1942. Na a kongres dati Brada Nathan H. Knorr hori a lezing „Vrede—A kan tan fu ala ten?” A ben taki finifini fu Openbaring kapitel 17 èn a ben sori taki wan pisi ten fu vrede ben o de baka a Di Fu Tu Grontapufeti. Fu dati ede, wi ben e fruwakti taki a wroko ben o tan go na fesi. Fu sreka wi gi a wroko dati, meki den brada opo a Gileadskoro na ini 1943. Mi no ben sabi srefisrefi taki a skoro disi ben o abi krakti tapu mi libi. Vrede ben kon trutru baka a feti èn sma no ben e frufolgu wi so furu moro. Ma di a feti na ini Korea bigin na ini 1950, dan sma bigin gens a preikiwroko baka, soleki fa wi ben si kaba na a bigin fu na artikel.

Mi e du moro fu yepi nanga a wroko di e go na fesi

Na ini 1954, mi klari middelbaar skoro èn wán mun baka dati mi bigin pionier. Baka di mi dini na ini a foto Kennett, na Missouri, pe wan grupu sma ben lontu wi na ini 1950, dan mi kisi a kari fu go na Bethel na ini maart 1955. A gemeente pe mi ben musu go dini ben musu wroko na ini a kontren fu Times Square, wan bigi pren na mindrisei fu New York City. Sani ben de heri tra fasi drape leki san mi ben gwenti na a boitipresi pe mi ben e libi fosi! Mi ben man hari a prakseri fu den sma na ini New York di no ben abi ten. Mi ben hori wan tijdschrift opo na wan moi artikel èn mi ben e taki: „Oiti yu aksi yusrefi a sani disi?” Furu sma ben e teki den tijdschrift.

Wan sani di mi ben lobi na Bethel, na te Brada Knorr ben e hori a takimakandra fu a deitekst. A ben sabi heri bun fa fu du dati! Neleki fa wan papa e taki nanga en manpikin, na so a ben e taki nanga wi di ben de yongu brada di no trow. Nofo tron a ben e gi wi moi rai fa fu handri nanga sisa.

Na a ten fu 1960, mi bosroiti fu trow. Mi ben seni wan brifi go gi den brada 30 dei na fesi, fu taigi den taki mi ben o gowe fu Bethel, ma baka den 30 dei den no ben piki mi ete. Aladi mi ben syensyen, toku mi teki deki-ati fu aksi den efu den kisi a brifi fu mi. Brada Robert Wallen ben taki nanga mi na telefon, èn a kon na a presi pe mi ben e wroko. A aksi mi fa mi ben o feni en fu go na ini a spesrutu pionierwroko noso a kringwroko. Mi piki en: „Ma Bob, mi abi 24 yari nomo, èn mi no sabi fa fu du a wroko dati.”

Mi e go na ini a kringwroko

A neti dati, wan bigi enveloppe ben e wakti mi na ini mi kamra. A ben abi tu papira na ini. Wán gi a spesrutu pionierwroko èn a trawan gi a kringwroko. San! Mi no ben man bribi! Na so  mi kisi a grani fu dini den brada fu mi leki kring-opziener na a zuid-westsei fu Missouri èn na a owstusei fu Kansas. Ma fosi mi gowe fu Bethel, mi ben go na wan konmakandra di ben hori gi kring-opziener nanga distrikt-opziener. Na a kaba fu a lezing, Brada Knorr ben taki: „Now di unu na kring-opziener nanga distrikt-opziener, dan dati no wani taki dati unu sabi moro leki den brada fu den kontren pe unu e go. Sonwan fu den brada abi moro ondrofeni leki unu. Ma den no abi na okasi fu du a kringwroko. Unu kan leri furu fu den brada disi.”

Dati ben de so trutru! Brada Fred Molohan nanga en wefi, èn sosrefi en brada Charley fu a foto Parsons, na Kansas ben de heri moi eksempre gi mi. Den ben kon na ini a tru anbegi syatu baka 1900. Mi ben lobi fu arki den ondrofenitori fu den. Mi no ben gebore srefisrefi ete di den sani dati ben pasa! Wan tra brada ben de John Wristen, wan owru brada di ben abi switifasi èn di ben de fu a foto Joplin, na Missouri. A brada disi ben pionier furu yari langa. Den lobi brada disi ben abi furu lespeki gi na organisâsi fu Yehovah. Den ben sori warderi gi mi leki kring-opziener, aladi mi ben yongu.

Na ini 1962, mi trow nanga Cloris Knoche, wan pionier di ben abi redi wiwiri èn di ben de nanga prisiri ala ten. Mi tan du a kringwroko makandra nanga Cloris. Te wi ben e tan na den brada nanga sisa, dan wi ben e leri sabi den moro bun. Wi ben man gi yonguwan deki-ati fu go na ini a furuten diniwroko. Tu tini fu a kring ben teki a deki-ati dati nanga den heri ati. Den tu tini dati ben de Jay Kosinski nanga JoAnn Kresyman. Fu di wi ben e wroko makandra nanga den na ini a preikiwroko èn wi ben e fruteri den sortu blesi wi ben e kisi fu di wi ben e gi wisrefi, meki den poti marki gi densrefi. JoAnn ben tron wan spesrutu pionier èn Jay ben e dini na Bethel. Bakaten, den trow nanga makandra èn now den e du a kringwroko sowan 30 yari kaba.

Wi e go du a zendelingwroko

Na ini 1966, Brada Knorr aksi wi efu wi ben wani go dini na tra kondre. Wi piki en: „Wi bun dyaso, ma efu yepi de fanowdu na wan tra presi, dan wi de klariklari fu go.” Wán wiki baka dati wi kisi a kari fu go na a Gileadskoro. Mi ben breiti srefisrefi fu de baka na Bethel na a ten di mi ben e go na a skoro. Drape mi miti baka nanga furu fu den sma di mi ben lobi èn di mi ben lespeki. Wi kon tron mati nanga den tra studenti di e dini Yehovah nanga den heri ati te na a dei fu tide.

Mi nanga Cloris ben musu go dini na Ekwador na Zuid-Amerika, èn wi go makandra nanga Dennis nanga Edwina Crist, Ana Rodríguez, nanga Delia Sánchez. A famiri Crist go na a mamafoto Quito. Mi, Cloris, Ana, nanga Delia ben musu go na Cuenca, wan fu den moro bigi foto fu Ekwador. A kontren ben abi tu distrikt. A fosi gemeente na ini Cuenca bigin na ini a foroisi fu wi. Wi fo ben de èn sosrefi tu tra sma. Wi ben aksi wisrefi fa wi ben o man preiki na ini a heri kontren drape.

Cuenca ben lai nanga kerki, èn tapu den dei di sma ben e si leki santa dei, kerki ben e hori  waka na ini a heri foto. Ma toku den sma fu Cuenca ben abi furu aksi. Fu eksempre, di mi miti Mario Polo fu a fosi leisi, a ben abi wan moi aksi gi mi di mi no ben fruwakti. A man disi ben de kampioen fu den sma di e strei rèi baisigri. A ben aksi: „Suma na a huru-uma di kari na ini a buku Openbaring?”

Wan tra leisi, Mario ben kon na wi oso na neti fu di a ben e broko en ede nanga wan sani. Wan domri fu wan Evangelie kerki, ben gi en wan tu buku di ben e taki seryusu sani teige Yehovah Kotoigi. Mi taigi Mario taki te wan sma e krutu wan trawan, a sma dati musu kisi na okasi fu opo taki gi ensrefi. Sobun, a tra dei, Mario kari mi nanga a domri kon na en oso fu fruklari san tru. Na a takimakandra dati, mi taki dati a ben o bun fu poti prakseri na a leri fu a Dri-wánfasi. Di a domri leisi Yohanes 1:1, dan Mario srefi sori en san na a difrenti na mindri „Gado” nanga „wan gado” na ini Grikitongo. Na so a ben go nanga ibri Bijbeltekst di a ben kari. Yu kan frustan taki a domri gowe sondro fu sori taki a leri fu a Dri-wánfasi tru. Disi gi Mario nanga en wefi na overtoigi taki wi ben e leri sma san tru, èn den kon tron heri bun Bijbel leriman di e opo taki gi san tru. A moi fu si taki 33 gemeente de now na ini Cuenca, èn ala nanga ala 63 gemeente de na ini a bigi kontren pe wi ben musu go dini fu a fosi leisi. Disi e sori krin taki a wroko e go na fesi srefisrefi!

Mi si fa a wroko go na fesi di mi ben e wroko na a bijkantoro

Na ini 1970, den brada aksi mi fu go wroko na a bijkantoro na ini Guayaquil, èn mi go makandra nanga Al Schullo. Mi nanga en ben e du kantorowroko drape. Joe Sekerak ben e poti buku na ini dosu gi den 46 gemeente di ben de na ini a heri kondre. Fu wan pisi ten, Cloris ben e dini leki zendeling na ini a preikiwroko aladi mi ben e wroko na Bethel. A ben man yepi 55 sma fu teki dopu, èn nofo tron dri, fo, noso feifi studenti fu en ben teki dopu na wan bigi konmakandra.

Fu eksempre, Cloris ben e studeri nanga wan uma di nen Lucresia, èn a masra fu na uma disi ben e gens en. Ma toku, Lucresia teki dopu te fu kaba èn a bigin dini leki wan gewoon pionier. A leri den pikin fu en a wani fu Yehovah. Now den tu manpikin fu en e dini leki owruman, èn wan fu den na wan spesrutu pionier. Na umapikin fu en na wan pionier tu. A granpikin fu en trow nanga wan brada di de wan bun eksempre, èn den e dini tu leki spesrutu pionier. A famiri disi yepi furu sma fu kon na ini a tru anbegi.

Na a ten fu 1980, sowan 5000 preikiman ben de na ini Ekwador. A kantoro fu wi ben kon pikin tumusi gi a wroko. Wan brada gi wi wan pisi gron fu 32 hectare, krosibei fu Guayaquil. Na ini 1984 wi bigin bow wan nyun bijkantoro nanga wan Kongreshal tapu a gron disi, èn na ini 1987 wi gi den gebow disi abra na Gado.

Moro sma e kon yepi nanga a wroko

Na ini den yari di pasa, a naki mi ati fu si taki so furu preikiman nanga pionier fu tra kondre kon na Ekwador fu yepi na ini den kontren pe moro Kownukondre preikiman ben de fanowdu. Wan fu den sma dati di mi man memre bun ete, na Andy Kidd, wan skoromeester fu Kanada di ben go nanga pensyun. A ben froisi kon na Ekwador na ini 1985, di a ben abi 70 yari èn a dini dyaso te na a dede fu en na ini 2008, di a ben abi 93 yari. A fosi leisi di mi si en, a ben e dini leki a wan-enkri opziener na ini wan pikin gemeente. Aladi a no ben man taki Spanyorotongo bun, toku a hori a publikitaki nanga a Waktitoren-studie. Boiti dati, a hori a Theokrasia Diniwroko-skoro nanga furu fu den prati na a Diniwroko konmakandra! Now, tu gemeente de drape di e go na fesi, èn den abi pikinmoro 200 preikiman nanga furu owruman fu a kontren drape.

Wan tra brada di nen Ernesto Diaz, ben froisi nanga en osofamiri fu Amerkankondre kon na Ekwador, èn baka aiti mun a taki: „Den dri pikin fu wi leri a tongo èn den tron bun Bijbel leriman. Leki papa, mi doro wan marki di furu sma no man doro na ini a sistema disi. Iya, mi na wan gewoon pionier, èn mi e teki prati na a furuten diniwroko makandra nanga mi osofamiri.  Wi alamala makandra abi 25 Bijbelstudie. A sani disi meki taki wi kon moro krosibei leki osofamiri, èn san de moro prenspari na taki noiti ete mi ben abi so wan bun matifasi nanga Yehovah.” Wi lobi den brada nanga sisa disi trutru!

Na ini 1994, wi meki a bijkantoro tu tron moro bigi. Na ini 2005, wi ben abi moro leki 50.000 preikiman èn a ben de fanowdu fu meki a bijkantoro kon moro bigi. Disi ben wani taki dati wi ben musu meki a kongreshal kon moro bigi, wi ben musu bow nyun kamra na Bethel, èn sosrefi nyun kantoro fu du vertaalwroko. Wi gi den nyun gebow disi abra na Yehovah, tapu 31 oktober 2009.

Di sma ben seni mi gowe fu skoro na ini 1942, dan sowan 60.000 Kotoigi ben de na ini Amerkankondre. Now moro leki wán milyun Kotoigi de drape. Di wi ben kon na Ekwador na ini 1966, dan sowan 1400 Kownukondre preikiman ben de dyaso. Now moro leki 68.000 preikiman de. Te wi e luku den 120.000 Bijbelstudie nanga den 232.000 sma di ben de na a Memrefesa fu Krestes na ini 2009, dan a no de fu taki dati moro preikiman o de. Iya, Yehovah blesi a pipel fu en na wan fasi di wi noiti no ben fruwakti. A moi srefisrefi fu libi na ini wan ten èn na wan presi pe a wroko e go na fesi trutru! *

[Futuwortu]

[Prenki na tapu bladzijde 5]

Wan bigi konmakandra di ben hori na wan opo presi (1981) na ini Guayaquil èn a kongreshal (2009) di de na tapu a srefi pisi gron