„Mi malengri now, ma no fu ala ten!”

Soleki fa Sara van der Monde fruteri

Nofo tron sma e taigi mi: „Sara, yu e lafu so moi. Fa a du kon taki yu e prisiri so ala ten?” Dan mi e taigi den taki mi abi wan moi howpu. Fu taki en syatu: „Mi malengri now, ma no fu ala ten!”

MI GEBORE na ini 1974 na Parijs na ini Fransikondre. Nanga furu muiti mi mama meki mi èn bakaten datra kon si taki mi ben abi wan problema na mi edetonton. Disi meki taki mi no ben man buweigi mi anu nanga futu bun èn sma no ben e frustan mi te mi ben e taki. Mi ben kisi fadonsiki noso stoipi tu èn mi ben man kisi tra siki makriki.

Di mi ben abi tu yari, mi famiri froisi go na Melbourne na Australia. Tu yari baka dati mi papa gowe libi mi nanga mi mama. Mi e memre taki dati na a fosi leisi di mi firi taki Gado de krosibei fu mi. Mi mama na wan Kotoigi fu Yehovah èn doronomo a ben e tyari mi go na den Kresten konmakandra pe mi leri taki Gado lobi mi èn taki a e broko en ede nanga mi. Fu di mi kon sabi disi èn fu di mi mama sori mi taki a lobi mi èn taki a e horibaka gi mi, meki mi no ben e frede aladi a libi fu wi ben kenki.

Mama leri mi tu fa fu begi Yehovah. Fu taki en leti, mi feni en moro makriki fu begi leki fu taki. Te mi e begi, mi no abi fu taki den wortu fu di mi kan taki na ini misrefi. A de neleki mi e yere misrefi e taki krin. Fu di sma no man frustan bun san mi e taki, a e gi mi trowstu fu sabi taki Yehovah e frustan ala san mi e taki, awinsi mi e taki na ini misrefi noso awinsi mi e pinapina fu taki sani nanga mi mofo.​—Ps. 65:2.

Fa mi e du nanga den problema fu mi

Di mi ben abi feifi yari, a siki fu mi ben kon moro ogri. Dati meki den ben gi mi wan tu isri tiki di mi ben musu tai na mi futu fu man waka. Na presi fu waka, mi ben e seiriseiri wan sortu fasi. Di mi ben abi 11 yari, mi no ben man waka moro. Bakaten mi no ben man komoto na bedi srefi sondro wan masyin di e opo mi poti na ini mi rolsturu di mi kan buweigi nanga wan tu knop.

A tru taki son tron mi e firi brokosaka fu di mi e siki. Ma dan mi e prakseri wan sani di mi famiri e taki ala ten: „No broko yu ede nanga san yu no man du. Du nomo san yu man du.” Disi gi mi a deki-ati fu leri rèi asi, fu leri seiri boto, èn fu leri pari boto. Mi lobi fu go na boiti tu pe wi e tan na ini tenti èn mi man rèi wan wagi srefi na den pasi pe tra wagi no e rèi! Fu di mi lobi moi sani, meki mi lobi ferfi moi skedrei, nai krosi, meki mamio, nai moimoi sani na tapu krosi, èn meki moimoi sani nanga klèidoti.

A siki fu mi e meki taki mi no man du furu sani èn dati meki furu sma aksi densrefi efu mi man dini Gado leki wan bigisma di de nanga en  krinkrin frustan. Di mi ben abi 18 yari, wan skoromisi taigi mi taki mi musu lowe gowe fu oso fu man komoto na ini a kerki fu mi mama. A ben wani seti wan tanpresi gi mi srefi. Ma mi taigi en taki mi no ben o libi a bribi fu mi noiti èn taki mi ben o gowe fu oso te mi ben de seiker taki mi ben man tan mi wawan.

A no langa baka di a sani disi pasa, mi teki dopu leki wan Kotoigi fu Yehovah. Tu yari baka dati mi froisi go tan na wan presi pe den e yuru kamra. Mi breiti nanga a presi disi fu di mi e kisi a yepi di mi abi fanowdu èn mi man tan mi wawan.

Wan sani di mi no ben fruwakti

Na ini den yari di pasa, mi kisi tra tesi tu. Wan dei mi skreki srefisrefi di wan boi na skoro di ben malengri tu aksi mi fu trow nanga en. Biginbigin mi ben lobi a tori. Neleki furu yongu uma, misrefi sa wani trow wan dei. Ma mi no denki taki wi ben o abi wan koloku libi, soso fu di wi abi a srefi siki. Boiti dati, a yonkuman no ben abi a srefi bribi leki mi. Den sani di wi ben e bribi no ben de a srefi, wi no ben lobi du den srefi sani, èn wi no ben e prakseri a srefi fu sani di wi ben sa wani du na ini a ten di e kon. Sobun, fa wi ben o man libi makandra? Mi ben abi a fasti bosroiti tu fu gi yesi na a krin komando fu Gado fu trow soso nanga wan sma di abi a srefi bribi leki mi (1 Kor. 7:39). Dati meki mi taigi a yonkuman na wan switi fasi taki mi no ben o man trow nanga en.

Te na a dei fu tide, mi sabi taki mi teki a yoisti bosroiti. Mi de seiker taki mi o de koloku na ini a nyun grontapu di Gado pramisi (Ps. 145:16; 2 Petr. 3:13). Ma solanga a ten dati no doro, mi o tan dini Yehovah èn mi o prisiri awinsi mi abi problema.

Mi e angri fu si a dei te mi o dyompo opo fu mi rolsturu èn lon leki wan dia. Dan mi o bari: „Mi ben malengri, ma now mi gosontu fu ala ten!”