Yehovah sabi fa fu frulusu en pipel

„Te tesi miti den sma di e dini Gado fayafaya, dan Yehovah sabi fa fu frulusu den.”​—2 PETR. 2:9.

FU SAN EDE WI KAN TAKI DATI YEHOVAH:

e bosroiti o ten sani musu pasa, so taki a wani fu en kon tru?

de srekasreka fu gebroiki en makti fu frulusu en pipel?

sabi soifri fa sani o waka na a ten fu a bigi banawtu?

1. Fa sani o de na grontapu na a ten fu a „bigi banawtu”?

A GRONTAPU fu Satan o kisi pori wantronso, te nowan sma e fruwakti dati (1 Tes. 5:2, 3). Na a ten fu a „bigi banawtu”, bigi bruya o de na grontapu (Sef. 1:14-17). Furu pina nanga problema o de. Bijbel e taki dati a o de wan ten fu banawtu di ’noiti ete ben de sensi a bigin fu grontapu teleki now’.​—Leisi Mateyus 24:21, 22.

2, 3. (a) San o miti a pipel fu Gado na a ten fu a „bigi banawtu”? (b) Fa a bribi di wi abi taki Yehovah o frulusu en pipel, kan kon moro tranga?

² Na a kaba fu a „bigi banawtu”, „Gok fu a kondre Magok” o kon feti nanga a pipel fu Gado. „Wan bigi legre” o kon feti nanga a pipel fu Gado „neleki fa wolku e kon fu tapu a kondre” (Esek. 38:2, 14-16). Nowan libisma organisâsi o kon yepi a pipel fu Yehovah. Na Gado wawan kan frulusu den. San a pipel fu Yehovah o du te den feanti fu den o kon fu kiri den?

³ Efu yu na wan futuboi fu Yehovah, yu e bribi taki Yehovah man frulusu a pipel fu en na a ten fu a bigi banawtu? Yu e bribi taki a o du dati trutru? Na apostel Petrus skrifi: „Te tesi miti den sma di e dini Gado fayafaya, dan Yehovah sabi fa fu frulusu den, ma a sabi tu fa fu libi ogri sma gi a krutudei te a o kiri den” (2 Petr. 2:9). A bribi di wi abi taki Yehovah o frulusu en pipel o kon moro tranga te wi e prakseri dipi fa a frulusu en pipel na ini owruten. Meki wi poti prakseri na dri okasi pe Yehovah frulusu en pipel.

DEN KISI FRULUSU DI WAN FRUDU KON NA HERI GRONTAPU

4. San ben musu pasa fosi a Frudu kon?

⁴ A fosi tori di wi o luku, na a di fu a Frudu di kon na  ini a ten fu Noa. Wan tu sani ben musu du fosi a Frudu kon. Wan bigi ark ben musu bow, èn den meti ben musu go na ini na ark. Genesis no e taki dati Yehovah wakti teleki na ark bow, fosi a bosroiti o ten a ben o tyari a Frudu. Yehovah ben kan poti wan dei o ten a Frudu ben o kon, sondro fu broko en ede efu na ark ben o kaba na a ten dati. Fu taki en leti, langa ten bifo Yehovah taigi Noa fu bow na ark, a ben bosroiti kaba o ten a Frudu ben o kon. Fa wi du sabi dati?

5. San Yehovah meki bekènti soleki fa skrifi na Genesis 6:3, èn o ten a du dati?

⁵ Bijbel e fruteri wi taki Yehovah teki wan bosroiti èn a ben meki dati bekènti na hemel. Soleki fa Genesis 6:3 e sori, dan Yehovah taki: „Mi no o tan abi pasensi nanga sma fu ala ten, fu di den na libisma nomo. Dati meki den o libi ete wán hondro tutenti yari.” Dyaso Yehovah no taki o langa libisma ben o libi. Yehovah ben taki o ten a ben o tyari wan kaba kon na ala ogri na grontapu. * A Frudu kon na ini a yari 2370 Fosi Krestes. Dati wani taki dati Gado meki a bosroiti fu en bekènti na ini a yari 2490 Fosi Krestes. Na a ten dati Noa ben abi 480 yari (Gen. 7:6). Sowan 20 yari baka dati, na ini a yari 2470 Fosi Krestes, Noa bigin kisi den manpikin fu en (Gen. 5:32). Baka di den dri manpikin fu Noa gebore, sowan 100 yari ben de ete fosi a Frudu kon. Ma Yehovah no ben taigi Noa ete fu a spesrutu wroko di a ben o meki a du èn fa a wroko dati ben o meki libisma kisi frulusu. O langa Gado ben o wakti fosi a taigi Noa?

6. O ten Yehovah taigi Noa fu bow na ark?

⁶ Soleki fa a sori, dan Yehovah wakti furu yari langa fosi a taigi Noa san a ben o du. Fu san ede wi e taki dati? Bijbel e sori taki di Gado taigi Noa fu bow na ark, den manpikin fu Noa ben de bigisma kaba èn den ben trow kaba. Yehovah taigi Noa: „Mi e meki wan frubontu nanga yu. Yu musu go na ini na ark, yu, makandra nanga den manpikin fu yu, a wefi fu yu, nanga den wefi fu yu manpikin” (Gen. 6:9-18). Sobun, a kan taki di Noa kisi a wroko fu bow na ark, sowan 40 noso 50 yari ben libi ete fosi a Frudu kon.

7. (a) Fa Noa nanga en osofamiri sori taki den ben abi bribi? (b) O ten Gado taigi Noa krin o ten a Frudu ben o kon?

⁷ Di Noa nanga en osofamiri ben e meki na ark, dan a ben musu fu de so taki den ben e aksi densrefi fa Gado ben o tyari a Frudu kon èn o ten a ben o du dati. Ma aladi den no ben sabi ala den sani dati, toku dati no tapu den fu bow na ark. Bijbel e taki: „Noa du ala san Gado taigi en fu du. A du leti so” (Gen. 6:22). Te fu kaba Yehovah taigi Noa taki a Frudu ben o kon baka seibi dei. Sobun, Noa nanga en osofamiri ben abi nofo ten fu tyari den meti kon na ini na ark. Fu dati ede, di alen bigin fadon „na ini a yari di Noa tapu siksi hondro yari, na a di fu tinaseibi dei fu a di fu tu mun”, ala sani ben sreka kaba.​—Gen. 7:1-5, 11.

8. Fa a tori fu a Frudu e meki wi abi a frutrow taki Yehovah sabi o ten a musu frulusu en pipel?

⁸ A tori fu a Frudu e sori taki ala ten Yehovah sabi san na a yoisti ten èn a yoisti fasi fu frulusu en pipel. A kaba fu a grontapu disi e kon moro krosibei, ma wi kan de seiker taki Yehovah o du ala den sani di a abi na prakseri fu du na a „dei nanga a yuru” di a poti.​—Mat. 24:36; leisi Habakuk 2:3.

DEN KISI FRULUSU NA A REDI SE

9, 10. Fa Yehovah gebroiki en pipel fu seti wan trapu gi a legre fu Egepte?

⁹ A tori fu a Frudu leri wi taki Yehovah na  a sma di e bosroiti o ten sani musu pasa, so taki a wani fu en kon tru. A di fu tu tori di wi o luku o sori wi wan tra sani di kan meki wi abi a frutrow taki Yehovah o frulusu a pipel fu en: A sa gebroiki en bigi makti fu meki a wani fu en kon tru nomonomo. A no de fu taki dati Yehovah man frulusu a pipel fu en ala ten. Ma son leisi a e gi pasi taki a pipel fu en kon na ini wan muilek situwâsi, fu di a wani seti wan trapu gi den feanti fu en. Na dati a du di a frulusu den Israelsma di ben de na ini katibo na Egepte.

¹⁰ Sowan dri milyun Israelsma gowe libi Egepte. A fasi fa Yehovah meki Moses tyari den Israelsma, ben meki Farao denki taki den ben bruya èn taki den ben lasi. (Leisi Exodus 14:1-4.) Di Farao si disi, en nanga a legre fu en go na baka den Israelsma èn den tapu den na a Redi Se. A ben gersi leki den Israelsma no ben abi nowan presi fu go (Eks. 14:5-10). Ma fu taki en leti, nowan ogri ben o miti den Israelsma. Fu san ede? Fu di Yehovah ben de srekasreka kaba fu frulusu den.

11, 12. (a) Fa Yehovah yepi den Israelsma? (b) San ben de a bakapisi fu a sani di Yehovah du, èn san a tori disi e leri wi fu Yehovah?

¹¹ Wan „wolku di gersi wan pilari” ben sori den Israelsma pe den ben musu waka. A wolku disi komopo fu fesisei go na bakasei fu tapu pasi gi a legre fu Farao èn a dungru a presi pe a legre fu Farao ben de. Ma na a sei fu den Israelsma a no ben dungru, èn na neti a wolku ben e skèin leti gi den. (Leisi Exodus 14:19, 20.) Baka dati, Yehovah meki wan tranga winti fu owstusei wai fu prati a se na tu èn „a gron ben kon drei”. A sani disi teki ten, fu di Bijbel e taki: „Te fu kaba, den Israelsma waka na ini a se na tapu drei gron.” Den Israelsma no ben man waka so esi leki a legre fu Egepte nanga den fetiwagi fu den. Toku den Egeptesma no ben o man doro den Israelsma noiti, fu di Yehovah ben e feti gi a pipel fu en. „A tyari bruya  kon na ini a legre fu den Egeptesma. A ben e puru den wiel na den asiwagi fu den, so taki den wagi ben muilek fu rèi.”​—Ex. 14:21-25.

¹² Di den Israelsma doro bun na abrasei, Yehovah taigi Moses: „Langa yu anu go na a se, so taki a watra kan kon na tapu den Egeptesma, den fetiwagi nanga den fetiman fu den.” Di den srudati pruberi fu lon gi a watra di ben e kon na den tapu, „Yehovah trowe den go na mindri fu a se”. Den no ben man lowe go na nowan sei. „Nowan fu den ben tan na libi” (Ex. 14:26-28). Na so Yehovah sori taki a abi a makti fu frulusu en pipel awinsi na ini sortu situwâsi den de.

DEN KISI FRULUSU DI YERUSALEM KISI PORI

13. Sortu rai Yesus gi den bakaman fu en, èn san den ben e aksi densrefi kande?

¹³ A di fu dri tori di wi o luku, abi fu du nanga a ten di a legre fu Rome kon feti nanga Yerusalem na ini a fosi yarihondro. A tori disi e sori taki Yehovah sabi soifri fa sani o waka, so taki den sani di a abi na prakseri kon tru. Fosi Yerusalem kisi pori na ini a yari 70, Yehovah meki Yesus taigi den Kresten di ben e libi na ini Yerusalem nanga Yudea, san den ben musu du fu tan na libi. Yesus taki: „Te unu e si taki a tegu sani di e tyari pori kon, a wan di a profeiti Danièl ben taki fu en, e tanapu na wan santa presi, . . . dan meki den sma di de na Yudea, bigin lowe go na den bergi” (Mat. 24:15, 16). Ma fa den bakaman fu Yesus ben o sabi o ten a profeititori disi ben o kon tru?

14. Sortu sani pasa di meki den Kresten frustan san Yesus ben taki?

¹⁴ Furu yari baka di Yesus taki a profeititori fu en, a kon na krin san a ben wani taki. Na ini a yari 66, Cestius Gallus nanga a legre fu en kon na Yerusalem fu strafu den Dyu di ben e opo densrefi teige a tirimakti fu Rome. Di den Dyu disi go kibri na ini a tempel, den srudati fu Rome bigin broko a skotu fu a tempel. Den Kresten di ben memre den wortu fu Yesus, ben sabi san disi ben wani taki. A legre fu Rome doro te na a skotu fu a tempel fu Yerusalem nanga den fraga fu den falsi gado fu den. Di den Kresten si dati, den frustan taki dati ben de a „tegu sani” di ben e tanapu „na wan santa presi”. A ten ben doro gi den bakaman fu Yesus fu „bigin lowe go na den bergi”. Ma feanti ben lontu a heri foto. Sobun, fa den ben o komoto na ini a foto? Wan sani ben pasa di den no ben fruwakti.

15, 16. (a) Sortu krin rai Yesus gi den bakaman fu en, èn fu san ede a ben prenspari srefisrefi fu du san a taki? (b) San wi o abi fu du fu kisi frulusu?

¹⁵ Nowan sma sabi fu san ede, ma Cestius Gallus nanga a legre fu en bigin hari  gowe fu Yerusalem. Den Dyu lon go na den baka. Now di a legre fu Rome èn den Dyu gowe libi a foto, den bakaman fu Yesus kisi na okasi fu lowe. Yesus ben taigi den krin taki den ben musu komoto na ini a foto wantewante èn den no ben musu go teki den gudu fu den. (Leisi Mateyus 24:17, 18.) A ben prenspari srefisrefi fu du san Yesus taki èn fu gowe wantewante. Fu san ede? Baka wan tu dei nomo, den Dyu di ben lon baka den Romesma drai kon baka èn den bigin dwengi den sma fu Yerusalem nanga Yudea fu kon feti makandra nanga den. Difrenti grupu Dyu bigin feti nanga makandra fu di den ben wani tiri a foto èn fosi yu denki, a situwâsi na ini a foto kon moro ogri. A ben kon moro muilek fu lowe komoto na ini Yerusalem. Di den Romesma drai kon baka na ini a yari 70, nowan sma ben man komoto na ini Yerusalem moro (Luk. 19:43). A ben lati gi iniwan sma di ben tan na baka na ini a foto! Ma den Kresten di du san Yesus taki èn di lowe go na den bergi, kisi frulusu. Den si nanga den eigi ai taki Yehovah sabi fa fu frulusu a pipel fu en. San wi kan leri fu a tori disi?

¹⁶ Na a ten fu a bigi banawtu, Kresten o abi fu gi yesi na rai di skrifi na ini Gado Wortu èn na rai fu na organisâsi. Fu eksempre, Yesus taigi den bakaman fu en fu „bigin lowe go na den bergi”. Na a pisi ten fu a bigi banawtu, wi srefi o kisi rai fu „bigin lowe”. Na sortu fasi wi o abi fu lowe? Dati wi no sabi ete. * Ma wi kan de seiker taki na a yoisti ten, Yehovah o taigi wi krin san wi musu du. Wi o kisi frulusu soso te wi e gi yesi na den rai di wi o kisi na a ten dati. Dati meki wi musu aksi wisrefi: ’Mi e gi yesi na den rai di Yehovah e gi en pipel now? Mi e gi yesi wantewante, noso mi e draidrai fu gi yesi?’​—Yak. 3:17.

WI KISI DEKI-ATI GI A TEN DI DE NA WI FESI

17. San wi e leri fu a profeititori fu Habakuk di e sori fa Gok o kon feti nanga a pipel fu Gado?

¹⁷ Na a bigin fu na artikel disi wi taki fu Gok di o kon feti nanga a pipel fu Gado. Meki wi luku a tori disi baka. A profeiti Habakuk ben taki fu a ten dati tu. A taki: „Di mi yere ala den sani disi, mi bere bigin trubu. Di mi yere a boskopu, mi mofobuba bigin beifi. Mi bonyo bigin pori gowe. Ne mi bruya, fu di mi ben e frede. Ma toku mi o tan pî, aladi mi e wakti a dei fu banawtu. A dei dati o kon leki wan man di kon fu feti nanga a pipel” (Hab. 3:16). Di Habakuk yere taki feanti ben o kon feti nanga a pipel fu Gado, en bere bigin trubu, en mofo ben e beifi, èn a ben kon swaki. Ma a profeiti ben de klariklari fu ’tan pî aladi a ben e wakti’ a bigi dei fu Yehovah. Te Gok nanga en legre e kon feti nanga wi, dan a kan taki wi e frede tu. Ma neleki Habakuk wi kan abi a frutrow taki Yehovah o frulusu a pipel fu en.​—Hab. 3:18, 19.

18. (a) Fu san ede wi no abi fu frede te den feanti fu wi o kon feti nanga wi? (b) San wi o luku na ini a tra artikel?

¹⁸ Den dri tori di wi taki fu den e sori krin taki Yehovah sabi fa fu frulusu a pipel fu en. Noti no kan tapu en fu du san a abi na prakseri. Wi kan de seiker taki a o wini den feanti fu en. Ma efu wi wani de drape te Yehovah o wini den feanti fu en, dan wi musu tan dini en te na a kaba. Fa Yehovah e yepi wi nownow kaba fu tan dini en? Wi o luku disi na ini a tra artikel.

[Futuwortu]

[Aksi fu a tori disi]

[Prenki na tapu bladzijde 24]

Fu san ede den Egeptesma no ben o man du nowan ogri nanga den Israelsma?