1. Sortu moi howpu a „bigi ipi” abi?

PRAKSERI fa a ben o de efu wi ben o abi wan tiriman di abi furu makti, di abi lobi, èn di e du ala ten san reti. Prakseri o furu bun so wan tiriman nanga a tirimakti fu en ben o man du efu a ben o tiri wán dusun yari. Na a moi howpu dati a „bigi ipi” abi. Na den o pasa „a bigi banawtu” di o tyari wan kaba kon na a ogri grontapu disi.​—Openb. 7:9, 14.

2. San libisma ondrofeni na ini den 6000 yari di pasa?

² Na ini den 6000 yari di pasa, libisma pruberi fu tiri densrefi. Disi tyari furu sari nanga pina kon gi a heri libisma famiri. Langa ten pasa, Bijbel ben taki kaba: „Sensi di libisma bigin tiri tra libisma, sani no waka bun gi den” (Preik. 8:9). San wi e si na ini a ten disi? Wi e si feti, sma e opo densrefi teige tirimakti, furu sma pôti, siki lai, sma e pori grontapu, a weer e kenki, nanga someni tra problema. Den tiriman taki dati sani o kon moro ogri efu wi no tyari bigi kenki kon èn efu wi no tapu fu pori grontapu.

3. Sortu sani o pasa te Yesus nanga den 144.000 tra kownu o tiri wán dusun yari?

³ Te a Mesias Kownu Yesus Krestes o tiri makandra nanga den 144.000 tra kownu, dan safrisafri Gado Kownukondre o meki ala sani kon bun baka gi libisma nanga grontapu. Na ini den dusun yari di den o tiri, a moi pramisi disi fu Yehovah Gado o kon tru: „Mi o meki nyun hemel nanga wan nyun grontapu. Sma no o memre den fositen sani moro èn den sani dati no o abi krakti na den tapu moro” (Yes. 65:17). Sortu moi sani o pasa na ini a ten di e  kon? Den profeititori na ini Gado Wortu o yepi wi fu frustan sortu moi sani o pasa na ini a ten di e kon, aladi wi „no e si” den ete.​—2 Kor. 4:18.

4. Fa furu sma e libi na ini a ten disi?

⁴ Suma no ben o wani en eigi oso pe en nanga en osofamiri ben o man libi switi sondro broko-ede? Na ini a grontapu disi furu sma no man feni wan bun oso. Nofo tron ipi-ipi sma e tan na ini wan foto aladi tanpresi no de. Nofo tron moro leki wán osofamiri musu tan na ini wan pikin oso. Furu fu den sma disi e dren fu abi den eigi oso.

5, 6. (a) Fa Yesaya 65:21 nanga Mika 4:4 o kon tru? (b) Fa wi kan kisi den blesi dati?

⁵ Te a Kownukondre o tiri grontapu, ala sma o abi den eigi oso, fu di a profeiti Yesaya ben taki: „Den o bow oso èn den srefi o tan na ini. Den o prani droifidyari èn den srefi o nyan fu en” (Yes. 65:21). Ma fu abi wan oso a no ala, bika na ini a ten disi son sma abi den eigi oso èn trawan abi bun bigi oso srefi. Toku den e frede son leisi taki moni problema kan meki taki den lasi den oso. Noso den e frede taki fufuruman o broko kon na ini den oso. Ma sani o de tra fasi te a Kownukondre o tiri grontapu! A profeiti Mika skrifi: „Ibriwan sma o sidon na ondro en eigi droifibon nanga en eigi figabon. Nowan sma o meki den frede.”​—Mika 4:4.

⁶ San wi musu du efu wi wani kisi den blesi disi di Gado Kownukondre o tyari kon? A no de fu taki dati wi alamala abi wan tanpresi fanowdu. Ma wi no musu poti wisrefi na ini bigi paiman, soso fu di wi wani abi wan kefalek moi oso na ini a ten disi. A moro bun fu libi na wan fasi di e sori taki wi e bribi trutru taki Yehovah o du san a pramisi. Memre san Yesus ben taki fu ensrefi: „Krabudagu abi olo pe den e tan èn den fowru di e frei na loktu abi nesi, ma a Manpikin fu libisma no abi nowan presi fu sribi” (Luk. 9:58). Yesus ben kan bow noso bai a moro bun oso di iniwan sma ben kan abi. Ma fu san ede a no du dati? A de krin taki Yesus no ben wani nowan sani tapu en fu poti a Kownukondre na a fosi presi na ini en libi. Meki wi teki na eksempre fu en. No meki gudu tron a moro prenspari sani na ini yu libi èn no meki dati gi yu broko-ede.​—Mat. 6:33, 34.

7. Fa libisma nanga meti ben o libi nanga makandra, soleki fa Yehovah ben taki?

⁷ Di Yehovah bigin meki sani na grontapu, a meki libisma leki lasti. Yehovah taigi en Manpikin di ben de a Tumusi Bun Wrokoman fu san ede a meki libisma. A taki: „Meki wi meki libisma fu gersi wi èn fu de leki wi. Meki den basi den fisi na ini se, den meti di e frei na loktu, nanga den osometi. Meki den basi ala sani na grontapu nanga ibri meti di e kroipi na gron” (Gen. 1:26). Gado ben taigi Adam nanga Eva taki den ben musu basi den meti èn taki den ben musu sorgu den. Te fu kaba ala libisma ben o du disi.

8. Fa furu meti e tyari densrefi nofo tron?

⁸ Yu denki taki libisma man basi ala meti èn taki den man libi nanga makandra sondro fu du makandra ogri? Furu sma di abi osometi soleki dagu nanga  pusipusi lobi den meti fu den. Ma fa a de nanga busimeti? Wi sabi taki son leisi meti e frede libisma èn den kan du ogri nanga libisma srefi. Ma sabiman di libi krosibei fu busimeti èn di ondrosuku den, kon si taki den meti disi abi firi tu. Den kan prisiri èn den kan sori lobi. Sabiman taki srefi dati te den meti disi abi pikin, den e sori taki den lobi den trutru èn den e sorgu den bun.

9. Fa meti o tyari densrefi na ini a ten di e kon?

⁹ Sobun, wi no musu fruwondru te wi e leisi na ini Bijbel taki libisma nanga meti no o du makandra ogri. (Leisi Yesaya 11:6-9; 65:25.) Fu san ede wi no musu fruwondru? Memre taki di Noa nanga en osofamiri komoto na ini na ark baka a Frudu, Yehovah taigi den: ’Ibri meti di e waka na grontapu o tan frede unu trutru.’ Now, furu meti e lon gowe gi libisma fu di den e frede taki libisma o du den ogri (Gen. 9:2, 3). Yu no denki taki Yehovah ben o man puru a frede disi so taki libisma nanga meti kan libi nanga makandra soleki fa a ben wani sensi a bigin? (Hos. 2:18) Dati o de wan switi ten gi ibri sma di o libi na grontapu na a ten dati!

10. Fu san ede libisma e krei nofo tron?

¹⁰ Di Salomo si „ala den ogri di sma ben e du fu pina trawan na grontapu”, a taki nanga bigi sari: „Mi si den watra-ai fu den wan di trawan ben e pina, ma nowan sma ben de fu trowstu den” (Preik. 4:1). Na so sani de na ini a ten disi èn kande a moro ogri srefi. Suma fu wi no krei wan leisi? A tru taki son leisi sma e krei fu prisiri. Ma nofo tron sma e krei fu di den e sari srefisrefi.

11. Sortu Bijbel tori e naki yu ati?

¹¹ Prakseri den someni Bijbel tori fu sma di ben e krei. Di Sara dede di a ben abi 127 yari, „Abraham bigin row èn krei fu Sara ede” (Gen. 23:1, 2). Di Naomi taigi den wefi fu den tu manpikin fu en adyosi, den tu uma disi „bari krei”. Baka wan pisi ten „den bari krei baka” (Rut 1:9, 14). Di Kownu Heskia ben kon siki so te, taki a ben o dede, a begi Gado èn a „bari krei”. Di Yehovah si dati, a meki en kon betre (2 Kow. 20:1-5). Te wi e leisi a tori pe na apostel Petrus taki dati a no sabi Yesus, dan dati e naki wi ati trutru, a no so? Di Petrus yere a kakafowru bari, „a go na dorosei èn a krei nanga bigi sari”.​—Mat. 26:75.

12. Fa a Kownukondre o yepi libisma?

¹² Fu di someni sari sani e miti libisma, meki den abi trowstu nanga yepi fanowdu. Na dati den o kisi te Krestes o tiri wán dusun yari: „[Gado] o figi ala watra puru na den ai èn dede no o de moro. Nowan sari, noso krei, noso pen no o de moro” (Openb. 21:4). A moi srefisrefi fu sabi taki row, krei, nanga pen no sa de moro. Ma Gado pramisi fu du moro srefi. A o puru dede di de a moro bigi feanti fu libisma. Fa a o du dati?

13. Sortu krakti dede abi tapu libisma sensi di Adam sondu?

¹³ Sensi di Adam sondu, dede tiri libisma leki kownu. Dede na wan feanti di nowan libisma wini. Nowan sondu libisma man lowe gi dede èn a tyari furu sari kon gi den (Rom. 5:12, 14). Fu taki en leti, fu di sma e „frede dede”, meki  milyunmilyun fu den „de na ini katibo den heri libi langa”.​—Hebr. 2:15.

14. San o pasa te dede no o de moro?

¹⁴ Bijbel e taki fu a ten te ’dede o de a lasti feanti di Gado o puru na pasi’ (1 Kor. 15:26). Tu grupu sma o kisi wini fu dati. A „bigi ipi” di e libi now o man pasa a kaba libilibi èn den o man libi fu têgo na ini a nyun grontapu. Den milyardmilyard sma di dede kaba o man kisi wan opobaka. Prakseri omeni prisiri o de te den sma di de na libi o miti den wan di kisi wan opobaka. Efu wi leisi den Bijbel tori fu sma di kisi wan opobaka, dan wi kan frustan pikinso fa a o de na ini a ten di e kon.​—Leisi Markus 5:38-42; Lukas 7:11-17.

15. Fa yu o firi te yu si fa den lobiwan fu yu di dede kisi wan opobaka?

¹⁵ Prakseri den wortu „den bigin prisiri srefisrefi” èn „den bigin gi Gado glori”. Efu yu ben de drape, dan kande yu ben o firi a srefi fasi. Iya, te wi o si fa den lobiwan fu wi kisi wan opobaka, dan dati o meki wi prisiri srefisrefi. Yesus taki: „A yuru o kon te ala den sma di de na ini den grebi o yere en sten èn den o komopo drape” (Yoh. 5:28, 29). Iya, na opobaka na wan fu den moro bigi sani di o pasa, aladi nowan fu wi si dati.

16. (a) Fu san ede wi musu taki nanga prisiri fu den blesi di wi o kisi na ini a ten di e kon? (b) San Paulus taki fu gi den Kresten na ini Korente deki-ati?

¹⁶ Den sma di e tai hori na Yehovah na ini den muilek ten disi o kisi kefalek moi blesi na ini a ten di e kon! Aladi den bigi blesi dati no kon ete, toku wi musu tan prakseri den, fu di dati o yepi  wi fu poti den moro prenspari sani na a fosi presi na ini wi libi. Disi o yepi wi tu fu no meki den sani fu a grontapu disi puru wi prakseri na a diniwroko fu Yehovah (Luk. 21:34; 1 Tim. 6:17-19). Meki wi taki nanga prisiri fu a moi howpu di wi abi. Wi kan du disi te wi e hori na Osofamiri Anbegi, te wi e taki nanga wi Kresten brada nanga sisa, te wi e taki nanga den Bijbelstudie fu wi èn te wi e taki nanga den sma di wani sabi moro fu Bijbel. Na so a howpu fu wi o de wan trutru sani gi wi ala ten. Na dati na apostel Paulus du di a ben e gi en Kresten brada nanga sisa deki-ati. Den sani di a taki yepi den fu prakseri den sani di o pasa na a kaba fu den dusun yari te Krestes o tiri. Prakseri fa sani o de aladi yu e leisi den wortu fu Paulus na 1 Korentesma 15:24, 25, 28.​—Leisi en.

17, 18. (a) Na sortu fasi Yehovah ben de „ala sani gi ala sma” na a bigin? (b) San Yesus o du fu tyari freide nanga wánfasi baka na hemel nanga grontapu?

¹⁷ Den wortu „Gado kan de ala sani gi ala sma” e sori krin fa sani o de na a kaba fu den dusun yari. San den wortu dati wani taki? Prakseri fa sani ben de na ini Eden di Adam nanga Eva ben de na ini a famiri fu Yehovah ete. Na a ten dati na soso Yehovah, a Moro Hei Tiriman, ben e tiri ala den libisani na hemel nanga grontapu. Den ben man taki langalanga nanga en, den ben e anbegi en, èn a ben e blesi den. Gado ben de „ala sani gi ala sma”.

¹⁸ A situwâsi disi kenki di Satan kori libisma fu opo densrefi teige Yehovah. Ma sensi 1914 a Mesias Kownukondre bigin du sani so taki te fu kaba freide nanga wánfasi o de na hemel nanga grontapu (Ef. 1:9, 10). Te Krestes o tiri dusun yari, furu moi sani di wi „no e si” ete, o pasa. Dan den dusun yari o kon na wan „kaba”. San o pasa baka dati? Aladi Yesus kisi „ala makti na ini hemel èn na grontapu”, toku a no wani teki a posisi fu Yehovah. Fu di a abi sakafasi, meki „a o gi a Kownukondre abra na en Gado èn Tata”. A o gebroiki a spesrutu posisi nanga makti fu en fu meki ’Gado kisi glori’.​—Mat. 28:18; Fil. 2:9-11.

19, 20. (a) Fa ala sma na ondro a tiri fu a Kownukondre o man sori taki den wani Yehovah leki tiriman? (b) Sortu moi sani wi kan fruwakti na ini a ten di e kon?

¹⁹ Na a ten dati te a Kownukondre o tiri, nowan sma na grontapu o abi sondu. Den o abi sakafasi neleki Yesus èn den o saka densrefi ondro a tiri fu Yehovah. Den sma disi o kisi wan lasti tesi fu sori efu den wani Yehovah leki tiriman (Openb. 20:7-10). Baka dati, ala den engel nanga libisma di no wani saka densrefi ondro a tiri fu Yehovah, o kisi pori fu têgo. Dati o de wan switi ten! A heri famiri fu Yehovah na hemel nanga grontapu o prèise en. Yehovah o de „ala sani gi ala sma”.​—Leisi Psalm 99:1-3.

²⁰ Now di yu sabi san a Kownukondre o du heri esi, yu kisi deki-ati fu poti ala prakseri na san Yehovah wani? Yu o du ala muiti fu du a wani fu en? A grontapu fu Satan e pramisi furu moi sani, ma den no o kon tru. Yu e sorgu taki den sani disi no puru yu fu a dini di yu e dini Yehovah? Yu kisi moro deki-ati now fu tan horibaka gi Yehovah di abi a reti fu tiri hemel nanga grontapu? Meki a de so taki den sani di yu e du sori taki yu wani du disi now èn fu têgo. Te yu e tyari yusrefi na so wan fasi, dan yu o man abi freide nanga wan bun libi dusun yari langa èn fu têgo srefi!