Natan​—Wan sma di ben e horibaka gi a tru anbegi ala ten

A no makriki fu go taigi wan man di abi furu makti taki a du wan sani di no bun èn taki a musu kenki en libi. Yu ben o go taki nanga so wan sma efu yu sabi taki a kiri wan man soso fu no kisi syen?

Kownu David fu owruten Israel ben du sutadu nanga Batseiba, dan Batseiba kon de nanga bere. Fu kibri a sondu fu den, David meki sma kiri a masra fu Batseiba, dan a teki en leki wefi. Someni mun langa David ben e du en wroko leki kownu sondro fu taigi sma san a du. Ma Yehovah no tapu en ai gi den sondu di a kownu du. A seni a profeiti Natan fu meki David frustan o seryusu a sondu fu en ben de.

Disi ben de wan muilek sani fu du. Prakseri nomo efu yu ben de Natan. Fu di Natan ben e tai hori na Yehovah èn a ben e horibaka fayafaya gi den wèt fu Yehovah, meki a go taki nanga David fu a sondu fu en. Ma fa a du disi èn fa a yepi Kownu David fu frustan taki a ben musu abi berow?

WAN LERIMAN DI BEN SABI FA FU TAKI NANGA SMA

Grantangi, teki wan tu miniti fu leisi 2 Samuel 12:1-25. Kon meki wi taki dati yu na Natan èn yu e fruteri David a tori disi: „Tu man ben de na ini wan foto. A wan ben gudu, a trawan ben pôti. A guduman ben abi furu skapu nanga kaw. Ma a pôtiman ben abi wán pikin umaskapu nomo di a ben bai. A ben e kweki a skapu èn a skapu ben e tan nanga en nanga den manpikin fu en. San a man ben e nyan, na dati a skapu ben e nyan tu èn san a ben e dringi, na dati a skapu ben e dringi tu.  Leti na en sei a skapu ben e sribi. A skapu ben kon de leki wan umapikin gi en. Wan dei wan sma kon luku a guduman. Di a ben musu sreka nyanyan gi a sma di ben kon na en, a no teki nowan fu den skapu noso kaw fu en. Na presi fu dati a teki a pikin umaskapu fu a pôtiman, dan a sreka dati gi a man di ben kon na en.”​—2 Sam. 12:1-4.

A tori fu Natan meki David ati bron srefisrefi èn a taki: „Neleki fa a de seiker taki Yehovah de na libi, na so a de seiker taki a man di du a sani disi musu dede!” Ne Natan taigi en krin: „Na yu na a man!” (2 Sam. 12:5-7) David srefi ben de wan skapuman fosi èn soleki fa a sori a ben denki taki a tori disi ben de wan tru tori. Wan man di e fruklari sani fu Bijbel taki dati a kan taki Natan ben gwenti kon na David fu suku yepi gi sma te trawan ben du kruka sani nanga den èn nowan tra sma ben de fu yepi den. Sobun, David ben kan denki taki na dati Natan ben kon du a leisi disi. Wi no sabi efu na dati pasa, ma san wi sabi na taki Natan ben musu abi deki-ati nanga trutru lobi gi Gado fu man go taki nanga a kownu na so wan fasi.

Meki wi luku fu san ede Natan opo a tori na a fasi disi. Te wan sma abi firi gi wan trawan, dan nofo tron a no man si sani krin te a abi fu du nanga en. Efu wi du wan sani di no bun, dan nofo tron wi o wani suku wan fasi fu sori taki wi no fowtu. Ma di Natan fruteri na agersitori, dan sondro fu sabi David krutu ensrefi. Kownu David ben si krin taki a man fu na agersitori fu Natan du wan sani di no bun. Ma na baka di David krutu a tori disi, Natan sori en taki na en na a man. Ne David frustan o seryusu a sondu fu en ben de èn disi meki taki a ben de klariklari now fu teki piri-ai. David srefi taki dati a „trangayesi” Yehovah di a du sutadu nanga Batseiba èn a teki a piri-ai di Natan gi en.​—2 Sam. 12:9-14; Ps. 51, Ede.

San wi kan leri fu disi? Wan sma di e gi Bijbel leri musu man yepi den sma di e arki en fu kisi wan yoisti denki fu sani. Natan ben e lespeki David èn dati meki a taki nanga en na wan lespeki fasi. Natan ben sabi taki David ben lobi san reti èn bun. Dati meki a gebroiki wan agersitori di ben o naki David ati. Na so wi srefi kan yepi reti-ati sma tu fu frustan fa Yehovah e si sani. Fa wi kan du dati? Nofo tron sma sabi san bun. Wi kan gebroiki disi fu yepi den sondro fu gi den a firi taki wi bun moro den noso taki wi abi a reti fu taigi den san den musu du. Na Bijbel e taki san bun èn san no bun, a no wi.

A moro prenspari sani di meki taki Natan piri-ai gi David ben de fu di a ben e tai hori na Gado (2 Sam. 12:1). Na so a de tu taki te wi e tai hori na Gado, dan wi o abi a deki-ati fu horibaka gi den wèt fu Yehovah.

A BEN E HORIBAKA GI A TRU ANBEGI

Soleki fa a sori, dan David nanga Natan ben de bun mati fu di David ben gi wan fu den manpikin fu en a nen Natan (1 Kron. 3:1, 5). A fosi leisi te Bijbel e taki fu Natan, a de nanga David. Den ala tu ben lobi Yehovah. Soleki fa a sori, dan a kownu ben e frutrow Natan èn ala ten a ben wani sabi fa Natan e denki fu wan tori. Fu dati ede, di a ben wani bow wan tempel gi Yehovah, a taigi Natan: „’Luku, mi e tan na ini wan oso fu sedre-udu, ma a santa kisi fu a tru Gado de na ini wan tenti.’ Ne Natan taigi Kownu: ’Yu kan du awinsi san de na yu ati, bika Yehovah de nanga yu.’”​—2 Sam. 7:2, 3.

Natan ben de wan fayafaya anbegiman fu Gado èn fu dati ede a ben de klariklari fu horibaka gi David di ben wani bow a fosi tempel pe ala sma na grontapu ben kan go fu anbegi a tru Gado. Ma na a okasi dati, Natan taigi David fa en srefi ben e denki, na presi fu taki fa Yehovah ben e denki fu a tori. A neti dati Yehovah taigi Natan fu tyari wan heri tra boskopu gi David. A taigi en taki a no David, ma na wan manpikin fu David ben o de a sma di ben o bow a tempel. Natan ben taki tu dati Gado ben o seti wan frubontu nanga David, so taki den bakapikin fu en ben o tiri „fu ala ten”.​—2 Sam. 7:4-16.

Gado no ben e agri nanga Natan na ini a tori fu a bow fu a tempel. Ma toku a profeiti disi di ben abi sakafasi no krutukrutu. A gi yesi na Yehovah èn a yepi fu meki sani pasa soleki fa Yehovah wani. Dati na wan moi eksempre gi wi efu wi kisi piri-ai fu Gado! Wi sabi taki Gado ben feni Natan bun ete, fu di a tan gebroiki en leki profeiti. Soleki  fa a sori, dan Gado ben seni Natan makandra nanga Gad di ben abi a koni fu si na fesi san ben o pasa, fu yepi David di a ben musu seti wan grupu fu 4000 pokuman di ben o meki poku na ini a tempel.​—1 Kron. 23:1-5; 2 Kron. 29:25.

A BEN E HORIBAKA GI A KOWNU DI GADO POTI

Natan ben sabi taki Salomo ben o tron kownu baka David di ben kon owru kaba. Sobun, di Adonia ben wani meki ensrefi tron kownu, Natan du wani sani wantewante fu tapu en. A leisi disi sosrefi, a sori taki a ben e tai hori na Gado èn taki a ben e lespeki trawan. A taigi Batseiba fu go memre David taki a ben pramisi fu poti en manpikin Salomo leki kownu. Baka dati Natan srefi go na Kownu David fu aksi en efu a ben taki dati Adonia ben musu tron kownu. Fu di David ben frustan o seryusu a tori disi de, meki a taigi Natan nanga den tra futuboi di ben de nanga en ala ten, taki den ben musu salfu Salomo èn den ben musu taigi ala sma taki Salomo ben o tron kownu. Na so Adonia no ben man meki ensrefi tron kownu.​—1 Kow. 1:5-53.

WAN HISTORIA SKRIFIMAN DI BEN ABI SAKAFASI

Furu sma e agri taki na Natan nanga Gad skrifi 1 Samuel kapitel 25 te go miti 31 èn a heri buku 2 Samuel. Na ini den Bijbel buku dati skrifi: „Samuel, di ben e kisi fisyun, sosrefi a profeiti Natan nanga Gad, di ben man si na fesi san ben o pasa, skrifi ala sani di abi fu du nanga Kownu David. Den skrifi ala den sani di a du na a bigin èn den sani di a du bakaten” (1 Kron. 29:29). Bijbel e sori tu taki Natan skrifi wan buku di ben abi fu du nanga „sani di Salomo du” (2 Kron. 9:29). Sobun, a sori leki Natan tan wroko gi kownu, srefi baka di David dede.

Kande na a profeiti Natan srefi skrifi furu fu den sani di wi sabi fu en. Ma wi kan leri furu fu en tu te wi e luku san a no skrifi. Soleki fa a sori, dan Natan ben de wan historia skrifiman di ben abi sakafasi èn di no ben e suku biginen gi ensrefi. Wan Bijbel wortubuku taki dati Bijbel no e taki suma na en èn suma na en famiri. Sobun, wi no sabi noti fu a libi fu en.

A BEN E DU SANI FU DI A BEN TAI HORI NA GADO

Bijbel no e taki furu fu Natan, ma toku wi kan si taki a ben de wan man di ben abi sakafasi èn di ben e horibaka fayafaya gi den seti fu Yehovah. Yehovah Gado ben gi en bigi frantwortu. Prakseri den fasi di Natan ben abi. Prakseri fa a ben tai hori na Gado èn fa a ben lobi den wèt fu Gado trutru. Du muiti fu abi den fasi disi tu.

Kande a no o pasa noiti taki yu musu piri-ai gi wan kownu di du sutadu noso taki yu musu tapu wan sma fu tron kownu. Ma Gado kan yepi yu fu tai hori na en èn fu horibaka gi iniwan sani di a feni bun. Yu kan de wan deki-ati leriman tu di e sori trawan lespeki, di e leri sma san tru, èn di e horibaka gi a tru anbegi.

[Prenki na tapu bladzijde 25]

Fu di Natan ben e horibaka gi a kownu di Gado poti, meki a go taki na wan lespeki fasi nanga Batseiba