No kori yusrefi nanga prakseri di no tru

„SAN yu du?”, na so Gado ben aksi Eva baka di a nyan fu a bon di a no ben mag nyan fu en. Eva piki: „Na a sneki kori mi, ne mi nyan” (Gen. 3:13). Satan ben gebroiki a sneki na wan triki fasi fu kori Eva fu trangayesi Gado. Bakaten Bijbel kari Satan ’a fosi sneki di e kori sma na heri grontapu’.​—Openb. 12:9.

A tori disi di skrifi na ini a buku Genesis e sori taki Satan abi triki, èn taki a e lei soso fu kori den wan di no de na ai. A no de fu taki dati Eva brokokindi gi den triki fu en. Toku wi no musu denki taki Satan na a wan-enkri sma di kan kori wi. Bijbel e warskow wi tu fu luku bun taki wi no e ’kori wisrefi nanga prakseri di no tru’.​—Yak. 1:22.

Kande wi feni taki noiti wi o kori wisrefi. Ma Gado musu fu abi wan reide fu san ede a e warskow wi gi a sani dati. Fu dati ede a bun taki wi e go luku san ben kan meki taki wi e kori wisrefi, èn sortu fowtu denki ben kan kori wi. Wan eksempre na ini Bijbel kan yepi wi.

Wan eksempre fu sma di ben kori densrefi

Na a pisi ten fu a yari 537 bifo Krestes, Sirus a Bigiwan fu Persia ben gi den Dyu di ben de na ini katibo na Babilon a komando fu drai go baka na Yerusalem, èn fu bow a tempel baka (Esra 1:1, 2). A yari baka dati, a pipel ben kaba nanga a fondamenti fu a nyun tempel, soleki fa Yehovah ben wani. Den Dyu di ben drai kon baka na Yerusalem ben breiti srefisrefi, èn den prèise Yehovah fu di a ben yepi den fu klari a fosi pisi fu a prenspari wroko dati (Esra 3:8, 10, 11). Ma syatu baka dati, sma bigin gens a wroko, èn a pipel ben kon lasi-ati (Esra 4:4). Sowan 15 yari baka di den ben drai go baka na a mamafoto fu den, dan den tiriman fu Persia tapu a wroko fu den na ini Yerusalem. Fu sorgu taki a wroko ben tapu trutru, dan heihei man fu a kontren drape go na Yerusalem, èn „nanga tranga den meki den Dyu tapu nanga a wroko”.​—Esra 4:21-24.

Fu di den Dyu ben kisi fu du nanga a bigi problema disi, meki den bigin kori densrefi nanga fowtu denki. Den ben taigi densrefi: „A ten no doro ete fu bow a tempel fu Yehovah” (Hag. 1:2). Den ben feni taki Gado no ben wani taki den bow a tempel wantewante. Na presi taki den suku wan fasi fu du a wani fu Gado, den tapu nanga a santa wroko di den ben kisi, èn den bigin gebroiki ala den ten fu moi den eigi oso. Hagai, a profeiti fu Gado, ben aksi den krin: „Fa unu kan tan na ini oso di abi moi udu skotu, aladi [a tempel fu Yehovah] na wan ipi broko ston?”​—Hag. 1:4.

Yu kan leri wan sani fu na eksempre disi? Efu wi ben o kon abi a fowtu denki taki Gado e draidrai fu du san a abi na prakseri, dan wi ben kan si a Kresten diniwroko leki wan sani di no de so prenspari, èn wi ben kan bigin poti ala wi prakseri na wi eigi afersi. Luku wan eksempre. Kon meki wi taki dati wan tu sma ben o kon tan na yu oso fu wan syatu pisi ten. Fu di yu sabi taki den o kon, meki yu e hasti yusrefi fu seti sani na ini na oso. Ma now yu kisi fu yere taki den sma o kon moro lati. Yu ben o tapu fu sreka sani gi den?

Ma hori na prakseri taki Hagai nanga Sakaria ben yepi den Dyu fu kon frustan taki Yehovah ben wani ete taki den bow a tempel wantewante. Hagai ben gi den a deki-ati disi: „Ala un pipel fu a kondre musu abi deki-ati . . . èn wroko go doro” (Hag. 2:4). A ben prenspari taki den go doro nanga a wroko wantewante, èn den ben musu abi na overtoigi taki Gado  ben o horibaka gi den nanga a santa yeye fu en (Sak. 4:6, 7). Yu denki taki na eksempre disi kan yepi wi fu no abi fowtu denki di abi fu du nanga a dei fu Yehovah?​—1 Kor. 10:11.

No abi fowtu denki moro, ma de nanga krin frustan

Na ini a di fu tu brifi fu en, na apostel Petrus ben poti prakseri na a ten te Yehovah o seti „nyun hemel nanga wan nyun grontapu” (2 Petr. 3:13). Petrus ben taki dati wan tu spotuman ben o meki sma tweifri efu Gado trutru o tyari kenki kon na ini den afersi fu libisma. Den ben abi a fowtu denki taki noti ben o pasa, èn taki „ala sani [ben e] tan soifri soleki fa den ben de sensi di Gado bigin meki sani” (2 Petr. 3:4). Petrus ben wani sori taki a denki dati no tru. A ben skrifi: ’Mi e memre unu fu de na ai.’ A ben memre den Kresten brada nanga sisa fu en taki den spotuman no ben abi leti. Na ini a ten di pasa, Gado ben tyari wan kenki kon kaba na ini den afersi fu libisma, iya, a ben pori ala ogrisma na heri grontapu nanga yepi fu wan bigi frudu.​—2 Petr. 3:1, 5-7.

Na ini 520 bifo Krestes, Hagai ben gi den Dyu di ben lasi-ati èn di ben tapu nanga a wroko, deki-ati na wan srefi sortu fasi. A ben gi den a rai disi: „Un prakseri disi” (Hag. 1:5). Fu di Hagai ben wani gi den deki-ati fu gebroiki den krin frustan, meki a memre den tra anbegiman san Gado ben wani, èn san A ben pramisi a pipel fu En (Hag. 1:8; 2:4, 5). Syatu baka di a pipel kisi a deki-ati dati, den bigin baka nanga a bow-wroko, aladi a tirimakti ben taigi den taki den no ben musu bow a tempel moro. Agen gensman pruberi fu tapu a bow-wroko, ma den no ben abi bun bakapisi. A tirimakti gi den primisi baka fu go doro nanga a wroko, èn na ini feifi yari den kaba bow a tempel.​—Esra 6:14, 15; Hag. 1:14, 15.

Wi musu poti prakseri na a fasi fa wi e libi

Yu denki taki te wi ben o kisi problema, dan wi ben kan lasi-ati neleki den Dyu na ini a ten fu Hagai? Efu dati ben o pasa, dan a ben o muilek gi wi fu tan preiki a bun nyunsu fayafaya. Ma san ben kan meki wi lasi-ati? We, wi ben kan kisi fu du nanga a kruktudu fu a sistema disi. Prakseri fa a ben de nanga Habakuk, di ben aksi: „O langa mi musu bari fu yu yepi mi? O langa yu o meki sma du ogri nanga mi, fosi yu frulusu mi?” (Hab. 1:2) Fu di wan Kresten ben kan denki taki a e teki langa fosi Gado yepi en, meki a kan frigiti taki a ten e kon syatu moro nanga moro. Na presi fu dati a e bigin si en leki wan moro prenspari sani fu libi wan switi libi. Yu denki taki a sani dati kan pasa nanga yu? Efu wi ben o denki so, dan wi ben o kori wisrefi. A prenspari srefisrefi fu gi yesi na a rai di Bijbel e gi wi fu ’poti prakseri’ na den pasi fu wi, èn fu „de na ai”! Wi ben kan aksi wisrefi a sani disi: ’A musu fruwondru mi taki na ogri sistema disi tan moro langa leki san mi ben fruwakti?’

Wan pisi ten di Bijbel ben taki fu en na fesi kaba

Prakseri san Yesus ben taki fu a kaba fu a sistema disi. Na ini na Evangelietori fu Markus, Yesus ben taki wan profeititori di abi fu du nanga  den lasti dei. Na ini a profeititori dati Yesus e gi wi a rai ibri tron baka fu tan na ai (Mark. 13:33-37). Wi e kisi a srefi warskow dati na ini a profeititori di e taki fu a bigi dei fu Yehovah na Armagedon (Openb. 16:14-16). Fu san ede Bijbel e gi wi a warskow disi ibri tron baka? A de fanowdu taki wi e kisi den warskow disi, bika te sma musu wakti tumusi langa fu wan sani, dan makriki den kan lasi howpu taki a sani dati o kon.

Yesus ben sori taki a de prenspari taki wi e tan na ai doronomo aladi wi e wakti a kaba fu a sistema disi. A ben taki fu wan sma di fufuruman ben kon fufuru sani na ini en oso. San a sma dati ben musu du so taki a sani dati no ben miti en? A ben musu tan na ai a heri neti. Na a kaba fu na agersitori fu en, Yesus e gi wi a rai disi: „Un musu de srekasreka tu, bika a Manpikin fu libisma o kon na wan yuru di unu no ben prakseri.”​—Mat. 24:43, 44.

Na agersitori dati e sori taki wi musu de klariklari fu wakti, awinsi na gi wan langa pisi ten. Ma awinsi a gersi leki na ogri sistema disi tan moro langa leki san wi ben fruwakti, toku wi no musu broko wi ede tumusi. Wi no musu abi a fowtu denki taki ’a ten fu Yehovah no doro ete’. Te wi ben o denki so, dan dati kan meki wi lasi a faya di wi abi fu preiki a bun nyunsu fu a Kownukondre.​—Rom. 12:11.

Tapu nanga fowtu denki

Te a abi fu du nanga fowtu denki, dan a gronprakseri na Galasiasma 6:7 e leri wi wan prenspari sani. A tekst dati e taki: „No kori unsrefi . . . San wan sma e sai, na dati a sa koti tu.” Efu wan sma no e prani sani na tapu wan pisi gron, dan makriki takru wiwiri kan tapu a heri gron. Na so a de tu taki te wi no e gebroiki wi frustan, dan wi kan bigin kisi fowtu denki. Fu eksempre, wi ben kan taigi wisrefi: ’Mi sabi taki a dei fu Yehovah o kon, ma a no now.’ Te wi ben o bigin denki so, dan dati kan meki taki wi no e si a Kresten diniwroko leki wan prenspari sani moro. Te fu kaba, wi ben kan lasi a faya di wi abi gi na anbegi fu wi. Efu dati ben o pasa, dan a dei fu Yehovah kan miti wi sondro taki wi de srekasreka.​—2 Petr. 3:10.

Ma efu wi e tan meki muiti fu „kon sabi san na Gado en wani di bun, di e plisi en èn di de volmaakti”, dan wi no sa kon abi fowtu denki (Rom. 12:2). Wan fu den moro bun sani di kan yepi wi fu no kisi fowtu denki, na te wi e leisi Gado Wortu doronomo. Bijbel kan tranga na overtoigi di wi abi taki ala ten Yehovah e handri na a yoisti ten.​—Hab. 2:3.

Te wi e studeri Bijbel, te wi e begi, te wi e go na den konmakandra doronomo, te wi e preiki a bun nyunsu, èn te wi e du bun sani gi trawan, dan dati o yepi wi fu tan ’hori bun na prakseri taki a dei fu Yehovah o kon’ (2 Petr. 3:11, 12). Yehovah o si taki wi e horidoro. Na apostel Paulus e memre wi na a sani disi: „No meki wi tapu fu du san bun, bika na a reti ten wi sa koti efu wi no kon weri.”​—Gal. 6:9.

A no de fu taki dati now a no a ten fu kori wisrefi nanga a denki taki a dei fu Yehovah no o kon ete. Na presi fu dati, disi na a ten fu tranga wi bribi, fu di a dei fu Yehovah kon moro krosibei.

[Prenki na tapu bladzijde 4]

Hagai nanga Sakaria ben gi den Dyu deki-ati fu go doro nanga a bow-wroko

[Prenki na tapu bladzijde 5]

Fa a ben o de efu a sma fu na oso ben sabi taki a fufuruman ben o kon?