„Yu wortu e taki san tru.”​—YOH. 17:17.

1. San na wan moi sani di yu e memre fu a fosi leisi di yu taki nanga Yehovah Kotoigi? Fa disi meki yu si taki den de tra fasi leki den sma fu tra kerki?

PRAKSERI a fosi leisi di yu ben abi wan bun takimakandra nanga wan Yehovah Kotoigi. San yu man memre fu a takimakandra dati? Furu fu wi ben o taki dati wi ben lobi a fasi fa den Kotoigi ben e gebroiki Bijbel fu gi piki tapu den aksi fu wi. Wi ben breiti srefisrefi di wi kon sabi san Gado o du nanga grontapu, san e pasa nanga wi te wi dede, èn sortu howpu de gi den lobiwan fu wi di dede!

2. Sortu sani meki taki yu lobi Bijbel?

² Ma di wi studeri Bijbel go moro fara, wi kon si taki a no e taki nomo fu sani di abi fu du nanga a libi, dede, èn a ten di e kon. Wi kon lobi en fu di wi kon si taki Bijbel na a moro bun buku di e sori wi fa fu libi na ini a grontapu disi. Den rai na ini Bijbel yepi sma ala ten èn den sma di e du san a e taki de koloku èn den abi wan bun libi. (Leisi Psalm 1:1-3.) Ala ten tru Kresten si Bijbel „leki a wortu fu Gado”, bika „na dati a de trutru”. Den no e si en „leki a wortu fu libisma” (1 Tes. 2:13). Te wi o luku syatu fa sma fu fositen ben e gebroiki Gado Wortu èn fa sonwan fu den no ben poti prakseri na dati, dan wi o man si suma abi trutru lespeki gi Gado Wortu èn suma no abi dati.

FA WAN MUILEK PROBLEMA LUSU

3. Sortu problema ben kan pori a wánfasi na ini a Kresten gemeente? Fu san ede disi ben de wan bigi problema?

³ Sowan 13 yari ben pasa baka di Kornelius, a fosi trakondre sma di no ben besnèi, tron wan salfu Kresten. Na a ten dati, furu trakondre sma tron Kresten tu. Disi meki taki wan problema kon di ben kan pori a wánfasi na ini a Kresten gemeente. Fu di furu trakondre sma ben e teki a Kresten bribi, meki sma bigin aksi densrefi efu trakondre sma ben kan teki dopu sondro fu besnèi soleki fa den Dyu gwenti fu du. Disi ben de wan muilek sani gi den Dyu.  Den Dyu di ben e gi yesi na a Wèt no ben e go na ini den oso fu trakondre sma. Sobun, yu kan frustan o muilek a ben o de gi den fu si wan trakondre sma di no besnèi, leki wan brada fu den. Den Dyu di tron Kresten ben kisi furu frufolgu fu di den ben gowe libi a Dyu bribi. Sobun, efu den ben o teki trakondre sma di no besnèi leki den Kresten brada, dan disi ben o tyari moro problema nanga pratifasi kon na mindri den sma fu a Kresten bribi èn den wan fu a Dyu bribi.​—Gal. 2:11-14.

4. Suma kon makandra fu lusu a problema? Sortu sani wan sma ben kan aksi ensrefi fu a konmakandra di den ben hori?

⁴ Na ini a yari 49, den apostel nanga den owru man fu Yerusalem di ben de Dyu di besnèi, „kon makandra fu taki fu a tori disi” (Tori 15:6). A konmakandra disi no ben de wan soi kerki konmakandra pe sma e haritaki fu pikinpikin sani ede. Na presi fu dati, a ben de wan span konmakandra pe den ben e luku fa den ben kan gebroiki den leri fu Bijbel fu lusu a problema disi. Ibri sma di ben abi fu du nanga a tori disi ben taki fa en ben e si a tori. Fa den ben o lusu a problema? Den ben o meki den eigi denki abi krakti tapu a bosroiti di den ben o teki? Den Dyu brada ben o teki wan bosroiti teige den tra brada di no ben de Dyu? Den owruman ben o wakti fu teki wan bosroiti teleki a situwâsi na ini Israel ben kon moro bun gi den Kresten? Noso den ben o taki nomo dati den agri nanga wan sani, soso fu di wan bosroiti ben musu teki?

5. Fu san ede a konmakandra di hori na Yerusalem na ini a yari 49, ben de heri tra fasi leki den kerki konmakandra di hori na ini den hondrohondro yari baka dati?

⁵ Na ini a ten disi, te den kerki e hori krutu èn te den kerki fesiman e hori konmakandra, a de so nofo tron taki den fesiman e taki dati den e agri nanga wan bosroiti aladi dati no de so. Den e du disi soso fu di wan bosroiti musu teki. Boiti dati, den e du ala sortu sani fu meki trawan teki a sei fu den. Ma nowan fu den sani disi pasa na a konmakandra na ini Yerusalem. Toku den ben man teki wan bosroiti di ala sma feni bun. Fa dati kan? Aladi ibriwan fu den ben abi den eigi denki, toku ala sma drape ben abi lespeki gi Gado Wortu èn den alamala ben sabi taki na ini den santa buku dati den ben o feni a lusu fu a problema.​—Leisi Psalm 119:97-101.

6, 7. Fa den gebroiki Bijbel fu bosroiti efu wan sma musu besnèi?

⁶ A tekst di yepi den fu lusu a problema ben de Amos 9:11, 12. Tori fu den apostel 15:16, 17 e taki fu a tekst disi, èn drape skrifi: „Mi o drai kon baka fu bow a broko kampu fu David baka. Mi o meki a brokopresi disi kon bun baka èn mi o meki a tanapu leti-opo. Na so den wan di tan abra fu a pipel disi kan suku Yehovah fayafaya, makandra nanga ala trakondre sma di e tyari mi nen, na so Yehovah taki.”

⁷ Ma wan sma kan denki kande taki a tekst disi no e sori taki den trakondre sma di tron Kresten, no ben abi fu besnèi. Dati tru. Ma na so den Dyu Kresten ben frustan a tekst disi. Fu san ede? We, efu wan trakondre sma ben besnèi èn a ben teki a Dyu bribi, dan den Dyu no ben e si so wan sma leki wan trakondre sma moro. Den ben e si en leki wan brada fu den, soleki fa a tekst e sori (Eks. 12:48, 49). Fu eksempre, na ini a Septuaginta vertaling fu Bagster, wi e leisi na Ester 8:17: „Furu fu den trakondre sma ben besnèi èn den tron Dyu.” Na ini a tekst fu Amos „den wan di tan abra” fu Israel, na den Dyu nanga den trakondre sma di besnèi èn di teki a Dyu bribi. „Ala trakondre sma” na den trakondre sma di no besnèi. Efu Bijbel e taki dati den tu grupu disi ben o tron wán pipel di ben o tyari Gado nen, dan a de krin fa den ben musu si makandra. Sobun, den trakondre sma no ben abi fu besnèi fu man tron Kresten.

8. Fu san ede deki-ati ben de fanowdu fu teki a bosroiti èn fu horibaka gi en?

⁸ Gado Wortu nanga en yeye yepi den reti-ati Kresten brada disi fu man teki wan bosroiti di den alamala feni bun (Tori 15:25). Aladi a bosroiti disi ben o tyari moro problema kon gi den Dyu Kresten, toku den wan di ben e tai hori na Gado horibaka gi a bosroiti di den brada teki nanga yepi fu Bijbel.​—Tori 16:4, 5.

 A DE KRIN TAKI TRU KRESTEN DE TRA FASI

9. Sortu prenspari sani meki taki falsi leri kon na ini a Kresten bribi? Sortu prenspari leri fu a Kresten bribi kon moksi nanga falsi leri?

⁹ Na apostel Paulus ben taki na fesi dati falsi leri ben o kon na ini a Kresten bribi, baka te den apostel dede. (Leisi 2 Tesalonikasma 2:3, 7.) Wan tu fu den sma di no ben o wani teki „a soifri leri”, ben o de sma di ben abi frantwortu na ini a gemeente (2 Tim. 4:3). Paulus ben gi den owruman na ini a ten fu en a warskow disi: „Sma na un mindri o taki sani di no tru, fu hari den disipel kon na den baka” (Tori 20:30). A buku The New Encyclopædia Britannica e taki fu wan prenspari sani di meki taki falsi leri kon na ini a Kresten bribi. A e taki dati son Kresten ben kon sabi den leri fu den Griki sabiman. Den bigin gebroiki den leri disi fu fruklari a Kresten bribi, fu di na so fasi a ben e gersi leki den koni kefalek èn dati ben meki den firi bun. Den ben e denki tu taki te den ben fruklari a Kresten bribi na so wan fasi, dan den sma di kisi hei skoroleri èn di ben e dini tra gado, ben o wani tron Kresten tu. Wan prenspari leri fu a Kresten bribi di den moksi nanga falsi leri, abi fu du nanga Yesus Krestes. Bijbel e taki dati en na a Manpikin fu Gado, ma den sma di ben lobi den leri fu den Griki sabiman ben e taki dati en na Gado.

10. Fa den kerki fesiman ben kan lusu a tori di ben abi fu du nanga Yesus Krestes?

¹⁰ Bakaten den kerki fesiman hori wan tu kerki konmakandra fu taki fu a tori disi. Efu den sma na den konmakandra ben gebroiki Bijbel fu lusu a tori disi, dan den ben o man lusu en makriki. Ma furu fu den no ben feni den sani di Bijbel e taki prenspari. Fu taki en leti, furu fu den ben teki wan bosroiti gi densrefi kaba, fosi den kon na den konmakandra èn noti ben kan meki den kenki prakseri. Den sani di den skrifi fu den bosroiti di den teki na den konmakandra disi, pikinmoro no e taki noti fu Bijbel srefi.

11. San ben de moro prenspari gi den kerki fesiman di den ben musu teki wan bosroiti? Fu san ede dati ben de moro prenspari gi den?

¹¹ Fu san ede den kerki fesiman no ben e gebroiki Bijbel so furu te den ben e teki bosroiti? A sabiman Charles Freeman taki dati disi de so fu di Bijbel no e agri nanga a denki fu den taki Yesus na Gado. Yesus srefi sori taki Gado bigi moro en. Fu di den fesiman disi si taki noti na ini Bijbel e horibaka gi a denki fu den, meki den ben e si den kerki gwenti nanga tra denki fu libisma moro prenspari leki san skrifi na ini den Bijbel buku di e taki fu Yesus en libi. Srefi na ini a ten disi furu kerki fesiman e bribi taki den sani di den Kerki Tata taki, prenspari moro Gado Wortu! Yusrefi ben o si dati efu yu ben o taki fu a Dri-wánfasi nanga wan sma di kisi leri fu kerkitori.

12. Sortu makti a grankownu ben abi?

¹² Den grankownu fu Rome ben abi furu makti na den sortu kerki konmakandra disi. Professor Richard E. Rubenstein ben skrifi fu eksempre, san pasa na a Konmakandra fu Nicea. A skrifi taki a nyun grankownu Konstantijn ben meki den beskopu kon gudu srefisrefi. Fosi wan yari pasa, a gi den ala sani baka di den ben lasi. Den kisi den kerki fu den baka, den wroko fu den, nanga den nen di sma ben gi den fu gi den grani. Boiti dati, a gi den spesrutu grani tu neleki fa den priester fu den tra gado ben e kisi dati fosi. Na so Konstantijn ben man abi furu krakti tapu den bosroiti di teki na a Konmakandra fu Nicea. Kande a ben man kenki sonwan fu den bosroiti srefi. Charles Freeman ben skrifi tu taki baka a konmakandra dati, a grankownu bigin kisi moro makti na ini kerki. A meki kerki abi furu makti na ini a kondre èn a ben man kenki den kerkileri tu.​—Leisi Yakobus 4:4.

13. Fu san ede yu denki taki den kerki fesiman no ben wani teki den leri fu Bijbel?

¹³ Den kerki fesiman no ben wani teki Yesus Krestes leki a Manpikin fu Gado. Toku furu sma di trawan no ben e si leki prenspari sma na ini a kondre, ben e bribi taki Yesus Krestes na a Manpikin fu Gado. Den ben e frustan krin san den ben e leisi na ini Bijbel èn na dati den ben e bribi tu. Ma den kerki fesiman ben wani den  gudu nanga a makti di a grankownu ben kan gi den èn dati meki den no ben wani teki san skrifi na ini Bijbel. Gregorius fu Nazianze ben de wan kerki fesiman di ben e libi na a ten dati. A ben krutu a fasi fa den sma di e seri krosi, di e kenki moni, di e seri gruntu èn di de futuboi srefi, ben e taki fu kerki. A no ben lobi en kwetikweti taki den sortu sma disi ben e sori trawan taki a Manpikin a no a Tata, taki a Tata bigi moro a Manpikin, èn taki na a Tata meki a Manpikin. Den sma disi ben e gebroiki Bijbel fu sori taki den sani disi tru. A ben o moro bun efu Gregorius fu Nazianze nanga den tra kerki fesiman ben arki den sma disi, fu di den fesiman disi no ben man gebroiki Bijbel fu sori taki den sani di den ben e taki, tru!

„ALEISI” NANGA „TAKRU WIWIRI” E GRO MAKANDRA

14. Fu san ede wi kan taki dati sensi a fosi yarihondro, tru Kresten di salfu nanga santa yeye ben de na grontapu?

¹⁴ Nanga yepi fu wan agersitori, Yesus ben sori taki sensi a fosi yarihondro yu ben o abi tru Kresten na grontapu di salfu nanga santa yeye. A ben taki dati den Kresten disi ben o de leki „aleisi” èn „takru wiwiri” ben o gro na den mindri (Mat. 13:30). A no de fu taki dati wi no man taki krin suma noso sortu grupu na den sma di Yesus agersi nanga na aleisi. Ma wi sabi taki ala ten sma ben de na grontapu di ben abi a deki-ati fu sori san Gado Wortu e taki trutru èn di ben sori sortu kerkileri no e kon fu Bijbel. Meki wi poti prakseri na wan tu fu den sma disi.

15, 16. Fruteri fu wan tu sma di ben abi lespeki gi Gado Wortu.

¹⁵ Granbeskopu Agobard fu Lyon na ini Fransikondre ben libi fu a yari 779 te go miti 840. A ben sori taki sma no kan gebroiki popki fu anbegi Gado èn a ben de teige a gwenti di den kerki ben abi fu gi grani na son sma di den ben e si leki santawan. Boiti dati, a ben de teige tra kerkigwenti nanga kerkileri di no e kruderi nanga Bijbel. Beskopu Claudius di ben e libi na a srefi pisi ten dati, ben de teige den kerkigwenti tu. A ben sori tu taki sma no musu begi den santawan èn den no musu anbegi tra sani. Na ini a di fu 11 yarihondro yu ben abi a prenspari kerki fesiman Berengarius fu Tours na ini Fransikondre. Den ben puru en fu a kerki fu di a ben de teige a leri fu Lomsu Kerki taki a win nanga a brede e tron Yesus brudu nanga skin na wan wondru fasi. A ben feni tu taki den leri fu Bijbel prenspari moro den kerkigwenti.

¹⁶ Na ini a di fu 12 yarihondro yu ben abi tu tra sma di ben lobi den tru tori fu Bijbel. Den sma dati ben de Petrus fu Bruys nanga Hendrik fu Lausanne. Petrus fu Bruys ben tapu nanga a priesterwroko fu en, fu di a kon si taki son sani di Lomsu Kerki e du no e kruderi nanga Bijbel. Dati meki a ben de teige a dopu di den e dopu beibi, a leri taki a win nanga a brede e tron Yesus brudu nanga skin na wan wondru fasi, a begi di den e begi gi den dedewan, nanga na anbegi  fu a kroisi. Na ini a yari 1140, den kiri Petrus fu en bribi ede. A moniki Hendrik fu Lausanne ben tyari a krukafasi fu kerki kon na krin èn a ben de teige den kerkigwenti di no ben e kruderi nanga Bijbel. Na ini a yari 1148 den grabu en èn den poti en na strafu-oso. Na drape a tan teleki a dede.

17. Sortu prenspari sani Waldus nanga den sma di ben e horibaka gi en du?

¹⁷ Den bron Petrus fu Bruys fu di a ben krutu den sani di kerki ben e du. Ma na a srefi ten dati, wan tra sma gebore di ben o du furu fu panya den tru tori fu Bijbel na ala sei. A bakanen fu a man disi ben de Valdès, ma den ben e kari en Waldus tu. * A no ben kisi leri fu kerki neleki Petrus fu Bruys nanga Hendrik fu Lausanne, ma a ben lobi Gado Wortu so te, taki a libi ala den gudu fu en, dan a seti sani fu meki sma vertaal Bijbel na ini wan tongo di furu sma na a zuid-owstusei fu Fransikondre ben e taki. Son sma ben breiti so te fu yere a Bijbel boskopu na ini den eigi tongo, taki densrefi libi den gudu fu den fu prati den tru tori fu Bijbel gi tra sma den heri libi langa. Sma ben kon sabi den fayafaya man nanga uma disi leki den Waldensen. Den kerki no ben lobi a sani disi kwetikweti. Na ini a yari 1184, a pawsu puru den sma disi na ini a kerki èn a beskopu dwengi den fu gowe libi den oso. Ma a sani disi meki taki a Bijbel boskopu panya go na tra presi. Te fu kaba yu ben abi sma na furu presi fu Europa di ben e horibaka gi Waldus, Petrus fu Bruys, Hendrik fu Lausanne nanga tra sma di gowe libi a kerki. Na ini den hondrohondro yari baka dati, yu ben abi tra sma di ben abi a deki-ati fu sori san Bijbel e taki trutru. Wan tu fu den na: John Wycliffe (di ben e libi na a pisi ten fu 1330 te go miti 1384), William Tyndale (di ben e libi na a pisi ten fu 1494 te go miti 1536), Henry Grew (di ben e libi fu 1781 te go miti 1862), nanga George Storrs (di ben e libi fu 1796 te go miti 1879).

„NOTI NO MAN TAPU A WORTU FU GADO”

18. Fa fayafaya Bijbelstudenti na ini a di fu 19 yarihondro ben e studeri Bijbel? Fu san ede disi ben de wan bun fasi fu studeri?

¹⁸ Sma di no lobi Bijbel du ala sortu sani fu pori en, ma toku den no ben man du dati. Na ini 2 Timoteyus 2:9 skrifi: „Noti no man tapu a wortu fu Gado.” Na ini a yari 1870, wan grupu sma di ben e studeri Bijbel fayafaya, bigin suku a tru bribi. Fa den ben e studeri? We, wan sma ben poti wan aksi fu wan pisi tori, dan den ben e hori wan takimakandra fu a tori disi èn den ben e luku ala den Bijbeltekst di abi fu du nanga a tori. Te den alamala ben kon si san den tekst abi fu du nanga makandra èn den ben e agri nanga dati, dan den ben teki wan bosroiti èn den ben skrifi dati na tapu papira. Disi ben de wan bun fasi fu studeri, bika na dati den apostel nanga den owruman fu a fosi yarihondro ben e du. Bakaten, sma kon sabi den Bijbelstudenti disi leki Yehovah Kotoigi. A e gi wi deki-ati trutru fu sabi taki den fosi Kotoigi disi di ben e tai hori na Gado, ben e luku bun taki den sani di den ben e bribi komoto fu Gado Wortu trutru.

19. San na a yaritekst fu 2012, èn fu san ede a tekst disi fiti?

¹⁹ Den sani di wi e bribi na ini a ten disi, na sani di wi kon sabi nanga yepi fu Bijbel. Nanga disi na prakseri, a Tiri Skin fu Yehovah Kotoigi bosroiti taki a yaritekst fu 2012 o de san Yesus ben taki krin: „Yu wortu e taki san tru” (Yoh. 17:17). Ala sma di wani taki Gado feni en bun, musu sabi san tru èn den musu du dati tu. Dati meki wi alamala musu du muiti ala ten fu meki Gado Wortu tiri wi na ini a libi.

[Futuwortu]

[Aksi fu a tori disi]

[Prenspari pisi na tapu bladzijde 8]

A yaritekst fu 2012 na: „Yu wortu e taki san tru.”​—Yohanes 17:17.

[Prenki na tapu bladzijde 7]

Waldus

[Prenki na tapu bladzijde 7]

Wycliffe

[Prenki na tapu bladzijde 7]

Tyndale

[Prenki na tapu bladzijde 7]

Grew

[Prenki na tapu bladzijde 7]

Storrs