„Awinsi san unu e du, du dati nanga un heri ati èn nanga ala un krakti, leki na gi Yehovah unu e du en.”​—KOL. 3:23.

1-3. (a) Yesus dede gi wi na wan pina-postu, ma disi wani taki dati wi no abi fu tyari ofrandi moro gi Yehovah? Tyari dati kon na krin. (b) Sortu sani wi kan aksi wisrefi fu den ofrandi di wi musu tyari?

NA INI a fosi yarihondro, Yehovah sori a pipel fu en taki a frulusu-ofrandi fu Yesus tyari wan kaba kon na a Wèt fu Moses (Kol. 2:13, 14). Ala den srakti-ofrandi di den Dyu ben e tyari hondrohondro yari langa kaba no ben de fanowdu moro èn den no ben de prenspari moro. A Wèt ben musu ’tyari den Dyu go na Krestes’ èn di dati pasa, a Wèt no ben de fanowdu moro.​—Gal. 3:24.

² Ma disi no wani taki dati Kresten no wani sabi noti moro fu ofrandi. Na apostel Petrus ben sori taki efu Gado yeye e tiri wi, dan wi o tyari ofrandi di Gado feni bun èn di Yesus Krestes e yepi wi fu tyari (1 Petr. 2:5). Na apostel Paulus ben sori krin tu taki ala sani di wan Kresten di gi ensrefi abra na Gado, e du na ini en libi de leki „wan srakti-ofrandi”.​—Rom. 12:1.

³ Sobun, wan Kresten e tyari ofrandi te a e gi Yehovah sani èn te a no e du son sani fu di a wani dini Yehovah moro bun. Te wi e prakseri den sani di wi sabi fu den ofrandi di den Israelsma ben musu tyari, dan fa wi kan sorgu taki Yehovah feni den ofrandi fu wi bun?

OFRANDI NA INI WI ALADEI LIBI

4. San wi musu hori na prakseri fu den sani di wi e du na ini wi aladei libi?

⁴ Kande a muilek fu frustan san den sani di wi e du ibri dei abi fu du nanga ofrandi di wi musu tyari gi Yehovah. Te wi e du sani soleki osowroko, skorowroko, grontapuwroko, noso te wi e go bai sani  na wenkri, dan a kan gersi leki den sani dati no abi noti fu du nanga na anbegi fu wi. Ma efu yu gi yusrefi abra na Yehovah noso efu yu wani du dati na ini a ten di e kon, dan yu musu hori na prakseri taki den sani di yu e du na ini yu aladei libi kan abi krakti tapu a matifasi di yu abi nanga Yehovah. Ibri yuru fu a dei wi na Kresten èn wi musu meki Bijbel tiri wi na ini ala san wi e du na ini wi libi. Dati meki Paulus e gi wi a deki-ati disi: „Awinsi san unu e du, du dati nanga un heri ati èn nanga ala un krakti, leki na gi Yehovah unu e du en èn no gi libisma.”​—Leisi Kolosesma 3:18-24.

5, 6. San kan yepi wi fu sabi fa wi musu tyari wisrefi èn sortu krosi wi musu weri?

⁵ Den sani di Kresten e du na ini na aladei libi a no wroko di den e du gi Gado. Ma fu di Paulus taigi wi fu du sani ’nanga wi heri ati èn nanga ala wi krakti, leki na gi Yehovah wi e du en’, meki wi wani prakseri a heri fasi fa wi e libi. Sobun, fa wi kan gebroiki a rai disi na ini wi libi? Na ala ten wi e tyari wisrefi leki Kresten? A de so taki ala ten wi e weri krosi di fiti wan Kresten? Noso te wi e du aladei sani, wi e syen fu taigi sma taki wi na Yehovah Kotoigi fu di wi no e tyari wisrefi na wan bun fasi, noso fu di wi no weri krosi di fiti? Noiti wi musu meki dati pasa! Noiti wi wani du wan sani di ben o meki Yehovah kisi porinen.​—Yes. 43:10; 2 Kor. 6:3, 4, 9.

⁶ Fu di wi wani du sani ’nanga wi heri ati èn nanga ala wi krakti, leki na gi Yehovah wi e du en’, meki wi wani luku now fa dati kan abi krakti tapu a fasi fa wi e denki èn fa wi e du sani na ini difrenti situwâsi. Te wi o du dati, dan hori na prakseri taki ala ten den Israelsma ben musu gi Yehovah a moro bun sani te den ben e tyari ofrandi gi Yehovah.​—Eks. 23:19.

FA NA ANBEGI FU YU ABI KRAKTI TAPU YU LIBI

7. Te wan Kresten gi ensrefi abra na Gado, dan san dati wani taki?

⁷ Di yu gi yusrefi abra na Yehovah, yu teki a bosroiti dati nanga yu heri ati, a no so? Te yu luku en bun, dan yu taki dati yu o poti a wani fu Yehovah na a fosi presi na ini ala san yu e du na ini yu libi. (Leisi Hebrewsma 10:7.) Dati ben de wan bun bosroiti. A no de fu taki dati yusrefi si taki yu e kisi soso wini te yu e du muiti fu kon sabi fa Yehovah e denki fu sani èn te yu e du a wani fu en (Yes. 48:17, 18). A pipel fu Gado de santa èn den de koloku, fu di den abi den srefi fasi fu Yehovah di e gi den leri.​—Lef. 11:44; 1 Tim. 1:11.

8. Fu san ede a prenspari gi wi fu hori na prakseri taki den ofrandi di den Israelsma ben e tyari gi Yehovah ben de santa gi en?

 ⁸ Den ofrandi di den Israelsma ben e tyari gi Yehovah ben santa gi en (Lef. 6:25; 7:1). A Hebrew wortu di vertaal nanga „santa” e sori taki wan sani poti aparti gi Gado, noso taki a de fu Gado wawan. Efu wi wani taki Yehovah feni den ofrandi fu wi bun, dan wi musu tan fara fu iniwan sani fu grontapu di no krin. Wi no kan lobi den sani di Yehovah no lobi. (Leisi 1 Yohanes 2:15-17.) Sobun, disi wani taki dati wi musu wai pasi gi iniwan sma noso iniwan sani di kan meki taki Gado no si wi moro leki sma di krin (Yes. 2:4; Openb. 18:4). Disi wani taki tu dati wi no kan luku noso prakseri sani di no krin èn di abi fu du nanga hurudu.​—Kol. 3:5, 6.

9. Fu san ede a prenspari fu libi bun nanga trawan?

⁹ Paulus ben taigi den Kresten brada nanga sisa fu en: „Un no musu frigiti fu du bun èn fu prati san unu abi nanga trawan, bika Gado e prisiri nanga den sortu ofrandi dati” (Hebr. 13:16). Sobun, te wi e libi bun èn te wi e du bun gi trawan, dan Yehovah o si dati leki ofrandi di a feni bun. Te wi e poti prakseri na trawan fu di wi lobi den, dan wi e sori taki wi na trutru Kresten.​—Yoh. 13:34, 35; Kol. 1:10.

OFRANDI NA INI NA ANBEGI

10, 11. Fa Yehovah e si a preikiwroko nanga na anbegi fu wi? Sortu krakti disi musu abi na wi tapu?

¹⁰ Wan fasi fa wi leki Kresten kan du bun gi trawan, na fu „fruteri sma fu a howpu fu wi”. Yu e gebroiki ibri okasi fu preiki gi sma? Paulus taki dati wi leki Kresten e tyari ’wan ofrandi gi Gado nanga wi mofo, te wi e fruteri ala sma fu a nen fu en’ (Hebr. 10:23; 13:15; Hos. 14:2). A bun fu prakseri omeni ten wi e gebroiki fu preiki a bun nyunsu èn fa wi kan du a preikiwroko moro bun. Furu pisi fu a Diniwroko Konmakandra e yepi wi fu du dati. Ma san wi musu hori na prakseri, na taki wi preikiwroko èn den tra okasi di wi feni fu preiki, na ’ofrandi di wi e tyari nanga wi mofo fu prèise Gado’. Sobun, den ofrandi dati musu de den moro bun sani di wi e gi Yehovah. Wi alamala de na ini difrenti situwâsi, ma a ten di wi e gebroiki fu preiki a bun nyunsu e sori fa wi e denki fu a dini di wi e dini Yehovah.

¹¹ Ala ten Kresten e anbegi Yehovah awinsi den de na oso noso na ini a gemeente.  Yehovah wani taki wi du dati. A tru taki wi no abi fu hori Sabat èn wi no abi fu hori den difrenti fesa na Yerusalem. Ma toku wi kan leri wan sani fu den wèt dati. Ibri dei wi abi furu sani fu du, ma te now ete Gado wani wi fu teki ten fu studeri Bijbel, fu begi èn fu go na den konmakandra. Osofamiri-edeman abi a frantwortu fu studeri Bijbel nanga na osofamiri fu den (1 Tes. 5:17; Hebr. 10:24, 25). A bun fu aksi yusrefi: ’Mi kan du moro gi Gado?’

12. (a) Nanga sortu sani na ini a ten disi wi kan agersi a switismeri di sma ben e bron gi Gado? (b) Fa den begi fu wi kan de leki switismeri?

¹² Kownu David ben singi gi Yehovah: „Meki den begi fu mi kon de leki switismeri di sma e bron spesrutu gi yu” (Ps. 141:2). A bun fu prakseri omeni leisi wi e begi èn fu sortu sani wi e taki na ini begi. A buku Openbaring e taki dati „den begi fu den santawan” de leki switismeri. A e taki dati begi di Yehovah feni bun e opo go na loktu neleki smoko di e smeri switi (Openb. 5:8). Na ini owruten Israel den ben e bron switismeri doronomo na tapu wan altari gi Yehovah. A ben de wan spesrutu switismeri di ben musu meki soifri soleki fa Gado ben taki. Yehovah ben feni na ofrandi disi bun, soso te den ben du ala sani soleki fa en ben taki (Eks. 30:34-37; Lef. 10:1, 2). Na so a de tu taki efu wi begi na a fasi fa Yehovah taigi wi èn efu wi e si begi leki wan santa sani, dan wi kan de seiker taki a o arki den begi fu wi.

WI E GI ÈN WI E KISI

13, 14. (a) San Epafroditus nanga a gemeente na Filipi du gi Paulus èn fa Paulus ben feni dati? (b) Fa wi kan du leki Epafroditus nanga a gemeente na Filipi?

¹³ A moni di wi e gi fu horibaka gi a wroko di wi e du na heri grontapu de leki ofrandi tu, awinsi wi e gi furu moni noso pikinso moni (Mark. 12:41-44). Na ini a fosi yarihondro a gemeente na Filipi ben seni Epafroditus go na Rome fu yepi Paulus. Soleki fa a sori, dan a gemeente ben gi en moni tu fu tyari gi Paulus. Disi no ben de a fosi leisi di den seni sani gi Paulus. Den ben du disi fu di den no ben wani taki Paulus broko en ede nanga moni. Na a fasi disi Paulus ben kan du moro na ini a preikiwroko. Fa Paulus ben si den sani di den seni gi en? A ben taki dati den sani disi ben de „wan switismeri, leki wan ofrandi di fiti èn di e plisi Gado”. (Leisi Filipisma 4:15-19.) Paulus ben de nanga tangi gi den sani di den Filipisma du gi en èn Yehovah ben lobi dati tu.

¹⁴ Na so a de tu na ini a ten disi taki Yehovah e warderi den sani di wi e gi fu horibaka gi a wroko di wi e du na heri grontapu. Boiti dati, a pramisi taki efu wi poti Kownukondre afersi na a fosi presi na ini wi libi, dan a o sorgu taki wi kisi ala san wi abi fanowdu na ini na aladei libi èn ala sani di o yepi wi fu abi wan tranga bribi.​—Mat. 6:33; Luk. 6:38.

SORI TAKI YU DE NANGA TANGI

15. Gi sortu sani yu musu taki Yehovah tangi?

¹⁵ A ben o teki wan heri pisi ten fu kari ala den sani di Yehovah du gi wi. Ibri dei wi musu taki en tangi taki wi de na libi, a no so? A e gi wi ala san wi abi fanowdu fu man tan na libi, soleki nyanyan, krosi, wan tanpe, èn srefi a loktu di wi e bro. Boiti dati, a meki wi kon sabi den tru tori fu Bijbel èn disi e meki wi abi bribi èn wan howpu gi a ten di e kon. Sobun, a fiti taki wi e anbegi Yehovah èn taki wi e prèise en fu a sma di a de èn fu den sani di a du gi wi.​—Leisi Openbaring 4:11.

16. Fa wi kan sori taki wi de nanga tangi taki Gado gi Krestes leki frulusu-ofrandi?

 ¹⁶ Na artikel na fesi a wan disi ben sori kaba taki a frulusu-ofrandi fu Krestes na wan spesrutu kado di Gado gi wi èn di warti srefisrefi. A kado disi e sori o furu Gado lobi wi (1 Yoh. 4:10). Fa wi musu si a kado disi? Paulus taki: „A lobi fu Krestes naki wi ati, bika wi kon frustan taki wán sma dede gi ala sma . . . Sobun, a dede gi ala sma. Dati meki den sma di e libi, no musu libi gi densrefi moro, ma gi a sma di dede gi den èn di kisi wan opobaka” (2 Kor. 5:14, 15). Paulus ben taki dati efu wi de nanga tangi trutru gi san Gado du, dan wi musu libi na wan fasi di e gi En nanga En Manpikin grani. Wi e sori taki wi lobi Gado nanga Krestes èn taki wi de nanga tangi, te wi e gi yesi na den, te wi lobi fu preiki èn te wi e meki sma tron disipel.​—1 Tim. 2:3, 4; 1 Yoh. 5:3.

17, 18. Fa son sma du moro fu prèise Yehovah? Gi wan eksempre.

¹⁷ Yu ben sa man du moro fu prèise Gado? Furu sma di prakseri ala den bun di Yehovah du gi den, go luku fa den kan gebroiki moro ten fu du a preikiwroko noso tra wroko di musu du na ini Yehovah en organisâsi. Son sma ben man du a yepi-pionierwroko wán noso moro mun na ini a yari èn trawan ben tron gewoon pionier srefi. Trawan go yepi nanga den bow-wroko di musu du. Disi na moi okasi fu sori taki yu de nanga tangi, a no so? Efu wi e dini Gado nanga a yoisti denki, dan a o breiti nanga den sani di wi e du. Sobun, meki wi dini en fu di wi e warderi san a du gi wi èn fu di wi wani taki en tangi fu dati.

¹⁸ Furu Kresten firi taki den musu du wan sani fu sori taki den de nanga tangi gi san Yehovah du. Wan fu den na Morena. A kweki na ini a Lomsu bribi, ma a ben abi furu aksi fu Gado èn fu a libi. Fu di a ben wani piki tapu den aksi fu en, meki a go suku yepi na Lomsu Kerki èn a go ondrosuku den difrenti bribi na ini Asia. Ma di a bigin studeri Bijbel nanga Yehovah Kotoigi, dan fosi a kisi krin piki tapu den aksi fu en. Morena ben kon de koloku trutru di a kon sabi san Bijbel e leri. A ben wani gebroiki ala en krakti gi Yehovah fu sori taki a de nanga tangi. Dati meki a go na ini a yepi-pionierwroko èn bakaten di a kisi na okasi, a tron gewoon pionier tu. Dati ben de 30 yari pasa èn te now ete a de wan pionier.

19. Fa yu kan du moro gi Yehovah?

¹⁹ Furu futuboi fu Yehovah di e dini en nanga den heri ati, no man pionier. Ma awinsi san wi man du gi Yehovah, wi alamala kan gi en ofrandi di a feni bun. Te wi e luku a fasi fa wi e tyari wisrefi, dan wi e tyari bun ofrandi te wi e du san Bijbel e taki èn te wi e hori na prakseri taki ala ten wi na sma di e teki presi gi en. Te wi e luku a bribi fu wi, dan wi e tyari bun ofrandi te wi e frutrow trutru taki Gado o du san a abi na prakseri. Wi e tyari ofrandi tu te wi e du bun wroko. Dati na te wi e fruteri sma a bun nyunsu. Te wi e du den sani disi, dan wi e sori taki wi de nanga tangi trutru gi ala san Yehovah du gi wi. Sobun, meki wi tan tyari ofrandi gi Yehovah nanga wi heri ati.

[Aksi fu a tori disi]

[Prenspari pisi na tapu bladzijde 25]

San yu wani du gi Yehovah te yu e prakseri ala den bun di a du gi yu?

[Prenki na tapu bladzijde 23]

Yu e gebroiki ibri okasi di yu kisi fu fruteri sma a bun nyunsu?