Tru anbegiman de na ini wánfasi
Tru anbegiman de na ini wánfasi
„Mi o meki den de wán leki wan ipi skapu na ini wan pen.”—MIKA 2:12.
1. Fa den sani di Gado meki e sori taki a koni?
A PSALM skrifiman ben taki: „Yehovah, den sani di yu meki furu srefisrefi. Yu meki den alamala na wan tumusi koni fasi. Grontapu lai nanga den sani di yu meki” (Ps. 104:24). Te wi e luku fa den someni difrenti bon, insekt nanga meti na grontapu abi makandra fanowdu fu man tan na libi, dan wi e si taki Gado koni. Boiti dati, ala den difrenti pisi fu yu skin, sosrefi den pikinpikin cel, e wroko makandra so taki noti no e mankeri na yu skin, èn so taki yu kan de gosontu.
2. Soleki fa a prenki na tapu bladzijde 13 e sori, dan fu san ede a ben musu fu de so taki sma no ben man bribi taki den Kresten ben de na ini wánfasi?
2 Yehovah meki libisma na so wan fasi taki den abi makandra fanowdu. Libisma e difrenti fu makandra te a abi fu du nanga a fasi fa den tan èn nanga den koni di den abi. Boiti dati, Gado gi den fosi libisma den srefi fasi fu en, so taki den ben o wroko makandra èn so taki den ben o abi makandra fanowdu (Gen. 1:27; 2:18). Ma toku furu sma no e anbegi Gado, èn noiti den ben man de na ini wánfasi (1 Yoh. 5:19). Tra fasi leki dati, den memre fu a fosi Kresten gemeente ben de na ini wánfasi. A ben musu fu de so taki sma no ben man bribi a sani dati, fu di den Kresten dati ben de srafu fu Efeise, prenspari Griki uma, Dyu di ben teki heiskoro leri, èn sosrefi sma di ben e anbegi falsi gado fosi.—Tori. 13:1; 17:4; 1 Tes. 1:9; 1 Tim. 6:1.
3. San Bijbel e taki fu a wánfasi di de na mindri Kresten, èn san wi o luku na ini a studie-artikel disi?
3 A tru anbegi e yepi sma fu wroko makandra na ini wánfasi, neleki fa a de nanga den pisi fu wi eigi skin. (Leisi 1 Korentesma 12:12, 13.) Wan tu tori di wi o luku na ini na artikel disi, na: Fa a tru anbegi e tyari wánfasi kon na mindri sma? Fu san ede Yehovah na a wan-enkri sma di kan tyari milyunmilyun sma fu ala kondre kon na wán? Nanga sortu problema Yehovah e yepi wi so taki a wánfasi no e pori? Èn te a abi fu du nanga wánfasi, dan fa a tru Kresten bribi e difrenti fu Krestenhèit?
Fa a tru anbegi e tyari wánfasi kon na mindri sma?
4. Fa a tru anbegi e tyari wánfasi kon na mindri sma?
4 Sma di de na ini a tru anbegi sabi taki fu di Yehovah meki ala sani, meki na en abi a reti fu tiri hemel nanga grontapu (Openb. 4:11). Sobun, aladi tru Kresten e libi na difrenti kondre èn den de na ini difrenti situwâsi, toku den alamala e gi yesi na den srefi wet fu Gado, èn den e hori densrefi na den srefi Bijbel gronprakseri. Boiti dati, ala tru anbegiman e kari Yehovah, „Tata” (Yes. 64:8; Mat. 6:9). Dati meki den alamala na Kresten brada nanga sisa èn den e kisi wini fu a moi wánfasi di de na den mindri. A psalm skrifiman ben taki fu a wánfasi dati: „Luku, o bun èn o switi a de te brada e libi leki wán famiri!”—Ps. 133:1.
5. Sortu fasi tru anbegiman musu abi fu man tan na ini wánfasi?
5 Aladi tru Kresten abi sondu, toku den e anbegi Gado na ini wánfasi fu di den leri fu lobi makandra. Yehovah e leri den fu sori lobi gi trawan, èn nowan tra sma man du dati moro bun leki en. (Leisi 1 Yohanes 4:7, 8.) A Wortu fu en e taki: „Un musu abi trutru sari-ati, bun-ati, sakafasi, safri-ati, nanga langa pasensi, èn den fasi disi musu de leki wan krosi na un skin. Tan frudrage makandra èn gi makandra pardon nanga un heri ati te wan sma feni taki wan trawan du en wan ogri. Soleki fa Yehovah e gi unu pardon nanga en heri ati, na so unu musu du tu. Ma boiti den sani disi, un musu abi lobi, èn a musu de leki wan krosi na un skin, bika lobi na wan volmaakti banti di e meki sma kon de wán” (Kol. 3:12-14). A volmaakti banti disi di e meki sma kon de wán na lobi, èn a fasi disi e sori krin suma na tru Kresten. Yusrefi no ondrofeni taki a wánfasi disi na wan prenspari sani na ini a tru anbegi?—Yoh. 13:35.
6. Fa a Kownukondre howpu e yepi wi fu de na ini wánfasi?
6 Wan tra reide fu san ede tru anbegiman de na ini wánfasi, na fu di den e si Gado Kownukondre leki a wan-enkri howpu gi libisma. Den sabi taki heri esi Gado Kownukondre o kon na ini a presi fu libisma tirimakti, èn taki a o blesi libisma di e gi yesi. Iya, a o meki den abi vrede fu ala ten (Yes. 11:4-9; Dan. 2:44). Fu dati ede, Kresten e du a sani disi di Yesus taki fu den bakaman fu en: „Den no de wan pisi fu grontapu, neleki fa mi no de wan pisi fu grontapu” (Yoh. 17:16). Tru Kresten e tan sorgu taki den no e moksi densrefi nanga den dyugudyugu fu grontapu, èn fu dati ede den de na ini wánfasi, aladi sma na den lontu e feti.
A wan-enkri seti di Gado e gebroiki fu gi leri
7, 8. Fa a leri di wi e kisi fu Bijbel e yepi wi fu tan na ini wánfasi?
7 Den fosi Kresten ben de na ini wánfasi, fu di den alamala ben e kisi leri nanga yepi fu a wan-enkri seti di Gado ben e gebroiki. Den ben sabi taki Yesus ben e gebroiki wan tiri skin fu gi a gemeente leri èn fu tiri en. Den memre fu a tiri skin dati ben de den apostel nanga owru man na ini Yerusalem. Den man dati di ben e dini Gado fayafaya ben e hori densrefi na Gado Wortu te den ben e teki bosroiti. Boiti dati, den ben e seni opziener go na den gemeente na ini difrenti kondre fu fruteri den Kresten sortu bosroiti den ben teki. Bijbel e taki fu den opziener dati: „Te den ben go na den foto, dan den ben e fruteri den brada drape sortu bosroiti den apostel nanga den owru man na ini Yerusalem ben teki, so taki den ben kan du san den apostel ben taki.”—Tori. 15:6, 19-22; 16:4.
8 Na ini a ten disi, a de so tu taki a Tiri Skin e yepi fu sorgu taki a gemeente na heri grontapu e tan na ini wánfasi. Den memre fu a Tiri Skin disi na salfu Kresten. A Tiri Skin e tyari publikâsi kon na doro na ini furu tongo, èn den publikâsi disi e yepi fu tranga a bribi fu sma. Den leri na ini den publikâsi e komoto fu Gado Wortu. Sobun, den sani di wi e leri no e komoto fu libisma, ma fu Yehovah.—Yes. 54:13.
9. Fa a wroko di Gado gi wi e yepi wi fu tan na ini wánfasi?
9 Kresten opziener e yepi tu fu sorgu taki wánfasi de, fu di den e teki fesi na ini a preikiwroko. A matifasi di de na mindri den Kresten brada nanga sisa di e wroko makandra na ini a diniwroko fu Gado, tranga moro a di fu grontapusma, fu di den sma dati e kon makandra soso fu meki prisiri. A Kresten gemeente no ben seti so taki sma kan meki prisiri, ma a seti fu gi Yehovah grani èn fu du wan wroko. Iya, wi musu preiki a bun nyunsu, wi musu meki disipel, èn wi musu gi makandra deki-ati na ini a gemeente (Rom. 1:11, 12; 1 Tes. 5:11; Hebr. 10:24, 25). Dati meki na apostel Paulus ben fruwakti fu yere fu den Kresten ’taki den tan abi wán denki, èn taki makandra den e feti leki wán man gi a bribi di den abi na ini a bun nyunsu’.—Fil. 1:27.
10. Na sortu fasi wi leki a pipel fu Gado de na ini wánfasi?
10 Sobun, wi leki a pipel fu Yehovah, de na ini wánfasi fu di wi e si Yehovah leki a moro hei tiriman, fu di wi lobi wi brada nanga sisa, fu di wi e howpu tapu Gado Kownukondre, èn fu di wi e lespeki den wan di Gado e gebroiki fu teki fesi na wi mindri. Yehovah e yepi wi fu kenki spesrutu fasi di wi leki sondusma ben kan abi, fu di den fasi dati ben kan pori a wánfasi di de na wi mindri.—Rom. 12:2.
San wi kan du fu no abi heimemre èn fu no dyarusu?
11. Fu san ede heimemre e tyari prati kon, èn fa Yehovah e yepi wi fu dwengi a firi disi?
11 Heimemre e tyari prati kon. Wan sma di abi heimemre e denki taki a bun moro trawan, èn a lobi meki bigi. Ma nofo tron a sani disi e tyari prati kon, fu di den wan di e yere fa a e meki bigi, kan dyarusu na en tapu. A disipel Yakobus e taigi wi krin: „A meki di unu e meki bigi na so wan fasi, na wan ogri-ati sani” (Yak. 4:16). A no de wan lobi-ati sani te wan sma e denki taki a bun moro trawan. A moi fu sabi taki Yehovah na wan eksempre gi wi te a abi fu du nanga sakafasi, fu di a e poti prakseri na sondu sma leki wi. David ben skrifi: „Na a sakafasi fu [Gado] e meki mi kon bigi” (2 Sam. 22:36). A Wortu fu Gado e yepi wi fu dwengi wisrefi fu no abi heimemre, fu di a e leri wi fu si sani na a yoisti fasi. Nanga yepi fu santa yeye Paulus ben aksi: „Suma taigi yu taki yu bun moro wan trawan? Iya, san yu abi di yu no kisi? Efu na kisi yu kisi en, dan fu san ede yu e meki bigi neleki a no kisi yu kisi en?”—1 Kor. 4:7.
12, 13. (a) Fu san ede wi kan dyarusu makriki tapu trawan? (b) San na a bakapisi te wi e si wi Kresten brada nanga sisa soleki fa Yehovah e si den?
12 Dyarusu na ete wan fasi di furu tron e tyari prati kon. Fu di wi kisi sondu, meki „dyarusufasi de na ini wi alamala”, èn srefi Kresten di e dini Gado furu yari langa kaba kan dyarusu son leisi tapu trawan. Iya, kande den e dyarusu tapu a libi fu trawan, tapu den grani fu den, noso tapu den sani di den man du. Fu eksempre, wan brada di abi wan osofamiri ben kan dyarusu tapu den grani di wan furuten dinari abi. Ma kande a brada no sabi taki a furuten dinari e dyarusu pikinso na en tapu fu di a abi wan wefi nanga pikin. Fa wi kan sorgu taki den dyarusu firi disi no e tyari prati kon?
13 Wan sani di o yepi wi fu no dyarusu tapu trawan, na te wi e hori na prakseri taki Bijbel e agersi salfu memre fu a Kresten gemeente nanga den pisi fu wi skin. (Leisi 1 Korentesma 12:14-18.) Fu eksempre, yu kan si yu ai makriki, ma dati no de so nanga yu ati. Ma toku den ala tu prenspari gi yu, a no so? Na so a de tu taki Yehovah e warderi ala den memre fu a gemeente, aladi sonwan fu den abi moro grani leki trawan son leisi. Sobun, meki wi si wi Kresten brada nanga sisa soleki fa Yehovah e si den. Na presi taki wi e dyarusu tapu trawan, wi kan sori den taki wi e broko wi ede nanga den èn taki wi wani kon sabi den moro bun. Te wi e du dati, dan wi e sori taki tru Kresten de heri tra fasi leki den sma fu den kerki fu Krestenhèit.
A Krestenhèit no de na ini wánfasi
14, 15. Fa wan prati kon na mindri den kerki fu Krestenhèit?
14 A wánfasi di de na mindri tru Kresten de heri tra fasi leki a strei di den kerki fu Krestenhèit e strei nanga makandra. Na a ten fu a di fu fo yarihondro, a Kresten bribi di ben kon lai nanga falsi leri ben panya na ala sei, taki srefi wan heiden tiriman fu Rome teki a bribi dati. Leki bakapisi fu dati Krestenhèit kon moro bigi. A sani disi meki taki safrisafri, furu kondre na grontapu pe den kerki fu Krestenhèit ben de den moro prenspariwan, prati fu Rome èn den seti den eigi kerki.
15 Den kondre dati, ben e feti nanga makandra furu hondro yari langa. Na a ten fu a di fu 17 nanga a di fu 18 yarihondro, sma na ini Ingrisikondre, Fransikondre, nanga Amerkankondre ben e gi trawan deki-ati fu sori tranga lobi gi a kondre fu den. Te fu kaba, a sani dati kon de leki wan anbegi. Na a ten fu a di fu 19 nanga a di fu 20 yarihondro, furu sma bigin sori tranga lobi gi a kondre fu den. Te fu kaba, den kerki fu Krestenhèit prati na ini furu pikinpikin kerki, èn furu fu den e gi sma deki-ati fu sori tranga lobi gi a kondre fu den. Kerkisma go feti srefi nanga sma fu tra kondre di ben abi a srefi bribi leki den. Na ini a ten disi, den kerki fu Krestenhèit prati fu di den abi den eigi leri, èn fu di den memre fu den kerki dati e horibaka gi den eigi kondre.
16. Sortu sani e meki taki pratifasi de na mindri den sma fu Krestenhèit?
16 Na ini a di fu 20 yarihondro, sonwan fu den hondrohondro kerki fu Krestenhèit bigin pruberi fu tyari wánfasi kon na den mindri. Baka di den du muiti omeni tenti yari langa, dan wan tu kerki nomo kon tron wán. Boiti dati, te nanga now, den sma di e go na den kerki dati no e bribi den srefi sani te a abi fu du nanga aksi soleki: A tru taki ala sani kon de nanga yepi fu evolutie? A bun fu puru bere? A fiti taki sma e libi wan homo-sekslibi? A fiti taki umasma e tron priester? Na ini son kerki fu Krestenhèit, kerki fesiman e pruberi fu tyari wánfasi kon na mindri sma fu difrenti pikinpikin kerki. Fu dati ede, den no e poti tumusi furu prakseri na Bijbel leri, di fosi ben e tyari prati kon. Ma te wan kerki no e poti prakseri na spesrutu Bijbel leri, dan den sma fu a kerki dati no o abi wan tranga bribi. Boiti dati, a sani disi no e tyari wánfasi kon kwetikweti na mindri den kerki fu Krestenhèit di prati.
Tru anbegiman no e sori tranga lobi gi a kondre fu den
17. Fa a tru anbegi ben o tyari wánfasi kon na mindri sma „na a kabapisi fu a ten”?
17 Aladi libisma prati now moro leki oiti bifo, toku tru anbegiman e tan na ini wánfasi. Mika, a profeiti fu Gado ben taki: „Mi o meki den de wán leki wan ipi skapu na ini wan pen èn leki wan ipi skapu na den weigron” (Mika 2:12). Mika ben taki dati a tru anbegi ben o kon hei moro ala tra anbegi. Dati o pasa, awansi sma e anbegi falsi gado, noso awansi den e anbegi a kondre fu den di den e si leki wan gado. Mika ben skrifi: „Na a kabapisi fu a ten dati, a bergi fu na oso fu Yehovah o tanapu steifi. A o hei pasa den ede fu den bergi, èn a o hei moro den pikin bergi. Na drape den pipel musu go. Bika ibri pipel o tyari a nen fu en gado, èn den o du san a gado fu den wani. Ma fu ala ten wi o tyari a nen fu Yehovah wi Gado èn wi o du san a wani.”—Mika 4:1, 5.
18. Sortu kenki a tru anbegi yepi wi fu tyari kon?
18 Mika ben taki tu fa a tru anbegi ben o tyari wánfasi kon na mindri sma di fosi ben de feanti fu makandra. A ben taki: „Furu pipel o go èn den o taki: ’Kon meki wi go na a bergi fu Yehovah èn na a oso fu a Gado fu Yakob. A o leri wi san na den pasi fu en, èn wi o waka den pasi dati.’ . . . Den o abi fu naki den feti-owru kon tron plugu èn den lansri kon tron grasinefi. Nowan pipel o teki feti-owru fu go feti nanga wan tra pipel èn den no o leri fu feti moro” (Mika 4:2, 3). Na ini a ten disi, sma e tapu fu anbegi gado di libisma meki èn den e tapu tu fu anbegi a kondre fu den, so taki den kan anbegi Yehovah. Den sma disi de na ini wánfasi nanga den Kresten brada nanga sisa na heri grontapu. Gado e leri den fa fu sori lobi gi makandra.
19. Te wi e luku taki a tru anbegi e tyari wánfasi kon na mindri milyunmilyun sma, dan san dati e sori krin?
19 A wánfasi di de na mindri tru Kresten na heri grontapu, na wan aparti sani, èn a de krin taki Yehovah e tiri a pipel fu en nanga yepi fu a yeye fu en. Sma fu ala kondre e kon de na ini wánfasi, èn noiti ete dati ben pasa nanga so furu sma. A sani disi na wan moi kontru fu den wortu di skrifi na Openbaring 7:9, 14, èn a e sori tu taki den engel fu Gado heri esi sa lusu den „winti” di o pori na ogri sistema disi. (Leisi Openbaring 7:1-4, 9, 10, 14.) A de wan grani fu de na ini wánfasi nanga wi Kresten brada nanga sisa na heri grontapu, a no so? Fa ibriwan fu wi kan yepi fu sorgu taki a wánfasi dati e tan? Wi sa luku a tori dati na ini a tra artikel.
San yu ben sa piki?
• Fa a tru anbegi e tyari wánfasi kon na mindri sma?
• Fa wi kan sorgu taki dyarusu no e pori a wánfasi fu wi?
• Fu san ede a tranga lobi di sma abi gi a kondre fu den no de wan sani di e tyari prati kon na mindri tru anbegiman?
[Aksi fu a tori disi]
[Prenki na tapu bladzijde 13]
Den Kresten fu a fosi yarihondro ben de sma fu difrenti kulturu
[Prenki na tapu bladzijde 15]
Te wi e yepi nanga a wroko na ini a Kownukondre zaal, dan fa dati e tyari wánfasi kon na wi mindri?