Tan preiki fayafaya

„Preiki a wortu, du disi fayafaya.”​—2 TIM. 4:2.

YU KAN TYARI DISI KON NA KRIN?

Fu san ede den Kresten fu a fosi yarihondro ben e preiki fayafaya?

San wi musu du fu no frigiti o prenspari a preikiwroko de?

Fu san ede a Kownukondre preikiwroko de so prenspari na ini a ten disi?

1, 2. Te wi e prakseri a rai fu ’preiki fayafaya’, dan sortu aksi musu kisi piki?

SMA di e du wroko pe den musu kibri sma libi, e si a wroko fu den leki wan seryusu sani. Fu eksempre, te wan oso e bron, dan brandweer-man e go esi-esi na a presi dati, bika den sabi taki sma kan lasi den libi.

² Leki Kotoigi fu Yehovah, wi wani yepi sma tu fu no lasi den libi. Fu dati ede wi e si en leki wan tumusi prenspari sani fu preiki a bun nyunsu fu a Kownukondre. Wi no e du en esi-esi sondro fu denki. Na apostel Paulus gi a rai disi: „Preiki a wortu, du disi fayafaya” (2 Tim. 4:2). Fa wi kan preiki fayafaya? Fu san ede a wroko fu wi de so prenspari?

FU SAN EDE A PREIKIWROKO FU WI DE SO PRENSPARI?

3. San kan pasa efu sma e gi yesi na a Kownukondre boskopu, noso efu den no e du dati?

³ Te yu e prakseri taki a preikiwroko fu wi kan kibri sma libi, dan a no de fu taki dati yu wani fruteri den a bun nyunsu nomonomo (Rom. 10:13, 14). Gado Wortu e taki: „Te mi taigi wan ogri sma: ’Yu o dede trutru’, ma a e tapu fu du ogri, a e bigin du bun, a tron wan reti-ati sma, . . . dan a o tan na libi trutru. A no o dede. Mi no o memre nowan fu den sondu fu en èn mi no o strafu en” (Esek. 33:14-16). Iya, Bijbel e taigi ala den wan di e preiki a Kownukondre boskopu: „Yu o frulusu yusrefi nanga den sma di e arki yu.”​—1 Tim. 4:16; Esek. 3:17-21.

4. Fu san ede Timoteyus ben musu preiki fayafaya di sma bigin panya falsi leri?

⁴ Efu wi wani frustan fu san ede Paulus gi Timoteyus a seryusu rai fu preiki fayafaya, dan wi musu leisi wan tu tra vers fu 2 Timoteyus kapitel 4. Na ini vers 2 te go miti 4 wi e leisi: „Preiki a wortu, du disi fayafaya na ini bun ten èn na  ini muilek ten, gi sma rai, warskow den èn gi den deki-ati. Du dati nanga ala pasensi èn nanga a koni fu gi sma leri, bika wan ten o kon taki sma no o wani yere a soifri leri. Den o du san densrefi wani èn den o suku wan lo leriman di o taki sani nomo fu switi den yesi. Den no o wani arki a tru leri.” Yesus ben taki na fesi taki sma ben o bigin panya falsi leri na ini a gemeente (Mat. 13:24, 25, 38). Sobun, a ben de prenspari taki Timoteyus „preiki a wortu” srefi na ini a gemeente, so taki sma no ben o man kori den Kresten nanga den falsi leri fu den. Noso den ben kan lasi den libi. Fa a de na ini a ten disi?

5, 6. Sortu sani den sma di wi e miti na ini a preikiwroko, e bribi?

⁵ Na ini a ten disi moro nanga moro sma e drai baka gi a tru bribi èn den e panya den falsi leri fu den na ala sei (2 Tes. 2:3, 8). Nanga sortu falsi leri den e switi sma yesi na ini a ten disi? Na furu presi moro nanga moro sma e bribi na evolutie-leri di e sori taki ala sani kon fu densrefi. Den no e bribi taki Gado meki ala sani. Aladi na sabiman kon nanga a leri disi, toku sma e horibaka gi a leri disi so fayafaya, taki a kon de leki wan sortu bribi gi den. A leri disi meki taki sma abi wan heri tra denki now fu Gado èn fu tra sma. Wan tra leri di furu sma e bribi, na taki Gado no e poti prakseri na wi, sobun wi no abi fu poti prakseri na en tu. Fu san ede milyunmilyun sma e arki den leri disi di e tapu den fu tron mati fu Gado? Ala den tu leri disi e meki sma bribi taki den kan du iniwan sani di den wani, fu di nowan sma o aksi den frantwortu fu san den e du. Fu tru, disi na wan sani di e switi a yesi fu furu sma.​—Leisi Psalm 10:4.

⁶ Ma tra leri de tu di e switi sma yesi. Son sma di e go na kerki ete, lobi en te den fesiman e taigi den taki Gado lobi den, awinsi san den e du. Kerki fesiman e switi den yesi fu sma, fu di den e taigi den taki Gado o blesi den te den e hori son kerki gwenti nanga kerki fesa. Den kerkisma disi no e frustan sortu ogri kan miti den (Ps. 115:4-8). Den sma disi e sribi na agersi fasi. Ma efu wi kan wiki den so taki den frustan den tru leri fu Bijbel, dan den kan kisi den blesi di Gado Kownukondre o tyari kon.

SAN A WANI TAKI FU PREIKI FAYAFAYA?

7. Fa wi kan sori taki wi e si a preikiwroko leki wan prenspari sani?

⁷ Te wan bun datra o koti wan sma, dan a o poti ala en prakseri na san a e du, fu di a sma di a e koti kan lasi en libi. Wi kan sori taki wi e si a Kresten diniwroko leki wan prenspari sani, te wi e poti ala wi prakseri na a wroko dati. Wi e du disi te wi e denki bun sortu tori o hari a prakseri fu sma di wi e miti, sortu aksi wi kan poti gi den, noso sortu sani den o wani sabi. Te wi e si a wroko fu wi leki wan prenspari sani, dan wi o seti sani na so wan fasi taki wi kan preiki gi sma na ten di moro bun gi den.​—Rom. 1:15, 16; 1 Tim. 4:16.

8. San wi o du te wi e si a preikiwroko leki wan seryusu sani?

⁸ Te wi e si a preikiwroko leki wan seryusu sani, dan wi o poti den moro prenspari sani na a fosi presi na ini wi libi (Gen. 19:15). Kon meki wi taki dati yu firi siki, dan yu go na datra meki a ondrosuku yu. Bakaten a e taigi yu nanga wan seryusu sten: „A siki fu yu na wan seryusu siki. Yu abi wán mun nomo fu suku yepi, bika a o kon moro ogri.” San yu ben o du? Yu ben o lon gowe libi a datra wantewante fu go suku yepi? Nôno, na presi fu dati yu ben o sidon arki bun sortu rai a datra ben o gi yu, dan yu ben o go na oso èn prakseri bun san na a moro prenspari sani di yu musu du now, a no so?

9. Fu san ede wi kan taki dati Paulus preiki fayafaya di a ben de na ini Efeise?

⁹ Te wi e leisi san Paulus taigi den owruman fu Efeise fu a preikiwroko di a ben du na ini a distrikt Asia, dan wi e si taki a ben du a preikiwroko fayafaya. (Leisi Tori fu den apostel 20: 18-21.) Soleki fa a sori, dan a fosi dei di a doro  na ini Efeise, a bigin go na sma oso kaba fu fruteri den a bun nyunsu. „Ibri dei a ben e taki nanga den sma na a skoro fu Tiranus.” A du disi tu yari langa (Tori 19:1, 8-10). A de krin taki Paulus ben abi a gwenti fu du den sani disi, fu di a ben e si a preikiwroko leki wan seryusu sani. Wi kisi a rai fu ’preiki fayafaya’, ma disi no wani taki dati wi musu si a preikiwroko leki wan hebi. Ma toku a preikiwroko musu de wan fu den moro prenspari sani na ini wi libi.

10. Fu san ede wi musu breiti taki wan grupu Kresten bigin preiki fayafaya sowan 100 yari pasa?

¹⁰ Fosi a yari 1914 wan pikin grupu Bijbelstudenti bigin preiki a bun nyunsu. Na eksempre fu den e sori wi san a wani taki fu preiki fayafaya. Aladi den no ben de nanga furu, toku den ben frustan taki den ben e libi na ini prenspari ten. Dati meki den bigin preiki fayafaya fu a Kownukondre. Den ben skrifi lezing di tyari kon na doro na ini hondrohondro koranti. Boiti dati, den ben sori sma a „Photo-Drama der Schepping”. Disi ben de wan tu prenki di den ben e sori baka makandra leki wan felem. Na a fasi disi den ben man prati a bun nyunsu gi milyunmilyun sma. Fu di den ben e frustan o prenspari a preikiwroko de, meki furu fu wi kon yere a Kownukondre boskopu.​—Leisi Psalm 119:60.

NO FRIGITI O PRENSPARI A PREIKIWROKO DE

11. San meki taki son sma frigiti o prenspari a preikiwroko de?

¹¹ Wan sma kan frigiti o prenspari a preikiwroko de, te tra sani e bigin hari en prakseri. Satan e gebroiki a grontapu disi fu puru wi prakseri fu a diniwroko fu Yehovah. A wani taki wi musu suku wi eigi bun nomo èn taki wi musu feti baka sani di no de prenspari (1 Petr. 5:8; 1 Yoh. 2:15-17). Son sma ben si a diniwroko fu Yehovah leki wan fu den moro prenspari sani na ini den libi, ma now den no e du dati moro. Fu eksempre, Demas, wan Kresten fu a fosi yarihondro, ben ’wroko makandra’ nanga na apostel Paulus, ma bakaten a meki grontapu sani hari en. Na presi taki Demas tan nanga Paulus fu gi en deki-ati di a ben kisi tesi, a gowe libi en.​—Fileim. 23, 24; 2 Tim. 4:10.

12. Sortu okasi wi abi now? Sortu tra okasi wi o abi na ini a ten di e kon?

¹² Efu wi wani tan preiki fayafaya, dan wi musu dwengi wisrefi fu no du sani di kan puru wi prakseri fu a preikiwroko. Wi musu meki tranga muiti fu „grabu a trutru libi hori bun steifi” (1 Tim. 6:18, 19). A no de fu taki dati yu e bribi taki wi o abi nofo ten fu du furu moi sani te wi o libi fu têgo na grontapu èn te a Kownukondre fu Gado o tiri. Ma now wi abi na okasi fu yepi sma pasa Armagedon libilibi èn disi na wan sani di no o pasa noiti moro.

13. Now di wi tron Kresten, san wi musu du fu tan na ai?

¹³ Furu sma na wi lontu e sribi na agersi fasi. Sobun, san wi kan du fu tan na ai? Wi musu hori na prakseri taki wan ten ben de taki furu fu wi no ben sabi Gado, èn wi no ben abi nowan howpu gi a ten di o kon. Ma wi kon leri sabi den tru tori fu Yehovah nanga Yesus, èn now wi abi a grani fu leri trawan den tru tori disi. (Leisi Efeisesma 5:14.) Paulus ben taki: „Luku bun taki unu no waka leki don sma, ma leki koni sma. Un musu gebroiki a ten fu unu na wan koni fasi, bika wi e libi na ini ogri ten” (Ef. 5:15, 16). Na ini na ogri grontapu disi a de prenspari taki wi e gebroiki wi ten ’na wan koni fasi’. Sobun, meki wi du sani di o yepi wi fu tan na ai.

WI E LIBI NA INI WAN TUMUSI PRENSPARI TEN

14-16. Fu san ede a Kownukondre preikiwroko de so prenspari na ini a ten disi?

¹⁴ Ala ten a Kresten diniwroko ben de wan prenspari sani. Ma now a de moro prenspari. Sensi a yari 1914 wi si fa furu sani pasa na grontapu, soifri soleki fa Bijbel ben taki na fesi  (Mat. 24:3-51). Noiti ete so furu sani ben de di kan meki taki ala libisma na grontapu lasi den libi. Den moro makti kondre na grontapu meki kruderi taki den no o feti moro nanga makandra. Ma toku den abi moro leki 2000 atoombom ete di den kan sutu go na iniwan presi na grontapu. Ondrosuku sori taki a e pasa someni leisi taki den sani di sma e gebroiki fu meki atoombom no de fu feni moro, èn sma e taki dati den sani lasi. A de so taki sma di wani gens tirimakti, abi wan tu fu den fetisani disi? Son sma e taki dati wan sma di e gens tirimakti kan gebroiki wan fu den fetisani disi fu bigin wan feti pe ala libisma na grontapu kan lasi den libi. Ma wan feti a no a wan-enkri sani di kan meki taki ala libisma lasi den libi.

¹⁵ Na ini 2009, a tijdschrift „The Lancet” nanga wan universiteit fu London taki: „A kenki di a weer e kenki kan meki taki sma na heri grontapu no de gosontu moro.” Den taki dati a sani disi kan meki furu sma kon siki èn milyunmilyun sma kan dede srefi. Furu presi na grontapu kan kisi pori fu di a watra na ini a se e kon hei moro nanga moro, dreiten e hori tumusi langa, bigi frudu e kon, èn bigi draiwinti de na ala sei. Boiti dati, ala sortu siki e panya na ala sei èn sma e feti fu di den sani di den abi fanowdu fu tan na libi, no de nofo moro. A de krin taki feti nanga rampu kan kiri ala libisma na grontapu.

¹⁶ Son sma e denki taki te fu kaba den kondre o gebroiki atoombom fu feti nanga makandra èn taki disi o de a kontru fu a profeititori di Yesus ben fruteri fu den lasti dei. Ma furu sma no e frustan a profeititori fu Yesus trutru. Furu yari langa kaba, wi si fa someni sani pasa di e sori taki Krestes kon kaba èn taki a kaba fu a grontapu disi de krosibei (Mat. 24:3). Noiti ete wi si so furu sani e pasa di abi fu du nanga a profeititori fu Yesus. Now na a ten taki sma musu frustan taki a de prenspari fu tron mati fu Gado. A preikiwroko di wi e du kan yepi den.

17, 18. (a) San wi musu du fu di wi sabi taki wi e libi na ini den lasti dei? (b) San kan meki taki sma bigin arki a Kownukondre boskopu?

¹⁷ Furu ten no de moro fu sori taki wi lobi Yehovah èn fu kaba a preikiwroko di wi kisi fu du na ini den lasti dei disi. A sani di Paulus taigi den Kresten na ini Rome de moro prenspari gi wi na ini a ten disi. A taki: „Unu sabi na ini sortu ten wi e libi. Unu sabi taki a yuru doro kaba taki un musu wiki. Now a frulusu fu wi de moro krosibei leki di wi ben tron bribiman.”​—Rom. 13:11.

¹⁸ Den sani di ben o pasa na ini den lasti dei soleki fa Bijbel e taki, kan meki sma frustan taki den musu tron mati fu Gado. Son sma e bigin arki a Kownukondre boskopu fu di den kon si taki libisma tirimakti no man lusu den problema na grontapu. Tiriman no man tyari wan kaba kon na moni problema na ini den kondre fu den, den no man tapu kondre fu meki atoombom, den no man tyari wan kaba kon na ogridu èn den no man tapu sma fu pori a grontapu. Tra sma e bigin arki a Kownukondre boskopu fu di den e kisi problema na ini den osofamiri. Kande wan sma fu den kon siki, kande den broko trow, noso kande wan lobiwan fu den dede. Sobun, wi kan yepi den sortu sma disi te wi e du a preikiwroko.

DEN KENKI DEN LIBI FU DI DEN SABI O PRENSPARI A PREIKIWROKO DE

19, 20. Fa furu Kresten tyari kenki kon na ini den libi, di den frustan o prenspari a preikiwroko de?

¹⁹ Fu di furu Kresten e frustan o prenspari a preikiwroko de, meki den tyari kenki kon na ini den libi fu kan du moro na ini a preikiwroko. Fu eksempre, wan yongu trowpaar na ini Ekwador bosroiti fu tyari wan tu kenki kon na ini den libi, baka di den go na a spesrutu dei konmakandra fu 2006 di ben nen „Hori yu ai krin”. Den skrifi na tapu papira sortu sani den no ben o abi fanowdu moro, dan den bigin tyari kenki kon. A no teki dri mun fosi den froisi  fu den oso di ben abi dri sribikamra, go na wan oso nanga wán sribikamra. Den seri wan tu sani èn den pai ala den paiman di den ben abi. Syatu baka dati den bigin wroko leki yepipionier èn di a kring-opziener aksi den fu go dini na ini wan gemeente di ben abi yepi fanowdu, den du dati tu.

²⁰ Wan brada na ini Amerkankondre skrifi: „Di mi nanga mi wefi go na wan bigi konmakandra na ini 2006, wi ben dopu 30 yari kaba. Di wi ben e rèi go na oso, baka a programa, wi taki nanga makandra fa wi ben kan gi yesi na a rai di wi ben kisi fu tyari kenki kon na ini wi libi” (Mat. 6:19-22). Den ben abi dri oso, gron, diri wagi, wan boto, nanga wan bigi wagi pe yu kan tan na ini. Den ben firi leki den lasi furu fu den ten, fu di den ben feti baka gudu nomo. Dati meki den bosroiti fu go du a furuten diniwroko. Na ini a yari 2008 den tron gewoon pionier neleki na umapikin fu den. A gi den furu prisiri fu si fa sma breiti te den yere den tru tori fu Gado Wortu èn te den e frustan dati. A brada taki: „A gi wi furu prisiri fu wroko skinskin nanga den brada nanga sisa! Wi ben man dini pe moro preikiman de fanowdu. Fu di wi e du moro gi Yehovah, meki wi tron moro bun mati fu en tu.”

21. Sortu sani di wi sabi e meki wi preiki fayafaya?

²¹ Wi sabi san o pasa nanga na ogri grontapu disi. Heri esi ’a dei o doro taki Gado o krutu den ogri sma èn a o pori den’ (2 Petr. 3:7). Fu di wi sabi san skrifi na ini Gado Wortu, meki wi e preiki fayafaya fu a bigi banawtu di de fu kon, èn fu a nyun grontapu di Gado o seti baka dati. Wi e tan hori na prakseri o prenspari a de fu yepi sma fu kon abi wan trutru howpu gi a ten di e kon. Te wi e du a prenspari wroko disi fayafaya, dan wi e sori taki wi lobi Gado nanga tra sma trutru.

[Aksi fu a tori disi]