A e gi yu prisiri trutru fu studeri Gado Wortu?

„DI MI bigin leisi Bijbel doronomo, dan a sani dati no ben e gi mi prisiri, ma mi ben e si en leki wan hebi”, na so Lorraine e taki. „Mi no ben man frustan den sani di mi ben e leisi, èn fu dati ede a ben e pasa furu tron taki tra sani ben e puru mi prakseri na san mi ben e studeri.”

Tra sma e taki dati di den bigin leisi Bijbel, dan dati no ben e gi den prisiri tu. Ma den go doro fu di den ben sabi taki a bun fu leisi den Santa Buku fu Bijbel. Marc e taki: „A kan pasa makriki taki tra sani e puru wi prakseri te wi e leisi Bijbel èn te wi e studeri. Mi ben musu begi Gado furu leisi fu yepi mi fu leisi Bijbel doronomo, èn mi ben musu du furu muiti tu.”

San kan yepi yu fu kisi moro warderi gi Gado Wortu, Bijbel? San kan yepi yu fu kisi prisiri te yu e leisi Bijbel? Luku wan tu sani di yu kan du.

Marki di yu kan poti èn a fasi fa yu kan doro den

Te yu o leisi Bijbel, dan begi Gado fu yepi yu èn no meki sani puru yu prakseri na san yu e leisi. Aksi Yehovah fu yepi yu fu kweki wan angri fu studeri a Wortu fu en. Begi en fu opo yu ati nanga yu frustan, so taki yu kan frustan a koni fu en moro bun (Ps. 119:34). Te wi no e studeri Bijbel nanga a denki disi, dan heri esi wi o si en leki wan plekti nomo, èn wi no o wani du en moro. Lynn e taki: „Son leisi mi e leisi tumusi esi, èn mi e misi ala den moi finifini penti. Nofo tron, mi no e frustan den prenspari sani so bun. Ma mi e begi Gado fu yepi mi so taki mi kan dwengi misrefi. Disi e yepi mi fu hori mi prakseri na den sani di mi e studeri.”

Warderi den sani di yu e leri. Hori na prakseri taki a kan kibri wi libi te wi e frustan den tru tori fu Bijbel èn te wi e fiti den sani di wi leri. Fu dati ede, du muiti fu leri penti di kan tyari wini kon gi yu, èn fiti den sani dati na ini yu libi. Chris e taki: „Mi e luku fu feni penti di kan yepi mi fu kon sabi sortu takru gwenti nanga denki mi abi. A e gi mi deki-ati fu si fa den tori na ini Bijbel èn na ini den publikâsi fu wi e tyari wini kon gi mi, aladi den skrifiman no sabi mi srefisrefi.”

Poti marki di yu man doro. Pruberi fu leri nyun sani fu sma na ini Bijbel. Yu kan leri moi sani fu furu fu den sma dati te yu e ondrosuku sani na ini Inzicht in de Schrift noso na ini a Index van Wachttoren Publikaties. Te yu e kon sabi man nanga uma na ini Bijbel leki trutru sma di abi den eigi fasi nanga den eigi firi, dan na eksempre fu den o abi moro krakti na yu tapu.

Suku fu kon sabi nyun fasi fa yu kan taki-go-taki-kon nanga sma fu Bijbel (Tori. 17:2, 3). Sophia e studeri nanga a marki dati. A e taki: „Mi wani leri nyun fasi fa mi kan taki-go-taki-kon nanga sma di mi e miti na ini a preikiwroko, noso na tra okasi. Dati o yepi mi fu taki krin nanga sma fu den tru tori fu Bijbel. A Waktitoren na wan moi sani di e yepi mi fu doro a marki dati.”​—2 Tim. 2:15.

Si den Bijbel tori na yu fesi. „A wortu fu Gado de na libi”, na so Hebrewsma 4:12 e taki. Te yu e leisi Bijbel, dan pruberi fu si san den sma na ini Bijbel ben e si, so taki a boskopu fu Gado kan abi krakti na yu tapu. Pruberi fu yere san den ben e yere èn fu firi san den ben e firi. Luku fa den ondrofenitori fu den e kruderi nanga  spesrutu situwâsi na ini yu libi. Teki leri fu a fasi fa den ben e handri na ini spesrutu situwâsi. Disi o yepi yu fu kon frustan den Bijbel tori èn fu kisi wini fu den.

Poti prakseri na Bijbeltekst di muilek fu frustan èn na den fruklari fu den tekst dati, so taki yu kan frustan den krin. Teki nofo ten ibri leisi fu studeri Gado Wortu. Kande yu sa feni moi penti di yu sa wani ondrosuku moro fini. Luku san den wortu di yu no sabi wani taki, poti prakseri na den sani di skrifi na ondrosei fu den bladzijde, èn poti prakseri na tra tekst di abi fu du nanga a tekst di yu e ondrosuku. O moro yu e frustan den sani di yu e studeri, èn o moro yu e fiti den sani dati na ini yu libi, o moro a Wortu fu Gado o gi yu prisiri. Te yu e du den sani dati, dan neleki a psalm skrifiman yu o man taki: „Den wèt di [Yehovah] e memre mi fu hori, de leki wan gudu gi mi ala ten. Den e meki mi ati prisiri.”​—Ps. 119:111.

No studeri sani esi-esi. Teki nofo ten fu studeri. Gebroiki pikinmoro a srefi ten di yu abi fanowdu fu sreka yusrefi gi den gemeente konmakandra. Raquel e taki: „Nofo tron mi abi so furu sani na mi ede taki mi no man studeri bun. Fu dati ede, a moro bun gi mi te mi e studeri wan syatu pisi ten. Disi e yepi mi fu kisi moro wini fu a studie fu mi.” Chris e taki: „Te mi e hasti misrefi fu studeri, dan mi konsensi e trobi mi, fu di mi no e leri furu. Nofo tron den sani di mi e studeri no e doro mi ati.” Dati meki a bun fu teki nofo ten fu studeri.

Kweki wan moro bigi angri fu studeri Gado Wortu. Na apostel Petrus ben taki: „Neleki nyunyun pikin un musu kweki wan lostu gi a soifri merki di de na ini a wortu fu Gado, so taki unu kan gro èn kisi frulusu nanga yepi fu dati” (1 Petr. 2:2). Nyunyun pikin no abi fu kweki wan angri gi merki. Na angri dati e kon fu ensrefi. Ma den Buku fu Bijbel e sori taki wi musu kweki wan angri gi Gado Wortu. Te yu e leisi awansi wán bladzijde fu Bijbel nomo ibri dei, dan heri esi yu o kisi na angri dati. A sani di ben gersi wan muilek sani na ini a bigin, heri esi o tron wan sani di e gi yu prisiri.

Denki dipi fu pisi na ini Bijbel. Yu sa kisi furu wini tu te yu e denki dipi fu den sani di yu e leisi. Disi o yepi yu fu si san den Bijbel tori di yu e ondrosuku, abi fu du nanga makandra. Heri esi yu o kisi furu koni, èn dati na wan tumusi moi sani fu abi.​—Ps. 19:14; Odo 3:3.

 Yu sa kisi wini trutru

A tru taki wi musu meki furu muiti fu studeri Gado Wortu bun, ma wi sa kisi bun furu blesi tu. Yu sa kon frustan Gado Wortu moro bun (Hebr. 5:12-14). A koni di yu sa kisi te yu e studeri Bijbel, sa meki taki yu de koloku, yu sa kweki moi fasi, èn yu sa abi wan korostu firi. A koni di de fu feni na ini a Wortu fu Gado, na „wan bon di e gi libi” gi den wan di e teki a koni dati èn di e fiti en na ini den libi.—Odo 3:13-18.

Te yu e studeri Gado Wortu finifini, dan dati kan yepi yu fu kon abi wan ati di abi frustan (Odo 15:14). Dati o yepi yu fu gi sma rai di e komoto fu Bijbel, èn a rai dati o abi krakti na den tapu. Te yu e teki bosroiti di e kruderi nanga den rai di de fu feni na ini Bijbel èn na ini den publikâsi fu „a getrow èn koni srafu”, dan yu o ondrofeni fa a Wortu fu Yehovah sa gi yu krakti baka (Mat. 24:45). Boiti dati, yu sa kon abi wan tranga bribi. Yu sa kon abi wan moro bun denki fu sani, èn a Wortu fu Gado o abi krakti tapu den sani di yu e denki, den sani di yu e du, èn den sani di yu e taki. Boiti dati, ala sani di yu o du fu plisi Gado, o waka bun.​—Ps. 1:2, 3.

Te yu abi tranga lobi gi Gado, dan dati o gi yu deki-ati fu fruteri trawan fu a bribi fu yu. A sani disi kan tyari furu wini kon tu gi yu. Sophia e meki muiti fu memre difrenti Bijbeltekst, èn a e gebroiki den tekst disi fu hari a prakseri fu ososma. Na so fasi a kan abi bun bakapisi na ini a Kresten diniwroko fu en, èn a e du a wroko dati nanga moro prisiri. A e taki: „A e naki mi ati te mi e si fa den sani di mi e fruteri sma fu Bijbel abi krakti na den tapu.”

Ma a moro moi wini di yu sa kisi te yu e si en leki wan prisiri fu studeri Gado Wortu, na taki yu o kisi wan bun matifasi nanga Yehovah. Te yu e studeri Bijbel, dan dati o yepi yu fu kon sabi den markitiki fu Gado, èn yu sa kon abi warderi gi a lobi fu en, a bun-ati fu en, èn a retidu fu en. Nowan enkri tra sani di yu e du prenspari moro dati, èn nowan enkri tra sani e tyari moro wini kon. Sobun, teki nofo ten fu studeri Gado Wortu. Yu sa kisi wini trutru te yu e du dati.​—Ps. 19:7-11.

[Faki/​Prenki na tapu bladzijde 5]

LEISI GADO WORTU: MARKI DI YU KAN POTI ÈN A FASI FA YU KAN DORO DEN

▪ Te yu o leisi Bijbel, dan begi Gado fu yepi yu èn no meki sani puru yu prakseri na san yu e leisi.

▪ Warderi den sani di yu e leri.

▪ Poti marki di yu man doro.

▪ Suku fu kon sabi nyun fasi fa yu kan taki-go-taki-kon fu Bijbel.

▪ Si den Bijbel tori na yu fesi.

▪ Poti prakseri na Bijbeltekst di muilek fu frustan èn na den fruklari fu den tekst dati, so taki yu kan frustan den krin.

▪ No studeri sani esi-esi.

▪ Kweki wan moro bigi angri fu studeri Gado Wortu.

▪ Denki dipi fu pisi na ini Bijbel.

[Prenki na tapu bladzijde 4]

Te yu e leisi Bijbel, dan si yusrefi na ini wan srefi sortu situwâsi