Suku a blesi fu Yehovah fayafaya

„[Gado] sa pai den sma di e suku en fayafaya.”—HEBR. 11:6.

1, 2. (a) Fa furu sma e suku fu kisi blesi fu Gado? (b) Fu san ede wi musu du tranga muiti fu kisi blesi fu Yehovah?

„GADO o blesi yu!” Son sma gwenti taki a sani disi te trawan du den wan bun. Den kerki fesiman fu difrenti kerki gwenti blesi sma, meti, nanga tra sani. Son sma e go na tra kondre fu begi na spesrutu presi, fu di den yere taki den kan kisi blesi drape. Nofo tron politiekman e aksi Gado fu blesi a pipel fu den. Yu denki taki a fiti te sma e aksi fu kisi den sortu blesi dati? Den sma disi e kisi san den aksi? Suma e kisi blesi fu Gado, èn fu san ede?

² Yehovah ben taki dati na ini den lasti dei, a ben o teki wan pipel di komoto fu ala kondre. A pipel dati ben o de krin, den ben o libi na ini vrede, èn den ben o preiki a bun nyunsu fu a Kownukondre te na den moro farawe presi fu grontapu. Den ben o du dati aladi sma ben o abi bita-ati gi den èn aladi sma ben o gens den (Yes. 2:2-4; Mat. 24:14; Openb. 7:9, 14). Wi di de fu a pipel dati, wani kisi blesi fu Gado èn wi abi a blesi dati fanowdu, efu wi wani taki sani waka bun (Ps. 127:1). Ma fa wi kan kisi blesi fu Gado?

Den sma di e gi yesi e kisi blesi trutru

3. Fa sani ben o waka gi den Israelsma efu den ben o gi yesi?

³ Leisi Odo 10:6, 7. Syatu bifo den Israelsma ben go na ini a Pramisi Kondre, Yehovah taigi den taki sani ben o waka heri bun nanga den èn a ben o kibri den efu den ben  o gi yesi na en (Deut. 28:1, 2). A de seiker taki Yehovah ben o blesi den sma di ben o gi yesi na en.

4. Te wan sma e gi yesi nanga en heri ati, dan san dati wani taki?

⁴ Fa den Israelsma ben musu gi yesi? A Wet fu Gado ben taki dati a no ben o feni en bun te a pipel fu en no ben o dini en ’nanga prisiri èn te den no ben o de nanga tangi’. (Leisi Deuteronomium 28:45-47.) Yehovah no wani taki wi e gi yesi na en soso fu di wi e si en leki wan plekti fu hori wisrefi na den komando fu en, bika srefi meti nanga ogri yeye kan du dati (Mark. 1:27; Yak. 3:3). Wan sma di e gi yesi na Gado nanga en heri ati, e sori taki a lobi en. A sma dati e gi yesi nanga prisiri fu di a e bribi taki den komando fu Yehovah no de wan hebi èn taki „a sa pai den sma di e suku en fayafaya”.—Hebr. 11:6; 1 Yoh. 5:3.

5. Te wan sma ben e poti frutrow na ini a pramisi fu Yehovah, dan fa dati ben o yepi en fu gi yesi na a wet di skrifi na ini Deuteronomium 15:7, 8?

⁵ Luku fa wan sma ben kan sori taki a e gi yesi nanga en heri ati te a abi fu du nanga a wet di skrifi na ini Deuteronomium 15:7, 8. (Leisi en.) Te wan sma ben e gi yesi na a wet dati, aladi a no ben e du en nanga en heri ati, dan kande a ben e yepi den pôtiwan. Ma dati ben o yepi a pipel fu Gado fu libi bun nanga makandra? Boiti dati, a sani dati ben o sori taki a sma e bribi taki Yehovah man sorgu gi den futuboi fu en? A ben o sori taki a sma de nanga tangi taki a kisi na okasi fu sori switifasi gi trawan, neleki fa Yehovah e du dati? Nôno! Gado ben e luku na ati fu wan sma di lobi du bun gi trawan èn a ben pramisi fu blesi a sma dati na ini ala san den ben o du (Deut. 15:10). Den sma di ben e bribi a pramisi dati, ben o gi yesi èn den ben o kisi furu blesi.—Odo 28:20.

6. Sortu dyaranti wi e kisi fu Hebrewsma 11:6?

⁶ Boiti taki wi musu bribi taki Yehovah na a Gado di e pai den futuboi fu en, Hebrewsma 11:6 e taki fu wan tra fasi di wi musu abi fu man kisi blesi fu Gado. Luku taki Yehovah e pai den sma di „e suku en fayafaya”. A Griki wortu di gebroiki dyaso wani taki dati wan sma ben e du furu muiti fu kisi blesi. A sani disi e gi wi a dyaranti taki wi o kisi blesi trutru! A sma di e gi wi den blesi disi na a wan-enkri tru Gado „di no man lei” (Tit. 1:2). Na ini den dusundusun yari di pasa a sori taki ala ten a e du san a pramisi. Ala ten a e du san a taki (Yes. 55:11). Sobun, wi kan de seiker taki efu wi e sori trutru bribi, a sa blesi wi.

7. Fa wi kan kisi blesi nanga yepi fu den bakapikin fu Abraham?

⁷ Yesus Krestes ben de a moro prenspari bakapikin fu Abraham. Den salfu Kresten na den tra bakapikin. Den kisi a wroko fu „fruteri ala sma fu den kefalek moi fasi fu a sma di kari [den] komoto na ini a dungru fu kon na ini en tumusi moi leti” (Gal. 3:7-9, 14, 16, 26-29; 1 Petr. 2:9). Wi no sa kon abi wan bun matifasi nanga Yehovah te wi no e gi yesi na den sma di Yesus poti fu luku den sani fu en. Sondro a yepi fu „a getrow èn koni srafu”, wi no ben o man frustan finifini san den sani di skrifi na ini Gado Wortu wani taki, èn wi no ben o sabi tu fa fu fiti den sani dati (Mat. 24:45-47). Te wi e du san wi e leri fu Bijbel, dan wi kan de seiker taki Gado o blesi wi.

Tan hori a wani fu Gado na prakseri

8, 9. Sortu muiti a famiri-edeman Yakob ben meki fu man kisi san a ben aksi Gado?

⁸ Te wi e prakseri taki wi musu du furu muiti fu kisi blesi fu Gado, dan kande wi e denki a famiri-edeman Yakob. A no ben sabi fa Gado ben o meki a sani di a ben pramisi Abraham, kon tru. Ma a ben bribi taki Yehovah ben o meki en granpapa kisi furu bakapikin, di ben o tron wan bigi pipel. Fu dati  ede, na ini 1781 bifo Krestes, Yakob go na Haran fu suku wan wefi. A no ben e suku nomo fu feni wan patna di ben abi switifasi. Na presi fu dati, a ben e suku wan uma di ben e anbegi Yehovah nanga en heri ati èn di ben o de wan bun mama gi en pikin.

⁹ Wi sabi taki Yakob ben miti Rakel, di ben de en famiri. A ben kon lobi Rakel èn a agri fu wroko seibi yari gi en papa Laban, fu man kisi Rakel leki wefi. Disi no ben de wan moi lobitori nomo. A no de fu taki dati Yakob ben sabi a sani di na Almakti Gado ben pramisi en granpapa Abraham. Bakaten Gado ben taigi Isak a sani dati tu (Gen. 18:18; 22:17, 18; 26:3-5, 24, 25). Isak ben taigi en manpikin Yakob: „Na Almakti Gado o blesi yu. A o meki yu kisi pikin èn a o meki yu kisi furu bakapikin tu, so taki yu o tron na afo fu wan bigi pipel. Neleki fa a ben blesi Abraham, na so a o blesi yu nanga den bakapikin fu yu, so taki yu kan teki a kondre disi abra di Gado ben gi Abraham, èn pe yu e libi now leki wan trakondre sma” (Gen. 28:3, 4). Sobun, a muiti di Yakob ben meki fu feni a yoisti wefi so taki a ben kan kisi pikin, ben e sori taki a ben e bribi den sani di Yehovah ben taki.

10. Fu san ede Yehovah ben de klariklari fu blesi Yakob?

¹⁰ Yakob no ben e suku fu kon gudu fu man sorgu gi en osofamiri. A ben e hori a pramisi fu Yehovah na prakseri, èn a ben wani sabi fa dati ben o kon tru. Yakob ben abi a fasti bosroiti fu du ala san a man fu kisi blesi fu Gado, awansi sortu tesi a ben e kisi. A ben tan du den sani disi teleki a ben kon owru, èn dati meki Yehovah blesi en.—Leisi Genesis 32:24-29.

11. Sortu muiti wi musu meki fu di wi kon sabi a wani fu Gado?

¹¹ Neleki Yakob, wi no sabi finifini fa den sani di Yehovah abi na prakseri o kon tru. Ma te wi e studeri Gado Wortu, dan wi e kon sabi pikinso san wi kan fruwakti tapu „a dei fu Yehovah” (2 Petr. 3:10, 17). Fu eksempre, wi no sabi soifri o ten a dei dati o kon, ma wi sabi taki a de krosibei. Wi e bribi Gado  Wortu te a e taki dati wi nanga den sma di e arki wi o kisi frulusu tu, te wi e gi kotoigi finifini na ini a syatu pisi ten di libi ete.—1 Tim. 4:16.

12. Sortu dyaranti wi kan abi?

¹² Wi sabi taki a kaba kan kon na iniwan ten. Yehovah no abi fu wakti teleki ibri sma na grontapu yere a bun nyunsu (Mat. 10:23). Boiti dati, wi e kisi bun rai fa fu du a preikiwroko na a yoisti fasi. Fu di wi abi bribi, meki wi e du ala san wi man fu teki prati na a wroko disi, èn wi e gebroiki ala san wi abi fu horibaka gi a wroko disi. A de so taki ala ten wi e preiki na ini kontren pe furu sma e arki? Fa wi ben o man sabi dati na fesi? (Leisi Preikiman 11:5, 6.) Na preiki wi musu preiki nomo, èn wi musu abi a frutrow taki Yehovah sa blesi wi (1 Kor. 3:6, 7). Wi kan abi a dyaranti taki a e si a tranga muiti di wi e meki, èn nanga yepi fu en santa yeye a sa gi wi a rai di wi abi fanowdu.—Ps. 32:8.

Suku fu kisi a santa yeye

13, 14. Fa a santa yeye fu Gado yepi den futuboi fu en?

¹³ Ma fa a de te wi feni taki wi no bun nofo fu du wan wroko noso fu teki prati na a preikiwroko? Wi musu aksi Yehovah fu gi wi en santa yeye so taki wi o man du a diniwroko fu en moro bun. (Leisi Lukas 11:13.) A yeye fu Gado kan gi sma a koni fu du wan wroko noso fu tyari wan frantwortu, awansi suma na den sma dati. Fu eksempre, syatu baka di den Israelsma komoto na ini Egepte, dan Gado en yeye yepi skapuman nanga srafu fu wini den feanti fu den, aladi den no ben de fetiman (Ex. 17:8-13). Syatu baka dati, a srefi santa yeye dati yepi Besaleèl nanga Oholiab fu meki a tumusi moi tabernakel, na a fasi fa Gado ben wani.—Ex. 31:2-6; 35:30-35.

¹⁴ Di a ben de fanowdu taki na organisâsi fu Gado pipel bigin druk den eigi publikâsi, dan a makti yeye yepi den futuboi fu Gado fu sorgu gi den sani di ben de fanowdu. Na a ten dati, Brada R. J. Martin, a brada di ben e luku a wroko na ini a drukkerij, fruklari na ini wan brifi sortu sani den ben man du na a ten fu 1927. A ben taki: „Masra opo a doro na a yoisti ten, èn wi kisi a bigi drukpers, aladi wi no ben sabi srefisrefi fa wi ben musu seti en èn fa wi ben musu wroko nanga en. Ma Masra sabi fa fu yepi den sma di e wroko fayafaya gi en so taki den e kisi koni. . . . Na ini wan tu wiki nomo wi ben man drai a drukpers, èn te now ete a e drai. Srefi den sma di meki a drukpers dati no ben sabi taki  a ben man druk spesrutu sani.” Te nanga a dei fu tide, Yehovah e tan blesi a tranga muiti di den futuboi fu en e meki.

15. Fa Romesma 8:11 kan de wan deki-ati gi den sma di e kisi tesi?

¹⁵ A yeye fu Yehovah e wroko na difrenti fasi. Ala den futuboi fu Gado kan kisi a yeye disi, èn a e yepi den fu pasa bun bigi problema. Ma fa a de te wi feni taki wan tesi hebi tumusi gi wi? Wi kan kisi krakti fu den wortu fu Paulus di skrifi na Romesma 7:21, 25 nanga 8:11. Iya, „a yeye fu a sma di gi Yesus wan opobaka”, kan yepi wi, fu di a e gi wi a krakti fu basi den lostu fu a skin. A tekst dati ben skrifi gi den salfu Kresten, ma toku a gronprakseri fiti gi ala den futuboi fu Gado. Wi alamala kan kisi libi te wi e poti bribi na ini Krestes, te wi e du muiti fu basi den lostu fu a skin, èn te wi e teki a tiri fu a yeye.

16. San wi musu du fu kisi a santa yeye fu Gado?

¹⁶ Wi kan fruwakti taki Gado o gi wi en santa yeye efu wi no e du nowan muiti fu kisi en? Nôno. Boiti taki wi musu begi Gado fu kisi a yeye, wi musu studeri a Wortu fu en fayafaya tu (Odo 2:1-6). Wan tra sani, na taki a yeye fu Gado de na tapu a Kresten gemeente. Te wi e go na den konmakandra doronomo, dan wi e sori taki wi abi na angri fu „yere san a yeye e taigi den gemeente” (Openb. 3:6). Boiti dati, wi musu abi a sakafasi fu du den sani di wi leri. Odo 1:23 e gi wi a rai disi: „Arki mi te mi e piri-ai gi unu. Dan mi o gi unu a krakti fu mi, èn mi o meki unu kon frustan den sani di mi e taki.” Iya, Gado e gi en santa yeye na „den wan di e gi yesi na en leki tiriman”.—Tori. 5:32.

17. Nanga sortu sani wi kan agersi den wini di wi e kisi fu di Gado e blesi wi?

¹⁷ Soleki fa wi si kaba, dan wi musu du tranga muiti fu kisi blesi fu Gado. Toku wi musu hori na prakseri taki a no dati wawan e meki taki Yehovah e gi a pipel fu en someni bun sani. Wi kan agersi a sani disi nanga a nyanyan di wi e nyan. Aladi wi no sabi fa wi skin e kisi krakti fu a nyanyan di wi e nyan, toku wi sabi taki wi musu nyan. O moro wi e nyan bun nyanyan, o moro wi sa de gosontu. Awansi fa a no fa, na Yehovah e gi wi nyanyan, èn a meki wi na so wan fasi taki a nyanyan e du wi bun. Yehovah e sori wi san wi musu du fu kisi têgo libi èn a e yepi wi fu du san de fanowdu fu kisi a têgo libi dati. A de krin taki wi e kisi bun furu yepi fu en, èn fu dati ede wi musu prèise en. Ma toku, wi musu wroko makandra nanga en, iya, wi musu du san Gado wani fu man kisi blesi.—Hag. 2:18, 19.

18. Sortu fasti bosroiti yu abi, èn fu san ede?

¹⁸ Sobun, du tranga muiti fu du iniwan wroko di yu e kisi nanga yu heri ati. Ala ten begi Yehovah fu yepi yu, so taki yu kan abi bun bakapisi (Mark. 11:23, 24). Te yu e du dati, dan yu kan abi a dyaranti taki „a sma di e suku, e feni” (Mat. 7:8). Den wan di salfu nanga santa yeye sa kisi blesi fu di ’Gado o pai den nanga libi’ na ini hemel (Yak. 1:12). Den „tra skapu” fu Krestes, di e meki muiti fu kisi blesi nanga yepi fu den bakapikin fu Abraham, o prisiri fu yere te A e taki: „Un kon, unu di mi Tata blesi, èn teki a kownukondre di sreka gi unu sensi a ten di grontapu seti” (Yoh. 10:16; Mat. 25:34). Iya, „den sma di Gado e blesi, o kisi grontapu . . . èn fu têgo den o tan libi drape”.—Ps. 37:22, 29.

Yu kan tyari disi kon na krin?

• San a wani taki fu gi yesi nanga wi heri ati?

• San wi musu du fu kisi blesi fu Gado?

• Fa wi kan kisi a santa yeye fu Gado, èn fa a yeye disi kan yepi wi?

[Aksi fu a tori disi]

[Prenki na tapu bladzijde 9]

Yakob ben feti nanga wan engel fu kisi blesi fu Yehovah.

Yu e meki a srefi muiti dati?

[Prenki na tapu bladzijde 10]

A santa yeye fu Gado ben yepi Besaleèl nanga Oholiab fu du wan tumusi prenspari wroko