Singi gi Yehovah!
Singi gi Yehovah!
„Solanga mi de na libi, mi o singi prèisesingi gi mi Gado.”—PS. 146:2.
1. San meki taki David skrifi wan tu fu den psalm fu en?
DI DAVID ben yongu, dan a ben de na ini den weigron fu Yerusalem furu yuru langa e luku den skapu fu en papa. Te David ben e luku den skapu, dan a ben kan teki ten fu luku den tumusi moi sani di Yehovah meki. A ben kan luku den stari na hemel, „den meti fu a busi”, nanga „den fowru di e frei na loktu”. Den sani di a ben si ben naki en ati trutru. Fu dati ede, a meki tumusi moi poku fu prèise a Sma di meki den wondru sani dati. Furu fu den singi di David ben skrifi de fu feni na ini a buku Psalm. *—Psalm 8:4, 5, 8-10; Da Bijbel na ini Sranantongo.
2. (a) Sortu krakti poku kan abi tapu sma? Gi wan eksempre. (b) San Psalm 34:8, 9 nanga Psalm 139:2-8 e leri wi fu a matifasi di David ben abi nanga Yehovah?
2 Soleki fa a sori, dan na a pisi ten disi fu en libi, David leri prei poku bun. A ben e prei so bun, taki Kownu Saul kari en fu kon prei a harpu gi en (Odo 22:29). A kownu ben abi broko-ede, ma te David ben e prei poku gi en, dan a ben firi moro bun. Na dati bun poku e du gi sma, srefi na ini a ten disi. Ibri leisi te David ben e prei a harpu fu en, „Saul ben e kisi ensrefi èn a ben e firi bun” (1 Sam. 16:23). Den poku nanga den singi fu David, wan man di ben abi frede gi Gado, e tyari wini kon gi wi te nanga a dei fu tide. Denki a tori! Now, moro leki 3000 yari baka di David ben gebore, milyunmilyun sma di de na ini difrenti sortu situwâsi èn di e libi na ala sei fu grontapu, e leisi den psalm fu David doronomo fu kisi trowstu nanga howpu.—2 Kron. 7:6; leisi Psalm 34:8, 9, Da Bijbel na ini Sranantongo; Psalm 139:2-8; Amos 6:5.
Poku na wan prenspari sani na ini a tru anbegi
3, 4. Sortu sani David ben seti fu meki sma prei poku na ini a tru anbegi?
3 David ben sabi prei poku, èn a ben gebroiki a koni dati na a moro bun fasi, namku fu gi glori na Yehovah. Baka di David tron kownu fu Israel, a seti sani so taki sma ben e prei moi poku na ini a tabernakel. Sowan 4000 fu den Leifisma di ben e wroko na a tempel ben kisi a wroko fu „prei poku fu prèise Yehovah”, èn 288 man ’ben kisi leri fu singi gi Yehovah èn den alamala ben sabi du a wroko fu den heri bun’.—1 Kron. 23:3, 5; 25:7.
4 David srefi ben skrifi furu fu den singi di den Leifisma ben e singi. Te wan Israelsma ben kisi a grani fu yere fa den Leifisma ben e singi wan fu den psalm fu David, dan a ben musu fu de so taki a sani dati ben naki en ati. Bakaten, di den ben tyari na ark fu a frubontu go na Yerusalem, dan „David taigi den edeman fu den Leifisma fu poti den tra Leifisma di ben de singiman, fu prei harpu, gengen, nanga tra pokusani di gersi harpu. Nanga den heri ati den ben e prei poku, so taki sma ben kan meki prisiri”.—1 Kron. 15:16.
5, 6. (a) Fu san ede sma ben e poti so furu prakseri na poku na a pisi ten di David ben de kownu? (b) Fa wi du sabi taki poku ben de wan prenspari sani na ini a tru anbegi na ini Israel fu owruten?
5 Fu san ede poku ben prenspari so na ini a ten fu David? Na fu di a kownu ben de wan pokuman? Nôno, wan tra reide ben de. Dati kon na krin hondrohondro yari baka dati, di a reti-ati Kownu Heskia seti sani so taki sma ben kan du diniwroko baka na a tempel. Na 2 Kroniki 29:25 skrifi: „Heskia taigi den Leifisma fu go tanapu na a oso fu Yehovah nanga den gengen, den harpu, èn nanga den tra pokusani di gersi harpu. Den Leifisma ben musu singi soleki fa David, a profeiti Natan, nanga Gad, a man di ben e tyari fisyun kon na krin gi Kownu, ben taigi den fu singi. Na Yehovah ben taigi den profeiti fu taki dati na so sani ben musu waka.”
6 Iya, nanga yepi fu den profeiti fu en, Yehovah taigi den anbegiman fu en fu prèise en nanga singi. Den singiman di ben de fu a priester lo ben musu libi a wroko fu den gi tra Leifisma, so taki den ben kan abi nofo ten fu meki poku, èn fu oefen den poku disi.—1 Kron. 9:33.
7, 8. Te wi musu singi den Kownukondre singi fu wi, dan san moro prenspari leki fu de bun singiman?
7 Kande yu sa taki: „Mi noiti no o man singi leki den sma di ben e singi na a tabernakel!” Ma a no ala den Leifisma di ben e prei poku, ben man du dati heri bun. Soleki fa 1 Kroniki 25:8 e sori, dan wan tu fu den „ben musu kisi leri ete”. A moi fu sabi tu taki kande tra lo fu Israel ben abi wan tu sma di ben man prei poku bun èn di ben man singi bun. Ma Yehovah ben gi den Leifisma a wroko fu meki poku. Wi kan de seiker taki ala den Leifisma ben e du a wroko fu den nanga den heri ati, awinsi den ben ’sabi prei poku heri bun’, noso awinsi den ben e „kisi leri ete”.
8 David ben lobi poku, èn a ben man prei poku heri bun. Ma a de so taki Gado e luku a sani dati wawan? Na Psalm 33:3 David ben skrifi: „Prei na tapu den harpu nanga yu heri ati èn bari fu prisiri.” San prenspari gi Yehovah, na taki wi musu prèise en ’nanga wi heri ati’.
Poku ben prenspari tu baka a ten fu David
9. Fruteri san yu ben o si èn san yu ben o yere efu yu ben de drape a dei di Kownu Salomo ben gi a tempel abra na Gado.
9 Di Salomo ben de kownu, poku ben de wan tumusi prenspari sani na ini a tru anbegi. Di den ben gi a tempel abra na Gado, dan wan bigi grupu pokuman ben de drape, èn wan grupu fu 120 man di ben e bro trompeti. (Leisi 2 Korentesma 5:12.) Bijbel e taigi wi taki „den sma di ben abi a wroko fu bro trompeti, nanga den singiman ben e meki poku leki wán man fu prèise Yehovah èn fu gi en tangi” fu di „Gado bun, bika a e du bun gi sma fu têgo”. Di a moi poku dati bigin prei, „wan wolku furu a heri oso fu Yehovah”, èn a sani dati ben sori taki Yehovah ben feni en bun. A ben musu fu gi sma groskin di den yere ala den trompeti, èn sosrefi den dusundusun sma di ben e singi na a srefi ten!—2 Kron. 5:13.
10, 11. San e sori taki den Kresten fu a fosi yarihondro ben e singi poku na ini a tru anbegi?
10 Den Kresten fu a fosi yarihondro ben e singi poku tu na ini a tru anbegi. A no de fu taki dati den anbegiman fu a fosi yarihondro no ben e kon makandra na ini tabernakel noso tempel, ma na ini oso fu brada nanga sisa. Fu di den ben kisi frufolgu, èn fu tra reide ede, meki nofo tron a ben muilek gi den fu feni bun konmakandra presi. Ma toku den Kresten dati ben e singi prèisesingi gi Gado.
11 Na apostel Paulus ben gi den Kresten brada nanga sisa fu en na ini Kolose a rai disi: „Tan frumane makandra nanga psalm, nanga singi di e prèise Gado, èn nanga moi singi di abi fu du nanga yeye afersi” (Kol. 3:16). Baka di sma poti Paulus nanga Silas na strafu-oso, dan den bigin ’begi èn den bigin singi prèisesingi gi Gado’, aladi den no ben abi singibuku (Tori. 16:25). Efu sma ben poti yu na strafu-oso, dan omeni fu den Kownukondre singi yu ben o sabi na ede?
12. Fa wi kan sori taki wi e warderi den Kownukondre singi fu wi?
12 Fu di poku prenspari so na ini a tru anbegi, meki a bun te wi e aksi wisrefi a sani disi: ’Mi e sori nofo warderi gi den Kownukondre singi? Mi e du ala san mi man fu doro biten na den gemeente konmakandra, na den bigi konmakandra, èn na den kongres, so taki mi kan singi a fosi singi makandra nanga mi brada nanga sisa? Èn mi e singi nanga mi heri ati? Te wi e singi baka a Theokrasia Diniwroko-skoro, noso baka a publikitaki, dan son pikin e si dati leki wan okasi fu opo go waka pikinso aladi dati no de fanowdu. Wi e leri den pikin fu wi fu no du dati?’ A singi di wi e singi na wan prenspari sani na ini a tru anbegi. Iya, awinsi wi sabi singi heri bun, noso awinsi wi e leri singi, toku wi alamala kan, èn wi musu singi makandra nanga wi brada nanga sisa fu prèise Yehovah.—Luku 2 Korentesma 8:12.
Kenki di ben de fanowdu na ini a ten disi
13, 14. Fu san ede a bun taki wi e singi nanga wi heri ati na den gemeente konmakandra? Gi wan eksempre.
13 Moro leki 100 yari pasa, a tijdschrift Zion’s Watch Tower fruklari san na wan fu den reide fu san ede den Kownukondre singi fu wi prenspari so. A tijdschrift ben taki: „A singi di a pipel fu Gado e singi den tru tori fu Bijbel e yepi den fu hori den sani dati na ede èn fu kon lobi den.” Furu fu den singi fu wi abi fu du nanga pisi fu Bijbel. Sobun, te wi e leri awansi wan tu fu den singi na ede, dan dati kan yepi trutru fu meki den tru tori fu Bijbel doro wi ati. A pasa furu tron taki di wan sma kon na den konmakandra fu wi fu a fosi leisi, èn a yere fa den sma na ini a gemeente e singi nanga den heri ati, dan a sani dati naki en ati trutru.
14 Wan neti na ini 1869, C. T. Russell ben komoto fu wroko go na oso, di a yere sma e singi na ini wan presi ondrosei fu wan gebow. Na a ten dati, a ben lasi howpu taki oiti a ben o kon sabi den tru tori fu Bijbel. Fu dati ede a bosroiti fu gebroiki en ten gi a bisnis fu en. A ben e prakseri taki efu a ben o meki moni, dan a ben o man gebroiki dati fu yepi sma di ben de na nowtu, awansi a no ben o man yepi den fu kon sabi Gado. Brada Russell go na ini a presi di ben dotidoti pikinso, èn di ben dungrudungru pikinso. Di a kon si taki wan kerki konmakandra ben e hori drape, dan a go sidon arki. Bakaten a skrifi taki san a yere a neti dati, „ben de wan fasi fa Gado yepi en fu kon abi a tranga bribi baka taki na En meki sma skrifi Bijbel”. Luku taki na a singi di den sma ben e singi hari Brada Russell go na a konmakandra.
15. Sortu sani di wi kon frustan moro bun, meki taki wan tu kenki ben musu kon na ini a singibuku fu wi?
15 O moro a ten e pasa, o moro wi e kon frustan den tru tori fu Bijbel moro bun. Odo 4:18 e taki: „A pasi fu den reti-ati sma de leki a leti di e bigin skèin na musudei. Safrisafri a e kon moro krin, teleki a de leki a brenki leti fu son na mindridei.” Fu di a leti e skèin moro krin, meki a de fanowdu tu taki wan tu kenki e tyari kon na ini den Kownukondre singi fu wi. Na ini den 25 yari di pasa, Yehovah Kotoigi na ini furu kondre ben prisiri fu gebroiki a singibuku di nen Singi Prèisesingi gi Yehovah. * Na ini den yari baka di a buku tyari kon na doro, wi kon frustan spesrutu tori fu Bijbel moro bun, èn sonwan fu den wortu na ini a singibuku, na wortu di wi no e gebroiki moro. Fu eksempre, wi no e taki moro fu a „nyun seti”, ma fu „a nyun grontapu”. Èn wi no e taki moro dati a nen fu Yehovah o kon „krin”, ma wi e taki dati a o kon „santa”. Te wi e luku den Bijbel leri disi, dan a de krin taki wan tu kenki ben musu kon na ini a singibuku fu wi.
16. Fa a nyun singibuku o yepi wi fu gi yesi na a rai di Paulus e gi na Efeisesma 5:19?
16 Gi a reide dati èn gi tra reide sosrefi, meki a Tiri Skin ben gi primisi fu tyari wan nyun singibuku kon na doro. A singibuku disi nen Singi gi Yehovah. A nyun singibuku fu wi abi 135 singi nomo. Fu di wi no abi fu leri so furu singi moro leki fosi, meki a musu de moro makriki gi wi fu leri awansi wan tu fu den nyun singi dati na ede. A sani disi e kruderi nanga a rai di Paulus e gi na Efeisesma 5:19.—Leisi en.
Yu kan sori taki yu e warderi den singi
17. Fa wi musu denki efu wi wani singi na ini a gemeente, awansi wi e frede fu kisi syen?
17 Kande wi e frede taki wi o kisi syen te wi e singi na den Kresten konmakandra. Wi musu meki a sani dati tapu wi fu singi? Luku a tori na a fasi disi: Te a abi fu du nanga den sani di wi e taki, dan „wi alamala e sondu furu tron”, a no so? (Yak. 3:2) Ma toku wi no e gi pasi taki den fowtu di wi e meki te wi e taki, e tapu wi fu prèise Yehovah na ini na oso-fu-oso preikiwroko. We, na so a de tu taki awansi wi no e singi so bun, toku dati no musu tapu wi fu prèise Gado nanga yepi fu singi. Yehovah di „gi libisma wan mofo fu taki”, e prisiri fu arki te wi e singi prèisesingi gi en.—Ex. 4:11.
18. Gi wan tu eksempre fa yu kan leri den wortu fu den singi.
18 Den CD di nen Sing to Jehovah—Vocal Renditions (Singi gi Yehovah–Nanga sten) de fu kisi na ini difrenti tongo. Tapu den CD disi, pokuman nanga singiman de fu yere di e prei den nyun singi disi na wan heri moi fasi. A e gi prisiri trutru fu arki den poku disi. Arki den furu tron. Na so a no o teki langa fosi yu kon sabi den wortu fu awansi wan tu fu den nyun singi fu wi. Den singi skrifi na so wan fasi, taki te yu e bigin singi wan pisi, yu kan sabi kaba san o de den tra wortu. Sobun, te yu e prei den CD, dan a ben o bun fu singi tu. Te yu e kon gwenti nanga den wortu èn nanga den poku na oso, dan a no de fu taki dati yu no o frede so moro fu singi na a Kownukondre zaal.
19. San de fanowdu fu sreka den Kownukondre singi di de fu yere tapu CD?
19 A makriki fu si den poku di e prei na den spesrutu konmakandra, den kring konmakandra, nanga den distrikt kongres, leki sani di no prenspari so. Bun furu wroko du fu meki den poku disi. Te den brada bosroiti sortu poku den o prei, dan den musu skrifi den poku disi gi den 64 pokuman fu na organisâsi. Baka dati, den pokuman e gebroiki bun furu yuru fu luku den poku di den musu oefen, èn te fu kaba den e meki opname na ini den studio na ini Patterson, New York. Tin fu den brada nanga sisa disi e libi dorosei fu Amerkankondre. Den alamala e si en leki wan grani fu meki moi poku gi den Kresten konmakandra fu wi. Wi kan sori warderi gi a muiti di den e meki na so wan lobi-ati fasi. Te a fesiman fu den bigi konmakandra nanga den kongres fu wi e aksi wi fu go sidon arki den poku di den brada sreka na wan lobi-ati fasi, dan wi musu du dati wantewante, èn wi musu poti ala wi yesi arki.
20. Sortu fasti bosroiti yu abi?
20 Yehovah e poti prakseri na den prèisesingi di wi e singi gi en. Den singi disi prenspari gi en. Meki wi singi nanga wi heri ati ibri leisi te wi e kon makandra fu teki prati na a anbegi, fu di dati sa gi en ati prisiri. Iya, awansi wi sabi singi bun, noso awansi wi e leri singi ete, meki wi „singi gi Yehovah”!—Ps. 104:33.
[Futuwortu]
^ paragraaf 1 A moi fu sabi taki 1000 yari baka di David dede, wan grupu engel sori densrefi na wan tu skapuman fu fruteri den taki a Mesias gebore. Den skapuman ben e luku den skapu fu den na ini den weigron krosibei fu Betlehem.—Luk. 2:4, 8, 13, 14.
^ paragraaf 15 Wan singibuku nanga ala den 225 singi de fu kisi na ini na ini moro leki 100 tongo.
San yu e prakseri?
• Sortu eksempre fu Bijbel ten e sori taki poku prenspari na ini na anbegi fu wi?
• Te wi e singi Kownukondre singi nanga wi heri ati, dan fa wi e gi yesi na a komando di skrifi na Mateyus 22:37?
• San na wan tu fasi fa wi kan sori taki wi e warderi den Kownukondre singi fu wi?
[Aksi fu a tori disi]
[Prenki na tapu bladzijde 23]
Yu e leri den pikin fu yu taki te wi e singi, den no musu opo go waka te dati no de fanowdu?
[Prenki na tapu bladzijde 24]
Yu e leri den wortu fu den nyun singi te yu de na oso?