Yonguwan—San unu o du nanga un libi?

„Mi e naki kofu na so wan fasi taki mi no e naki winti.” —1 KOR. 9:26.

1, 2. Efu yu wani taki sani waka bun nanga yu aladi yu e gro kon bigi, dan san yu musu abi?

KON meki wi taki dati yu musu go na wan presi, ma yu no sabi a pasi go drape. A ben o bun fu abi wan karta na yu, so taki yu kan sabi fa fu doro drape. Ma a karta no ben o yepi efu yu no sabi pe yu e go. Sobun, fu no wakawaka lontu fu soso, dan yu musu sabi heri bun pe yu e go.

² Na so a de tu te yu e gro kon bigi. Yu abi wan bun karta di kan sori yu sortu pasi fu waka. A karta dati na Bijbel (Odo 3:5, 6). Efu a konsensi fu yu e wroko bun, dan a kan yepi yu fu tan waka na tapu a yoisti pasi (Rom. 2:15). Ma efu yu wani taki yu libi waka bun, dan yu musu sabi sortu marki yu wani doro. Yu musu poti marki gi yusrefi di yu o man doro trutru.

3. Soleki fa den wortu fu Paulus e sori na 1 Korentesma 9:26, dan sortu wini a e tyari kon te yu e poti marki gi yusrefi?

³ Na apostel Paulus ben sori sortu wini wi sa kisi te wi e poti marki gi wisrefi. A ben skrifi: „Mi no e lon bruyabruya; mi e naki kofu na so wan fasi taki mi no e naki winti” (1 Kor. 9:26). Efu yu poti marki gi yusrefi, dan yu no o abi fu lon bruyabruya. Heri esi yu o abi fu teki wan tu prenspari bosroiti di abi fu du nanga na anbegi. Yu o abi fu bosroiti tu sortu wroko yu o du, efu yu o trow, efu yu o seti wan osofamiri, èn so moro fara. Son leisi, den difrenti bosroiti di yu musu teki kan meki yu bruya. Ma te yu e bosroiti na fesi san yu wani du, èn te den bosroiti dati e kruderi nanga den tru tori nanga den gronprakseri na ini Gado Wortu, dan yu no sa teki don bosroiti.—2 Tim. 4:4, 5.

4, 5. (a) San kan pasa te yu no e poti marki gi yusrefi? (b) Fu san ede yu musu abi na angri fu plisi Gado te yu e teki bosroiti?

⁴ Efu yu no e poti marki gi yusrefi, dan kande den speri fu yu nanga den sma di e gi yu leri na skoro o dwengi yu fu du san den e si leki a moro bun sani gi yu. A no de fu taki dati awansi yu sabi krin sortu marki yu wani doro, toku trawan ben kan gi yu rai. Te yu e arki den rai fu den, dan aksi yu srefi: ’Den sani di den e taigi mi fu du o yepi mi fu memre mi Mekiman aladi mi yongu ete, noso den o meki en muilek gi mi fu du dati?’—Leisi Preikiman 12:1.

⁵ Fu san ede yu musu abi na angri fu plisi Gado te yu e teki bosroiti? Wan reide, na taki Yehovah gi wi ibri bun sani di wi abi (Yak. 1:17). Iya, ibri sma musu de nanga tangi gi san Yehovah du gi en (Openb. 4:11). San na a moro bun fasi fa yu kan sori taki yu de nanga tangi gi san Yehovah du gi yu? Dati na te yu e tan hori En na prakseri te yu e poti marki gi yusrefi, a no so? Meki wi go luku sortu bun marki yu kan poti èn san yu musu du fu doro den marki dati.

Sortu marki yu kan poti gi yusrefi?

6. Sortu prenspari marki yu kan poti gi yusrefi, èn fu san ede yu musu du dati?

⁶ Soleki fa na artikel na fesi ben sori, dan wan prenspari marki di yu kan poti gi yusrefi, na fu overtoigi yusrefi taki den sani di skrifi na ini Bijbel na tru tori (Rom. 12:2;  2 Kor. 13:5). Kande den speri fu yu e bribi na evolutie-leri noso tra falsi leri, fu di trawan taigi den taki na den sani dati den musu bribi. Ma yu no abi fu bribi wan sani soso fu di trawan wani taki yu du dati. Hori na prakseri taki Yehovah wani taki yu musu dini en nanga yu heri frustan. (Leisi Mateyus 22:36, 37.) Wi hemel Tata wani taki yu musu overtoigi yusrefi fu den sani di yu e bribi.—Hebr. 11:1.

7, 8. (a) Sortu marki di yu o man doro heri esi, o yepi yu fu tranga a bribi fu yu? (b) Fa yu o firi te yu e doro wan tu fu den marki dati?

⁷ Fu man tranga a bribi fu yu, dan a ben o bun fu poti wan tu marki di yu kan doro heri esi. Wan fu den marki dati na fu begi ibri dei. Te yu e begi, dan yu musu taki krin san yu e denki, èn yu no musu taki den srefi sani ibri tron baka. Wan sani di o yepi yu fu du dati, na te yu e hori spesrutu sani na prakseri di pasa na ini a dei noso te yu e skrifi den sani dati. No taki soso fu den tyalensi di miti yu, ma taki tu fu den sani di gi yu prisiri (Fil. 4:6). Wan tra marki di yu kan poti, na fu leisi Bijbel ibri dei. Yu sabi taki te yu e leisi pikinmoro fo bladzijde wan dei, dan yu o klari a heri Bijbel na ini wán yari nomo? * Psalm 1:1, 2 e taki: „Koloku fu a man di . . . lobi a wet fu Yehovah. Dei nanga neti a e leisi a wet fu Gado nanga wan safri sten.”

⁸ Ete wan marki di yu o man doro heri esi, na fu sreka yu srefi fu gi piki na den gemeente konmakandra. Na a bigin, a ben o bun fu leisi a piki noso wan Bijbeltekst. Ma bakaten yu kan poti en leki marki fu gi piki nanga yu eigi wortu. Iya, ibri leisi te yu e gi piki, yu e gi Yehovah wan presenti (Hebr. 13:15). Te yu doro wan tu fu den marki disi, dan yu sa de moro seiker fu yusrefi, èn yu sa kisi moro warderi tu gi den sani di Yehovah du gi yu.  Boiti dati, yu sa de srekasreka fu poti marki di yu o man doro na ini a ten di e kon.

9. Efu yu no de wan Kownukondre preikiman ete, dan sortu marki yu kan poti fu doro na ini a ten di e kon?

⁹ Te a abi fu du nanga marki di yu kan doro na ini a ten di e kon, dan sortuwan yu musu poti gi yusrefi? Efu yu no e preiki a bun nyunsu ete, dan kande yu kan poti en leki marki fu tron wan Kownukondre preikiman. Te yu doro a tumusi prenspari marki dati, dan yu kan suku fu tron wan bun preikiman di e teki prati doronomo na a preikiwroko. Iya, noiti yu musu misi wan mun. Yu kan poti en leki marki tu fu leri fa fu gebroiki Bijbel na ini a diniwroko. Te yu e du dati, dan kande yu o si taki a preikiwroko e gi yu moro prisiri. Kande yu kan gebroiki moro ten fu teki prati na a oso-fu-oso preikiwroko, noso kande yu kan pruberi fu studeri Bijbel nanga wan sma. Efu yu na wan preikiman di no dopu ete, dan a no de fu taki dati a moro bun marki di yu ben kan abi, na fu doro den markitiki fu teki dopu so taki yu kan tron wan Kotoigi fu Yehovah di e dini Gado nanga en heri ati.

10, 11. Sortu marki yonguwan di dopu kan poti fu doro na ini a ten di e kon?

¹⁰ Efu yu na wan dopu futuboi fu Yehovah kaba, dan luku wan tu marki di yu kan poti fu doro na ini a ten di e kon. Kande yu kan yepi tra gemeente ten na ten fu preiki na ini kontren pe den no e preiki furu. Fu di yu yongu ete èn fu di yu abi wan bun gosontu, meki yu ben kan go dini leki yepi pionier noso leki gewoon pionier. Dusundusun koloku pionier o fruteri yu taki te yu leki yonguwan e go na ini a furuten diniwroko fu memre yu Mekiman, dan yu o kisi furu blesi. Yu kan pruberi fu doro den marki disi aladi yu e libi ete nanga yu papa nanga mama. A gemeente fu yu sa kisi wini tu te yu doro den marki disi.

¹¹ Tra marki di yu kan poti fu doro na ini a ten di e kon, kan tyari tra sortu wini kon tu. Fu eksempre, kande yu kan bosroiti fu go dini na ini wan tra kontren, noso na ini wan tra kondre pe moro preikiman de fanowdu. Kande yu kan go na tra kondre fu yepi bow Kownukondre zaal noso bijkantoro. Kande yu kan go dini srefi na Bethel, noso kande yu kan tron wan zendeling. A no de fu taki dati fosi yu kan doro ala den marki disi di kari, dan yu o abi fu teki dopu fosi. Efu yu no dopu ete, dan prakseri san yu o abi fu du fu doro a marki dati.

Yu kan doro a marki fu teki dopu

12. Sortu reide son sma abi fu teki dopu, èn fu san ede den reide disi no bun nofo?

¹² San yu denki a wani taki fu teki dopu? Son yonguwan ben kan denki taki te den teki dopu, dan dati o kibri den gi sondu. Kande trawan feni taki den musu teki dopu fu di den speri fu den du dati. A kan taki tra yonguwan wani teki dopu fu di den wani plisi den papa nanga mama. Ma yu no musu denki taki te yu teki dopu, dan dati o tapu yu fu du ogri kibrikibri. Yu no musu teki dopu tu fu di trawan e dwengi yu fu du dati. Yu musu teki dopu te yu e frustan krin san a wani taki fu de wan Yehovah Kotoigi, èn te yu de seiker taki yu de srekasreka fu teki a frantwortu dati na yu tapu.—Preik. 5:4, 5.

13. Fu san ede yu musu teki dopu?

¹³ Wan reide fu san ede sma musu teki dopu, na taki Yesus ben gi den bakaman fu en a komando fu ’meki sma tron disipel èn fu dopu den’. A ben de wan eksempre gi den fu di ensrefi teki dopu. (Leisi Mateyus 28:19, 20; Markus 1:9.) Boiti dati, a de prenspari taki sma di wani kisi frulusu e teki dopu. Baka di na apostel Petrus ben taki fu Noa di ben bow na ark di kibri en nanga en osofamiri na a ten fu a Frudu, dan a taki: „A sani di e kruderi nanga disi, e frulusu unu now sosrefi,  namku a dopu, . . . nanga yepi fu na opobaka fu Yesus Krestes” (1 Petr. 3:20, 21). Ma disi no wani taki dati yu musu teki dopu soso fu kan kisi frulusu te a dei fu Yehovah doro. Na presi fu dati yu musu teki dopu fu di yu lobi Yehovah èn fu di yu wani dini en nanga yu heri ati, nanga yu heri sili, èn nanga ala yu krakti.—Mark. 12:29, 30.

14. Fu san ede son sma ben kan tweifri fu teki dopu, ma sortu dyaranti yu abi?

¹⁴ Son yonguwan ben kan tweifri fu teki dopu fu di den frede taki den o du wan sani bakaten di ben kan meki taki den brada puru den fu a gemeente. Yu e frede tu gi a sani dati? Efu dati de so, dan dati kan de wan bun sani. A sani disi ben kan sori taki yu e frustan taki a de wan seryusu frantwortu fu de wan Yehovah Kotoigi. Wan tra reide ben kan de tu fu san ede yu no wani teki dopu? Kande yu e tweifri ete efu a moro bun fasi fu libi na te yu e hori yusrefi na den markitiki fu Gado. Efu dati de so, dan kande yu sa denki tra fasi te yu e prakseri den takru bakapisi di e miti den sma di no e hori densrefi na Bijbel gronprakseri. Kande yu lobi den markitiki fu Gado, ma yu no sabi efu yu o man hori yusrefi na den. Fu taki en leti, a kan de wan bun sani te yu e denki so, fu di dati e sori taki yu abi sakafasi. Te yu luku en bun, dan Bijbel e taki dati na ati fu ala sondusma na wan bedrigi sani (Yer. 17:9). Ma sani sa waka bun gi yu te yu e ’tan na ai, soleki fa Gado taki’. (Leisi Psalm 119:9.) Awansi sortu reide yu abi fu tweifri fu teki dopu, yu musu du san de fanowdu fu sorgu taki yu no e tweifri moro.

15, 16. Fa yu kan sabi efu yu de srekasreka kaba fu teki dopu?

¹⁵ Ma fa yu kan sabi efu yu de srekasreka kaba fu teki dopu? Wan fasi fa yu kan sabi dati, na te yu e aksi yusrefi den sani disi: ’Mi kan fruklari prenspari Bijbel leri gi sma? Mi e teki prati na a diniwroko, awansi mi papa nanga mama no e du dati? Mi e meki muiti fu go na ala den Kresten konmakandra? Mi kan taki fu wan tu okasi pe mi kakafutu gi speri di ben wani dwengi mi fu du san no bun? Mi ben o tan dini Yehovah awansi mi papa nanga mama, noso den mati fu mi e tapu fu du dati? Mi begi Gado fu yepi mi fu kon abi wan moro bun matifasi nanga en? Èn mi gi misrefi abra na Yehovah na ini begi?’

¹⁶ Te wan sma teki dopu, dan dati na wan bigi kenki na ini en libi, èn a de wan prenspari bosroiti tu. Yu lepi nofo fu denki seryusu fu a bosroiti disi? A no te wan sma man hori moi lezing na tapu a podium noso te a man gi bun piki na a konmakandra, dan dati wani taki dati en na wan lepi Kresten. Wan lepi Kresten man teki bosroiti di e sori taki a e frustan Bijbel gronprakseri. (Leisi Hebrewsma 5:14.) Efu yu man du dati kaba, dan yu  abi a moro bigi grani di yu oiti ben kan kisi. Iya, yu abi a grani fu dini Yehovah nanga yu heri ati, èn fu libi na wan fasi di e sori taki yu gi yusrefi abra na en trutru.

17. Te yu teki dopu, dan san o yepi yu fu horidoro te tesi miti yu?

¹⁷ A kan taki baka te yu teki dopu, yu sa de fayafaya fu dini Gado. Ma kande heri esi, yu o kisi tesi fu sori taki yu e bribi na ini Gado èn taki yu sa tan gi yesi na en (2 Tim. 3:12). No denki taki yu sa musu pasa den tesi disi yu wawan. Suku rai na yu papa nanga mama. Suku yepi na lepi Kresten na ini a gemeente. Tron mati nanga sma di o horibaka gi yu. Noiti no frigiti taki Yehovah e sorgu gi yu èn taki a o gi yu a krakti di yu abi fanowdu fu horidoro, awansi san pasa.—1 Petr. 5:6, 7.

Fa yu kan doro den marki fu yu?

18, 19. Te yu e luku san na den moro prenspari sani gi yu, dan fa dati o yepi yu?

¹⁸ Awansi fa yu e meki muiti, toku a ben kan gersi taki yu noiti no abi nofo ten fu du san yu wani du èn san yu musu du. Na so a de tu nanga yu? Efu dati de so, dan yu musu luku san na den moro prenspari sani gi yu. Luku na agersitori disi: Teki wan embre èn poti wan tu bigi ston na ini. Lai na embre nanga santi. Now yu abi wan embre di lai nanga ston èn nanga santi. Leigi na embre, ma no trowe a santi nanga den ston. Now yu musu poti a santi fosi na ini na embre, èn baka dati, pruberi fu poti den ston na ini. San pasa, presi no de gi den ston? Dati e kon fu di yu poti a santi fosi na ini na embre.

¹⁹ Na a srefi problema disi yu abi te yu musu bosroiti fa yu o gebroiki yu ten. Te yu e poti sani so leki prisiriten na a fosi presi, dan noiti yu o abi nofo ten gi den moro prenspari sani di abi fu du nanga na anbegi. Ma te yu e teki a rai di Bijbel e gi fu „kon sabi san na den moro prenspari sani”, dan yu o feni ten fu dini Gado èn yu o man abi pikinso prisiriten.—Fil. 1:10.

20. Efu yu e bruya èn e tweifri aladi yu e pruberi fu doro den marki fu yu, dan san yu kan du?

²⁰ Aladi yu e du muiti fu doro den marki fu yu èn fu teki dopu, dan kande yu o bruya son leisi, èn kande yu o tweifri. Te dati e pasa, dan „trowe yu hebi na tapu Yehovah, dan en srefi o horibaka gi yu” (Ps. 55:22). Ma now yu abi na okasi fu teki prati na a moro moi wroko di libisma du oiti. Dati na a wroko di Yehovah Kotoigi e du na heri grontapu fu preiki a bun nyunsu èn fu gi sma leri (Tori. 1:8). Yu kan bosroiti fu luku nomo fa trawan e du a wroko disi, noso yu kan teki prati tu. No tweifri fu gebroiki den koni fu yu fu horibaka gi Kownukondre afersi. Noiti a o hati yu taki yu dini „yu Gran Mekiman na ini yu yongu yari”.—Preik. 12:1.

[Futuwortu]

San yu ben sa piki?

• Fu san ede yu musu poti marki gi yusrefi?

• San na wan tu bun marki di yu kan suku fu doro?

• San yu musu du fu man teki dopu?

• Te yu e luku san na den moro prenspari sani gi yu, dan fa dati o yepi yu fu doro den marki fu yu?

[Aksi fu a tori disi]

[Prenki na tapu bladzijde 13]

Yu poti en leki marki fu leisi Bijbel ibri dei?

[Prenki na tapu bladzijde 15]

San o yepi yu fu doro a marki di yu poti fu teki dopu?

[Prenki na tapu bladzijde 16]

San yu leri fu na agersitori disi?